Luke 2

1Aty me'si' mu' muju'chaty jacchety ayo' Augusto yụ'tye' p̂eyacdye' muntyidyes in paj qui räj san'quejĉoij muntyi' in. 2Ọij nash tashches san'quejĉodyes muntyidyes in, mọ' jäm'tye' in yoqui'dyem' ayo'bu'yi mu' Cirenio, Siriaĉan jiquej u. 3Mu' ayo' Augusto jéyacsi paj qui räj muntyi' in ĉụi'si'ĉan bä'yedye' jịjcaban in yóĉandyem' vóshi'vun bä'yaque jiquej u mu'in, mu'ĉan ca ra' san'quejĉoij in. 4Mọ'dyes qui mu' José Nazaretĉantyi' shupqui, Galileaĉansi' bä'yedye'. Sacje' Belénĉan jịjcaij Judeaĉansi' bä'yedye', ĉaĉaij na mu' David-vuntyi' vóshi' mu'. 5Maríatum Belénve jịjcaij paj qui ji'sañiĉun, ĉaĉaij na mu' ra' jäcte, mọ' na María anic jạjtsis. 6Aty Belénĉan in cha'she' mọ' tupudye' p̂en mu', 7na'i mu' tashchety ạva' mọ'. Comon'jeyaqui' bä'yesĉan chat qui päcä'jete yóĉandyem' ji'säcsac cu'dye' o in, mọ'ĉandye chime' dyäqui' in ĉaĉaij na mọ' dyäquedye' muntyidyes in anic bän' mọ' jam juna' vav. 8Chime'dye c̣hẹi'ya' mọ' Belén mu'ya' ĉọjcaquity oveca pạrej in, taĉandye ĉọshi tajñi'ĉan in ĉọjcaquity oveca in. 9Vátyequej ji'caviti mu'inya' in yirity anjer Jen'tyi' mu', chime'dye Jen'si' mạijquedye' tŝọ́tacsi', jäm' itŝijyacñi noi'yacñi in. 10Jéyacsi mu' anjer: —Jam ra' noi'yi mi'in, yụ nash jäm'si' p̂eyacdye' tui'tyi' mi'indyes, mọ' nash ra' räjdyes muntyi' in so'macsi' ra' därsi' ma'jodye' räj muntyi' in. Me' yi' ọij p̂eyacdye' tui'si' yụ: 11Ọij nash mạyedye' aty na'i mu' ji'c̣honnactyi' ra' mi'in, mu' Cristo, Ayo' tsun, Belénĉan na'i. 12Jesha' cạvecmac mi'in, me' ra' chị́yetinte mi'in, mu'ĉan dạquictinteya' cu'dyesĉan aca' mọ'in, co'moij ra' bä'yesĉan, yóĉandyem' ji'säcsacĉan cu'dye' o in —yi jéyacsi anjer. 13Me'ĉandye dai' vatyquej ji'caviti mạyedye'chety anjer in, tima'quete mu' Jen', yi in: 14—Tima'queja mu' Jen' mạyedye'chety, paj mu'in jacchety muntyi' in, mu'in ma'jotactyi' Jen'ya' in, paj mu'in so'mac in c̣hon'dye-dyes mu'in —yi anjer in. 15Jọban anjer in mạyedye'che' jịjcaban in. Yi mu'in ĉọjcaquity oveca jítidyeij in: —Jesha' Belénĉan jịjcabajsha' cạveĉajsha' tsun yoj jisin'dyem' mu' Ayo' tsun. 16Me'dye cavintum sacjeban' in. Mọ'ĉan dạquique' in mọ' María, judyeya' José judyeya' joijno', mu'ĉan mu' chụjduij yóĉandyem' ji'säcsacĉan cu'dye' o in. 17Mu'in ĉọjcaquity oveca in aty cạvacsi in chat qui jéyacsi in jätäjjeyacsi chuc anjer mu'in in, p̂eijte joijno' jiquej in. 18Mu'in se'vacsebity p̂eyacdye' in anic äjjeyacsebi p̂eyacdye' mu'in. 19Mọ' na María räj mọ' yejĉoi' dyijtuva'que' ĉojtyi'ĉan mọ' se'ves p̂eyacdye' p̂eijtes mu' joijno'. 