Luke 22

1Aty ra' c̣hẹi'ya' cha'she' in mọ' feshta pan jam ji'dujraquistumtyi', yocsi' tịj mọ' Ji'c̣honacdyes feshta. 2Mu'in tashche' cudyitity Jen'che' in, judyeya' mu'in jị'chiyacsity yụ'tacdye' in, mạ'je' tsan' mu'in ji'ijate mu' Jesús in, quijnacsi qui nam' muntyi' in. Dyijyi in jun' bu'yi chuc ra' caminve ji'ijate in mu' Jesús. 3Chat qui mu' Satanás jasäsdyi mu' Judas, jị'chiyactyi' tsan' mu' Jesústyi' mu'in yiri'tac pärä' jiyity in. Mu' jétety in: Judas Iscariote. 4Mu' ĉọcsequi tashche' cudyitity Jen'che' in judyeya' mu'in yụ'tactyi' ĉọjcai'tyi' Jen'si' aca' in. Jéyacsi mu' jun' bu'yi chuc ra' mu' ji'mincayacsi Jesús. 5Anic ma'jotyepte dyijyedye' in, jéte in: “Jụdyej, tsun ra' so'meyac querec̣ha.” 6Judas jụjtacsebi p̂eyacdye' mu'in, mu' tiyacchui' dyijyi queve' jun' bu'yi chuc ra' caminve so'macsi mu' Jesús paj qui tapjete in. 7Aty tŝọi' mọ' feshta pan jam ji'dujraquistumtyi', yoqui'dyem' ji'co'shaye' Jen'dyes u in mọ' oveca Ji'c̣honacdyes. 8Jesús jutaqui pärä' jị'chiyactyim', Pedro judyeya' Juan, jéyacsi: —Tạij mi'in tashvac jä'mij ra' jäm'tiñe' tsundyes säcsedye' mọ' Ji'c̣honacdyes —jéyacsi. 9Vorjete in: —Jụdyej, ¿juna' buty ra' mọ'ya' jäm'tye' tsun mọ' säcsedye'? 10Vorjeyacsi mu' Jesús: —Aty sitiya' mi'in bä'yedye'ĉan, mu'ĉan ra' yirity muntyi' rébetinte cạquity ojñi' puñujĉan. Mu' ra' cäc̣hä'chutinte mi'in, juna' chuc mu' sisan, cäc̣hä' ra' mu'ya' mi'in chime'. 11A ra' mu'ĉan mi'in jétinte ra' mu' a'tumtyi' aca': “Mu' ji'chäyintyi' tsun yi jin mi: ¿Jụ'ñisĉan buty ra' vavdye' säcsi yụ Ji'c̣honacdyes säcsedye' jị'chiyactyi'tum yụ?” me' ra' jétinte mi'in. 12Mu' qui ra' ji'caviyinac yiris därsi' vavdye' che'ves acas mọ', aty jä'mii'tyi' räj mọ'che'. Mọ'ĉan ra' mọ' jäm'tiñe' säcsedye' —jéyacsi Jesús jị'chiyactyi' mu'. 13Sacti in bä'yedye'ĉan jịjcaij in. Me'dye dạquique' in yoj jeyacsidyem' jiquej Jesús u. Mọ'ya' qui jäm'tye' in Ji'c̣honacdyes säcsedye'. 14Cha'she' hora säcsedyes chat Jesús atsij jutactyi'tum mu', rụij bu'yi mesaya' tŝọij in. 15Yi Jesús jéyacsi: —Anic yụ fer mạ'je' säcsi mi'intum ọij Ji'c̣honacdyes säcsedye', an'dyem' jambi' ijan yụ in. 16Yụ jéyac, me'qui'dye ra' jebei' yụ ọij Ji'c̣honacdyes säcsedye' jun' qui' chuc ayij mụi'sis tupudye' ayo'bu'yedyedyes Jen'si' mu', mọ'ĉan ra' cạ̈tsi' jedye' chuc cại' p̂eyacdye' ọij feshta jiquej, chat q̂uin'dyem' ra' jebeban' cuvij yụ —jéyacsi mu' Jesús. 17Jesús tapje' tyéquis, yoshoropaij jéte Jen', jéyacsi: —Miya'ĉa ọij tyéquis, mi'in qui ra' ji'jiyiti, tyeij ra' mi'in. 18Yụ jéyac, me'qui'dye ra' tyeij yụ ovas fi' mọ' jun' qui' chuc ayij tupudye' ayo'bu'yedyes Jen'si' mu'. 