Luke 6

1Mọ' mạyedye' jị'jutyitidyes, Jesús nati jị'chiyactyi'tum mu', cätidye'ĉan trivo mu'ĉan tyeij in. Jị'chiyactyi' mu' shorjepte in trivos väsh mu', jebepte in. 2Pạrej mu'ya' fariseo cạvacsi in, yi mu'in jéyacsi in: —¿Jun' dash me' mi'in? Jam dam' chiquetiñe' yụ'tacdye' urucyas, mijam ạ̈räjjetiñe' jị'jutyitidyes mạyedye', carijtaqui mọmo' mi'in. 3Vorjeyacsi Jesús: —¿Jam adac p̂eyetiñe' mi'in mọ' sánacdye' p̂eijtes jiquej mu' David? Yi' jun' chuc mu' jiquej yoqui'dyem' dáquiya' jiquej u in pen'dye'tum mu'. 4Siti pen'dye'tum mu' Jen'si'ĉan aca' mu', jebete mu' pan Jen'yadyety, judyeya' so'macsi pen'dye' chime' mu'. Yi' mọ' yụ'tacdye' uts nash cudyititydyety mọmo' Jen'che' in, mu'in mọmo' tupuj jebete in yi', mijam dam' yoctyidyety in, me' tsan' me', jebete qui nam' mu' David jam mọ' jedye' shupqui' —jéyacsi Jesús. 5Chime'dye yi jéyacsi: —Yụ nash Anictyity Muntyi' bächäi'tyi' yụ ọij jị'jutyitidyes mạyedye' in. 6Yocsi'ĉan mạyedye' jị'jutyitidyes mu' Jesús ĉọ́que' vajmu'yaijĉan judío in, jị'chiyacsi. Chime'dye mu'ĉan yirity muntyi' tacvesve putyuijtyi' un. 7Pạrej mu'in fariseo in judyeya' jị'chiyacsity yụ'tacdye' Jen'si' in, mu'in vaj mọ'ches vej mu'in cạveva'te in mu' Jesús, jun'jete a ĉa ji'chäĉajte jị'jutyitidyesĉan mạyedye', yi in, mu'in mạ'je' in paj qui ji'me'te in ayo'ya'. 8Mu' qui nam' chị́yacsebi dyijyedye' mu'in, jéte mu' muntyi' putyuijtyi' un: —Sacyeva tashche' bu'va. Me'dye mu' sacyi mu' muntyi'. 9Chat qui mu' Jesús jéyacsi muntyi' in: —̣Q̂uin' ra' yụ jéyac mi'in: ¿Jụ'ñis buty tupuj yụ'tyeja' jị'jutyitidyes mạyedye'? ¿Are' jäm'si' are' a'c̣his? ¿Tupuj buty ji'chäĉajsha mu' muntyi', are' ji'me'yeja mọmo'? ¿Jätäjyi' buty yụ'tacdye' Jen'si' mu'? —yi jéyacsi Jesús. 10Jesús cạvi jéyacsi chum muntyi' in, chat qui jéte mu' muntyi': —Chụi'jebada' un mi. Me'dye mu' chụi'jeyaĉan un mu', me'ĉandye jäm'joban' un mu'. 11Mu'in fariseo in ji'me'tyeyete in mọ'dyes qui fạ́quete in. Shuban mu'in in tiyacchui' dyijyi in jun'jete chuc ra' in. 12Aty me'si' mu' Jesús mụcu'che' jịjcaij cọdajquiqui Jen'che' mu', dyutsen'je' tsedyedye' me'qui' cọdaqui Jen'che'. 13Me'dye nạijjoij mu' Jesús, chat fayacseban jị'chiyactyi' mu', mu'inĉantyi' in mu' Jesús tsim'tacsi' mu'in yiri'tac pärä' jiyity in, mu'in qui yụ'tacsi jutacdyety mu'. 