Luke 12

1Chat qui me'si' yejĉoij shach tyeij muntyi' in, quec̣he' tyeij in jun'tum ra' mu'ya' in, vaj meij yútyitidyeij in. Jesús jéyaqui jị'chiyactyi' mu': —Are'ĉa jam ra' me'chucsebi mi'in mọ' ji'dujraquis fariseos mu'in, mọ' cại' jun' chuc mu'in me' tsan' ac̣hi' dyijyity in, jäm' tsan' yu'ti in. 2Jesha' mọ' jujmus q̂uin' in jäqui've ra' räj jorojĉanyi' in, räj jijmu'sacsi' q̂uin' in jäqui've ra' räj chị́yac in. 3Jätäjyi chuc tojmadye'ĉan p̂eyaqui mi'in, jäqui've ra' mạijĉan se'vac, judyeya' jedye' chuc jumves tsan' p̂eyaqui aca'ĉan mi'in, me' tsan' ĉär' chụi'dye' mi'in, mọ' ra' muntyisya' vej se'vac jäqui've —me' jéyaqui jị'chiyactyi' mu'—. 4Yụ jéyac chätidye', jam ra' quijnacsi mi'in mu'in c̣hojvinactyi' mi'in, mu'in ra' ijabunacya' a' in aty ra' jam jedye' jíbunac in. 5Yụ jéyac q̂uin' tyi bu ra' quijñetinte mi'in, mu' ram' quijñetinte mi'in Jen', ĉaĉaij na mu' ram' jam ijacsi mọmo', chime' mu' va'cacsequity tŝijĉan, mu' ra' quijñetinte mi'in. 6Jesha', miqui'munsi' jaijtyi' in jam ya'i' in, ĉanam' jaijtyi' pärä' ficha jịjcai' in me' ya'i' mọ'. Mu' qui nam' Jen' jam yiris jaijtyi' yaquintui'. 7Mọ'dyes jam ra' noi'yi mi'in, dadam' mu' muju'cha' ạ̈räjjinac mi'in, jam jeñej jaijtyi' in, ọya'ya' ma'jotacsi. Jäm' dyijtunac, paj tsan' fin mi'in jo'no'ches, mu' räj chäyibunac juñucsi' chuc mọ'ya' fin mi'in. 8Yụ Anictyity Muntyi' yụ jéyac mi'in, tyi chuc jị'chicaqui yụ́dyes in muntyisya' vej mu'in, yi in, “Yụ nash Jesucristoty”, me'dye ra' yụ chime' jị'chicaqui mu'indyes in anjersi'ya' vej mu'in Jen'tyi'. 9Tyi chuc jam jị'chicaqui yụ́dyes in muntyisya' vej mu'in, yity in: “Yụ jam Jesucristoty,” chiyidye ra' yụ chime' jam jị'chicaqui yụ anjersi'ya' vej mu'in Jen'tyi'ya' in. 10Tyi chuc ac̣hi' p̂iyin yụ in yụ Anictyity Muntyi' yụ, Jen' tupuj vayacjeyacsebi juchaj mu'in, mu'in na ac̣hi' p̂eijbitety in Jen'si' Ạ'edye' mu', Jen' ra' jam tupuj vayacjeyacsebi juchaj mu'in. 11A na ra' ji'me'tyinacya' ayo'ya' jụijya' in, me' tsan' vajmu'yadye'ĉantyi'ya' ayo' in, me' tsan' bä'yedye'ĉantyi'ya' ayo', jam ra' cajotyiti mi'in jun' chuc ra' ñutsjiti p̂eyacdye'ya' mi'in, 12ĉaĉaij na Jen'si' Ạ'edyem' mọ' ra' ñútyinac chime' ra' mọ'dye so'minac p̂eyacdye' mi'indyes. 13Yirity muntyi' dai'tyi'-ĉantyi' in voryi jéte mu' Jesús: —Jị'chiyacsity, yụ jéye, jíbuti' ram vojity yụ paj qui mu' ji'chetiyin yụ jen'vunsi' jedye' tsun. 14Vorjete Jesús: —Jam nash yụ yụ'tac paj qui yụ jị'cäts yụ'tyeyac jacchesya' jedye', mijam ji'chetety jo'mes yụ. 15Chime'dye Jesús jéyacsi muntyi' in: —Jam ra' fer mạ'jetiñe' jacches jedye' mi'in. Mọ' jacches jedye' me' tsan' dai' me'chutiñe' mi'in, jam qui nam' mọ' ma'jodye' so'minac mi'in. 16Chat qui mu' Jesús yụ'tyeyacsi jị'ĉocdyes p̂eyacdye', jéyacsi: —Mu'ya' jiquej yirity muntyi' jedye'tumtyi', anic dai' shupqui' cätidye' vädacdye' mu'. 