Luke 8

1Aty me'si' mu' Jesús pai' qui sococor'jeyacsi bä'yedye' in, cại' Jäm'si' P̂eyacdye', p̂eye' ayo'bu'yedye' Jen'si' mu', cäc̣hä'chute in mu'in jị'chiyactyi' mu' yiri'tac pärä' jiyi mu'in rụi'cu' in. 2P̂enmun chime' ji'chäcacsebansi' jiquej mu' Jesús, judyeya' meijjetyetacsi' sọyo' in. Mọ' na yiris María, judyeya' tịj mọ' Magdalena, sọyo'tumsi' mọ' jiquej, yävätidye' jiquej sọyo' me'chui' mọ'. 3Chime'dye mọ' cäc̣hä'chute Susana, judyeya' Juana, Cuzassi' p̂en mu', mu' nótaquity Herodestyi',84 mu'ĉantyi' mu' ayo'. Chime'dye yocsi' p̂en mọ'ya' dai' in nọ́tyetes Jesús in judyeya' jị'chiyactyi' mu', nọ́tyetacsi' so'macsi jedye' in jedye' chuc mu'in jemoñe' in. 4Dai' muntyi' in ĉọshte in mu' Jesús, pai' bä'yedye'ĉantyi' in, vajmu'yaij mu'ya' in. Mu' jị'chiyacsi yụ'tyeyeyacsi ọij jị'ĉocdyes p̂eyacdye', yi mu' jéyacsi: 5—Yirity muntyi' quịjodye'ĉan jịjcaij cätiyequi. Aty facajnaquiya' mu', pạrej majmiĉan tŝọi' vej in, me'dye muntyi' yútye' in, judyeya' qui jaijtyi' ayij in, mọ' vej jebei' in. 6Pạrej na mijche' tŝọi' vej in, mu'si' na jac mu' jam tyes. Me' tsan' mọ'che' chịbi', p̂añi' tsan' judyeya' qui sacñi' cätidye', ĉaĉaij na chañej mọ'ches jac. 7Pạrej däräsya' ribin tŝọi', mọ'tumdye chịbi' därä'tum, mọ' qui jabusti', jam qui jun' p̂añi'. 8Pạrej na jäm'ya' jac tŝọi', mọ'ya' jäm' p̂añi', jäm' mọ' väshi' mọ' cätidye', yiris vej quịcsi' cien mọs vej juban' mọ' —jéyacsi Jesús. Dadam' mu' cäch jéyacsi: —Tyi chuc chuntumtyi' in, paj jäm' se've' in ọij p̂eyacdye'. 9Jị'chiyactyi' Jesústyi' mu' jéte in: “¿Jedye' buty cại' mọ' jị'ĉocdyes p̂eyacdye' p̂eijte mu' cätity muntyi'?” 10Jesús vorjeyacsi: —Mi'indyes mọmo' so'minac Jen' paj qui chị́yeptinte caminsis dyijyedye' mu', jun' chuc ayo'bu'yedye' mu'si'. Mu'in na yoctyi' in jam me' so'mac in, jị'ĉocdyestumsim' p̂eyacdye' jị'chiyacsi yụ, paj qui me' shupquive in: me' tsan' cạvi in, jam qui nam' naijti in, judyeya' me' tsan' se'vaqui in jam qui nam' chicacsi in jedye' buty cại' mọ'. 11Jesús jéyacsi: —Me' bu'yi' ọij cại' jị'ĉocdyes p̂eyacdye': Mọ' vej mọ' cại' jeñej Jen'si' p̂eyacdye' mu'. 12Vej majmiĉan tŝọi'si', mọ' cại' jeñej mu'in se've'tyi' tsan' in mọ' p̂eyacdye'. Mọ'ya'dye mọ' shupqui' sọyo', me'ĉandye jäctyetacsi' p̂eyacdye' ĉojtyi'ĉansi' mu'in paj qui jam anicje've in paj qui jam c̣hoñi in. 13Vej mijche' tŝọi'si', mọ' cại' jeñej se've'tyi' tsan' in mọ' p̂eyacdye', tashche' tsan' ma'jodye'tum tiĉuñe' in. Mijam qui nam' ĉojtyi'ĉan mu'in ji'site' in, jeñej bu'yi' itŝis ribin mọ' cätidye', me' bu'yi' mọ' p̂eyacdye' shupqui' mu'indyes in, dam'tuquim' cäc̣hä'chui' in. A