Luke 23

1Sacyi in mu'in judíoty ayo' mu'in, Pilato ĉọcte in cạte Jesús in. 2Pilatosya' vej mu' ji'me'te in mu' Jesús, mu'ya' jéte in: —Tsun nash uts cạvete muntyi', mu' sac ja'yacsi chätidye' tsun paj qui yoc dyijyi in. Ji'chäyitidye'ĉan jin tsun: “Jam ra' jiya'dyeyetinte querec̣ha mu' Romaĉantyi' ayo'.” Chime'dye yi mu': “Yụ nash Ji'c̣honacsity muntyi', ayo' muntyity in”, —jéte in mu' Pilato. 3Yi qui mu' Pilato jéte Jesús: —¿Mi adac judíoty ayo' mu'in? Vorjete Jesús: —Me' nash yụ yoj yidye' bu um. 4Chat qui yi mu' Pilato jéyacsi mu'in tashche' cudyitity Jen'che' in judyeya' räjen'dye mu'in mu'yaty in. Jéyacsi: —Mijam méqui' dạcbite yụ juchaj utssi' muntyis mu'. 5Mu'in na muntyi' in dadam' mu'in muju'cha' jéte in: —Uts nash sac ja'yacsi muntyi' in ji'chäyitidye'ya' mu', räj bu'yi ọij jac Judea jị'chiyacsi, tiyacchui' Galileaĉan, chat úve qui jijtuij jị'chiyacsi muntyi' in —jéte in. 6Se'vacsebi Pilato p̂eyacdye' mu'in, mu' qui jéyacsi: “¿Galileaĉantyi' ca' uts Jesús?” 7Vorjete in: “Mu'ĉantyi' nash.” Chị́qui mu' Pilato, mu' qui jéyacsi: “Herodesya' cạmac uts muntyi'”, yi, ĉaĉaij na mu' Herodes Galileaĉan ayo'bu'yi.100 Mu' Herodes aty mu'ĉan mu' Jerusalénĉan. 8Mu' Herodes aty jacavitiya' mu' Jesús anic ma'jotyete mu', ĉaĉaij na aty men se'vacsi jun' chuc p̂eijte mu' Jesús in, mạ'je' tsan' fer cạvete Jesús, judyeya' chime' mạ'je' cạvetyete ferdye' mu'. 9Mu' Herodes dai' qui' tsan' cọdyetyete p̂eyacdye' mu' Jesús, mijam qui nam' méqui' voryi mu'. 10Chime'dye mu'ya' mu'in in tashche' cudyitity Jen'che' in, judyeya' mu'in jị'chiyacsity yụ'tacdye' in. Mu'in ĉọshte in Herodes, mu'ya' ji'me'te in mu' Jesús, yi in: “Anic nash därsi' juchaj utssi' mu'.” 11Mu' na Herodes judyeya' väc̣hä'tyity mu' äcäijjete Jesús in, majmatute mọmo' in. Ayotyĉan quị'si' jị'quite in paj qui dyisa'yi ĉọ́te in. Aty me'si' majmatute in, chat qui mu' Herodes jéyacsi paj qui ji'ca'ñeyebajte in Pilatoya'. 12Mu' Pilato judyeya' mu' Herodes vaj meij fáquiti tsan' jiquej in, mọ'dye qui nam' mạyedye' jäm'jibun quivij in. 13Pilato fayacsi vajmu'ya'jeyacsi mu'in tashchety cudyitity Jen'che' in judyeya' judíoty ayo' in judyeya' yoctyi' in. 14Jéyacsi: —Mi'in tuyitiĉa' mi'in uts Jesús, jítiĉa' tsan' yụ mi'in: “Uts a'c̣hisya' p̂eyacdye' sac ja'yacsi muntyi' in.” Mọ'dyes yụ cọdyetyete p̂eyacdye' mi'insi'ya' vej, itŝi' méquis dạcbite juchaj yụ útssi' mu', jam na me' yojdyem' ji'me'tinte u. 15Chime'dye mu' Herodes jam jun' dạcbite juchaj mu', mọ'dyes qui mu' ji'ca'ñebajte tsunya'. Mijam mus méquis juchaj ji'ujacdyes mu'. 16Mọ'dyes yụ ra' ji'si'bete fer útsi chat qui ra' farajjebajte yụ —jéyacsi Pilato muntyi' in. 17Yicdye'dye me' mu' Pilatos räjĉan cha'she'ya' mọ' feshta in Ji'c̣honacdyedyes, ji'c̣honte yirity ĉär'tactyi' muntyi'. 18Mọ'dyes qui vaj cäts fer p̂eyaqui jéte in: —¡Paj ijac uts muntyi'! Tsun cọdyeyac paj Barrabás farajjebajtem. 