1 - 2 Ọij nash jäm'si' p̂eyacdye' p̂eijte mu' Jesucristo Jen'tyi' Ạva' mu'. Tashche' ra' yụ p̂eijte mu' Juan yoj yi'dyem' mọ' sánacdye' Isaíassi', jaso'mitity p̂eyacdye' Jen' jiquej u. Yi' sánacdye': Yụ ra' jutete jutactyi' yụ, mu' ra' tashi paj qui jä'miij jäm' yu'tyiyin mídyes majmi. 3 Mu' ra' fer p̂eyaqui cäjyasĉan jac, yi ra' mu': “Jäm' yụ'tyevac majmi Ayodyes, chụi'jeyac chime'”, yi' sánacdye'. 4 Juan chojtacsity atsij, me'qui' jị'cätse' ọij sánacdye', mọ'dyes qui mu' cäjyasĉan jac chojtacsi judyeya' voro'tacsi. Jéyacsi: “Jä'mij dyijyevac juchajche' mi'in, ji'chojtiĉam' paj qui mu' Jen' vayacjityinac juchaj mi'in.”. 5 Jerusalénĉan bä'yity in judyeya' mu'ĉantyi'dye pai' Judeaĉan bä'yity in, räj mu'in ĉọcte in se'vecbite p̂eyacdye' Juansi' in. Mu'in p̂eye' juchaj ĉụi'si' mu'in chat qui mu' Juan chojtacsi cojiro Jordánĉan. 6 Juantyi' quị'si' p̂anacsi' fin cameyos, ñutu'tacdye' nam' sho'pa'. Säcsedye' shọ́com' judyeya' därä'ĉantyi' coroma. 7 Voro'tacdye'yam' jéyacsi muntyi' in: —Jäqui've ra' atsij yoctyi' jutactyi' Jen'tyi' mu', mu' muju'cha' ferdye'tumtyi', jam jeñej yụ, uya'yaty nash yụ mijam tupuj chacjepte yụ yujches co'sis mu', me' ĉúti yụ. 8 Yụ chojtyeyac ojñi'ĉan, mu' ra' Jen'si' Ạ'edye' yu'tyiyinac mi'in. 9 Aty me'si' mu' Jesús yạjquiban' mọ' Nazaret, Galileaĉansi' bä'yedye', chat qui ĉọcte mu' Juan. Mu' qui Juan jachojti cojiro Jordánĉan. 10 Aty chanam'che' bu'banya', mu' Jesús cạve' vanacyi' mạyedye'che', judyeya' chại' Jen'si' Ạ'edye' mu' mu'che' tŝọi', je'ñes ọ'to' jo'mei' ji'caviti'. 11 Mạ'i' vatyquej mạyedye'ches p̂eyacdye' yi': —Mi nash mạ'jeyacdyety Ạva' yụ, anic ma'jotyeye yụ. 12 Chat qui Jen'si' Ạ'edye' mu' cäjyasĉan jac jácati mu' Jesús, 13 yóĉandyem' bä'yi' vajedyedye' o in. Vạjpedye' qui'tac mạyedye' me'qui' mu'ĉan me' bu'yi, jị'ĉojtac Satanásya', mạ'je' tsan' ji'pente a'c̣hisya' dyijyedye'. Atsij anjer in nọ́tyete in. 14 Aty me'si' ĉär'te in mu' Juan, chat qui mu' Jesús mu've jịjcaij Galileave voro'tacsequi jäm'si' p̂eyacdye' Jen'si' mu'. 15 Yi mu': —Aty ayij tupudye', atyu' u c̣hẹi'ya' ayo'bu'yi ra' Jen'. Dyijyevac juchajche' mi'in, anicjebimac jäm'si' p̂eyacdye' mu'. 16 Sinve tsique' Galilea mu've tyeij mu' Jesús. Cạvacsi pärä' tạbity muntyi' in, Simón judyeya' Andrés vojity mu', jeve'dacva'joij in tsique'ĉan sạji'ya' in. 17 Jesús jéyacsi: —Cäc̣hä'chutiĉam' yụ. Mi'in tạbity q̂uin', tạbacsity ra' muntyi' yụ'tyeyac. 18 Yiristum farajjeyaqui sạji' mu'in, chat qui cäc̣hä'chute in mu' Jesús. 19 Dam' mọmo' jịjcaij mu' Jesús, rébete yoctyi' muntyi', Santiago tịj mu' vojitytumdye, Juantum, mu'in Zebedeoty ạva' mu'. Covambache' mu'in re'bacva'joban sạji' mu'in. 20 Jesús fayacsi, tacche'dye covambache' farajjeyactaqui jen' mu'in carijtaquitytum mu', chat qui jịjcate in mu' Jesús. 21 Aty me'si' Capernaumĉan venjoij in. Jị'jutyitidyes mạyedye' mu' Jesús ĉọcsecbi vajmu'yadye' judíos mu'in, mu'ĉan tiyacchui' jị'chiyacsi muntyi' in. 22 Anic äjjepte in mọ' ji'chäyitidye' mu', ĉaĉaij na ĉụi'si'ya' ferdye' mu' jị'chiyacsi, jam jeñej mu'in jị'chiyacsity yụ'tacdye' Jen'si' in. 23 Chime'dye mu'ya' yirity sọyo'tumtyi' muntyi' vajmu'ya-dye'ĉan mu'in. Äjyedye'tum p̂eyaqui jéte Jesús: 24 —¿Jedyetuij buty atsij tsunya' mi Jesús Nazaretĉantyi'? ¿Mạ'je' buty jị'motstiĉa' tsun mi'in? Yụ nash chị́yeye, mi nash Anictyity Jutactyi' Jen'tyi' mu'. 