qui nam' jị'ĉojtacya' in farajjecajcai' in, mijam dam' dyijtuban' in. 14Mọ' vej däräsche' ribin tŝọi'si', mọ' cại' se've'tyi' tsan' in mọ' p̂eyacdye'. Mu'in qui nam' yejĉoij dyijtujijcaqui in ĉụi'si' dyijyedye' jacches mu'in, fer mạ'jete querec̣ha in, jo'mes ma'jotye' in jacches jedye' in, mọ'dyes qui jam p̂añi Jen'dyes in mijam mu'dyes chime' bä'yi in. 15Mọ' na vej jäm'ya' jac tŝọi'si', mọ' cại' jeñej bu'yi' jäm' se've'tyi' p̂eyacdye' in, mu'in jäm' ĉojtyi'ĉan ji'site' in judyeya' tyum'chutidye'tum chique' in, mu'in räjĉan Jen'dyes bä'yi in, mu'in jeñej bu'yi jäm' väshis cätidye' in. 16Chime'dye Jesús jéyacsi: —Mọ' mạijyis aty ji'jä'nacya' jam jun' bustac juban' chijam ọ́ĉan yụ'tac ĉushaquisĉan, jemoñe' che've yụ'tac paj qui tupuj mạijchucsi' räj mu'ĉantyi' in. 17Me' bu'yidye ra' chime' mu' Jen'. Mu' ra' räj mạijchui' räj jujmus q̂uin', räj jijmu'sacsi' q̂uin', mu' ra' räj jorojĉanje' jäqui've. 18Jäm' se'vevac ọij p̂eyacdye', tyi chuc chicacsity jụijya' in, mu'in ra' muju'cha' so'mac in, jam na chicacsity jụijya' in, me' tsan' dyijyedye'tum ĉúti in, chutyetac ra' in mọ' dam'sis dyijyedye' mu'in —jéyacsi Jesús. 19Jesússi' tse' mu' judyeya' vojity mu' ĉọshte in mu' Jesús. Jam qui nam' c̣hẹi'ya' ĉọcte in ĉaĉaij na anic q̂uich muntyi' in. 20Chat qui jéte in mu' Jesús: —Mosh tyu' jorojya' tse' mi judyeya' vojity mi, mu'in nash mạ'je' cavin in. 21Yi mu' Jesús jéyacsi muntyi' in: —Tyi chuc se'veptety Jen'si' p̂eyacdye' in judyeya' chiqueptety in, mu'in nash tse'tucsi yụ judyeya' vojitytucsi yụ. 22Yirisĉan mạyedye' mu' Jesús covambache' p̂ai'joij, räjtumdye jị'chiyactyi' mu'. Jéyacsi: —Cabu'tyum, nopej tsique' jịjcaja'. Me'dye yacchuti in. 23Mu' Jesús chijäm' ĉushtyiti mu'che' covambache', cä'c̣häijdye chäcdyity tyi'mu tŝọ́tacsi, ji'siteyacsi vacam'quedye' covambaĉan, mạ'je' ji'pechte covamba, anic där tsäqui' mọ'. 24Mu'in na jị'chiyactyi' Jesústyi' mu' anic itŝijyacñi noi'yi in, cavin jịjtsa'ebajte in jéte in: —Jị'chiyacsity, Jị'chiyacsity, a tyu' ra' uya' jịjcaja' pechja' tsun —jéte in. Sacyeban vátyequej mu' Jesús, p̂eyacdye'ya' mọmo' mu' jéte tyi'mu judyeya' vacam'quedye'. Me'ĉandye mu' dyäc tyeij tyi'mu judyeya' ojñi'. 25Chat qui mu' jéyacsi jị'chiyactyi' mu': —¿Jun' ca' me' mi'in jam anicyi yụ́che' mi'in? Anic mu'in jäm' äjjete in, judyeya' irijyi in, jítidyeij in: —¿Tyi buty uts muntyi'? Yoj na tupuj ji'dyäquete tyi'mu judyeya' ojñi', yoj na se'vete in. 26Chijäm' nopej venjoij in, Gerasaya' sojquiti in, quic̣hen' mọ' jac Galilea. 