Luke 24

1Nojno mạyedye' dọmicoya' pam'dye, sacti' mọ'in p̂en in, ru'dyei'ya' jịjcai' in. Cạqui' in tai'tacdyes jẹrejres a'dyes mu' Jesússi', mọ' jämi'tyes jiquej in. 2Venjoi' mọ'ya' in itŝij mu'ya' dạquicte to'yaty mij in, aty muju'va' tac jiquej vancai' mọ' to'. 3Aty siti' mọ'ĉan in, aty itŝi' méquis mọ'ĉan atsvun Jesússi' a' mu'. 4Itŝi' dyijdye' tyei' mọ'in. Pärä' vatyquej muntyi' mu'ya' ji'caviti in, rụi'cujcuquen mu'ya' in, anic pashyityĉantyi' quị'si' mu'in. 5Mọ'in na p̂en in tyum' tyeij ĉojtyi' mọ'in, dyụtsyi' qui mu'insi'ya' vej in, täjjeque' jac jáfiya' mọ'in. Mu'in na muntyi' in jéyacsi in: —¿Jun' ca' quevtinte mu' tsạ'tyi' muntyi' úya' yóya'dyem' yụ'tac säñity u in? 6A nash itŝij úya' mu' Jesús, aty nash vañinyebadaque mu'. ¿Jam adac dyijtubibajtinte p̂eyacdye' mu' jínacsi' jiquej taĉandyem' Galileaĉan jiquej? 7Yi jiquej mu': “Yụ Anictyity Muntyi' ji'me'tac ra' yụ ac̣hi'yityya' muntyi' in, mu'in ra' pactyin croshche' yụ in, chibin ra' mạyedye' me' bu'yi yụ chat qui ra' vañinyeban yụ”, yi mu' jiquej jínac —me' jéyacsi pärä' anjer in. 8̣Q̂uin'dyem' dyijtubibajte in p̂eyacdye' mu' jéyacsis jiquej. 9Chat qui ca'ñibun' in ĉọcseshan' in mu'in jutactyi' Jesústyi' mu' yiri'tac yirity jiyity in, jéyacseban' räj in jun' chuc ji'caviti' mu'ya' in. Chime'dye yoctyi' jéyacsi' in mu'in cäc̣hä'chutety chime' in. 10Mọ'in p̂en jéyacsis in tịj mọ'in: María Magdalena judyeya' Juana judyeya' Santiagos tse' mu' María, judyeya' yocsi' p̂en chime' mọ'ya' in. 11Mu'in na jutactyi' mu' mijam méqui' mu'in anicyi in, jeñej fibis p̂eyacdye' ĉọcsebi in. 12Mu' na Pedro sacyi, shuj tyeij mu'ya' jịjcaij ru'dyei'ya'. Venjoij mu'ya', vụdui'yi cạvi mu'ĉan, itŝij mu'ĉan to'ĉan, comon' tacya' jiquej, mu'dyety mu'ĉan. Ca'ñibun aca'ya' jijtuban där äjyi mu' jun' chuc ji'caviti. 13Mọ'dye mạyedye' pärä' mu'in cäc̣hä'chutety Jesús in mu've jịjcaij in Emaúsve. Mọ' Emaús jam moch bu'yi' Jerusaléntum, yiri'tac yiris jiyi' quirometro mọmo'. 14Mu'in p̂ep̂eyacjoij in p̂eye' räj in jun' chuc me'jete Jesús in. 15Taca' p̂ep̂eyacjoij in cha'shacsi vatyquej mu' Jesús, pen'dyetucsi. 16Me' tsan' mu'in cạvete in, jam qui nam' chị́yete in, ĉaĉaij na jam chäte' bu'yi' mu'indyes in. 17Jéyacsi Jesús: —¿Jedye' ca' p̂ep̂eijtutiñe' majmiya' mi'in? Dyäcyi in, jäm' yocdyejyi vejya' in. 18Mu' yirity Cleofas tịj mu', jéte Jesús: —¿Mi adac mọmo' yirity Jerusalénĉantyi' jam chịj jun' chuc jiyi' ọ́ĉan ọij q̂uin' mạyedye' in? —yi jéte Jesús. 