19Uts Barrabás chutity ayotytum väc̣hä'tyity Jerusalénĉan jiquej, judyeya' chime' ijate muntyi', mọ'dyes ĉär'taquisĉan yụ'tac jiquej. 20Pilato mạ'je' tsan' ji'c̣honte mu' Jesús, mọ'dyes qui quivij tsan' jéyacsi muntyi' in. 21Mu'in qui nam' muntyi' in jam jun' jụjyi in, fer mọmo' p̂eyaqui in, jéte in: —Uts pacme croshche', uts pacme croshche' —yi mọmo' in. 22Chibin qui' mu' p̂eyeyacsi Pilato jéyacsi: —¿Jedye' ca' juchaj mu'? Jam méqui' dạcbite juchaj yụ ji'ijacdyes mu'. Mọ'dyes yụ ra' ji'si'bete fer chat qui ra' q̂uin'dyem' farajjete yụ —jéyacsi Pilato. 23- 24Mu'in na yejĉoij cọdyeva'te in paj qui jụjtacsi judyeya' paj qui pactac croshche' mu'. Yejĉoij äjnaqui in jun' qui chuc jụjtacsi Pilato. 25Chat ji'c̣honte mu' Barrabás jun' chuc cọdyetyete in. Barrabás chutity ayotytum väc̣hä'tyity jiquej judyeya' chime' ijatety muntyi'. Chat qui mu' Pilato jụjtacsebi muntyis dyijyedye' mu'in, yojdyem' mạ'je' ji'pacte mu'in u in. 26Väc̣hä'tyity in cạte in mu' Jesús yóya'dyem' ra' pactac u, mu'ya' jịjicayete in. Aty meij jịjcaij in rébete yirity muntyi' in, Simón tịj mu', Cireneĉantyi' mu', jorojyaty bä'yedye' atsij. Mu'in väc̣hä'tyity in mu' qui ji'vemeyete in crosh, mu' qui vemepte cäc̣hä'chute mu' Jesús. 27Shach muntyi' cäc̣hä'chute in. Chime' dai' p̂en in fer tári' in tárete Jesús in ñịbe' ĉọ́te in. 28Jesús caman' cạvacseban jéyacsi: —Mi'in Jerusalénĉansi' p̂en mi'in, jam ra' táritiĉa' yụ mi'in. Ĉụi' ra' táriti' mi'in judyeya' ạva' mi'in 29ĉaĉaij nash ra' tupudye' venchui' ñịbe'yejoij ra' muntyi' in. Yejoij ra' muntyi' in: “Dadam' ma'jodye'tum mọ'in särä' bu'yis p̂en in judyeya' itŝisdyem' ạva' in, paj qui jam ñịbedyes jị'ĉojtye' ạva' mọ'in.” 30Muntyi' ra' yi in jéte ra' mụcu' in: “Vai'naca rudyu'jitiĉam' tsun, jijmu'sitiĉam' tsun”, jéte ra' mụcu' in. 31Yụ, me' tsan' itŝity juchaj yụ, mu'in qui nam' me'tyin yụ in, jeñej tsạ'si' son carij co'shai' me' bu'yi yụ. Dadam' ra' muju'cha' ñịbe'tyinac mi'in in juchajtumtyi', jeñej chañes son jam carij co'shai'si' me' bu'yi mi'in —jéyacsi Jesús. 32Chime'dye cạcsi in pärä' ac̣hi'yity muntyi' in, mu'inmun chime' Jesústum pactac in. 33Miquity mụcu' cha'shete in, “Jo'no'vunya'” jéte muntyi' in. Mu'che' pacte in croshche' mu' Jesús judyeya' mu'in pärä' ac̣hi'yity in chime' yoctyi'che' crosh pactac mu'in in, yirity tacve yụ'tac yoctyi' q̂uimve yụ'tac. 34Jesús cọdyete Jen' jéte: —Yụ́tyi' Jen', jam ra' dyijtucsebim juchaj mu'in jun' chuc jäm'taqui uts in ĉaĉaij na itŝi' dyijyedye' mu'in me'jin yụ in —jéte. Mu'in na väc̣hä'tyity in ji'chetepte in quị'si' Jesústyi' mu', majmadye'ya' yi in tyi a ĉa bíjoij, me' yi in. 35Mu'in muntyi' in mu'ya' cạvacseva'joij in. Mu'in na judíoty ayo' mu'in dyisacte mu'in Jesús in, yi in: —Uts ca baja' ji'c̣honacsi yoctyi' muntyi' in. Ji'c̣honacsity muntyi' jụijya' mu', tsim'tactyi' Jen'tyi' jụijya' mu', ¡paj ĉụi' ji'c̣honti