20Chat qui mu'in ĉọjcaquity oveca in ca'ñibun in. Jäm' tima'quete Jen' in, yoshoropaij jéte in jun' chuc cạvecte jiquej in judyeya' se've' in, ĉaĉaij na cäts shupqui' yoj jeyacsidyem' anjer jiquej u in. 21Aty q̂uen'ĉan mạyedye' tyiti mu' joijno', chat ji'sei'tac judyeya' yụ'tyeyete tịj in, jéte in: Jesús, yụ'tyeyete in, yoj yidyem' anjer jiquej u jéyacsaque, jambi'dyem' ạva'tum jiquej mọ'. 22Aty me'si' cha'she' mọ' mạyedye' tupudye' Marías basdyidyes mọ', jäm' yu'ti' qui Jen'si'ya' vej mu', yoj yi'dyem' yụ'tacdye' o, jaso'mitis Moisés jiquej. Chat qui Jerusalénĉan jịjcaij in cạte in mu' joijno', paj qui mu' jị'cavecte in Ayo'ya' tsun, 23yoj yi'dyem' yụ'tacdye' Ayo'si' um'. Yi': “So'metinte ra' Ayo' tsun räj tashchety ạva' mi'in son' in”, yi'. 24Chime'dye ji'co'shaye' Jen'dyes in, yoj yi'dyem' yụ'tacdye' Ayos um', yi': “Ji'co'shayevac Jen'dyes pärä' ọ'to' in, jam jụijya' mọ' pärä' tórtula in.”79 25Chime'dye mu'ya' jiquej Jerusalénĉan yirity muntyi' tịj mu' Simeón. Anic rụijtyity mu', ĉútity Jen'che', anic fer bisaqui paj qui mu'in Israeltyi' vóshi' in c̣hoñi in. Jen'si' Ạ'edye' mu' jame'chuti mu'. 26Mọ' jajiti mu' ra' cạvete mu' Cristo mu' jutactyi' Jen'tyi' mu' jambi'dyem' säñi mu'. 27Mọ' Jen'si' Ạ'edye' mu' jajutiti mu' Simeón paj qui Jen'si'ĉan aca' jịjcaij. Vátyequej atsij mu' José judyeya' María c̣hobo' mọty joijno' Jesús, siti in Jen'si'ĉan aca' mu', paj qui jị'cätsepte in jun' chuc yi' Jen'si' yụ'tacdye' mu'. 28Mu' qui Simeón roquen'jeĉun'te mu' Jesús, tima'quete Jen', jéte: 29—Tsuntyi' Ayo', mi nash aty jị'cätse' p̂eyacdye' mi, q̂uin' chat aty tupuj yụ́dyes, q̂uin' chat aty jam otejjiti säñi yụ, 30ĉaĉaij na aty cạvete yụ ĉụi'si'ya' vej yụ uts Ji'c̣honacsity muntyi'. 31̣Q̂uin' mi yụ'te uts Ji'c̣honacsity mu'insiya' vej mu'in jacchety muntyi' räj in. 32Mu' ra' mạijchucsebi ĉojtyi' mu'in jam Israeltyi' vóshi' in, jéyacsi ra' mu' mis p̂eyacdye', judyeya' qui ra' mu' so'macsi c̣hon'dyedyes mu'in Israeltyi' vóshi' in, me' ra' uts Ji'c̣honacsity muntyi' —yi Simeón. 33Jesústyi' jen' mu' judyeya' tse' mu' anic äjjepte p̂eyacdye' in Simeónsi', p̂eijtes mu' Jesús. 34Mu' qui Simeón yụ'tyeyacsi p̂eyacdye' mu'indyes in, yi je' María: —Uts q̂uin' ạva' mi jatsim'tity Jen', pạrej ra' ji'c̣honacsi mu', pạrej na ra' so'mac tsäqui'sis in. Mu' ra' jayu'ti Jen' jị'ĉocdyes muntyidyes in, me' tsan' me', ñiñete qui na ram' muntyi' in. 35Mu' ra' jorojĉan yụ'tacsebi ĉojtyi'ĉansi' dyijyedye' mu'in. Mi qui na ram' fer tári' utsdyes ạvadyes mi, sapen'yi' ra' ĉojtyi'chem jeñej ra' p̂oc̣htac coc̣hinoya' ĉojtyim —yi je' mu' Simeón. 