19Jéyacsi Jesús: —¿Jedye' ca' jiyi'? Vorjete in: —Jun' chuc ji'caviti Jesús Nazaretĉantyi', mu' jaso'mitity p̂eyacdye' Jen'. Ferdye'ya' mu' voro'tacsi muntyi' in judyeya' chime' därsi' ferdye' jị'caveyacsi, mọ' jị'ĉoi' mu' Jen' jama'jotyiti mu', judyeya' chime' muntyi' in ma'jotyete in. 20Me' tsan' me' mu'in ayo' tsun, mu'intumdye in tashche' cudyitity Jen'che' in, mu'in qui nam' ji'me'te in Romaĉantyi'ya' paj qui mu' ji'ijacdyes p̂eyacdye' yụ'tyeyete, chat qui pactac croshche' in. 21Tsun jeñej ji'c̣honsin'tyi' ra' tsun Israeltyi' vóshi' tsun, me' ĉọ́te tsun. ̣Q̂uin' aty chibin mạyedye' tyiti me'jete ijate in. 22Chime'dye därsi' äjyedye' so'min tsun mụi'. Pam' pạrej p̂en in pen'dye' tsun ru'dyei'ya' jịjcai' in, 23aty jam dạquicbite in a'vun mu'. Ca'ñibun' in jíshun tsun in jun' chuc anjer ji'caviti mọ'indyes in, jéyacsi in: “Tsạ' nash mu'.” 24Yoctyi' qui pen'dye' tsun chimu'ya'dye jịjcaij ru'dyei'ya' in. Chime'dye mu'in in me'dye dạquique' in mọ' to', itŝij dạquicte mu'ĉan in —jéte in. 25Aty se'vacsebiya' p̂eyacdye' Jesús jéyacsi: —Anic itŝi' dyijyedye' mi'in, anic yäcäj ĉojtyi' mi'in, jam méqui' anicjeyacsebi mi'in sánacdye' mu'insi' in jaso'mititysi' p̂eyacdye' Jen' jiquej in. 26¿Jam adac chịj mi'in tashche' chum ra' mu' Ji'c̣honacsity muntyi' jị'ĉojtye' chum ra' räj ọij ñịbedyes q̂uin', chat q̂uin'dyem' ra' so'mac ayo'bu'yedye' mu'? —jéyacsi Jesús. 27Mu' qui räj jị'chiqueyacsi sánacdye' in, jap̂eijdyis mu', tiyacchui' Moiséssi'ĉansi' sánacdye', me'dye jäqui'vesĉan qui' sánacdye' mu'in jaso'mititysi' p̂eyacdye' Jen' in, räj jị'chiqueyacsi mọ' p̂eyacdye' jap̂eijdyis mu'. 28Venjoij bä'yedye'ĉan in, jeñej ra' tsan' jiyi ĉúti mu' Jesús. 29Mu'in qui nam' nọ́te in jéte in: —Dyäqueva tsuntum, atyu' u yómoyeja'. Jụjyi sitacsi mu' mu'ĉan dyäqui. 30Aty mesaya' bä'yi, mu' Jesús tapjete mu' pan, yoshoropaij jéte Jen', q̂uemi'vete qui, chat qui so'macsi. 31̣Q̂uin'dyem' chị́yete in se'yi ĉojtyi'ĉan in. Mu'ya'dye tyäpä' monjan mu'. 32Mu'in na jíti in: —Där se'yeja', anic jiyi' ĉojtyi'ĉan ma'jodye' tsun jísin'ya' majmiya', ji'chäquiyisin'ya' sánacdye' —jíti in. 33Cavintum ca'ñibun in chimu'ĉan jijtuban in Jerusalénĉan. Dạcacseshan in aty tsudyujñiti in mu'in jutactyi' Jesústyi' in, yiri'tac yirity jiyity in, judyeya' yoctyi' pen'dye' chime' mu'in. 34Yi mu'in in jutactyi' in jéyacsi mu'in pärä'tyity in: —A nash vañinyeban Ayo' tsun, ji'caviti utsya' Simónya' —jéyacsi. 