Luke 16

1Jesús jéyaqui jị'chiyactyi' mu': —Mu'ya' jiquej yirity muntyi' jedye'tumtyi', chime'dye mu'ya' úñity mu' ĉọjcaptety jedye' in. Yirisĉan mạyedye' yoctyi' muntyi' in p̂eijbite in úñity mu' jéte in mu' muntyi': “Uts ĉujcabuntyi' jedye' mi pạrej ĉụi'situbun jedye' mi”, jéte in. 2Mọ'dyes mu' muntyi' ji'vorvaĉan úñity mu' jéyaqui: “¿Jun' ca' me' mi? A nash se'vacsi yụ muntyi' in p̂iyin in jun' chuc jäm'taqui mi a'c̣histum dyijyedye' mi. Yụ ra' cạvebiye déve mi, juñucsi' chuc mọ'che', ĉaĉaij na yụ ra' ji'shupjadyeye carijtacdye'ĉantyi' mi”, jajiti ayo' mu'. 3Dyijyi úñity mu', yi ĉojtyi'ĉan mu': “¿Jun'taqui qui bu ra' q̂uin' yụ aty shubanya' úĉantyi' yụ? Yụ na jam jun' chịj bächäi' jedye', itŝi' dyijyedye' yụ, tsịca' qui ra' yụ cọdacsity querec̣ha yụ chime'. 4Me' ra' yụ paj qui muntyi' tiĉuñin yụ in ĉụi'si'ĉan aca' mu'in, aty shubanya' yụ carijtacdye'ĉan yụ, yoctyisĉan aca' jịjcaij yụ”, yi ĉojtyi'ĉan mu'. 5Mọ'dyes qui mu' úñity räj ji'vorvacsi tyijtyi chuc dévetuptety ayo' in. Mu' úñity jéte mu' tashche' atsijtyi' dévetuptety ayo': “¿Juñucsi' ca' dévetubutim ayo' yụ?” 6Vorjete: “Yụ dévetute jiquej cien rata aceite, me'si' déve yụ”, jéte. Mu' úñity vorjete: “Mosh ọ́che' déve mi, yocsi'che' qui ra' jịjicayem, ĉanam' qui'tac ram' yụ'tyem', me'si' ram' jiya'dyeyebajtem uts ayo'”, jéte. 7Mu' úñity chijetedye yoctyi' dévetutety: “Mi na ¿juñucsi' ca' dévetutem?” jéte. “Cien obota trivo yụ́si'”, jéte. Mu' qui jéte: “Mosh ọ́che' déve mi yocsi'che' qui ra' jịjicayem, q̂uen'ĉan qui'tac ram' yụ'tyem', me'si' qui ra' mọmo' jiya'dyeyebajtem”, jéte, me' me' jị'chacsebi déve mu'in dévetutety ayo' mu'in. 8Mu' na ayo' mu' chị́qui mu' anic dyijyedye'tum ĉọ́qui úñity mu', me' dyijyi mu' paj qui ĉụi' tsạ' bu'yedyes quevaqui. Me' tsan' me'tyity úñity mu', nọ́tyetacsi qui nam' muntyi' yoctyi' in paj qui mu'in chime'jetedye. Anicdye me', mu'in cäc̣hä'chui'tyi' in jacches jedye' in mu'in muju'cha' dyijyedye'tum carijtaqui in ĉụi'si'ya' jacches jedye' mu'in, mu'in na cäc̣hä'chui'tyi' mạijyis in uya'ya' in, jam me' dyijyedye'tum carijtaqui Jen'dyes in —jéyacsi Jesús—. 9Yụ jéyac: me'dye ra' mi'in chime', yụ'taqui ra' ĉụi'si' jedye' mi'in jacches paj qui nọ́tacsi yoctyi' muntyi' mi'in, aty rä'i'ya' mọ', chat qui ra' mu' Jen' tiĉuñinac mạyedye'che' mi'in mu'che' ra' räjĉan Jen'ya' bä'yi mi'in. 10Tyi chuc jị'cätse'tyi' miquis p̂eyacdye' jụijya', mu' ra' jị'cätse' därsi' p̂eyacdye' chime'. Mu' na dam' shu'atucsity, me' tsan' miquis jedye' jụijya', mu'dye ra' shu'aij därsi' jedye' yocsi'. 11Shi'aij jụijya' mi'in, yocve jịjijcayetiñe' jacches jedye' jụijya', mi'in jam ra' jun' so'mac mi'in paj qui carijtaqui Jen'dyes mi'in. 12Yocve jịjijcayeptinte yoctyis jedye' jụijya' mu', jam ra' jun' so'mac mi'in ĉụi'dyes jedye' mi'in. 13Cạvemac, yirity úñity muntyi' jam tupuj pärä'che' úñi, ĉaĉaij na yirity ra' mạ'jete, yoctyi' na jam, mu' mạ'jetety mu' ra' jäm' carijtyeyete, mu' na yoctyi' fạ́quete, jam mu' jun' jäm' carijtyeyete, äcäijjete mọmo' mu'. Me'dye chime' muntyi' in jam tupuj pärä'che' dyijyi in, Jen'che' judyeya' querec̣hache' —jéyacsi mu' Jesús. 