Luke 9

1Jesús fayacsi jị'chiyactyi' mu', yiri'tac pärä' jiyi mu'in in. So'macsi ferdye' mu' judyeya' chime' yụ'tacsi paj qui meijjetyetacseban sọyo' in judyeya' ji'chäcacseban muntyi' in. 2Chat qui jutacsi paj qui voro'tacsi muntyi' in mọ' p̂eyacdye' p̂eye' ayo'bu'yidyes Jen'si' mu', judyeya' paj qui chime' mu'in ji'chäcacseban japacjoijtyi' muntyi' in. 3Chime'dye mu' jéyacsi: —Jam ra' cạqui majmi-yadyes jedye' mi'in, mijam ra' mutyudye' cạqui mi'in mijam ra' víquis chime' cạqui mi'in, mijam ra' chime' víte cạqui mi'in, mijam ra' querec̣ha, mijam ra' nabac bu'yi camisa cạqui mi'in, jam ra' me' bu'yi sacti mi'in. 4Jụ'ñity chuc jụjjinactyi' aca'tumtyi' in, mu'ĉan ra' dyäqui mi'in jun' qui' chuc shọijtiñe' mi'in mọ' bä'yedye'. 5Vatyquej jam jana' ji'dyäquinac jụijya' in, jam ra' me' bu'yi mu'ĉan mi'in, cavin ra' yạjquicseban mi'in chischisjeyactaqui ra' jac yujches mi'in, me' ra' jị'ĉoyacsi mi'in jun' chuc ra' va'tacdye' so'mac in —jéyacsi Jesús. 6Chat qui mu'in jị'chiyactyi' mu' sacti in, räj socor'jeyacsi in bä'yedye' in, pai' voro'tacsi in Jen'si' p̂eyacdye' mu' judyeya' ji'chäcacseban japacjoijtyi' muntyi' in. 7Chime'dye mu' Herodes,85 Galileaĉantyi' ayo', se'vaqui jun' chuc mu' Jesús jị'caveyacsi ferdye' muntyi' in. Mu' Herodes dyijyeban ĉaĉaij na pạrej muntyi' yi in: “Uts Jesús q̂uin' Juanvun jiquej, a nash vañinyeban.” 8Pạrej na yi in: “Uts Jesús q̂uin' mu' nash Elíasvun jiquej, aty q̂uin' ji'cavibun.” Chime'dye pạrej yi in: “Uts Jesús q̂uin' mu' nash urucyaty jaso'mitity p̂eyacdye' Jen' jiquej, q̂uin' aty vañinyeban,” me' me' yi p̂eijte muntyi' in. 9Mu' na Herodes yi: —Yụ jutacsi jiquej paj qui tätsepte jo'no' in Juansi' mu'. ¿Tyi ra' ĉaĉaij q̂uin' uts muntyi' anic ferdye'tumtyi' mọ' se'vacsebis p̂eyacdye' yụ? Mọ'dyes mu' Herodes fer tsan' mu' mạ'je' cạvete mu' Jesús. 10Jutactyi' Jesústyi' mu' ca'ñibun in Jesúsya' jijtuban in, räj jébajte in jun' chuc mi'i in. Jesús mu'in mọmo' cạcsi, mu've jịjcaij in Betsaida tịj mọ' bä'yedyes, jam yoctyi' cạcsi. 11Mu'in na yoctyi' in chị́qui in, cä'c̣häijdye mu'in jäqui' cäc̣hä'chute in. Jesús tiĉunacsi, voro'tacsi mọ' p̂eyacdye' p̂eye' ayo'bu'yidyes ra' Jen'si' mu', judyeya' ji'chäcacseban mu'in japacjoijtyi' in. 12Aty shocamyejoi' jị'chiyactyi' mu', yiri'tac pärä' jiyity atsij in, ĉọshte mu'in in, yi jéte in: —Jéyacseva uts muntyi' in paj qui yocvevej jịjcaij in, paj tsan' bä'yedye'ĉan in, judyeya' paj tsan' jorojya' in, paj qui mu'ĉan quevaqui in säcsedye' in judyeya' ĉọshdyes mu'in, cäjya' tyu' u úya' tsun —jéte in. 13Vorjeyacsi Jesús: —Mi'indye ra' ji'säcsacsi uts muntyi' in. Vorjete mu'in in: —Itŝi' to' o säcsedye' tsunsi', me'dye ĉanam' mọmo' pan tsun judyeya' pärä' tạbedye' tsun. Me'dye ra' chat