27Mu'ĉan yirity muntyi' bä'yi sọyo'tumtyi', jam aca'ĉan bä'yity mu', ru'dyei'ya' mọmo' bä'yi räjĉan judyeya' cädäj chime'. P̂ai'joij mu'ya' mu' Jesús atsij mu' sọyo'tumtyi' muntyi'. 28Nạijte mọmo' Jesús, äjyi dyụtsyi mu'ya' Jesúsya' fer p̂eyaqui jéte: —Jam ra' me'ti' mi Jesús, mi nash Ạva' mu' Jen'tyi' muju'chaty. Yụ cọdyeye jam ra' jị'ñibe'catim. 29Me' yi mu' ĉaĉaij na mu' Jesús aty juteban' mọ' sọyo' paj qui meijyeban' mu'ĉansi'. Mọ' jame'chutis jiquej mu' muntyi', pucmun jaji'ñe'iti. Mu'in muntyi' in mạ'je' tsan' chọco'te cadenaya' in, mu' na sọyo'-tumtyi' muntyi' räj quishje' mọ' cadena chat qui cäjyasĉan jac jácati mọ' sọyo', mu'ĉan qui bä'yi. 30Chat qui mu' Jesús jéte: —¿Tyi tịj u mi? Vorjete: —Yụ́si' nash tịj Dai'tyi'. Me' yi mu' ĉaĉaij na dai' sọyo' me'chute in. 31Mọ'in sọyo' in ferche' cọdyete in mu' Jesús jéte in: “Jam ra' jutitiĉa' tsun mi'in mochĉansi'ĉan to'”, jéte in. 32Mọ'ya' na mọ'in cochij dai'si' in mụcu'ya' säcseva'joi' in. Mọ'in na sọyo' in ferche' cọdyete in mu' Jesús: “Farajjitiĉam' cochijĉan qui ra' jịjcai' tsun.” Jesús jụjjeyacsebi cọdacdye' mọ'in. 33Me'ĉandye mọ'in sọyo' in meijyeban' muntyi'ĉansi' in, cochijĉan qui siti' in. Mu'in na cochij in jäm' mu'in bujujuj tacñi in, roi'je' tsävĉan in, judyeya' ojñi'ĉan qui jịjcaij in tasdye p̂uti in. 34Mu'in na ĉọjcacsity cochij in, cạvacsi mu'in in, chiĉa'joijdye mu'in in jéyacsequi bä'yedye'-ĉantyi' in judyeya' jorojya' bä'yedye' bä'yity chime' in. 35Chat qui mu'in muntyi' in atsij in mạ'je' cạvete' in jun' bu'yi' buty mọ' jiyaque. Aty ventyecte in mu' Jesús, dạquicte in mu' sọyo'tumtyi' muntyi' jiquej, Jesúsya' bä'va'joij, aty quị'si'ĉan cäbudaque, jiyaque shapudye' chime' mu'. Aty me' cạvete in noi'yi mu'in in. 36Mu'in cạvetety jiquej in jéyacsi muntyi' in jun' buty ji'chäĉujse jiquej mu' Jesús. 37Mu'ĉantyi' in Gerasaĉantyi' in räj mu'in cọdyete Jesús in paj qui mu' cavin jọban, ĉaĉaij na mu'ĉantyi' in där noi'yacñi in. Me'dye mu' Jesús jọban, covambache' qui p̂ai'joban jọban mu'. 38Aty covambache' bu'ban mu', mu' sọyo'tumtyi' muntyi' jiquej jéte tsan' fer mạ'je' mu'mun jịjcate. Mu' na Jesús jutebajte ĉụi'si'ya' aca' mu'. Jéte: 39—Tạij, ĉụi'si'ĉan aca' jịjcabada, jéyacseva chätidye' mi jun' chuc mu' Jen' anic ñịbe'jin mi ji'chäĉun. Me'dye mu' jọban muntyi', pai' socor'je' bä'yedye' jéyacsi muntyi' mu'ĉantyi' in jun' chuc mu' Jesús ñịbe'jajiti jaji'chäĉun. 