14Fariseo in aty mọ' se'vepteya' Jesússi' p̂eyacdye' in, dyisacte in ĉaĉaij na mu'in fer dyijtutety querec̣ha in. 15Jesús jéyacsi: —Jeñej jäm'yity ji'ĉuti mi'in muntyisya' vej mu'in, mu' qui nam' Jen' chäyibunac ĉojtyi' mi'in jun' chuc dyijyi mi'in. Cạvevac, mọ' mọjo'cha' jäm'si' dyijtui'si' muntyi' in, mọ' itŝi' shupqui' Jen'si'ya' vej mu', mọ' anic fạ́que' —jéyacsi mu' Jesús—. 16Mọ' tashches sánacdye' Jen'si' yụ'tacdye' mu' judyeya' yocsi' sánacdye' mu' jaso'mititysi' p̂eyacdye' Jen' in, räj mọ' yụ'taqui Jen' paj qui fer bu'yi' jun' qui' chuc na'iya' mu' Juan chojtacsity jiquej. Aty me'si' tiyacchuti voro'tacsi yocsi' p̂eyacdye' p̂eye' ayo'bu'yedye' ra' Jen'si' mu', chat qui muntyi' in anic fer mạ'je' siti Jen'ya' in ayo'bu'yedye'ya' mu'. 17Räjĉan bu'yi' ra' Jen'si' yụ'tacdye' mu', mọjo'cha' carij jị'motsac mu', ọya'ya' carij jị'motsac ọij jac judyeya' mạyedye', mijam ra' méqui' mọtsi' yiris miquis ji'chäyitidye' yụ'tacdyes. 18Tyi chuc yacchuqui ĉụi'si' p̂en mu' judyeya' yocsi'che' qui vämi, mu' me'tyity so'mete juchaj mu' Jen'. Chime'dye tyi chuc mọ'che' vämi jụijya' yacchucsi'che' p̂en, me'dye mu' chime' so'mete juchaj mu' Jen' —jéyacsi Jesús. 19Jesús jéyacsi: —Mu'ya' jiquej yirity muntyi' anic jedye'tumtyi', anic jäm'tyi'ĉan quị'si' räjĉan bä'yi, räjĉan mạyedye' feshta jäm'tye' judyeya' jäm' säcsi. 20Mu'ya' chime' yirity muntyi' ñịbety, Lázaro tịj mu', yedyety mu' chómin'dye'. Mụijyam' bä'yi acasya' chụi'dye' jedye'tumtyisya'. 21Mu' Lázaro mạ'je' tsan' jebei' mọ' säcsedye' jọ'chai'si' mesaches yacchutis jedye'tumtyis. Ọij na ac̣huj ayij mọ'ya' in, enam'jepte chómin'dye' in. 22Yirisĉan mạyedye' säñi mu' Lázaro. Atsij mu'in anjer in jäshte in Abrahamya' cạte in jäm'si'che' bä'yedye', mu'che' yụ'te in. Mu' jedye'tumtyi' muntyi' chime' mu' säñi judyeya' nạc mu'. 23Mu' jedye'tumtyi' muntyi' mu'ĉan mu' yụ'tac yóĉandyem' säñitysi'ĉan ĉär'tacdye' u in, anic där ñịbe' cạve' mu'ĉan. Mu'ĉan mu' che've cạvi, mu'che' nạijte mu' Abraham Lázarotum moch. 24Fer p̂eyaqui fayete Abraham jéte: “Abraham, mi nash vóshi' yụ jiquej, ñịbe'jiti', jutiyiti' mu' Lázaro paj mu' ĉútin yụ úĉan, paj qui mu' tuyin ojñi' yụ chirijri'chem' paj pacajjishbun nem yụ, ĉaĉaij nash ñịbe' cạve' úĉan tŝijĉan yụ”, yi jéte. 25Vorjajiti Abraham: “Ạva' yụ, jesha' tsạ'dyem' jiquej mi, räjĉan ma'joij bä'yi mi, q̂uin' na aty ñịbe' cạve' mi. Lázaro jiquej anic mu' där ñịbe' cạve', q̂uin' aty ma'joij bä'yi mu'. 26̣Ọya' chime' chäcdyis to', mijam mọ' tyi cajñe' in, mọ'dyes úyaty in jam jun' cajñe' in, chime'dye mu'ĉantyi' in jam jun' úya' atsij in”, yi jajiti Abraham. 27Mu' jedye'tumtyi' vorjete: “Yụ nash cọdyeye mi Abraham juteme mu' Lázaro paj ĉucbubun jen'si' aca' yụ. 28Mu'ya' nash vojity yụ ĉanam' in. Paj mu' jéyacsi paj qui jam mu'inmun úĉan jijtuij in yóĉandyem' q̂uin' yụ u, paj jam jeñej yụ in ñịbe' cạve' yụ”, yi jéte. 29Vorjajiti Abraham: “A nash me'chupte in Moiséssi' sánacdye' judyeya' jaso'mititysi' p̂eyacdye' Jen' chime' in, paj mọ' chique' in.” 30Vorjete mu' muntyi': “Me' tsan' me', tsạ'eban qui nam' jụijya' yirity säñity muntyi', jéyacseban mu', anicyi ra' mu'in in”, jéte. 31Vorjajiti Abraham: “Jam mạ'je' chiquepte jụijya' in Moiséssi' sánacdye' mu' judyeya' jaso'mititysi' p̂eyacdye' Jen' in, jam ra' jun' anicyi chime' in, paj tsan' yirity säñity tsạ'eban jéyacseban mu'in in”, me' jajiti mu' muntyi' —jéyacsi mu' Jesús.

will be added

X\