36Chime'dye mọ'ĉan Jen'si'ĉan aca' mu' yiris mọ'ĉan p̂en, Ana tịj mọ', ạva' mu' Fanuelsi', vóshi' mu' Aservunsi' jiquej, me' mọs tịj ñuru'. Mọ' jaso'mitis p̂eyacdye' Jen', anic jiyi' isho' mọ'. Yävätidye' mọmo' yómodye' vämtyi'tum bä'yi' mọ' jiquej, chat qui säntaqui' vämtyi' mọ', 37q̂uen'ĉan qui'tac vạjpedye' jiyi' yómodye' muñej bu'ban' mọ'. Yejĉoi' dyijtute Jen', pucmun Jen'si'ĉan aca' jadyiqui', mạij judyeya' tsedyedye', mọ' carijtaqui' Jen'dyes yịñijdye'tum judyeya' cọdacdye'tum. 38Aty me'si' p̂eyaqui Simeón, mọ' qui yoshoropaij jéte Jen' judyeya' p̂eijte mu' Jesús, jéyacsi' mu'in bisaquity in c̣hon'dyedyes ra' mu'in Israelĉantyi' in. 39José judyeya' María ijaij in jun' chuc cọdaqui' mọ' yụ'tacdye' Jen'si' mu', chat qui sacjeban' in me'si'dye in, ca'ñibun in ĉụi'situban bä'yedye' in Nazaretĉan jijtuban in mọ' Galileaĉansi' bä'yedye'. 40Mu' Jesús aty utu'yejoij p̂añi ferdye'tumyejoij anic dyij-yedye'tum cati, ĉaĉaij na mu' Jen' jañutyiti mạ'jitidyesya' mu'. 41Räjĉan yómodye' cha'she'ya' mu' José, Jesústyi' jen' mu' judyeya' tse' mu' Jerusalénĉan sóbajquiqui in, cạveque' Ji'c̣honacdyedyes feshta in. 42Jesús yiri'tac pärä' jiyi' yómodye' tyiti mu', cuvij Jerusalénĉan jịjcaij in, cuvij feshta cạveque' in, mọ' yicdye' mu'in. 43Jiyi' feshta, chat qui mu' José, mọ'tumdye Maríatum ca'ñibun in. Mu'dyety Jesús taĉan ji'yajcabun Jerusalénĉan, jam jun' chịj jen' mu' judyeya' tse' mu', 44jeñety pen'dye'tum jäqui' atsijban, me' ĉọ́te in. Aty yiris mạyedye' mi'eban in, chat q̂uin'dyem' dyijtute in chat qui quevjajte in chätidye'ĉan mu'in, 45jam méqui' dạcajte in. Mu'ya'dye caman'jeban' ca'ñibun José judyeya' María, Jerusalénĉan jịjcaban quivij in, queviĉajte in. 46Chibin mạyedye' quevjajte mu'ĉan in, chat q̂uin'dyem' dạĉajte in, Jen'si'ĉan na jiquej aca' mu'. Jị'chiyacsitytum bä'va'joij se'vacseva'bi p̂eyacdye' mu'in judyeya' cọdyetacsi chime' p̂eyacdye' mu'in. 47Mu'in se'vetety in anic mu'in äjjepte in dyijyedye' mu', anic rụijsis voryedye' mu'. 48Mu' na jen' judyeya' tse' mu' aty cạvete in anic äjyi in. Yi' tse' mu' jajiti: —¿Jun' dash me'jitiĉa' mi'in ạva'? Tsun cajotyiti' quevja-dyeyac pai' där dyijtuyac tsun. 49Vorjeyacsi Jesús: —¿Jun' dash quivjudyiĉa' yụ mi'in? ¿Jam adac chịj mi'in úĉan nash yụ ĉụi'si'ĉan aca' Jen'si'ĉan yụ? 50Mu'in na jam chiquepte p̂eyacdye' in, jedye' chuc mọ' cại'. 51Chat qui q̂uin'dyem' jịjcacseban Nazaretĉan, yóĉandyem' yejĉoij chicaqui jen' um' judyeya' tse' mu'. Mọ' na tse' mu' räj mọ' dyijtui' ĉojtyi'ĉan mọ'. 52Mu'ĉan mu' p̂añi Jesús, anic dyijyedye'tum cati mu', räjĉan jama'jotyiti Jen' mu', me'dye chime' muntyi' ma'jotyete in.

will be added

X\