25 Jesús dyäcjeĉuñe' mọ' sọyo' je': —C̣hu'c̣huva mi, meijyebada ọ́ĉan muntyi'ĉansi'. 26 Mọ'dye sọyo' ji'ñe'ete mu' muntyi', fer äj ja'yete chat qui meijyeban' muntyi'ĉansi'. 27 Räj-dye mu'in irijyi in, jítidyeij in: —¿Jun' buty me'? Anic mụi'sis ọij ji'chäyitidye' mu'. Anic ferdye'tum jị'chiyacsi. Paj tsan' sọyo' in jéyacsi uts, játaty chiquepte p̂eyacdye' in —yi in. 28 Itŝi' jaijve chịj in pai' bä'yity in mọ'ĉansi' jac Galilea räj muntyi' chị́qui in jun' chuc yi mu' Jesús. 29 Shuban vajmu'yadye'ĉan in. Jesús Santiagotum judyeya' Juan, mu'ĉan jịjcaij in site' in mọ' aca' pärä'sis a', Simónsi' judyeya' Andréssi'. 30 Mọ'ĉan jubijĉan Simónsi' quis mu', japacjova'joi' jänjänyeva'joi'. Mọ'dyes qui jéte in mu' Jesús. 31 Mu' qui ĉọ́que' tapjebi' un mọ' judyeya' vañinje'. Me'ĉandye jiyi' jänjändye' mọ' tiyacchubun' úñeban' mọ' mọ'dye ji'säcsacseban'. 32 Aty siti tsun, mu'in muntyi' in tuyete in mu' Jesús räj are'reijtyi' muntyi' in judyeya' sọyo'tumtyi' in. 33 Atsij räj bä'yedye'ĉantyi' muntyi' in, sät tŝọij acasya' chụi'dye' in. 34 Jesús ji'chäcacseban dai' muntyi' in, jedye' jedye' chuc are'redye' mu'in judyeya' chime' meijjetyetacseban muntyi' sọyo' in. Mu' dyäcjeĉúnacsi sọyo' in paj qui jam p̂eyaqui' in ĉaĉaij na mọ'in chị́yete in Jen'tyi' ạva' mu'. 35 Nojno mạyedye' taca' tojmai', sacti mu' Jesús shupqui bä'yedye'ĉantyi', cäjya' jịjcaij cọdajquiqui Jen'che' mu'. 36 Jäqui've mu' Simón pen'dye'-tum mu' sacti in queviĉajte in mu' Jesús. 37 Cha'shete in jéte in: —Räj nash muntyi' quivin q̂uin' in. 38 Jesús vorjeyacsi: —Me' tsan' me' jemoñe' qui nam' yocsi've jịjcaja' bä'yedye' tsun c̣hẹi'ya'munsi' in, mọ'in ra' ĉọcseĉa' tsun, mu'ĉan ra' voro'tacsequi yụ, ĉaĉaij na me'dyes atsij úche' yụ. 39 Anicdye me', yocve jịjcaij mu' Jesús, räj socor'je' Galilea-ĉansi' bä'yedye', voro'tacsequi vajmu'yadye'ĉan judíos mu'in jéyacsi Jen'si' p̂eyacdye' mu'. Chime'dye mu' meijjetyetacseban sọyo' in mu'in sọyo'tumtyi' in. 40 Atsij yirity japacjoijtyi' muntyi', räj bayi'yitaquity a' mu', ĉọcte mu' Jesús dyụtsyi mu'ya' jéte: —Mạ'je' jụijya' mi tupuj meijjityityibun' mi ọij japacjodye' yụ. 41 Jesús ñịbe' ĉọ́te mu' muntyi' mọ'dyes qui toco'jete unya' mu' judyeya' jéte: —Me' nash mạ'je' yụ, chäĉäda mi. 42 Me'ĉandye jäm'joban' mọ' bayi'yidyem'. 43 Chat qui mu' Jesús jutebajte, ferche' jajiti: 44 —Jam ra' jị'chiqueyacsi yoctyi' in. Tạij mu'ya' ji'cavicda mi cudyitityya' Jen'che', yụ'taqui ram cu'dye' mi, yóyidyem' Moisés u. Mọ' ra' jị'ĉocdyes muntyidyes in aty jäm'jotaĉan mi bayi'yidye' jiquej mi —jajiti Jesús. 45 Mu' na jam yi, pai' mu' jéyacsi muntyi' in jun' chuc mu' Jesús jaji'chäĉun. Mọ'dyes qui sacyi muntyi' in, mu' na Jesús aty mu' jam tupuj ĉúti siti bä'yedye'ĉan muntyisya' vej mu'in, cäjya' mọmo' bä'yi tacya'. Pai' bä'yity in ĉọcte in mu' Jesús.
