Luke 19

1Chat qui mu' Jesús ventyeque' Jericó. Yejĉoij mi'i, mạ'je' sapa'je' mọ' bä'yedye'. 2Mu'ĉan yirity bä'yi muntyi' jedye'tumtyi', Zaqueo tịj mu', mu' ayo' mu'intyi' in tsim'tetytyi' querec̣ha in. 3Mu' Zaqueo mạ'je' tsan' mu' cạvete Jesús, jam qui nam' jun' bu'yi cạvete ĉaĉaij na anic sät muntyi' mu'ya' in, chime' mu' Zaqueo anic miquity uĉandye mu'. 4Jam me' bu'yi, shuj tyeij cavin tashche' son ĉọ́que', ĉaĉaij na mạ'je' cạvete mu' Jesús. Mu'che' bojvi, yóya'dyem' ra' tyeij u mu' Jesús, mu'ya' mu' etspeij sonche'. 5Jesús venjoij mu'ya' quic̣hen' che've cạvi janaijti mu'che', jajiti: —Zaqueo cavin chạbada, misĉan nash ra' aca' dyäcyemjoij yụ q̂uin' —jajiti. 6Cavintum chạban mu' Zaqueo, ma'jodye'tum tiĉun'te mu' Jesús. 7Mu'in na muntyi' in cạvete in jun' chuc mu' Jesús Zaqueosĉan aca' dyäqui, tiyacchuti p̂eijte in, yi in: —¿Jun' dash uts Jesús site' ọij aca' juchajtumtyis mu'? 8Mu' na Zaqueo sacyi, yi jéte mu' Jesús: —Yụ ra' ñịbe'jeyacsi ñịbety muntyi' in, chocya' qui' ra' jedye' yụ, yụ ra' so'macsi. Jụ'ñity chuc shu'atucsity jiquej yụ, yụ ra' ji'ca'ñeyacseban mu'in in, dam'dye raij so'macseban vạjpedye' qui' ra' mọ'che' cächyi', me' ra' ji'ca'ñeyacseban yụ muntyi' in. 9Jesús jase'vibuti p̂eyacdye' mu' chat qui yi mu' jéte: —Ọij q̂uin' mạyedye' uts aca'tumtyi' in aty c̣hoñi in, aty c̣hoñi mi, mi nash Abraham-vuntyi' vóshi' mu'. 10Me'dyes nash atsij yụ Anictyity Muntyi' yụ, quevacseti yụ mon'dye'ĉantyi' in, paj qui ji'c̣honacsi yụ, —yi Jesús jajiti. 11Muntyi' se'veva'bite p̂eyacdye' in Jesússi' mu'. Jesús cäc̣hä'chutetytum mu' aty c̣hẹi'ya' tyiti Jerusalén in, jeñej aty ra' cavintum ayo'bu'yi Jen' ĉọ́te u in. Mọ'dyes mu' Jesús jéyacsi ọij jị'ĉocdyes p̂eyacdye', 12yi mu' jéyacsi: —Mu'ya' jiquej yirity muntyi', fer bu'yity. Dyijyi mu' moch ra' jịjcaij yocsi'ĉan bä'yedye', mu've ra' ayo'bu'yedye' so'mac mu' paj qui ayo'bu'yi ĉụi'si'ĉan bä'yedye'. 13Jambi'-dyem' mu' sacti muntyi' tashche' mu' fayacsi yiri'tac úñity mu', räj mu'in so'macsetaqui querec̣ha oro in. Mu' muntyi' jéyacsi: “Ji'daijbutiĉa' ra' mi'in uts querec̣ha yụ, jun' qui' chuc atsijbanya' yụ”, jéyacsi mu'. 14Chat qui sacti mu' muntyi'. Mu'in na mu'ĉantyi' chätidye' mu' fạ́quete in, me'dyes qui jutacsi muntyi' in, paj qui cä'c̣häijdye in ĉọcte in mu' muju'chaty ayo', jéte in: “Tsun jam mạ'je' uts paj qui ayo'bu'yi tsundyes”, yi jéte in. 15Me' tsan' me' mu' muntyi' yụ'tyeyete mọmo' yụ'tacdye' in paj qui ayo'bu'yi mu'. Aty me'si' atsijban mu' ĉụi'si'ĉan bä'yedye' jijtuban. Aty shupqueshanya' úñityya' mu', fayacseban qui úñity mu' yạjquiyacsetaquity