Luke 5

1Yirisĉan mạyedye' mu' Jesús tsiquim'quedye've tsiques mọ' jịjcaij mu', Genesaret tịj mọ' tsiques. Anic dai' muntyi' ĉọshte in mạ'je' se'vepte in Jen'si' p̂eyacdye' mu', yódyesdyem' p̂eyes Jesús u. Mu'in muntyi' in vaj meij ta'quijcati in, mạ'je' tsan' c̣hẹi'ya'jete Jesús ĉúti in. 2Mu'che' mu' pärä' covamba nạijte jámanche', yạjquictyi' tạbitytyi' in, ĉaĉaij na c̣hico'naĉan sạji' mu'in. 3Mu' na Jesús yoctyi'che' covamba p̂ai'joij Simóntyi'che', chat qui Jesús jajiti: —Dam' majyaya' jéme covamba mi. Chat mu'che' qui p̂utsquen'yi, chat mu'chetucsi jị'chiyacsi muntyi' in. 4Aty me'si' mu' Jesús jị'chiyacsi chat qui Simón jajiti: —Jụdyej, q̂uin' chat majya' jịjcajam' mi'in, va'cajquicac sạji' q̂uin' mi'in, jeve'daĉam'. 5Vorjete Simón: —Me' buty, Jị'chiyacsity, a nash tsan' inoj dyutsen'je' tsedyedye' tsun jeve'daqui tsun mijam yiris jäque' tạbedye' tsun. Me' tsan' me', mis qui nam' p̂eyacdye' yi' q̂uin', tupuj va'queque' yụ. 6Me'dye va'cajquiqui sạji' mu'in, q̂uin'dyem' a ra' ji'ñicsi tạbedye' in, mạ'je' ver'yi' sạji' mu'in. 7Mọ'dyes qui vaijvaijjeyaqui pen'dye' mu'in yoctyi'chety covamba in. Mu'in qui atsij nọ́tacsi in. Pären'dye covamba bän'jeyacsi in, chajchajyi covamba yụ'taqui in, aty mạ'je' pechi in. 8Aty Simón cạvepteya' ferdye' mu' Jesússi', chat qui dyụtsyi mu'si'ya' vej mu', jéte: —Mi Jị'chiyacsity, pạrejyeva yụ́ya', ĉaĉaij nash yụ anic juchajtumtyi' muntyi'. 9Simón judyeya' pen'dye' mu' anic där irijyi in cạve' mọ' tạbedye' in. 10Chime'dye mu' Santiago, judyeya' Juan, Zebedeoty ạva' mu', mu'in carijtaquity yiri'ya' in Simóntum in, chime'dye mu'in tạbedye' cạve' in anic mu'in irijyi in. Jesús jajiti Simón: —Jam ra' noi'yi mi, úya' qui' ra' yacchuti mi tạbacsity ra' muntyi' yụ'tyeye. 11Me'dye sojquiti in, räj farajjeyactaqui jedye' mu'in, chat qui cäc̣hä'chute Jesús in. 12Yirisĉan mạyedye' mu' Jesús yocsi'ĉan bä'yedye'. Atsij yirity japacjoijtyi' muntyi', räj bayi'yitaquity a' mu'. Nạijte mu' Jesús ĉọsh tyeij ĉọshte mu', mu'ya' dyụtsyi cọdaqui mu'che' jéte: —Jị'chiyacsity, me' buty jụjyi mi, jäm'jibubun' a' mi. 13Me'dye mu' Jesús toco'jajiti unya' mu', jajiti: —Mạ'je' yụ, —jajiti—, jäm'jobada. Me'ĉandye jäm'joban' mọ' bayi'yidyem'. 14Yi Jesús jajiti: —Jam ra' jị'chiqueyacsi mi yoctyi' in, tạij mu'yam ji'cavicda mi cudyitityya' Jen'che', mu' ra' chäyibun a' mi, chat qui ra' cạyete cu'dyem, yoj yidyem' Moisés jiquej u. Mọ' ra' jị'ĉocdyes muntyisya' vej mu'in aty jäm'joban' bayi'yidye' jiquej mi —yi Jesús jajiti. 