17Chat qui dyijyi mu' muntyi' ĉojtyi'ĉan mu' yi: “¿Jun' bu ra' q̂uin' yụ? Jam tyu' ra' juna' jäm'jeyaqui yụ ọij därsi' vädacdye' yụ. 18Me' ĉa yụ, yụ ra' vanaijjeyacseban aca' yụ jäm' yụ'tacdyes yụ, dadam' qui ra' utu'mun jäm' yụ'tacseban yụ, paj qui tupujyi' vädacdye' yụ judyeya' yocsi' jedye' yụ chime'. 19Chat qui ra' yụ ĉụi' jíti: Atyu' u jam jayej jedye' me'chui' yụ aty jäm' yụ'tac yụ. Aty jam yiris ra' jedye' jayejjotaqui yụ. Dai' ra' yómodye' yäjqui' jedye' yụ. Tupuj ĉụi' mọmo' jị'jutyitiij, säcsi qui ram' jịjcaij yụ, ma'joij qui ra' bä'yi yụ”, yi mu' muntyi'. 20Mu' na Jen' jam me' yi, jajiti: “Anic mis itŝi' dyijyedye', q̂uin' ra' ọij yómos säñi mi. Jadyic ra' ma'jotaqui dai'si' jedye' mi, yoctyi' qui ra' ma'jotyibun in”, jajiti Jen'. 21Me'dye ra' chime' tyi chuc dụri'ñety jedye' ĉụi'dyes in, me' tsan' me' ñịbe' qui nam' Jen'si'ya' vej in —jéyacsi Jesús. 22Jesús jéyacsi jị'chiyactyi' mu': —Jam ra' cajotyetiñe' mi'in jedye' chuc ra' jebetiñe' tsạ' bu'yedyes mi'in, mijam ra' dyijtutinte quị'si' mi'in jedye'ĉan chuc ra' cofjibun mi'in. 23Jen' mạ'je' paj qui jam mọ' mọmo' dyijtutiñe' mi'in säcsedye' judyeya' quị'si', Jen'dyes mọjo'cha' jemonac. 24Cạvacsejam' jaijtyi' in, jam jun' yiri' cäti' in mijam vädaĉan in, mijam jäm' yụ'taqui' aca'ĉan säcsedye' mọ'in. Mu' qui nam' Jen' mạyedye'chety räjĉan ji'säcsacsi. Dadam' mi'in muju'cha' mu' mạ'jinac mi'in, jam jeñej mọ'in jaijtyi' in. 25Chime'dye mi'in, me' tsan' fer dyijyiya' mi'in, mijam qui nam' jun' ñutsjeyaqui sän'dye' mi'in, paj tsan' yiris hora tsạ' bu'yetaquiya' mi'in. 26Anicdye me', mi'in jam tupuj jäm' yụ'bajtiñe' jam carijsis jedye', mọ'dyes jam ra' cajotyetiñe' yocsi' jedye' in. 27Jam ra' cajotyetinte quị'si' mi'in. Jesha' mọ' därä' jámetumsi' in, me' tsan' jam carijtaqui' in mijam p̂anaqui' quị'si' in, mọ'in qui nam' in anic mọjo'cha' jäjämun quị'si' mọ'in, mijam mu' me' ayo'tyi' quị'si' jo'mety Salomóntyi' jiquej. Me' tsan' muju'cha' jäm' yu'ti ya'ijtyi'ĉan quị'si', jam qui nam' yiris cätstye', mọjo'cha' mọ'in jäjämun in. 28Mu' Jen' me' jị'quii' mọ' därä', jam men me' bu'yis, cavin ji'co'shayac jornoĉan, dadam' ra' mi'in muju'cha' jäm' ji'quinac mu' Jen', me' tsan' dam' mọmo' anicjetinte mi'in, mu' qui nam' ĉujcanac mi'in. 29Mọ'dyes jam ra' cajotyiti mi'in mijam ra' dyijtutiñe' jedye' chuc ra' jebetiñe' säcsedye', 30ĉaĉaij na räj ọij jedye' in fer dyijtui' mu'in jam anicjetety Jen' in. Mu' na Ạvatunactyi' mi'in, mu' nash chäyinac jedye' chuc jemontiñe' mi'in. 31Mi'in na dyijtumac Jen', mu'si' dyijyedye' cäc̣hä'chubimac, me' ra' mu' ayo'bu'yi mi'indyes, chat qui ra' so'mac mi'in räj jedye' chuc jemontiñes ọ́che' jacche'. 