35Mu'in pärä'tyity yi in: “Mu' Jesús majmiya' ji'caviti tsunya', aty q̂uemi'veteya' pan q̂uin'dyem' chị́yebajte tsun”, jéyacsi in. 36Taca' p̂eyacva'joij in vátyequej ji'caviti mu' Jesús mu'ya', ĉụi'dye rụi'cujcuj shupqueti. Vorjeyacsi jéyacsi: —Jam ra' jo'meque'queij cajotyiti mi'in. 37Mu'in na itŝijyi in, tyum' tyeij ĉojtyi' mu'in, jeñej onojnodye' ĉọi' in. 38Mu' na Jesús jéyacsi: —¿Jun' dash me' noi'yi mi'in? ¿Jun' dash me' yocve dyijyi ĉojtyi'ĉan mi'in? 39Jesha', cavibutiĉam' un yụ judyeya' yuj yụ, yụ́dye nashu', toco'jibutiĉam' a' yụ, chat qui ra' chäyitiĉa' yụ mi'in a'tum yụ. Onojnodye' jam nash a'tum jam jeñej yụ —jéyacsi. 40Aty me'si' jéyacsi, jị'caveyacsi qui un mu' judyeya' yuj mu'. 41Anic äjyi mu'in in, jäm' tsan' ma'joij in, taca'dye qui nam' jam anicyi in. Chat qui cọdyetacsi säcsedye'. 42So'mete in tạbedye' faratucsi', 43tapje' mọ' jebei' mu'insi'ya' vej in. 44Chat qui mu' jéyacsi: —Mọ' jị'ĉojtyes yụ ñịbedyes, mọ' nash mọ' ji'chiqueyeyacsi' yụ taca'dyem' mi'intum yụ jiquej. Mọ' ra' tupuj cạ̈tsi' jiquej, räj jätäjyi' chuc sánac p̂iyin jiquej yụ, Moisésĉansi' sánacdye' judyeya' mu'inĉansi' jaso'mititysi' p̂eyacdye' Jen' in, judyeya' salmosĉansi' sánacdye', me' aty cạ̈tsi' yụ́dyes q̂uin' mọ' sánacdye' —jéyacsi Jesús. 45Aty me'si' jéyacsi, chat qui mạijchucsebi dyijyedye' mu'in paj qui chicacsive in jedye' chuc mọ' cại' in sánacdye' in. 46Jéyacsi: —Yi' mọ' sánacdye': “Ijac ra' mu' Ji'c̣honacsity muntyi', chibin ra' mạyedye' me' bu'yi chat ra' me'si' vañinyeban mu'.” 47- 48Mi'in q̂uin' ĉụi'si'ya' vej mi'in cavibutiĉa' yụs ñịbedyes mi'in, mọ'dyes qui yụ́si'che' ra' tịj räj jéyacsi mi'in úche' jacchety muntyi' in, pai' bä'yity in, tiyacchui' ra' mi'in Jerusalénĉan. Jéyacsi ra' mi'in paj dyijyi juchajche' in, chat qui ra' vayac juchaj mu'in. 49Yụ ra' juteyeyac Jen'si' Ạ'edye' mu', yoj yidyem' Jen' jiquej u, so'minac ca ra' mi'in. Taĉan chum ra' úĉan mi'in Jerusalénĉan bistiñe', jun' qui' chuc so'macya' mi'in me' mạyedye'ches ferdye' mi'in, chat q̂uin'dyem' ra' pai' jịjcaij mi'in. 50Aty me'si' mu' Jesús jorojya' Jerusalén cạqui jị'chiyactyi' mu', Betaniave qui jịjcaij in. C̣họco'jeyaqui un mu', cọdyete Jen' paj qui mu' ñịbe'jeyacsi. 51Taca' cọdacva'joij Jen'che', cọdacdye'ĉandyem' Jen'che' yạjquicseban jácabun mạyedye'che' mu' Jen'. 52Me'dye tima'quetacte in chat qui ca'ñibun in Jerusalénĉan jijtuban in, ma'jodye'tum in. 53Räjĉan mu'ĉan bu'yi in Jen'si'ĉan aca' mu', yejĉoij mọmo' tima'quete Jen' in.

will be added

X\