15Me' tsan' jam mạ'je' Jesús, yejĉoij qui nam' jị'chiqueyacsi in, räj mu'in pai' bä'yity in se'vaqui in. Dai' vatyquej tyeij atsij muntyi' in mạ'je' se'veshbite p̂eyacdye' in, jätäjyi chuc mu', chime' mu'in mạ'je' in paj qui ji'chäcacseban are'redye'ya' mu'in. 16Mu' qui nam' Jesús räjĉan cäjya' jịjcaij, cọdaqui Jen'che' mu'. 17Yirisĉan mạyedye' mu' Jesús jị'chiyacsi muntyi' in. Pạrej mu'ya' chime' fariseo in judyeya' jị'chiyacsity yụ'tacdye' in Jen'si' mu', mu'in pạrej Galileaĉansi' bä'yedye' atsijtyi' in, judyeya' pạrej Judeaĉansi' bä'yedye' atsijtyi' in judyeya' pạrej Jerusalénĉantyi' chime' in, mu'ya'dye mu'in chime' in se'vepte p̂eyacdye' in. Mu' na Jesús me'chupte Jen'si' ferdye' mu' paj qui tupuj ji'chäcacseban muntyi' in. 18Yirity muntyi' turacdye'che' tute in punichjoijtyi'. Mạ'je' tsan' chụi' bu'yi ji'siste in mu'si'ya' vej mu'. 19̣Q̂ui'chiij qui nam' mu'ĉan in, jam jun'yi in. Chat qui bojvi in fajche' aca' in, tai'ya' qui aca' cóshe' in, mu'ya' quiĉhen' jị'chate turacdye'che' in, Jesússi'ya' vej mu' jị'tŝote in. 20Jesús aty me' cạvacsi jun' chuc fer anicjete in, mọ'dyes qui jajiti mu' punichjoijtyi' muntyi': —Yụ jéye chätidye' yụ, q̂uin' aty vayac juchaj mi. 21Mu'yaty na fariseo in judyeya' mu'in jị'chiyacsity yụ'tacdye' Jen'si' in, me' dyijyi mu'in in, yi ĉojtyi'ĉan in: “¿Jun' buty me' yi uts muntyi'? Anic ñinacdye' Jen'dyes shupqui' mọ' p̂eyacdye' mu', jeñej Jen' yu'ti mu', ĉaĉaij na yirity mọmo' mu'ya' Jen' mu' tupuj vayacjibusin'tyi' juchaj muntyis tsun.” 22Mu' na Jesús chị́yacsebi a'c̣his dyijyedye' mu'in. Jéyacsi: —¿Jun' me' dyijyi ĉojtyi'ĉan u mi'in? 23¿Jụ'ñis buty carij ĉọ́tiñe' mi'in, are' vayac juchaj utssi' mu', are' chäĉän mu'? ¿Are' jéte yụ “Aty vayac juchaj mi”, jam jụijya', are' jéte yụ: “Sacyebada, mi'ebada?” ¿Jätäjyi mi'in u? 24̣Q̂uin' ra' jị'caveyeyac yụ jun' chuc yụ ferdye' so'mac paj qui vayacjetyetacsiij juchaj jacchetysi' muntyi' in, ĉaĉaij nash yụ Anictyity Muntyi' yụ. Chat qui jajiti mu' punichjoijtyi' muntyi': —Sacyebada, tapjebada' jubij mi, tạij aca'ya' jịjcabada mi —jajiti Jesús. 25P̂eyacdye'ĉandye mu' punichjoijtyi' muntyi' jiquej sacyeban tapjeban' jubij mu' mu'insi'ya' vej mu'in, chat qui jọban aca'yam' titima'quebajte Jen'. 26Där äjyi muntyi' in, anic irijyi in chitima'quetedye Jen' mu'in in, yi jítidyeij in: —Anic där äjyeja' cạvejas q̂uin', jam jäm'dyeya' me' jo'mes cạveja' jiquej. 