32Jam ra' noi'yi mi'in yụs oveca mi'in, me' tsan' jam dai' mi'in, ĉụi'si'ya' dyijyedye' mu', mu' Jen' aty rụij yu'tyinac paj qui mu'yadyety mi'in ayo'bu'yedye'-ĉan-dyety ra' mu'. 33Mọ'dyes ji'mincaqui ra' ĉụi'si' jedye' mi'in, chat qui ra' querec̣ha ñịbe'jeyacsi mi'in mu'in jayejjotaquity jedye' in, dụri'ñetiñe' ra' mạyedye'che' jedye' mi'in. Mọ' mọ'ches jedye' räjĉan ra' me' bu'yi', mijam ra' jun' mọtsi', mu'che' itŝij méqui' shishi'aty in, mọ'che' ra' jam tạbai' jedye' chime'. 34Tyi chuc jacche' dụri'ñe' jedye' in, mọ' mọmo' mu'in dyijtuva'que' ĉojtyi'ĉan mu'in, mu'in na mạyedye'che' dụri'ñe'tyi' jedye' in, mọ' mu'in dyijtui' in ĉojtyi'ĉan mu'in. 35Jä'mii'tyejam', cäbusham' judyeya' ra' jäñä' mạijyis mi'in, me' bu'yi ra' bisva'dyiĉa' yụ mi'in. 36Me' ra' mi'in jeñej bu'yi úñity in bisajtety ayo' mu'in, ĉọ́quety vämedyes feshta. Aty venchubanya' mu', fayebanya' chụi'dye'ya', q̂uin'dyem' ram' vanacjeyebajte in. 37Jäm' där mu'in úñity in dạcacseshanya' ayo' mu'in tsạ' bu'va'joij in. Yụ jéyac anicsis p̂eyacdye', mu' ayo' mu'in anic ra' jäm'jeyacsi, mu' ra' ji'bä'yacsi ra' mesaya' judyeya' ra' ji'säcsacsi. 38Där jäm' mu'indyes in dạcacseshan tsạ' bu'yi in, paj tsan' menya' venchubanya', paj tsan' nạijjoqui've jụijya'. 39Cạvevac mi'in, yirity muntyi' chịj jụijya' jun' qui' chuc ra' venchuij mu' shushu'aty aca'ya' mu', jam ra' jun' mem' cạvete paj qui javanchubuti aca' mu' judyeya' jashu'atuti. 40Me'dye mi'in chime' jam chịj mi'in, yụ ra' jun'si' ra' ĉụi' mọmo' atsijban yụ Anictyity Muntyi' yụ, mọ'dyes ra' jä'mii'tyi mi'in. Jun'si' ra' ĉụi' mọmo' atsijban yụ, aty jam dyijtubunya' yụ in, q̂uin'dyem' ra' atsijban yụ. 41Pedro yi jéte Jesús: —Jị'chiyacsity, ¿tyídyes buty ọij p̂eyacdye' q̂uin'? ¿Are' räjtumdyes in, are' tsundyes mọmo'? 42Jesús voryi: —Tyi chuc dyijyedye'tumtyi' úñity chiquetety ayo' mu', mu'dyes ra' ọij p̂eyacdye'. Mu' ayo' mu' jayu'tity paj qui ĉọjcapte aca' mu' paj qui mu' räjĉan mạyedye' so'macsi säcsedye' yoctyi' úñity in. 43Mu' ayo' mu' aty ca'ñibunya' där mu' ma'joban úñity mu' jadaquishun jụijya' ayo' mu' yejĉoij chiquepte p̂eyacdye' mu'. 44Me' jụijya' mu', mu' ayo' muju'cha' qui ra' jayu'ti paj qui räj jedye' ĉọjcapte. 