14Ọij nash tịj mu'in jutactyi' mu': Simón, mu'dyem' Pedro jị'ti'ete, judyeya' Andrés, vojity mu' Simóntyi', judyeya' Santiago, judyeya' Juan, judyeya' Felipe, judyeya' Bartolomé, 15judyeya' Mateo, judyeya' Tomás, judyeya' Santiago, Alfeotyi' ạva' mu', judyeya' Simón, mu' cäc̣hä'chuc-sity mu'in fạ́cacsity Romaĉantyi' in, 16judyeya' Judas, Santiagoty ạva' mu', judyeya' Judas Iscariote, mu' ra' ji'mincatety mu' Jesús, me'tum tsim'tacsi. 17Chat qui mu' Jesús mụcu'che' jijtuban, räjtumdye jutactyi'tum mu', mojijĉansi' jac cha'sheban' in. Yoctyi' jị'chiyactyi' mu', dai' mu'in ĉọshte in, yoctyi'tum mu'in muntyi' chime' in, räj mu'in jajbu'yety in mọ' jac Judea, judyeya' Jerusalénĉantyi' in, judyeya' Tiroĉantyi' in judyeya' Sidónĉantyi' in, mọ'in pärä' bä'yedye' in sinves mar in. Junanaj chuc bä'yi mu'ĉan in mu'vevety atsij in, mạ'je' se'veshbite p̂eyacdye' in, judyeya' paj qui meijjetacsebive are'redye' chime' mu'in. 18Mu' ji'chäcacseban judyeya' sọyo' meijjetyetacseban. 19Mọ'dyes muntyi' in mạ'je' räj toco'jete in, ĉaĉaij na räj ji'chäcacseban mu'in toco'jetety in, mu' na jị'ĉojcayaqui ferdye' mu'. 20Jesús cạvacsi mu'in jị'chiyactyi' mu', jéyacsi: —Ma'joij mu'in ñịbety q̂uin' in, aty Jen'yadyety in ayo'bu'ye-dyedyety mu'. 21Ma'joij mu'in dáquity q̂uin' in ĉaĉaij na mu'in ra' räj so'mac in. Ma'joij mu'in tárity q̂uin' in, jäqui've ra' mu'in dyisi in. 22Ma'joij ra' mi'in muntyi' fáquinac yụ́dyes jụijya' in judyeya' ñäñinacya' yụ́dyes in, paj tsan' va'quicnac in judyeya' fạra'ñinac in yụ́dyes cäc̣hä'-chucdye'ya' Anictyity Muntyi' yụ. 23Aty ra' me'tyinac muntyi' jụijya' in, jam ra' tári mi'in, jị'cavetiñe' ra' mọmo' mọ' jäm'si' ma'jodye' mi'in, ĉaĉaij na aty mọ'ya' jä'mii'tyi' chäcdyis bijodyedyes so'minac mu' Jen' mạyedye'che'. Jesha', mu'in vóshi'vun utstyi' me'tyinactyi' q̂uin' in, me'dye mu'in chime' jiquej in me'tacsi in mu'in jaso'mitity p̂eyacdye' Jen' jiquej in. 24Där ra' ñịbe' cạvetiñe' q̂uin' mi'in jedye'tumtyi' mi'in, ĉaĉaij na me'qui'dye ra' ma'jodye' cạvetiñe' úche' q̂uin' mi'in. 25Där ra' ñịbe' cạvetiñe' mi'in so'mactyi' jedye' q̂uin' mi'in, yirisĉan ra' mạyedye' dáqui mi'in. Där ra' ñịbe' cạvetiñe' mi'in dyisity q̂uin' mi'in, yirisĉan ra' mạyedye' tári mi'in. 26Där ra' ñịbe' cạvetiñe' mi'in tima'quinactyi' q̂uin' muntyi' in, ĉaĉaij na me' mu'in jiquej vóshi'vun mu'in utstyi' muntyity in tima'cacsi in mu'in väñäijtyi' jiquej in, mu'in jeñej bu'yity jaso'mitity p̂eyacdye' Jen' ji'ĉutity in. 27Chime'dye yi mu' Jesús jéyacsi jiquej: —Se'vibutiĉam' jäm' ọij p̂eyacdye' yụ: Mạ'jeyacsejam' mu'in fáquinactyi' in, jäm'yejam' mọmo' mu'intum in. 28Cọdyemac Jen' mu'indyes in tyi chuc a'c̣his so'minactyi' p̂eyacdye' jụijya' in, judyeya' mu'indyes in me'tyinactyi' in. 29Chime'dye tyi chuc ĉatjinac jụijya' yirisve an, jemoñe' pären've ji'ĉattyeyetinte. Tyi chuc chutyinac jụijya' fajchety quị'si' mi'in, jam ra' quijatutyetinte mi'in camisamun chime' jị'cayemac. 