19Pan qui tapjete, yoshoropaij jéte Jen', mu' qui q̂uemi'vete, chat qui so'macsi ji'cheteyacsi jị'chiyactyi' mu' jéyacsi: —Uts pan jeñej ĉụi'si' a' yụ, mọ' ra' yụ'tac mi'indyes. Me' ra' mi'in paj qui räjĉan dyijtutiĉa' yụ mi'in —jéyacsi Jesús jị'chiyactyi' mu'. 20Aty ijaij säcsi in mu' Jesús tyéquis qui tapje', jéyacsi: —Ọij tyéquisĉansi' mọ' jeñej bu'yi' chäsh yụ, mọ' ra' chojyi' yụ'tac mi'indyes, mọ' ra' jaso'miti' ferdye' mọ' mụi'sis p̂eyacdye' Jen'si' mu' yụ'tyeyacsis ra' muntyi' in. 21Mush tyu' úya' q̂uin' mu' ji'mincantyi' yụ, mu'tum q̂uin' säcsi yụ. 22Anic nash me', aty yụ'tac yụ Anictyity Muntyi' yụ paj qui ijac yụ. Me' tsan' me', där qui na ram' mu' ñịbe' cạve' mu' me'jintyi' ji'mincantyi' yụ —jéyacsi Jesús. 23Chat qui mu'in jị'chiyactyi' mu' vaj meij jítidyeij mu'in in, yi in: “¿Jụ'ñity buty mu' ji'mincatety ra' Ayo' tsun?” jítidyeij in. 24Jị'chiyactyi' mu' jíti in tyi buty muju'cha' bu'yity muntyisya' vej mu'in. 25Mu' qui Jesús jéyacsi: —Se'vaĉam' mi'in, mu'in jacchety ayo' in anic son' bu'yi yu'ti in paj qui me' ayo'bu'yi muntyidyes in, paj qui mu'in jäm'jeĉúnacsi jéyacsi in: “Anic mi nọ́tacsity”, me' bu'yi jacchety ayo' in. 26Mi'in qui na ram' jam me', mu' muju'cha' bu'yity mi'indyes paj mu' uya'ya' yu'ti, tyi chuc tashche' bu'yi mi'inya' paj úñi mi'indyes. 27Uche' jacchety ¿jụ'ñity buty mu' tashche' bu'yity, are' mu' säcsity mesaya' are' mu' patstyety? Mu' säcsity. Me' tsan' yụ Ayo' mi'in, jam nam' me' yụ, yụ qui nam' úñi mi'indyes. 28Me' tsan' yụ yejĉoij ñịbedyes jị'ĉojtye' yụ, mi'in qui nam' jam jun' farajjitiĉa' yụ mi'in. 29Mọ'dyes qui ra' yụ yụ'tyeyac mi'in paj qui mi'in ayo'bu'yi mụi'sisĉan tupudye', yojdyem' yụ Jen' yu'tyin u yụ paj qui me' ayo'bu'yi yụ. 30Aty ra' tŝọi'ya' mọ' tupudye' ayo'bu'yedyes yụ, yụsche' ra' mesa säcsi mi'in, judyeya' ra' ayo'bu'yi mi'in Israeltyidyes vóshi' in, mu'in yiri'tac pärä' jiyi ñuru'tyity in, ayosche' ra' bä'yaquis bä'yi mi'in —yi mu' Jesús jéyacsi. 31Jesús jajiti Simón Pedro: —Se'viti' Simón, atyu' u jụjbite Jen' Satanássi' cọdacdye' mu', mu' ra' ji'ĉujnac mi'in, yojdyem' yirity muntyi' shajretety trivo u, me' bu'yi ra' ji'ĉujnac, mạ'je' tsan' ji'yacchunac yụ́ya'. 32Yụ qui nam' ferche' cọdyete Jen' mídyes Simón, paj qui jam jiva'chabun anicyedye' mi. A qui na ram' chimu've jụijyam, jemoñe' jiĉun yụ'tacseban ĉụi'tyi' chätidye' mi mu'in jị'chiyactyi' yụ. 33Pedro vorjete: —Yụ́tyi' Ayo', me' ra' tsan' mi ĉär'tyin in, me' ra' tsan' ijan in, yụ qui na ram' täyä' míya', yụ ra' jam méqui' yacchuye —jéte Pedro mu' Jesús. 