Luke 7

1Aty me'si' ijaij jị'chiyacsi muntyi' in, chat qui roi'je' Capernaumĉan jịjcaij. 2Mu'ĉan yirity bä'yity Romaĉantyi' väc̣hä'tyitytyi' ayo' mu'. Chime'dye mu'ĉan úñity mu', mạ'jeyacdyety mu'. Anic fer japacjoij, aty mạ'je' säñi. 3Mu' ayo' se'vaqui mọ' p̂eyacdye' jun' chuc mu' Jesús, chat qui mu' jutacsi tashche' bu'yity judío in paj qui jäcte in, paj qui mu' ji'chäqueshbibajte úñity mu'. 4Me'dye ventyecte in judyeya' fer cudyiti mu'che' in jéte in: —Anic nash jäm'tyi' mu' ayo' nọ́tyecme, 5ĉaĉaij nash mu' anic mạ'jisin' tsun judío tsun, mu' jäm'tyiyin tsun yóĉandyem' vajmu'yaijĉan u tsun. 6Jụjyi mu' Jesús, jijtucsi. Aty c̣hẹi'ya'yeban ayosya' aca' in, chat qui mu' ayo' jutacsi pen'dye' mu', ji'rebete in jéte in: —Yi mu' ayo' yụ'tye' p̂eyacdye': “Jị'chiyacsity, jam qui nam' tupuj yụsĉan aca' yútyi mi, ĉaĉaij nash mi muju'chaty Ayo', uya'ya' nash yụ, 7mijam chime' tupuj cạveye vejya' mi. Paj tsan' p̂eyacdye' mọmo' jute' mi, tupuj ra' jo'mesya' chäĉän úñity yụ. 8Yụ chime' chịj yụ'tye' mọ' p̂eyacdye', ĉaĉaij na yụty chime' mu'ya' ayo', judyeya' chime' yụ ayo'bu'yi väc̣hä'tyitydyes in. Jéte jụijya' yụ yirity: Mu've ra' mi, mu've jịjcaij, yoctyi' qui na jéteya' yụ: Atsiva mi, atsij mu', judyeya' úñity yụ chime'dye jutaqui jụijyaij paj qui jäm'tye' yiris jedye', mu' jäm'tye', me'dye mi chime' tupuj ra' p̂eyacdye' jute' mi paj qui chäĉän úñity yụ”, yi ayo' —jéte in Jesús. 9Jesús äjjepte p̂eyacdye' mu', chat caman'yi cạvacsi jéyacsi mu'in cäc̣hä'chutety in: —Yụ ra' rụij jéyac, itŝij yirity Israelĉantyi' vóshi' mu'in me' dạcbite yụ anicyedye' mu', yojdyem' uts u Romaĉantyi' muntyi'. 10Mu'in cại'tyi' p̂eyacdye' in ca'ñibun mu'in in, ayosĉan aca' jijtuban in, dạquishajte in mu' úñity mu' jam mụi' chäĉädaque mu'. 11Aty me'si' mu' Jesús jị'chiyactyi'tum mu' Naínĉan jịjcaij in, tịj mọ' bä'yedyes, dai' muntyi' cäc̣hä'chute in. 12Jambi'dyem' ventyeque' mọ'ya' in sisdye'ya' bä'yedyes, mu'ya' täjjacsi mu'in nạctety ra' in yirity muntyi' säñity. Mu' yiritytyity ạva' mọ', muñestyi' mọ' tse' mu'. Jam pụyu' muntyi' jịjcai' in pen'dyetui' in nạcte ra' tsan' in. 13Jesús cạve' mọ', anic där ñịbe' ĉọi', je' qui: —Jam ra' tári' mi. 14Chat qui ĉọ́que' mọ' cajón, toco'je'. Mu'in cạtety in dyäcyi mu'in in. Jesús jéte mu' säñity muntyi': —Yụ ra' jéye mi nanaty: ¡Vañinyebada! 15Yédye'ĉan mọmo' p̂utsquen'yeban mu' säñity, judyeya' p̂eyaĉan. Chat qui mu' Jesús so'meban' tse' mu'. 16Mu'in na muntyi' in jäm' mu'in itŝijyi ĉojtyi'ĉan in, mu'ya'dye tima'quete Jen' in, yi in: —Tsunya' tŝọij mu' anictyity jaso'mitity p̂eyacdye' Jen'. Chime'dye yi in: —Jen' aty ĉushsin' tsun paj qui ñútyisin'. 17Räj vatyquej mu'ĉantyi' chị́qui in Judeaĉantyi' in jun' chuc carijtaqui mu' Jesús. 18Me' tsan' ĉä'räij mu' Juan, mu'tyi' qui nam' jị'chiyactyi' mu' jébajte in jun' bu'yi chuc mu' carijtaqui Jesús. Juan fayacsi pärä' mu'in in, 19jéyacsi: —Tạij ĉọcmac mi'in mu' Jesús, jétinte ra' mi'in: “¿Mi buty atsijtyi' muntyi' Ji'c̣honacsity, are' jam? ¿Yoctyi' ra' jụijya' biste tsun, jadac jam?” jétinte ra' mu'. 