30Tyi chuc cudyinac jedye' jụijya' mi'in, jam ra' quijatutyetinte mi'in. Chutyinac jedye' jụijya' mi'in, jam ra' cọdyetyebajtinte. 31Jemoñe' mi'in jäm'yedye'tum jäm'jeyacsi räj muntyi' in. Jesha' mi'in mạ'jetiñe' paj qui muntyi' in jäm'yedye'tum jäm'jinac in, me'dye ra' mi'in jäm'yedye'tum jäm'jeyacsi räj muntyi' in. 32Mi'in mạ'jeyacsi jụijya' mu'in mọmo' mạ'jinactyi' in, mọ' ra' jam jun' tima'cac mi'in, me'dye mọmo' mu'in dyijyi in mu'in chime' juchajtumtyi' muntyi' in, me'tyity mọmo' mạ'jeyacsi in. 33Chime'dye mi'in jäm'yi mọmo' mu'intum in mu'in jäm'jinactyi' in, mọ' ra' jam tima'cac mi'in. Me'dye mu'in juchajtumtyi' muntyi' in. 34Mi'in prestaj-jeyeyacsi mọmo' jụijya' mi'in mu'in ji'ca'ñiyibunactyi' in, mọ' ra' jam jun' tima'cac. Me'dye mu'in chime' juchajtumtyi' in, mu'in prestajjeyeyacsi mọmo' in mu'in ji'ca'ñeyeyacsity in. 35Mi'in na mạ'jeyacsejam' mu'in fáquinactyi' in, jäm'yejam' mu'intum in. Me' ra' tsan' jam ji'ca'ñiyibunac jedye' jụijya' mi'in, prestajjeyeyacsi ra' mọmo' mi'in. Me' jụijya' mi'in, därsi' ra' bijodye' so'mac mi'in jäqui've, judyeya' ra' ạva' mu' Jen'tyi' muju'chaty shupqui mi'in, ĉaĉaij na mu' jäm'jeyacsi ac̣hi'yity in, mu'in jam yoshoropaij yity in. 36Jemoñe' ñịbe' ĉọcsi mi'in, yojdyem' mi'intyi' Jen' u ñịbe' ĉọcsi muntyi' in. 37Chime'dye jéyacsi mu' Jesús: —Jam ra' ac̣hi' dyijtucsebi ĉojtyi'ĉan yoctyis dyijyedye' mu'in, mijam ra' p̂eijtacsebi juchaj mu'in, paj qui mu' Jen' jam dyijtubunac juchaj mi'in. Tyi chuc juchatunac jụijya' mi'in, jam ra' dyijtuva'bibajtinte juchaj mu', paj qui mu' Jen' vayacjibunac juchaj mi'in. 38Ñịbe'jeyacsi ra' muntyi' mi'in paj qui mu' Jen' ñịbe'jinac chime' mi'in. Muju'cha' ra' so'minac, dam'dye ra' mọjo'cha' ji'ca'ñeban' mu' Jen', dam'che' cäch ra' so'mac juban mi'in. Jun' quisĉan chuc tuputuyacsi so'macsi jiquej mi'in mu'in yoctyi' muntyi' in, me'quisĉandye ra' chime' Jen' ji'ca'ñiyibunac. 