ya'iyeja' jụijya' säcsedye' tsun räj utsdyes shachtyitydyes muntyi' in —yi jéte in. 14Shach qui nam' mu'ya' in, jedac ĉanam' mir rụi'cu' son' in. Mọ'dyes mu' Jesús jéyacsi jị'chiyactyi' mu': —Jéyacsejam' uts muntyi' in paj chimes chimes jịjcaij bä'yi in, paj ĉanam' qui'tac muntyi' jịjcaij yirity ñuru' bä'yi in. 15Me' bu'yidye ji'bä'yacsi räjtum in. 16Chat qui mu' Jesús mu' ĉanam'tyity pan tapjete judyeya' pärä'sis tạbedye', cạvi qui mạyedye'che', yoshoropaij jéte Jen' säcsedyedyes. Mu' chum q̂uemi'vete pan judyeya' tạbedye', so'macsi qui jị'chiyactyi' mu', mu'in qui ji'jiijte in yoctyi'ya' in. 17Räjtumdye säcsi in c̣hụcmun yu'ti in. Mu'dye jị'chiyactyi' mu' tsimjan' ji'shucdyidye' in, yiri'tac pärä' jiyi' ụ́bu' me'qui' ji'shupjan' mọ' tsimjan'si' in. 18Yirisĉan mạyedye' mu' Jesús yirity mọmo' cọdaqui Jen'che' mu', c̣hẹi'ya'dye mu'in jị'chiyactyi' mu'. Jesús jéyacsi: —¿Jätäjyi buty q̂uin' muntyi' in, tyi buty ĉun yụ in? 19Vorjete in: —Mu'ya' yi in: “Uts nash Juanvun chojtacsity”, yi in. Yoctyi' na yi in: “Uts nash Elíasvun”, yi in, chime'dye yoctyi' yi in: “Uts nash yoctyi' jaso'mitity p̂eyacdye' Jen' jiquej, aty q̂uin' vañinyeban”, jam vaj cäts ji'jäquin muntyi' in —yi jéte in jị'chiyactyi' mu'. 20Jesús quivij jéyacsi: —Mi'in na, ¿tyi yụ ĉútiĉa' u mi'in? Pedro vorjete: —Mi nash Ji'c̣honacsity muntyi' jutactyi' Jen'tyi' mi. 21Chat qui mu' Jesús jéyaqui jị'chiyactyi' mu' paj qui jam mọ' p̂eyacdye' jị'chiqueyacsi yoctyi' muntyi' in jun' chuc mu' Jesús Ji'c̣honacsity muntyi'. 22Chime'dye mu' Jesús jéyacsi: —Yụ ra' ñịbedyes jị'ĉojtye' Anictyity Muntyi' yụ, ĉaĉaij na mu'in tashchety ĉọjcacsity in, judyeya' mu'in tashchety cudyitity Jen'che' in judyeya' mu'in jị'chiyacsity yụ'tacdye' in, me' me' ra' va'quiquin yụ in judyeya' ra' ji'ijan yụ in. Chibin qui na ram' mạyedye' me' bu'yi yụ chat qui ra' vañinyeban yụ sän'dye'ĉantyi' yụ. 23Chime'dye mu' jéyacsi räj muntyi' in: —Tyi chuc mạ'je' cäc̣hä'-chun yụ in, paj tashche' ĉụi'si' dyijyedye' yacchuqui in, paj räjĉan mạyedye' vemete crosh in,86 chat qui ra' q̂uin'dyem' cäc̣hä'chun yụ in. 24Tyi chuc otejjitity ĉụi', jam mạ'je' yụ́dyes bä'yi jụijya', mu' ra' fibi' mọmo' shupqui' jun' chuc bä'yi mu'. Tyi chuc jam otejjitity ĉụi', mu' yụ́dyes bä'yity, mu' ra' jam fibi' bä'yi, mu'si' ra' mọ'ya' bijodye' mu'. 25Mu' muntyi' räj tsan' me'chui' jacches jedye' jụijya', me' tsan' me', jam qui nam' yụ́dyes bä'yi jụijya' mu', va'cac bä'yi mu'. 26Tyi chuc tsị́catyintyi' yụ in judyeya' p̂eyacdye'ya' yụ Anictyitysi' Muntyi' yụ, me'dye ra' yụ chime' yụ tsị́catacsi mu'in me'tyity in, aty atsijbanya' yụ räj ferdye'tum yụ, Jen'si'tum ra' mạijquedye' atsijban yụ, judyeya' ra' anjer in tucsi yụ Jen'tyi' mu'. 