q̂uin'! —jíti in. 36Mu'in na väc̣hä'tyity in dyisacte chime' in. Ji'tyete tsan' in va'cacsi' tyédye' vino. 37Jéte in: —Mi judíoty ayo' jụijyam, ĉụi' ji'c̣honta q̂uin' —jéte in. 38Jo'no'che' croshsi' mu' yụ'tyeyete sánacdye' in, yi': “Uts nash judíoty ayo' mu'in.” 39Yirity ac̣hi'yity pactactyi' mu'chetute meij fạra'ñete mu' Jesús, jéte: —Ji'c̣honacsity muntyi' jụijyam, ĉụi' ji'c̣honta q̂uin', tsun chime' ji'c̣hontiĉam' úchety —jéte. 40Mu' na yoctyi' ac̣hi'yity dyäcjeĉun'bite p̂eyacdye' mu', jéte: —¿Jam adac irijyi Jen'chem? Tsun chime' jo'mes va'tacdye' cạja', yojdyem' uts Jesús u. 41Anic qui nam' rụij me' pacsin' tsun in, mọ' juchaj ĉụi'si' tsun mọ' ji'me'sin', útsi na muntyis itŝi' méquis juchaj mu'sim' —jéyaqui pen'dye' mu'. 42Chat cächyi jéte Jesús: —Aty ayo'bu'yedye'ĉan jụijya' mi Jesús, dyijtuti' ra' yụ mi —jéte. 43Vorjajiti Jesús: —Yụ jéye, q̂uin' ra' mi yụ́tum yiri'ya' jäm'si'che' bä'yedye' tsun —jajiti. 44- 45Aty quichĉan tsun cha'she' in, tyum'joij tsun, tomaj tuqui' räj bu'yi' jac chibin hora, me'qui' tomaj bu'yi'. Mu' juñum bu'yity quị'si' Jen'si'ĉantyi' aca' ĉụi'dye vatyquej choc tyeij. 46Fer äjyi mu' Jesús p̂eyaqui, jéte Jen' mu': —Yụ́tyi' Jen', a nash so'meye ạ'edye' yụ. P̂eyacdye'ĉandye tyum' tyeij mu' Jesús säñi. 47Mu' väc̣hä'tyitytyi' ayo' mu'in Romaĉantyi' in aty cạvepte sän'dye' mu', chat mu' q̂uin'dyem' tima'quete Jen', yi: —Anic rụijtyity uts muntyi' jiquej. 48Mu'in na mu'yaty in cạveva'tety Jesús in jọban mu'in in, pä'jitacdyi unya' e'feya' mu'in ĉaĉaij na táristum jọban in. 49Mu'in chị́yetety Jesús in tacya'dye mu'in in ji'yajcabun in, moch bu'yi mu'in in meij cạveva'joij in. Chime'dye mọ'in p̂en Galileaĉan ayijsi' in cäc̣hä'chutes Jesús in, mọ'in chime' tacya' ji'yajcabun' in. 50- 51Mu'ya' jiquej yirity muntyi' José tịj mu' Arimatea-ĉantyi' mu', Judeaĉansi' bä'yedye'. Anic mu' jäm'yity judyeya' rụij bä'yity chime', mu' bisva'bite tupudye' Jen'si' mu' ayo'bu'yedyes mu'. Me' tsan' mu'ĉantyi' in tashche' yụ'tactyi' judíoty mu'in, mu' qui nam' jam jäm' ĉọĉsebi dyijyedye' mu'in me'jetety ra' Jesús in. 52Chat qui mu' José ĉọcte mu' Pilato, cọdyetyete Jesússi' a' mu', mu' ca ra' nạpte. 53Jụjte mu' Pilato. Mu' qui José jị'chabajte croshchety, chat comon'bite a' in yirity tyä'väty quị'si' lino, judyeya' qui rudyu'jete fadactyi'ĉan mij. Anic mụi'sisĉan to' yụ'te, jambi' yirity nạc mu'ĉan sänity. 54Mọ' mạyedye' viernesh, mọ' je' in: jäm' yu'tidyes mạyedye', aty c̣hẹi'ya' mọ' mạyedye' jị'jutyitidyes. 55Mọ'in na p̂en Galileaĉan ayijsi' in cäc̣hä'chutes in mu' Jesús, mọ'in jịjcate José in cạvepte in a' mu', jun' bu'yi' chuc mu' yụ'tac to'ĉan mu'. 56Aty me'si' chat qui jọban' in acatuban' in. Jäm' yụ'taqui' in jẹrejres tai'tacdyes ra' a' mu' Jesússi' mu'. Chat qui jị'jutyiti' in ĉaĉaij na aty tŝọi' mọ' mạyedye' jị'jutyitidyes, me' jị'cätse' in yụ'tacdye' Jen'si' mu'.

will be added

X\