Luke 14

1Yirisĉan mạyedye' jị'jutyitidyes, mu' Jesús mu'ĉan jịjcaij fariseosĉan aca' mu', säcsequi mu'tum tashche' bu'yitytum fariseo. Mu'in na yoctyi' fariseo in meij mu'in tän'veva'te in. 2Mu'ĉan chime' yirity muntyi' chujbity. 3Jesús jéyacsi mu'in fariseo in judyeya' mu'in jị'chiyacsity yụ'tacdye' in, yi mu': —¿Tupuj buty ji'chäcac are'reijtyi' muntyi' jị'jutyitidyesĉan mạyedye'? ¿Jätäjyi' buty yụ'tacdye' Jen'si' mu'? —me' jéyacsi mu' Jesús. 4Mu'in na muntyi' in tyäpä' mu'in tyeij in. Chat qui mu' Jesús toco'jete mu' chujbity muntyi', ji'chäĉajte, judyeya' jutebajte aca'ya' mu'. 5Jesús jéyacsi mu'in fariseo in: —Jesha', tomi noriaĉan jụijya' ĉụi'tyi' ạva' mi'in, paj tsan' vóye jụijya' mi'in, me' tsan' jị'jutyitidyesĉan mạyedye' cavin jäcaĉan mi'in —jéyacsi mu' Jesús. 6Mu'in fariseo in jam mu'in jun' voryedye' dạque' in. 7Jesús cạvacsi säcsetity ra' in, anic fibi'yi in tashchesche' bä'yaquis bä'yi in. Mọ'dyes mu' Jesús jéyacsi jị'ĉocdyes p̂eyacdye', yi mu': 8—Se'vaĉam', jäm'dyeya' ji'vorvinac jụijya' in vämedyesya' feshta, jam ra' fibi'yi mi'in tashchesche' bä'yaquis bä'yi mi'in. Vátyequej ra' atsij yirity muntyi' fer bu'yity jụijya' 9vatyquej ra' mu' ji'vorvinactyi' jin: “Meijyeva úche' mi, paj mu'che' uts bä'yi yoctyi'.” Me' yi jin jụijya', jị'tsicayin ra' mu', chat jäqui'vesche' qui ra' jịjcaij bä'yaquis mi. 10Mọ'dyes ji'vorvinac jụijya' in, jemoñe' mu'che' chum bä'yi mi'in jäqui'-vesche' bä'yaquis. Vatyquej ra' atsij mu' ji'vorvinactyi' vatyquej ra' jin mi: “Chätidye', mu'che' ra' bä'yi mi tashchesche' bä'yaquis.” Me' ra' jụijya' mi mu'in mesayaty in tima'quin ra' in. 11Tyi chuc ĉụi' muju'cha' yu'tity, mu' ra' uya'ya' yụ'tac in, mu'in na uya'ya' yu'tity in, mu'in ra' muju'cha' yụ'tac in —jéyacsi Jesús. 12Chime'dye mu' Jesús jéte mu' ji'vorvetety: —Jäm'dyeya' yụ'tyeyacsiyam säcsedye' muntyidyes in, jam ra' ji'vorvacsim ĉụi'tyi' chätidye' mi, mijam pen'dye' mi, mijam jedye'tumtyi' muntyi' ji'vorvac in, ĉaĉaij mu'indye ra' chime' ji'vorvibun in paj qui yiri'ya' säcsi mu'intum, mọ' ra' bijodye' mi. 13Jäm'dyeya' yụ'tyeyacsiyam säcsedye' muntyidyes in, dam'dye jäm' mu'indye ji'vorvacsi mi mu'in ñịbety in, judyeya' täcnity in, judyeya' väi'väi'yity in, judyeya' tofety in. 14Me' ra' chat där ma'joij mi, mu'in ra' jam jun' chime'jindye in ji'vorvin in. Jen'dye ra' so'min bijodye' mi aty ayijban'ya' tupudyem' vañinyeban ra' mu'in rụijtyity in —jéte Jesús. 15Chime'dye mu' yirity mesaya' bä'yity aty se'vepteya' p̂eyacdye' mu', mu' yi jéte Jesús: —Där ra' ma'joij in mu'in sitiya' Jen'ya' in ayo'bu'yedyesya' mu', judyeya' säcsi mu'tum in —yi mu' muntyi'. 16Yi Jesús jéte: —Mu'ya' jiquej yirity muntyi' yụ'tyety därsi' feshta, dai' muntyi' ji'vorvacsi paj qui mu'tum säcsi in. 17Aty jä'mii'tyi'ya' mọ' säcsedye', mu' yụ'tyety jutaqui úñity mu' jéyacsequi muntyi' in. Yi mu': “Jesha' tsun, a nash jä'mii'tyi' säcsedye'.” 