20Me'dye mu'in sacti in ĉọcte in mu' Jesús jéte in: —Mu' Juan chojtacsity muntyi', mu' nash jutin tsun paj qui tsun jéyac mi: “¿Mi buty aty q̂uin' atsij Ji'c̣honacsity muntyi' in? Jam jụijya' mi tsun ra' yoctyi' yejĉoij biste”, yi Juan jin tsun —me' jéte in. 21Mu'ya'dye vatyquej räj ji'chäcacseban japacjoijtyi' in, judyeya' meijjetyetacseban sọyo' in, judyeya' tofety chime' naijbun yụ'tacseban. 22Aty me'si' chat qui mu' Jesús vortacsi jéyacsi jutactyi' Juantyi' mu': —Tạij mi'in jémac mu' Juan yódyesdyem' cạvetiñes u judyeya' se'vetiñes. Me' ra' jébajtinte mi'in jun' chuc yụ naijbun yụ'tacseban mu'in tofety in, judyeya' ji'mi'acseban yụ mu'in jam mi'ity in, judyeya' ji'jäm' yụ'tacseban yụ mu'in bayi'yijtyi' a' in, judyeya' chime' ji'se'vacseban yụ mu'in tyuctyity chun jiquej in, judyeya' vañinjeyacseban yụ mu'in aty säñity in, judyeya' jéyacsi yụ mu'in ñịbety in mọ' jäm'si' p̂eyacdye'. 23Chime'dye jémac: “Anic ma'jodye'tum mu'in jam yocve dyijyity in yụ́dyes in”, me' jémac mu' Juan chime' —jéyacsi Jesús. 24Chat qui jọban in mu'in jutactyi' Juantyi' mu'. Tiyacchui' mu' Jesús p̂eijte mu' Juan jéyacsi muntyi' in: —¿Jedyetuij ca' mu'ĉan mi'in cäjyasĉan jac, cạvectinte mu' Juan? ¿Jeñej buty jedye' ĉọ́tinte mi'in? ¿Jeñej shan ji'nashva'ques tyi'mu, me' buty ĉọ́tinte mi'in?83 Mijam me' mu'. 25¿Jeñej buty ya'ijtyi'ĉan quị'si' cäti, me' buty ĉọ́tinte mi'in? Mijam me' mu'. Mu'in ya'ijtyi'ĉantyi' quị'si' in, mu'in ayosĉan aca' bä'yi in. 26Jítiĉam' yụ, ¿mạ'je' buty cạvectinte yirity jaso'mitity p̂eyacdye' Jen'? Me' nash mu' Juan, cạvectintety mi'in, mu' nash anic muju'cha' jaso'mitity p̂eyacdye' mu' Jen', mi'in jam chị́yetinte mu'. 27Mọ' sánacdye' p̂eijte mu' Juan, yi': “Yụ ra' jutete jutactyi' yụ, mu' ra' tashi paj qui jä'mij jäm' yu'tyiyin mídyes majmi.” 28Yụ jéyac, räj muntyi' cajnacsi mu', urucyaty in judyeya' q̂uin'tyity in. Me' tsan' me' mu'in Jen'yadyety q̂uin' in, ayo'bu'yedye'ĉandyety in, räj mu'in muju'cha' yụ'tac Jen'ya' in, uya'ya' mu' Juan. 29Mu'in muntyi' in judyeya' mu'in tsim'tety querec̣ha in se'vepte jiquej in Juansi' p̂eyacdye' mu', anic rụijsis ĉọpte in Jen'si' dyijyedye' mu', mọ'dyes qui mu'in chiquepte in judyeya' qui ji'chojti Juanya' jiquej in. 30Mu'in na fariseo in judyeya' mu'in jị'chiyacsity yụ'tacdye' Jen'si' in jam mu'in me' in, jam mu'in jụjjepte jiquej in Jen'si' dyijyedye' mu', jun' chuc mạ'je' mu' paj qui mu'in me' jäm'taqui in, mijam ji'chojti Juanya' jiquej in, ĉụi'si' mọmo' dyijyedye' cäc̣hä'chuqui in. 31¿Jedye'tum bu ra' jị'cätstacsiij uts q̂uin' muntyi' q̂uin'tyity in? ¿Jụ'ñiij buty uts in? 32Jeñej miqui'muntyi' majmaijtyi' in, yi jéyacsi pen'dye' mu'in: “Tsun ma'jodyedyes boñi mi'indyesi', jam qui nam' ma'joij mi'in, chat qui táredyedyes jime' tsun, mijam chime' tári mi'in”, yi miqui'muntyi' in. 33Me'dye mi'in chime', mijam Juan ma'jotyetinte jiquej mi'in, mu' jam