27Yụ anic jéyac pạrej úyaty q̂uin' in jambi' ra' säñi in mu'in ra' cạvepte in Jen'si' ayo'bu'yidye' mu'. 28Aty me' yi mu' Jesús, q̂uen'ĉan mạyedye' jiyi', chat qui mu' Jesús mụcu'che' jịjcaij cọdajquiqui Jen'che' mu'che', mu'in mọmo' cạcsi Pedro, Santiago judyeya' Juan. 29Aty cọdacva'joijya' Jen'che', yocdyejyi vatyquej vejya', anic pashyi quị'sim' judyeya' anic jiyi jai'baty chime'. 30Ĉụi'dye vatyquej pärä' muntyi' ji'caviti in, Moisés judyeya' mu' Elías mu'in p̂eyete Jesús in, 31anic mạijquedye'tum ji'caviti in. P̂eye' in jun' chuc ra' mu' Jesús jị'cätsepte Jen'si' dyijyedye' mu' aty ra' ijacya' mu' muntyidyes in Jerusalénĉan. 32Pedro pen'dye'tumdye mu', me' tsan' fer ĉúshi'shiij in, taca' qui nam' doijro' bu'va'joij in, chat cạvepte in mạijquedye' Jesússi' mu' judyeya' chime' pärä' mu'yatydye muntyi' in. 33Aty ra' yạjquibajteya' in mu' Jesús, yi mu' Pedro jéte Jesús: —Jị'chiyacsity, ¡anic jäm' úya' q̂uin' tsun! Jesha', tsun ra' jäm'tye' chibin p̂isijsis aca', yiris ra' mídyes, judyeya' Moisésdyes judyeya' Elíasdyes. Ĉụi' mọmo' p̂eyaqui Pedro, itŝi' tyei' dyijyedye' mu'. 34Taca' p̂eyacva'joij mu' Pedro, me'ĉandye juñumjeyacsi dyicba'badye', jị'chiyactyi' mu' noi'yi mu'in in. 35Yiris p̂eyacdye' se've' in dyicba'badye'ĉansi' yi': —Uts nash Ạva' yụ, tsim'-tactyi' yụ, mu' se'vemac mi'in. 36Aty jiyi'ya' mọ' p̂eyacdye', yiritydyety mu'ya' mu' Jesús. Mu'in jị'chiyactyi' mu' tashche' jambi' jị'chicaqui in cạves mọ'che' in. 37Nojno mạyedye' mu' Jesús chibindye jị'chiyactyi' mu', mụcu'ya' jijtuban in. Anic shach muntyi' in ji'rebeĉun'te in mu' Jesús. 38Yirity muntyi' mu'ĉantyi' fer jéte mu' Jesús: —Jị'chiyacsity, yụ cudyiti míche', cavibuti' ram ạva' yụ, mu' nash yiritytyity ạva' yụ. 39Jäm'dyeya' sọyo' fer jaji'ñe'iti judyeya' äjdyi jayu'ti, shucben' shucben'yi chụ'ĉan mu', mọ' fer jạji'ñibe'cati, mijam mạ'je' jayacchuti. 40Yụ tsan' jepye jiquej jị'chiyactyi' mi paj qui mu'in meijjetyebajte sọyo' in, jam qui nam' mu'in jun'te in. 41Chat qui mu' Jesús jéyacsi: —Där ac̣hi'tyity q̂uin'tyity muntyi' mi'in, mijam méqui' anicyi mi'in. Me'dye ra' yạjquibadyeyac yụ, tạ'caijdye ra' mi'in. Aty ra' jam jun' dyichchuyac mi'in. Uya' jijtuva tuca ạva' mi —jéte mu' muntyi'. 42Aty tsan' tuyete in mu' nanaty, mọ' qui nam' sọyo' jame'ti jaji'ñe'iti, mụijya' jaji'tŝuti. Mu' qui nam' Jesús fạra'jeĉuñe' mọ' sọyo', ji'chäĉajte mu' nanaty, chat qui so'mebajte jen' mu'. 