18Mu'in na jam jụjte in, päcä' mọmo' dyijyi in. Mu' yirity jéte: “A nash ya'ij yụ yiris jac, jemoñe' tashche' chum cạveque' jac yụ, där tsan' otej jam qui nam' tupuj yụ”, jéte. 19Chiyidye yoctyi': “Yiri'tac ya'ij yụ vóye in, jemoñe' jị'ĉojtajquiqui yụ, där tsan' otej jam qui nam' jun' yụ”, me' jéte. 20Yoctyi' chime' chiyidye mu': “̣Q̂uin'dyem' nash vämi yụ, där tsan' otej jam qui nam' jun' yụ”, jéte. 21Ca'ñibun mu' úñity, jébajte ayo' mu', jam tyu' ca' jụjyi in. Mọ' mu' jị'fajque' ayo', jéyaqui úñity mu': “Tạij quivijjeyacseca, räj ra' socor'je' mi mọ' caye in bä'yedyes, quevacsi ram jụ'ñity jụ'ñity chuc ñịbety in, judyeya' täcnity in, judyeya' tofety in, judyeya' mu'in väi'väi'yity in”, jo'memety ra' tucsi mi paj qui atsij säcseti in. 22Me'dye mu' úñity. Aty atsijban mu' jébajte ayo' mu': “Aty chiquebiye p̂eyacdye' mi, taca' qui nam' mọ'ya' vav”, jéte. 23Quivij mu' ayo' jéyaqui úñity mu': “Tạij quivij mi, räj ra' socor'je' caye mi bä'yedye'ĉansi' in judyeya' räj mọ'in majmi chime' in, quevacseva yoctyi' in, ferdye'ya' tucseva paj qui sät tŝọi' in yụsĉan aca' in. 24Yụ jéyac, mu'in tashche' ji'vorvactyi' tsan' in mijam ra' yirity yụ́tum säcsi in”, yi mu' ayo' —jéyacsi Jesús. 25Meijquejĉoij mi'i mu' Jesús anic shach muntyi' in cäc̣hä'chute in. Caman'yi jéyacsi muntyi' in: 26—Tyi chuc mạ'je' cäc̣hä'chun jụijya' yụ in, jemoñe' mu' muju'cha' mạ'jin yụ, paj qui uya'ya' mạ'jeyaqui ĉụi'tyi' jen' mu', judyeya' tse' mu', p̂en mu', ạva' mu' judyeya' vojity mu' judyeya' chime' uya'ya' ĉụi' mạ'jiti mu'. Tyi chuc uya'ya' mạ'jintyi' yụ, jam tupuj cäc̣hä'chun yụ. 27Chime'dye jam vemetety jụijya' mu' crosh paj qui me' bu'yi jịjcabun ñịbedyes yụ,97 jam me' jụijya' mu', mu' ra' jam tupuj cäc̣hä'chun yụ. 28Jesha', mi'in pạrej dyijyi jäm'tiñe' ra' därsi' aca' jụijya', ¿jam adac tashche' ji'dyijviti mi'in jäm' juñucsi'che' chuc ra' ya'i' paj qui ijac mọ' aca' mi'in? 29Jam me' jụijya', me' mọmo' ĉụi' tiyacchutiñe'ya' yụ'tiñe' cach bu'yi'che', me' tsan' me' bu'yi' jam qui nam' tupuj ijaijya' mi'in. Muntyi' cavinactyi' jụijya' in dyisacbunac ra' in aca' mi'in. 30Yi ra' in: “Uts muntyi' me' tsan' tiyacchui'tyi' aca' jäm'tye', mijam qui nam' jun' ijai' mu'”, yi ra' in. 31Me'dye chime' mu'ya' jụijya' yirity ayo' se'vaquity jun' chuc yoctyi' atsij ayo' dai'tyi'tum väc̣hä'tyity mu', pärä' qui'tac mir in, me'si' rụi'cu' väc̣hä'tyity mu'. Jambi'dyem' shupqueti in jambi'dyem' tiyacchui' chuti in, tashche' chum mu' mu'yaty ayo' ji'dyijviti, are' tupuj ji'penacsi in, vatyquej ra' jam, ĉaĉaij na mu'tyi' väc̣hä'tyity uya'ya' in, yiri'tac mir mọmo' in. 32Aty chịj jụijya' jam ra' jun'tacsi ji'penacsi yoctyi' väc̣hä'tyity in, me' ĉútiya', taca'dyem' moch mu'in in, cavin ra' jutete muntyi' mu' ji'rebacsi, paj qui jäm'jitive in paj qui aty jam jedyetuij in. 33Me'dye ra' mi'in chime' ji'dyijviti mi'in, are' yụ mạ'je' cäc̣hä'chutiĉa' jụijya' mi'in, are' jam. Jemoñe' jam dyijtutiñe' ĉụi'si' jedye' mi'in paj qui cäc̣hä'chutiĉa' yụ mi'in —jéyacsi mu' Jesús—. 34Mọ' jicoj anic jäm', me' jụijya' tsabacjoi', jam ra' jun' ca'ñibun' mijam ra' cuvij jesecjoban'. 35Mọ' aty jam jedyedyes shupqui', mijam jacdyes pịñitucdyes cätidye' atsvun, jemoñe' qui va'cac mọmo'. Tyi chuc chuntumtyi' in paj jäm' se've' in ọij p̂eyacdye' —jéyacsi mu' Jesús.

will be added

X\