39Jesús jéyacsi jị'ĉocdyes p̂eyacdye', yi: —Yirity tofety jam jun' tapcapte un ji'mi'ete yoctyi' tofety muntyi', ji'mi'iti tsan' in, vaj me' to'ĉan tŝọij jọ'chaij in. 40Chime'dye mu' ji'chäyitity jam jun' muju'cha', uya'ya' mu' jị'chiyacsity mu'. A ra' chat ji'me'siyaquiya' ji'chäyitidye' mu' tupuj ra' cätste jị'chiyacsity mu'. 41¿Jun' buty me' cavin cạvacsebi mi yoctyis juchaj mu'in? Ĉụi'si' na jam jun' cạvaqui juchaj mi. Anic jeñej yirity muntyi' cavin nạijbite chätidyes miquis vejĉansi' patsacdye' mu', ĉụi'si' na jam jun' cạvaqui mọ' chäcdyis son vejĉansi' mu'. 42Yi jétinte chätidye' mi'in: “Jesha' yụ ra' jäcbibadyeye miquis vejĉansi' patsacdye' mi”, yi jétinte, ĉụi'si'ĉan qui nam' vej mi'in jam dyijtuqui mi'in, me' tsan' därsi' son mọ'ĉan, mijam mọ' chị́yaqui mi'in. ¡Anic ac̣hi' dyijyity mi'in, jäm' yu'ti tsan' mi'in! Jemoñe' tashche' chum ĉụi'si'ĉansi' vej jäcaqui mi'in, paj qui chuñem naijti mi'in paj qui tupuj jäcbibajtinte chätidyes mi'in mọ' miquis patsacdye' vejĉansi' mu'. 43Mọ' jäm'si' cätidye' jam jun' a'c̣hii' väshi', chime'dye mọ' a'c̣his cätidye' jam jun' jäm' väshi'. 44Mọ' cätidye' chị́yac ĉụi'si'che' väsh mọ'. Mọ' yutijtumsi' därä' jam jun' ji'shupque' higo, judyeya' chime' a'c̣his därä' jam jun' ji'shupque' ova. 45Me'dye mu' chime' muntyi', mu' rụijtyity muntyi' rụijsis dyijyedye' ji'shupque', ĉaĉaij na rụijsis me'chui' ĉojtyi'ĉan mu'. Mu' na ac̣hi'yity muntyi', mọ'dye ji'shupque' a'c̣his dyijyedye' mu', ĉaĉaij na mọ'dye ĉojtyi'ĉan mu'. Ĉaĉaij na jedye' chuc mọjo'cha' mọ'ya' ĉojtyi'ĉan, mọ' shupqui' chụ'ĉan p̂eyac. 46Chime'dye yi mu' Jesús jéyacsi: —Fibi' mọmo' jítiĉa' yụ mi'in: “Mi nash Ayo' tsun, mi nash Ayo' tsun”, me' jítiĉa' yụ mi'in, jam qui nam' méqui' chäquibutiĉam' yus p̂eyacdye' mi'in. 47Tyi chuc atsij yụ́ya' jụijya', se'vibun p̂eyacdye' jụijya' yus, judyeya' mọ' chäquibun jụijya' yụ in, mu' jeñej bu'yi 48yirity acaijtyi' muntyi'. Tashi fadye' mochĉan to', jun' qui' chuc cha'shete mu' mij, chat qui mu' jatapchuti yóche'dyem' pä' bu'yi'che' u, chat q̂uin'dyem' mọ'che' jäm'tye' aca' mu'. Me' qui tsan' ayij mọ' bänedye', jacha'shibuti tsan' aca' mu', mijam qui jun' yäcänjajibuti aca' mu', ĉaĉaij na anic dyich bu'yi' jäm'tye' mijche'. 49Me' buty tsan' se'vibun p̂eyacdye' yụ in, jam qui nam' chäquibun yụ in, mu'in ra' jeñej bu'yi yoctyi' acaijtyi' muntyi'. Mu' na jacche' mọmo' jäm'tye' aca', jam jäm' yụ'tye' cach bu'yi'che' mijam mij cha'shete. Aty ayijya' mọ' bänedye' jacha'shibuti aca' mu', fer tacjajibuti chat qui jajiva'chabuti aca' mu', räj patsac tŝọi' jọ'chai' mu'.

will be added

X\