Luke 21

1Jesús Jen'si'ĉan aca' mu', cạvacseva'joij jedye'tumtyi' muntyi' in, bijtaquity in dyimacdye'ĉan. 2Ayij yiris muñes p̂en, anic jiyi' ñịbes mọ', pärä' miqui'muntyi' mọmo' ficha bijte. 3Jesús jéyacsi: —Yụ jéyac, me' tsan' me'qui' bijte ọij ñịbes p̂en, mọjo'cha' qui nam' yụ'te querec̣ha, me' bu'yi' shupqui' mọ', yoctyi' na jam me' in, räj uya'ya' in, 4ĉaĉaij na mu'in in ji'shucdyity mọmo' querec̣ha yụ'te in. Mọ' na jam me', me' tsan' anic jiyi' ñịbes mọ', tasdye yụ'te tsạ' bu'yedyety mọ' —jéyacsi Jesús. 5Pạrej jị'chiyactyi' Jesústyi' mu' cạvepte Jen'si' aca' in, anic jäjämuntyi' mij mọ' judyeya' sháshadyes chime' mọ' yụ'tye' muntyi' in, chime'dye mọ' jäjämunsi', yi in. Jesús jéyacsi: 6—Yirisĉan ra' mạyedye' räj ra' jịva'chac ọij aca', räj ra' vän'jetac mij, mijam ra' yirity tibu' tacya' ji'yajcati. 7Jị'chiyactyi' mu' jéte in: —Jị'chiyacsity, ¿jun'si' buty ra' cạ̈tsi' ọij jítiĉas tsun mi'in? ¿Jedye' buty ra' jị'ĉocdyes aty ra' cạ̈tsi'ya' mọ'? 8Jesús vorjeyacsi: —Are'ĉa mi'in, jam ra' se'vacsebi mi'in väñädye' muntyis mu'in. Dai' ra' muntyi' ji'caviti in, yụ́si' ra' tịj ji'jäcbun yụ in, mu'in ra' yi in: “Yụ nash Ji'c̣honacsity muntyi'”, yi ra' pạrej in. Pạrej ra' yi chime' in: “Aty ayij jadyiquis tupudye'”, me' ra' yi in. Jam ra' se'vacsebi p̂eyacdye' mi'in, mijam ra' cäc̣hä'chucsi mi'in. 9Chime'dye ra' dai' se'vetiñe' chutidye' jacches in judyeya' ijatidye', jam qui na ram' cajotyiti mi'in. Me' ra' tsan' me', tashche'dye ra' cạ̈tsi' räj ọij, jambi' qui na ram' ayij jadyiquis tupudye'. 10Chime'dye yi jéyacsi mu' Jesús: —Yiris ra' jac yocsi'tum jac chutidyeij in, judyeya' yirity jacchety ayo' jutaqui ra' väc̣hä'tyity mu', chuti ra' yoctyi'tum in. 11Chime'dye pai' ra' mọ'ya' tsäqui'sis bubacdye', judyeya' ra' dáquedye', judyeya' ra' tsäqui'sis japacjodye' chime'. Ji'caviti' ra' därsi' mạyedye'ches jedye' tsäqui'sis chime'. 12Jambi'dyem' ra' cạ̈tsi' ọij p̂eyacdye' yụ jéyacsi' q̂uin' mi'in, tashche' ra' tapjinac in, ñịbe'tyinac ra' in. Ji'me'tyinac ra' ayo'ya' in vajmu'yaijĉan judío in, ĉär'tyinac ra' in. Yụ́dyesi' tashchetyya' ayo' ji'me'tyinac in. 13Aty me' shupqui'ya', tupuj jị'chiqueyacsi mi'in yụ́si' p̂eyacdye'. 14Aty ji'me'tyinacya' in, jam ra' tashche' jä'miij dyijyi mi'in jun' bu'yi chuc ra' vorjeĉúnacsi mi'in, 15yụ́dye ra' so'meyac mọjo'chas dyijyedye' paj qui jam tupuj dạque' in voryedye' mu'in. 16Pạrej ra' mu'ya' ĉụi'tyi' chätidye' mi'in ji'me'tyinac ra' ayo'ya' mi'in, taca'dye ra' ĉụi'tyi' jen' mi'in judyeya' tse' mi'in, judyeya' vojity mi'in, judyeya' pen'dye' mi'in ji'me'tyinac ra' ayo'ya' in, judyeya' ra' pạrej ijac mi'in. 17Räj ra' yụ́dyes mọ'jinac fáquinac in mu'in jam cäc̣hä'chuntyi' yụ in. 18Jam qui na ram' jedyeij mi'in, mijam ra' yiris fin jo'no'ches jọ'chai' moñi' mi'in. 19Jemoñe' dyich bu'yi bä'yi mi'in paj qui c̣hoñi mi'in. 20Aty atsijya' väc̣hä'tyity in cọtoij ra' tŝọ́tacsi Jerusalénĉantyi' in, chat qui ra' chịj mi'in aty c̣hẹi'ya' tŝọ́taqui' mọ' bä'yedye'. 