querec̣ha jiquej in, mạ'je' chị́yacsebi juñucsisij chuc atsvun tyiti querec̣ha mu'in. 16Tashchety úñity mu' atsij, jéte ayo' mu': “A nash ji'daijbiye querec̣ha mi, aty yiri'tac qui' dam'dye cächjete mu'che' yụ”, jéte. 17Vorjajiti ayo' mu': “Anic där jäm' mi, mi anic jäm'tyi' úñity yụ. Aty jị'cätsem miquis p̂eyacdye' so'meyes mi, mọ'dyes yụ qui ra' yụ'tyeye mi paj qui mi ayo'bu'yi yiri'tacdyes bä'yedye' in”, jajiti. 18Yoctyi' qui atsij úñity mu'. Yi jéte ayo' mu': “A nash ji'daijbiye querec̣ha mi, aty ĉanam' qui' cächjete mu'che' yụ”, jéte. 19Vorjajiti ayo' mu': “Jụdyej, yụ ra' yụ'tyeye mi paj qui mi ayo'bu'yi ĉanam'dyes bä'yedye' in”, jajiti. 20Yoctyi' qui atsij úñity mu', jéte ayo' mu': “Mush uts querec̣ha mi, yụ nash mem' chupu'jebiye mọmo' querec̣ha mi, 21ĉaĉaij nash yụ chị́yeye mi jam ñịbe' ĉọcsity muntyi' in, mi nash ĉụi'situcsebity yoctyis jedye' mu'in judyeya' jäcacsebi mi yoctyis cätidye' mu'in. Mọ'dyes noi'yi yụ jäm' ĉọjcabiye querec̣ha mi,” jéte. 22Yi mu' ayo' jajiti: “Där ac̣hi'tyity mi úñity. Ĉụi'si' p̂eyacdye' mi, mọ' ji'ĉubun juchaj mi, ĉaĉaij na yi mi yụ ca ĉụi'situcsebity yoctyis jedye' mu'in judyeya' jäcacsebi yụ yoctyis cätidye' mu'in, me' yi mi. 23Me' dyijyaque jụijya' mi, ¿jun' ca' jam so'macsim querec̣ha yụ mu'in mạ'je' prestaijtyi' in, paj qui dam' cächjete mu'in in? Me'dye jụijya' mi, aty qui shupqueshanya' yụ tupuj qui ji'ca'ñiyibun' mi querec̣ha yụ, juñucsi' chuc cächyi”, jéyaqui úñity mu'. 24Chat qui jéyacsi yoctyi' in: “Chutyebajmac uts querec̣ha, so'memac mu' me'chutety yiri'tacyity.” 25Mu'in na muntyi' äjyi in jéte ayo' in: “Ayo' tsun, jun' bu ra' me', a na muty mu'ya' yiri'tac me'chute.” 26Ayo' vorjeyacsi: “Yụ jéyac: tyis chuc mọ'ya' mọjo'cha' jedye' mu' dadam' ra' mu' cächjeyeyac so'mac. Tyi chuc dam' me'chui', Jen' ra' jachutyiti mọ' dam'sis mu'.99 27Mu'in na fáquintyi' yụ in, jam mạ'jety in paj qui yụ ayo'bu'yi mu'indyes in, mu'in ra' jäcacsi mi'in ijacsi ra' mi'in yụ́si'ya' vej”, yi mu' —jéyacsi Jesús. 28Jesús aty ji'me'siyaqui p̂eyacdye' mu', quivijje' meijquejĉoij mi'i Jerusalénve jịjcaij. 29Aty c̣hẹi'ya' tyiti in Betfagéya' judyeya' Betaniaya', mụcu'ches bä'yedye' in Orivoches, chat qui mu' Jesús jutacsi pärä' jị'chiyactyi' mu'. 30Jéyacsi mu': —Sisvac mọ' tashche' bu'yis bä'yedye'. Aty ra' sistiñe'ya' mọ', mu'ĉan ra' dạquictinte yirity ban'tyity bórico sa'baij, jambi' foquin'tactyi'. Dajjetinte ra' mọmo', tutinte ra' mi'in. 31Mu'ĉantyi' jínac jụijya' in: “¿Jedyedyety bu ra' cạtinte mi'in uts?” Me' jínac jụijya' in, jéyacsi ra' mọmo' mi'in: “Ayo' u ca' tsun jemonte”, yi ra' jéyacsi mi'in. 32Me'dye sacti in. Anicdye me' dạquicte in mu' bórico yoj jeyacsidyem' Jesús u. 33Aty dajte in mu' bórico, mu'in a'tumtyi' in yi jéyacsi in: —¿Jedyedyety bu ra' dajtinte uts bórico? 