27Aty me'si' yạjquicseban. Cạvete yirity muntyi', Leví tịj mu', mu' tsim'tety querec̣ha Romaĉantyidyety ayo', yóĉandyem' tsim'teĉan querec̣ha u, mu'ĉan bä'va'joij. Jesús jajiti: —Cäc̣hä'chuti' ram. 28Sacyi mu' Leví farajjetaque' tashches dyijyedye' mu', chat qui cäc̣hä'chute mu' Jesús. 29Yirisĉan mạyedye' mu' Leví jäm'tye' därsi' feshta Jesúsdyesi'. Chime'dye atsij mu'in in tsim'tety querec̣ha in dai' in, judyeya' yoctyi' chime' muntyi' in, mu'inmun mu'ya' che'yeij chime' mesaya' in. 30Fariseo pạrej in judyeya' mu'in jị'chiyacsity yụ'tacdye' Jen'si' in, chifariseodye mu'in in, jam mu'in jäm' ĉọi' in, mọ'dyes jepte in jị'chiyactyi' Jesústyi' mu', yi in: —¿Jun' dash me' mi'in tsim'tetytum querec̣ha säcsi mi'in judyeya' juchajtumtyi' chime' in? 31Jesús vorjeyacsi: —Jesha' muntyi' räshtyi' jam jun' jemonte mu' pịñitucsity, mu' na japacjoijtyi' mu' chat jemonte. 32Me' bu'yidye yụ chime', atsij yụ jam rụijtyity-dyety muntyi' in, yụ atsij juchajtumtyidyety in judyeya' jéyacsi yụ paj qui mu'in dyijyi juchajche' in. 33Pạrej muntyi' in jéte in mu' Jesús: —Jị'chiyactyi' Juantyi' mu' judyeya' fariseoty chime' mu'in, mu'in räjĉan cọdaqui Jen'che' in yịñijdye'tum Jen'si'ya' vej in. Uts qui nam' in jị'chiyactyi' mi jam me' in, mu'in jam dam' yịñij cạve' in. ¿Jun' buty me' mu'in in? 34Jéyacsi Jesús: —Mu'in feshtaijtyi' in vämitydyes in jam mu'in tupuj yịñij Jen'dyes in, mijam jị'ĉoqui táredye' mu'in taca'dyem' mu'ya' jụijya' mu' vämity muntyi'. Taca' mu'ya' mu' mijam jun' yịñij in. 35Me'dye yụ chime', a qui na ram' ayijya' tupudye' yụ́dyes, jäcac ra' yụ juban, me'qui'dye ra' pen'dyetucsi yụ uts in, chat qui ra' q̂uin'dyem' tári in uts jị'chiyactyi' yụ judyeya' yịñij bu'ban in. 36Chime'dye jéyacsi ọij jị'ĉocdyes p̂eyacdye', yi mu': —Jesha' ishoijtyi' quị'si' shẹi'joij jụijya', jam dam' raptac mụi'tyityya' quị'si'. Me' jụijya' mu', ac̣hi'joij shupqui mu' mụi'tyity, judyeya' chime' jam jäm'jajiti mu' isho'. 37Chime'dye muntyi' in mijam jun' bijtye' in mụi'sis tyédye' vino urucyasĉan sho'pa'. Me' jụijya', mọ' qui na ra' pashi'ya' tyédye', topje' ra' mọ' sho'pa', mọ'tumdye ra' moñi' sho'pa'tum. 38Jemoñe' bijtac mụi'sisĉan sho'pa' mọ' mụi'sis tyédye' paj qui jam me'jajiti' mọ'.81 39Chime'dye tyi chuc tyeij jụijya' urucyas tyédye', jam mọ' mạ'je' mọ' mụi'sis tyédye'. Yi in: “Dadam' mọjo'cha' jäm' tyec mọ' urucyas vino”,82 —jéyacsi Jesús.

will be added

X\