dyijtui' jäm'si' säcsedye', mijam c̣hom' tyeij vino chime'. Mi'in qui nam' jam ma'jotyetinte, “Uts sọyo'tumtyi' muntyi'”, yim' jétinte mi'in. 34Yụ na atsij Anictyity Muntyi' yụ, jäm' säcsi yụ judyeya' chime' tyeij yụ chime'jitiĉa'dye yụ mi'in jam ma'jotyitiĉa' mi'in. “Uts Jesús säsäcsa' judyeya' tyeijtyi' tyédye', pen'dyetucsi juchajtumtyi' in judyeya' tsim'tety querec̣ha in”, yi jítiĉa' yụ mi'in. 35Me' tsan' me', chị́yac qui nam' mu'in in me'chuptety in dyijyedye' Jen'si' mu', jun' chuc carijtaqui mu'in in. 36Yirity fariseo fayete mu' Jesús paj qui mu'tum säcsi. Mu'ĉan Simónsi'ĉan aca' siti mu' Jesús mesaya' bä'yi. 37Mọ'dye bä'yedye' mọ'ĉan yiris p̂en juchajtumsi'. Se'vaqui' mọ' aty mu' Jesús mu'ĉan säcsi fariseosĉan aca'. Mọ'ĉan jịjcai' Simónsi'ĉan aca', cại' jẹrejres puñujĉansi'. 38Mọ' c̣hẹi'ya'jete Jesús, mọ'ya'dye tári' Jesúsya'. Ĉụi'si'ya' táris mọ' favbite Jesússi' yuj mu', judyeya' ĉụi'si'ya' fin mọ' ji'chanbibajte yuj mu', judyeya' pụ'septe yuj mu', chat qui tai'bite jẹrejresya'. 39Mu' fariseo aty cạve' me' mọ', dyijyi mu' yi ĉojtyi'ĉan: “Anictyity jụijya' jaso'mitity p̂eyacdye' Jen' uts Jesús, chịj ra' anic juchajtumsi' ọij p̂en toco'tes q̂uin'.” 40Jesús yi jéte mu' fariseo: —Se'vibuti' jäm' ọij p̂eyacdye', Simón. Vorjete mu' fariseo: —Jíti'. 41Jesús jéte: —Mu'ya' jiquej pärä' muntyi' in, pären'dye dévetute in yirity muntyi'. Mu' yirity dai' dévetute, ĉanam' qui' cien querec̣ha. Mu' na yoctyi' uya'ya' mus, ĉanam' qui'tac mọmo' mus. 42Pären'dye mu'in in jam jun'teban' jiya'dyeyebajte in mu' muntyi' dévetutety in, mọ'dyes qui mu' dévetutety in ñịbe'jeyacsim' mu', aty jam cọdyetacseban, pären'dye c̣hicon'jeyacsebi déve mu'in. ̣Q̂uin' ra' chat yụ jéye mi Simón: Mu'in pären'dye déveijtyi' in ¿jụ'ñity buty ra' muju'cha' mạ'jete ñịbe'jeyacsity? 43Vorjete Simón: —Jedac mu' muju'cha' déveijtyi', mu' anic muju'cha' mạ'jete. Chat qui Jesús jéte: —Anic nash me'. 44Chat qui mu' Jesús caman'yi cạve' mọ' p̂en, yi jajiti Simón: —Cạveva' ọij p̂en jun' mọ' o. Jesha' sitiya' yụ aca'ĉan mi, jam méqui' so'mitim ojñi' favacdyes yuj yụ. Ọij na p̂en jam mem' cavin yụ, mọ' ĉụi'si'ya' táris mọ' favbun yuj yụ judyeya' ji'chanbubun yụ ĉụi'si'ya' fin mọ'. 45Jam dam' pụ'sacdye' so'mitim, ọij na p̂en jam me' mọ', mọ' jam farajje' yejĉoi' mọmo' pụ'sibun yuj yụ. 46Mi na jam méqui' me'yim so'mitim aseijte findyes yụ, ọij na p̂en jam me', mọ' tai'jibun yuj yụ jẹrejresya'. 47Ọij p̂en mọjo'cha' mọ' ji'caviyin yụ mạ'jitidyes mọ', jam jeñej mi. Mọ'dyes yụ jéye, mọ' dai'si' juchaj mọ' aty vayac, mu' na dam' mọmo' vayactactyi' juchaj, dam' mọmo' mạ'jin yụ. 48Chat qui mu' Jesús je' mọ' p̂en: —̣Q̂uin' chat aty vayac juchaj mi. 49Mu'in na yoctyi' säcseva'joijtyi' in yi mu'in ĉojtyi'ĉan in: —¿Jun' buty yi uts muntyi' je' mọ' p̂en? ¿Tyi buty útsi yoj na yi tupuj ca vayacjeyacsebi juchaj muntyis in? 50Mu' Jesús je' mọ' p̂en: —Anicyedye'ya' mi me'dyes c̣hoñi' mi. Tạij mi ma'jodye'tum jọbada mi —jajiti' Jesús.

will be added

X\