45Jam na me' jụijya' mu' úñity, yocve dyijyi jụijya' mu', yi jụijya' mu': “Jambi' ra' atsijban ayo' tsun.” Tiyacchui' yoctyi' jị'ñibe'cacsi úñity mu' judyeya' úñis mu' judyeya' säcsedye'ya' yíya' judyeya' tyédye'ya' yíya' chime' shu'queva'joij. 46Yódyesdyem' mạyedye' jam bisajte u mijam chịj, mọ' ra' mạyedye' venchuban vátyequej ra' c̣hon'yeban, fersi' ra' va'tacdye' jaso'miti, mu'ĉan ra' va'cac yóĉandyem' va'cac u in mu'in jam anicjetety Jen' in. 47Yirity úñity me' tsan' chị́yeptety jụijya' p̂eyacdye' ayos jụijya' mu', jedye'veij chuc mu', jam qui nam' chiquepte p̂eyacdye' jụijya', anic ra' fersi' va'tacdye' so'mac mu'. 48Mu' na úñity jam chị́yeptety jụijya' p̂eyacdye' ayos mu', me' tsan' mọ'ya' va'tacdyedyes juchaj jụijya' mu', so'mac ra' va'tacdye' dam' qui na mọmo'. Tyi chuc so'mactyi' Jen'ya' jụijya' in paj qui dai' chị́ye' jedye' in, jemoñe' paj qui mu'in fer carijtaqui Jen'dyes in. Tyi chuc dadam' fer so'mac Jen'ya' jụijya' in, mu'in dadam' chị́ye'tyi' in, jemoñe' paj qui mu'in dadam' muju'cha' carijtaqui Jen'dyes in. 49Yụ úche' atsij jacche' tsäqui'sis tui' yụ, jeñej tŝij ji'jä'ñes yụ, faraj vu' ca' me'ĉandye co'shai'. 50Därsi' ra' ñịbedyes jị'ĉojtye' yụ, aty fer dyijtuti atsvun yụ jun' qui' chuc ra' cạ̈tsi'. 51Me' buty ĉútiĉa' yụ mi'in yụ atsij úche' jacche' paj qui jäm'jitive jacchety muntyi' in, me' buty ĉútiĉa' yụ mi'in. Jam, jam me'dyes atsij yụ. Yụ nash atsij jam jäm'jititydyety muntyi' in. 52Yụ́dyes ra' pạrej muntyi' in jam ra' jäm'jiti in ĉụi'tyi'tum chätidye' mu'in, chibinyity ra' chätidye' in fáquiti ra' in pärä'yitytum in. 53Pạrej ra' muntyi' in jam ra' jäm'jiti ĉụi'tyi'tum ạva' in, ạva' ra' chime' mu'in jam ra' jäm'jiti ĉụi'tyi'tum jen' mu'in. Me'dye ra' chime' p̂en in, pạrej ra' jam jäm'jiti' ạva'tum in, pạrej ra' mọ'in ạva' mọ'in jam jäm'jiti' tse'tum in. Pạrej ra' p̂en in jam jäm'jiti' jäi'tum in, judyeya' ra' mọ'in jäi' mọ'in chime' jam jäm'jiti' yaya'dye'tum mọ'in. 54Chime'dye mu' Jesús jéyacsi muntyi' in: —Cạvetiñe' jụijya' mi'in dyicba'badye' yóche'dyem' jịjcaijche' tsun u, yi mi'in: “Añei' to' ra'”, yi mi'in, me'dye anic. 55Chime'dye jụijya' jätisve va'queshan tyi'mu, yi mi'in: “Anic ra' coshyeban'”,94 yi mi'in, anicdye me'. 56Anic ac̣hi' dyijyity mi'in, jäm' yu'ti tsan' mi'in. Anic chị́yetiñety jo'mes jacches jị'ĉocdye' judyeya' mạyedye'ches, Jen'si' qui nam' jị'ĉocdye' jụijyam' jam méqui' chị́yebitinte mi'in, jun' chuc aty cạ̈tsi' yụ́dyes sánacdye' q̂uin'. 57¿Jun' dash jam ĉụi' dyijyi mi'in jedye' chuc rụijsis jụijya' judyeya' jedye' chuc jam rụijsis? 58Jesha' yirity muntyi' atsij jụijya' ji'me'tyinac ayo'ya' jụijya', aty canac jụijya' ayo'ya', cavintum quevvac paj qui jäm'jiti mu'tum mi'in, jambi'dyem' ayo'ya' venjoij mi'in. Jam me' jụijya' mi'in väc̣hä'tyityya' chum ra' yu'tyinac in, chat qui ra' jäqui've ĉär'yejoij ĉär'taquisĉan mi'in. 59Yụ jéyac mu' ra' jam jun' ji'shupquinac jun' qui' chuc tas jiya'dyeyac.

will be added

X\