34Jesús vorjajiti: —Yụ jéye Pedro, ọij q̂uin' tsedyedye' jambi' ra' p̂oñi ojtere', chibin qui' ra' yi mi: “Jam yụ chị́yete mu' Jesús”, yi ra' jéyacsi mi. 35Chat qui mu' Jesús jéyaqui jị'chiyactyi' mu': —Jesha' jiquej yóqui'dyem' juteyac jiquej u, jam jubij cạqui mi'in, mijam querec̣ha mi'in, mijam yujches chime' mi'in. Me' juteyacya' yụ jiquej ¿jayejjotaqui ca' jedye' mi'in? —jéyacsi Jesús. Vorjete in: —Mijam méquis jedye' jayejjoi' tsun. 36Jesús jéyacsi: —̣Q̂uin' ra' chat yoc qui. Tyi chuc jubijtumtyi' jụijya', paj cại' mọmo', tyi chuc c̣hav' querec̣ham', paj c̣hav' mọmo' cạte, tyi chuc jam chutidyestumtyi' coc̣hino, paj ji'mincaqui quị'si' mu', jo'mesya' qui ya'ij. 37Yụ jéyac, cạ̈tsi' ra' mọ' urucyas sánacdye' yụ p̂iyinsi' yi: “Ac̣hi'yitytum muntyi' yụ'tac”, yi' sánacdye'. Cạ̈tsi' ra' tas sánacdye' in p̂iyinsi' yụ in jiquej —jéyacsi Jesús. 38Jị'chiyactyi' mu' jéte in: —Mosh ọij pärä' coc̣hino chutidyedyes in. Vorjeyacsi mu': —Aty to' o tupuj. 39Jerusalénĉan shupqui mu' Jesús jị'chiyactyi'tum mu' Orivoche' qui jịjcaij ĉaĉaij na mu'chem' jịjcava'joij. 40Aty mu'che' venjoij in, Jesús jéyacsi jị'chiyactyi' mu': —Cọdyemac Jen' paj qui jam peñi jị'ĉojtacdye'ya' mi'in. 41Mu' na Jesús muju'veyam' jịjcaij, dyụtsyi mu'ya' cọdyete Jen', 42jéte: —Yụ́tyi' Jen', mạ'je' jụijya' mi, ji'c̣hontim jam qui jị'ĉojtye've yụ därsi' ñịbedyes, jam qui na ram' me' jun' chuc yụ mạ'je', yu'ti' ram jun' chuc mis dyijyedye' —jéte Jesús. 43Yirity vatyquej ji'caviti anjer mạyedye'chety, mu' jaso'miti ferdye'. 44Därsi' táredye' jị'ĉojtye' mu', dadam' qui muju'cha' cọdyete Jen'. Tsom'yi' junjos mu', yódyei'dyem' chäsh o, jo'mei' mụijya' tŝọi' mu'. 45Aty me'si' cọdyete Jen', cuvij chimu'ya' jijtuban, tacya'dye dạcacseshan ĉọshva'joij jị'chiyactyi' mu', ĉaĉaij na mọ' táredye' mu'in ji'no'bacsi'. 46Jéyacsi: —¿Jun' ca' ĉọshi mi'in? Vañinyebajsham' cọdaĉajsham' Jen'che' mi'in paj qui jam peñi jị'ĉojtacdye'ya' mi'in. 47Taca' p̂eyacva'joij mu' Jesús, shupqueti vatyquej mu'ya' in dai'tyi' muntyi' atsij in, tucsi Judas, jị'chiyactyi' tsan' Jesústyi' mu', yiri'tac pärä' jiyity in. Rụij bu'yi Jesúsya', pụ'sete. 48Jesús jéte: —Mi Judas, ¿pụ'sacdye'ya' bu ra' ji'mincatim yụ Anictyity Muntyi' yụ? 49Mu'in jị'chiyactyi' mu' jéte in: —¿Coc̣hinoya' chucseja' uts in? 50Yirity jị'chiyactyi' mu' siscajcapte úñity mu' ayoty, mu' tashche' bu'yitytyi' cudyitity Jen'che', sei'jepte tacves chun mu'. 51Jesús jéyacsi: —Paj mọ'ya', jam ra' me'tacsi mi'in. Chat qui mu' Jesús pei'jebibajte chun mu' jaji'chäĉun. 