40Jesús ca'ñibun nopjan quivij tsique'. Yóya'dyem' yacchutiya' jiquej u, mu'ya' quivij sojquibun. Mu'in muntyi' in tiĉun'te mu'in in ĉaĉaij na tạ'caty bisva'bajte in. 41Atsij yirity muntyi', Jairo tịj mu', mu' tashche' bu'yity vajmu'yadye'ĉan judíos mu'in. Mu' Jairo dyụtsyi Jesúsya', fer cudyiti mu'che' paj qui ĉụi'si'ya' aca' jịjcaban mu'tum, 42ĉaĉaij na mọ'ĉan yirissis ạva' mu' Jairos, fer japacjoi' mọ', cändyety mọ' mạ'je' säñi'. Mọ' ạva' mu' yiri'tac pärä' jiyis yómodye'. Chat qui mu' Jesús sacje' jịjcate mu'. Anic shach muntyi' in pen'dyetute in, anic quec̣he' tyeij Jesúsya' in. 43Mọ'ya' chime' yiris p̂en japacjoi'si', yiri'tac pärä' jiyi' yómodye' me'qui' jị'ĉojtye' ĉụi'si' japacjodye' mọ' chäshvacdye' a'ĉansi' mọ'. Dai' qui' tsan' jị'piñituti' pịñitucsityya' in, me' tsan' mu'in pịñitui' in, mijam qui nam' jun' ji'chäĉan' in, chijäm' räjjeyaqui' jedye' mọ'. 44Chat qui ĉọcte Jesús dyete'ĉaĉan cajnacsi' muntyi' in, murujruchetute ĉọcte, me'ĉandye caminve toco'jepte quị'si' mu'. Täjyedye'ĉandye mọmo' chäĉän' mọ', täts vatyquej tyei' japacjodye' mọ' chäshvacdye' mọ'. 45Chat qui mu' Jesús jéyacsi muntyi' in: —¿Tyi ca' toco'tyin yụ? Jam tyi yi in. Mu' Pedro jéte: —Jị'chiyacsity, uts q̂uin' muntyi' in anic quec̣he' tyeij míya' in, vatyquej ra' jụ'ñity ĉụi' mọmo' toco'tyin in. 46Voryi Jesús: —Jam, pạrej nash mu'ya' toco'tyin yụ in, aty jị'ĉojcayaqui a' yụ shupqui' ferdye' ĉọ́qui yụ —yi mu' jéyacsi. 47Mọ' na p̂en aty chị' mu' Jesús aty chị́ye', mọ'dyes cavin mọ' ayij ĉọcte noc̣ho'c̣hodye'tum dyụtsyi' Jesúsya'. Muntyisya' vej mu'in, yi' mọ' jéte jun' chuc mọ' toco'te judyeya' täjyedye'ĉan mọmo' chäĉän' mọ', me' jéte. 48Jesús je': —Ạva' yụ, q̂uin' anicye-dye'ya' chäĉän' mi, tạij ma'jodye'tum acatubada. 49Taca' p̂eyacva'joij mu' Jesús, atsij vatyquej yirity ayosĉantyi' aca' p̂eyacdye' tui'tyi' Jairodyes, mu' tashche' bu'yity vajmu'yadye'ĉan in. Jéte: —A nash säñi' ạva' mi, paj mu'ya' uts Jị'chiyacsity jam ra' me'tem. 50Jesús se'vepte p̂eyacdye' mu', jéte mu' Jairo: —Jam ra' cajotyiti mi, anicyeva mọmo' mi, jam ra' jedyei' ạva' mi. 51Ventyecbite aca' in. Mu' Jesús mu'in mọmo' ji'sitacsi Pedro, judyeya' Santiago, judyeya' Juan judyeya' jen' mọ'tyim' judyeya' tse' mọ'. Mu'in na yoctyi' in jorojya' ji'yajcati in. 52Mu'ĉantyi' aca'ĉantyi' in aty mu'in fer táreva'que' in mọ' nanas. Jesús qui jéyacsi: —Jam ra' tári mi'in, ọij nanas jam nash säñi', ĉọshi' nash mọ'. 53Mu'ĉantyi' in dyisacbite p̂eyacdye' in Jesússi', chịj mu'in in aty säñi' mọ' nanas. 54Jesús qui tapjebi' un mọ', fer p̂eyaqui je': —Nanas, sacyebada mi. 55P̂eyacdye'ĉandye mu'si' tsạ'eban' mọ' nanas sacyeban'. Chat qui mu' jéyacsi: “Ji'säcsebadac ọij nanas.” 56Jen' mọ' judyeya' tse' mọ' där äjyi in cạvete in. Mu' qui jéyacsi paj jam jị'chiqueyacsi yoctyi' muntyi' in.

will be added

X\