34Voryi mu'in in jị'chiyactyi' Jesústyi' mu': —Ayo' tsun mu' u ca' jemonte. 35Me'dye tute in mu'ya' Jesúsya' mu' bórico. Jäm'chuyete mu'ya' quị'si' in, chat qui mu'ya' ji'foquin'te in mu' Jesús. 36Chat qui mi'i in, mu'in na muntyi' in natsjeyete mụijya' quị'si' in, yóya'dyem' ra' tyeij u mu' Jesús. 37C̣hẹi'ya' tyiti Jerusalén, chạij mụcu'ya' Orivoche', mu'in dai'tyi' pen'dyetutety in cäc̣hä'chutety Jesús in. Tiyacchuti tima'quete Jen' in, fer p̂eyaqui äjyi in, yoshoropaij jéte in, därsidyes ferdye' jị'caveyacsi jiquej. 38Yi in: —¡Tima'queja uts Ayo', uts nash jutactyi' Ayo'tyi' tsun mạyedye'chety, paj mu' ñịbe'jajiti. Mu' tui'tyi' c̣hon'dyedyes mạyedye'ches, tima'queja mu' Jen' mạyedye'chety! —yi in. 39Mu'ĉantyi' fariseo in pạrej jéte Jesús in: —Jị'chiyacsity, fạra'jeyaca jị'chiyactyi' mi paj jam me' yi in —jéte in. 40Jesús vorjeyacsi: —Yụ jéyac, tyäpi jụijya' uts in, mij qui ra' äjyi in tima'quin yụ in —jéyacsi mu' Jesús. 41Aty c̣hẹi'ya' Jerusalén tyiti in, aty nạijtye' mọ' bä'yedye' in chat qui mu' Jesús táracsi Jerusalénĉantyi' muntyi' in. 42Yi mu': —Faraj vu' ca' chicacsi q̂uin' mi'in paj qui c̣hoñi mi'in, q̂uin' qui nam' aty jiyi' tupudye', aty jam jun', ĉaĉaij na jam chäte' bu'yi' ọij mi'indyes. 43̣Q̂uin' chat ra' ayij tupudye' ñịbedyes mi'in, atsij ra' in mu'in fáquinactyi' in, cọtoij ra' tŝútyibunac in bä'yedye' mi'in cochop ra' tŝọij in, junanaj ra' ĉụi' mọmo' ñutsjiĉun'nac in. 44Mu'in ra' jiva'chabunac bä'yedye' mi'in, räj ra' me'sisij tŝọi' aca' mi'in, judyeya' ra' ijanac in, jo'mes ra' jị'ĉojtiñe' mi'in, ĉaĉaij na me' tsan' mu' Jen' ĉushnac mi'in, mạ'je' tsan' ji'c̣honnac mi'in, mi'in qui nam' jam dam' ĉúti —yi Jesús jéyacsi. 45Jesús siti Jen'si'ĉan aca' mu', ji'shupcacsi mu'in ji'mincaquity in. 46Jéyacsi: —Yi' Jen'si' sánacdye' mu': “Ọij aca' yụ cọdacdyedyes mọmo' yụ́che'” yi'. Mi'in qui nam' jam me', mu'ĉan ji'bä'yacsi shushu'aty mi'in —jéyacsi mu' Jesús. 47Jesús räjĉan mạyedye' Jen'si'ĉan aca' mu' jị'chiyacsi muntyi' in. Mu'in na tashchety cudyitity Jen'che' in, judyeya' mu'in jị'chiyacsity yụ'tacdye' in, judyeya' Jerusalénĉantyi' fer bu'yity chime' in, mọ' jị'fajqueyete mu'in in. Mu'in dyijyi in jun' bu'yi' chuc ra' ji'ijate in mu' Jesús, queve' tsan' in, 48jam qui nam' jun' bu'yi' dạque' in ĉaĉaij na muntyi' räj se'vepte p̂eyacdye' in, anic ma'jotyepte in mu'si' p̂eyacdye' mu'.

will be added

X\