21Tyi chuc Judeaĉan in judyeya' me'yi' ji'caviti', paj mụcu'che' jịjcaij in. Tyi chuc Jerusalénĉan in paj yacchui' in mọ' bä'yedye', judyeya' tyi chuc jorojyaty mọ' bä'yedye' in paj jam ca'ñibun in. 22Mọ' ra' va'tacdyedyes tupudye', cạ̈tsi' ra' räj urucyas sánacdye' jiquej Jen'si' mu'. 23Där ra' ñịbe' cạve' in jạjtsis p̂en in, judyeya' ji'tsi'yaquis ạva' in, ĉaĉaij na ra' därsi' ñịbedyes jị'ĉojtye' in mu'in bä'yedye'ĉantyi' in, därsi' ra' va'tacdye' so'macsi mu' Jen'. 24Pạrej ra' coc̣hinoya' ijac in, pạrej ra' yocsi'ĉan jac jịjijcayac in, úñity qui ra' yụ'tac mu'ĉan in. Chat qui ra' mu'in jorojyaty muntyi' in jam judío in, mu'in qui ra' mu'ĉan ayo'bu'yi in Jerusalénĉan, jun' qui' chuc mọ' rä'i' tupudye' yụ'tyes Jen' paj qui me' in. 25Aty ra' me'si' mọ'ya' ra' mạyedye'ches jedye' jutacdye' ji'caviti'. Mu'che' ra' tsunche' ji'caviti', judyeya' ịvajche' judyeya' ọ́rota'che' chime'. Jacchety ra' muntyi' in pai' bä'yity in anic ra' itŝijyi noi'yi in, tyum' ra' tyeij ĉojtyi' mu'in. Anic ra' tsäqui'yi' mạ'i' marĉansi' ojñi' fer ra' mạ'i', där ra' tsäqui' vacam'quedye' mọ'. 26Muntyi' ra' in anic ra' där itŝij tyeij in dyijtuva'que' in tsäqui'sis ra' tsọ́ban' ọ́che' jacche'. Chime'dye ra' ọ́rota' in turen' qui in, yocve ra' tyeij in. 27Chat qui ra' q̂uin'dyem' che've ji'ĉujtuyibun yụ in Anictyity Muntyi' yụ, dyicba'badye' ra' jijtui' yụ, därsi'ya' ferdye' yụ judyeya' mạijquedye' yụ . 28Aty ra' tiyacchuti'ya' cạ̈tsi' ọij jéyacsi' yụ mi'in q̂uin', sóñi'yi ra' ĉojtyi'ĉan mi'in, mạyedye'che' ra' cạvi mi'in ĉaĉaij na aty c̣hẹi'ya' ra' c̣hon'dyedyes mi'in —jéyacsi Jesús. 29Chime'dye mu' Jesús jéyacsi jị'ĉocdyes p̂eyacdye', yi mu': —Dyijtuvac mọ' higuera, judyeya' yocsi' cätidye' chime' in. 30Aty co'ñeyeban'ya' mọ', aty me' ji'chäquiyisin' aty c̣hẹi'ya' juñ'yeban' tupudye'. 31Me'dye ra' chime', aty cạvetiñe'ya' cạ̈tsi' ọij p̂eyacdye' yụ q̂uin', me' ra' chịj mi'in aty c̣hẹi'ya' tupudye' Jen'si' mu', ayo'bu'yedyedyes mu'. 32Yụ jéyac, jambi' ra' jụ'ñiij mọtsi uts muntyi' in, räj ra' tashche' mọ' cạ̈tsi'. 33Ọij mạyedye' judyeya' ọij jac mọtsi' ra' in, yụ́si' na p̂eyacdye' jam ra' jun' mọtsi', mọ' ram' cạ̈tsi' räj. 34Are'ĉa mi'in, jam ra' jacches mọmo' dyijtutiñe' jedye' mi'in, jam ra' feshtadyes mọmo' dyijtutiñe' mi'in, mijam ra' shu'quedye', paj qui jam yäjqui ĉojtyi' mi'in, vatyquej ra' cha'shinac mọ' tupudye' mijam ra' chị́va'joij mi'in. 35Yojdyem' jibejĉan tŝọijtyi' muntyi' u, me'dye ra' mọ' chime' mọ' tupudye', caminve tŝọ́tacsi' räj jacchety muntyi' in. 36Jä'miij dyij bu'jam' mi'in räjĉan ra' cọdaqui Jen'che' mi'in paj qui fer bu'yi bä'yi mi'in Jen'dyes, paj qui jam peñi mi'in aty jị'ĉojtiñe'ya' mọ' jéyacsi' yụ mi'in q̂uin'. Chat qui ra' tupuj ji'caviti mi'in yụsya' vej yụ Anictyity Muntyi' yụ —jéyacsi Jesús. 37Räjĉan mạyedye' mu' Jesús jị'chiyacsi Jen'si'ĉan aca' mu', yómo' qui nam' mụcu'che' jịjcaij Orivoche', mu'che' dyäqui. 38Muntyi' in räj pam' ĉọ́que' in Jen'si' acam', se'vepte in Jesússi' p̂eyacdye' mu'.

will be added

X\