43Räj muntyi' in äjjepte in ferdye' Jen'si' mu', anic chäcdyis mọ' jị'caveyacsi ferdye' mu'. Mu'in muntyi' in yejĉoij mu'in äjjepte in ferdye' Jesússi' mu'. Jesús jéyacsi jị'chiyactyi' mu': 44—Se'vibutiĉam' ọij p̂eyac-dye' yụ, jam ra' yaquintubutiĉa' mi'in: Yụ Anictyity Muntyi' ji'me'tac nash ra' yụ mu'inya' in ayo'ya' in. 45Mu'in na jị'chiyactyi' mu' jam jun' chiquepte p̂eyacdye' in, jedye' chuc cại' mọ' p̂eyacdye', ĉaĉaij na mọ' p̂eyacdye' tofetui' mu'in in, noi'yi cọdyete p̂eyacdye' in. 46Mu'in jị'chiyactyi' mu' vaj meij jítidyeij mu'in in, p̂eye' in tyi buty ra' mu'ĉan muju'cha' bu'yity. 47Jesús chị́yacsebi a'c̣his dyijyedye' mu'in, me'dyes qui yirity miquity fayete jị'caveyacsi mu'insi'ya' vej in. 48Chat qui mu' Jesús jéyacsi: —Tyi chuc yụ́dyes tiĉun'tety uts miquity, yụ́dye mọmo' tiĉuñin yụ in. Tyi chuc tiĉuñintyi' yụ in, Jen'dye mọmo' chime' tiĉun'te in, mu' jutintyi' yụ. Tyi chuc uya'ya' yu'tity mi'inĉantyi', mu' nash muju'cha' shupqui Jen'si'ya' vej mu'. 49Chat qui mu' Juan jéte mu' Jesús: —Jị'chiyacsity, tsun cạvete yirity muntyi', mísi'che' tịj meijjetyetacseban sọyo'. Tsun nash jéte paj qui jam me' jäm'-taqui, ĉaĉaij na jam cäc̣hä'tyity tsunya'. 50Jesús vorjeyacsi: —Jam ra' jétinte paj qui jam me' jäm'taqui, ĉaĉaij nash tyi chuc jam p̂iijsin'tyi', mu' ñútyisin'tyi' shupqui. 51Aty c̣hẹi'ya'yeti' mọ' tupudye' jun'si' chuc ra' ca'ñibun mạyedye'che' mu' Jesús, chat qui sacti ma'yedye'tum, Jerusalénve jịjcaij, mijam méqui' yocve dyijyi mu'. 52Jä'mij ji'tashacsi muntyi' mu' mu'ĉan jịjcaij in yiris bä'yedye' Samariaĉansi', paj qui mu'ĉan queve' in dyäquedyedyes mu'. 53Mu'in qui nam' mu'ĉantyi' in jam mạ'je' méqui' tiĉun'te in, ĉaĉaij na chịj in mu've ra' jịjcaij Jerusalénve.87 54Jị'chiyactyi' mu', mu' Santiago judyeya' mu' Juan, chịj in jun' chuc jam tiĉun'te ra' in, chat jéte in: —¿Mạ'je' tyu' um paj qui tsun cọdyete mu' Jen' paj qui mu' va'tyeyacsi mạyedye'ches tŝij paj qui räj co'shaij mu'ĉantyi' in? —jéte in. 55Jesús caman'yi fạra'jeĉú-nacsi, 56chat qui mi'eban in yocsi've qui bä'yedye' jịjcaij in. 57Aty jiyi in, atsij vatyquej yirity muntyi' ĉọshte Jesús jéte: —Yụ mạ'je' cäc̣hä'chuye mi juna' chuc jịjcaijya' mi. 58Vorjajiti Jesús: —Mọ'in foij in mọ'ya' aca' mọ'in, mọ'in jaijtyi' che'ves in chime' mọ'ya' tịj mọ'in. Yụ qui nam' Anictyity Muntyi' yụ jam juna' jị'jutyiti úche' chuden'yi yụ. 59Chime'dye yi mu' Jesús jéte yoctyi' muntyi': —Cäc̣hä'chuti' ram. Voryi mu' muntyi': —Jụdyej Jị'chiyacsity, tashche' chum ra' nạ́qui jen' yụ, chat qui ra' q̂uin'dyem' cäc̣hä'chuye mi —jéte. 60Jesús vorjajiti: —Paj mu'in sän'dye'ĉan bä'yity in, paj mu'in rudyu'jeyacsi säñity in. Mi na sacta jéyacseva muntyi' in mọ' p̂eyacdye' ayo'bu'yidyes ra' Jen'si' mu'. 61Yirity muntyi' yi jéte mu' Jesús: —Yụ mạ'je' cäc̣hä'chuye mi, tashche' chum ra' aca'ya' jadyiĉan yụ paj qui vorjeyactaqui chätidye' yụ. 62Vorjajiti Jesús: —Jam, tyi chuc yi: “Yụ ra' Jen'dyes carijtaqui”, aty qui nam' yocve dyijyi jụijya', mu' jam tupuj carijtaqui Jen'dyes ayo'bu'yedyedyes mu'.

will be added

X\