52Mu'in na ĉọshtety in mu'in tashche' cudyitity Jen'che' in, judyeya' mu'in yụ'tactyi' ĉọjcai'tyi' Jen'si' aca' in, judyeya' mu'in tashche' bu'yity judío in, mu'in ĉọshtety in mu'in jeshtety Jesús in. Yi jéyacsi: —¿Jedyedyes ca' jo'mes tutiñe' coc̣hino judyeya' son? Jeñej quiyaij ac̣hi'yity muntyi' ĉútiĉa' yụ mi'in, me' tŝútyitiĉa' yụ mi'in. 53Yóqui' na Jen'si'ĉan aca' mu' räjĉan tsan' me' bu'yi yụ jiquej mu'ĉan, jam méqui' ĉucdyiĉa' yụ mi'in. ̣Q̂uin' chat aty cha'sheja' mọ' tupudye' mi'indyes, aty mọ' tojmadye'ĉansi' Sọyo' carijtaqui' —jéyacsi Jesús. 54Taptete in mu' Jesús, ayosĉan aca' cạte in tashchetysi' cudyitity Jen'che'. Jä'quiij mu' Pedro cäc̣hä'chute Jesús, 55siti p̂ejya' acas. Chidyi'ĉanya' mọ'ya' tŝij jä'ñis mu'in coc̣hop bu'yi mu'ya' jufiva'ti in. Chịmo'dyem' ĉọ́que' Pedro, p̂utsquen'yi mu'ya' bä'yi. 56Mọ'ĉansi' úñis janaijti Pedro bä'va'joij tŝijve janaijti. Jäm' se' jacaviti, yi': —Uts tyu' ca' chime' cäc̣hä'chutety Jesús —jéyacsi'. 57Mu' na Pedro ticamaqui. Je': —Mi p̂en jätäjyi' ra' mi, yụ jam chị́yete mu'. 58Judye'dye men yoctyi' muntyi' janaijti mu' Pedro, chijajitidye mu': —Mi adac chime' cäc̣hä'chutety mu' Jesús. Vorjete mu' Pedro jéte mu' muntyi': —Jam, jam nash yụ. 59Tyä'päi'tyim' jedac yiris hora, yoctyi' qui feryaij mu' jajiti: —Anic nash me', útsi cäc̣hä'chutety Jesús, ĉaĉaij nash uts Galileaĉan bä'yity. 60Yi Pedro vorjete mu' muntyi': —Yụ jéye, yụ jam jun' chịj jätäjyi ra' mi. Taca' p̂eyacva'joij mu' Pedro p̂oñi vatyquej ojtere', 61chat qui mu' Ayo' caman'yi chụi' vatyquej jacaviti. Chat qui mu' Pedro dyijtubibajte Ayo'si' p̂eyacdye' mu', yi jéte jiquej: “Jambi' ra' p̂oñi ojtere' q̂uin', chibin qui' ra' yi mi ticamitim: yụ jam cäc̣hä'chutety Jesús.” 62Chat qui mu' shupqui Pedro, jorojya' jịjcaij fer tári. 63Mu'in ĉọjcatety Jesús in mu'in majmatute in judyeya' untute in. 64Mu'indye panjete vejya' in, yejĉoij untute in. Yi jéte in: —Chị́va ¿jụ'ñity untun u? 65Yịjyi fạra'nacdye' so'mete in jätäjjete ĉụi' mọmo' in. 66Aty nạijjoi' tsudyujñiti in mu'in tashche' bu'yity judío in, judyeya' mu'in tashche' cudyitity Jen'che' in, judyeya' mu'in jị'chiyacsity yụ'tacdye' in. Aty vaj mu'ĉan in chat tute in mu' Jesús, yụ'te in mu'insi'ya' vej mu'in. Jéte in: 67—Jítiĉam', ¿mi adac Ji'c̣honacsity muntyi'? —jéte in. Jesús vorjeyacsi: —Me' ra' tsan' yụ jéyac mi'in, mi'in qui na ram' jam jun' anicjitiĉa' yụ mi'in. 68Chime'dye cọdyetyeyac p̂eyacdye' jụijya' yụ, mi'in ra' jam jun' chäquitiĉa' yụ mi'in mijam vorjibutiĉa' p̂eyacdye' yụs mi'in. 69̣Q̂uin' chat ra' yụ Anictyity Muntyi' yụ tacve bu'yi ra' bä'yi Jen'ya' yụ, mu' muju'cha' ferdye'tumtyi'. 70Mu'in qui jéte in: —¿Mi adac Jen'tyi' Ạva' mu'? Vorjeyacsi Jesús: —Me' nash yụ yoj yidye' bu u mi'in. 71Mu'in ayo' yi in jítidyeij in: —Aty jam jun' jemonja' tsun tyi chuc p̂eijbitety juchaj útssi' mu', ĉaĉaij na aty tsun se'vepja juchaj mu' ĉụi'si'ya' chụ' mu'.

will be added

X\