Luke 11

1Yirisĉan mạyedye' mu' Jesús cudyiva'ti Jen'che' mu'. Aty ji'me'siyaqui cọdaqui, yirity jị'chiyactyi' mu' ĉọshte jéte: —Jị'chiyacsity, ji'chäyitiĉam' cọdacdye' Jen'che' tsun paj qui tsun tupuj me' cọdaqui, yojdyem' mu' Juan u jị'chiyacsi jiquej cọdacdye' ĉụi'tyi' jị'chiyactyi' mu'. 2Jesús jéyacsi jị'chiyactyi' mu': —Cọdaqui Jen'che' jụijya' mi'in, me' ra' jétinte: “Tsuntyi' Jen', paj muntyi' in ạ̈räjjin in, cọdaqui tsun chime' paj qui cavintum ayo'bu'yi mi. 3Räjĉan mạyedye' so'mitiĉam' säcsedyedyes tsun. 4Jam ra' dyijtubutiĉa' mi juchaj tsun, yojdyem' tsun jam dyijtucsebiban juchaj u mu'in yódyetydyem' juchajtuntyi' u tsun. Ñútyitiĉam' paj qui jam jị'ĉojtac tsun sọyo'ya'”, me' ra' yi cọdaqui mi'in Jen'che'. 5Jesús jéyacsi chime'dye: —Yéja' ra', yirity mi'in mu'ya' pen'dye' mu', judyeya' yirity mi'in menya' ĉọctinte aca'ya' mu', judyeya' jétinte: “Prestajjiyiti' chibin pan 6ĉaĉaij na mụi'dye shupqueti pen'dye' yụ aca'ya' yụ, itŝi' jedye' paj qui ñịbe'jete yụ”, me' jétinte pen'dye' jụijya' mi'in. 7Mu' ra' mu'ĉantun vorjin mi: “Jam ra' me'tim cudyityitim, a nash ĉä'räi' chụi'dye' yụ, a nash jubijĉan yụ räj ạva'tumdye yụ, aty jam jun' sacyi yụ paj qui so'meye”, me' ra' jin jụijya'. 8Yụ jéyac, me' ra' tsan' pen'dye' mi, jam qui na ram' jedye' farajjiyin mi. Me' tsan' me' yejĉoij qui nam' cọdyeva'teya' mi, chijäm' ra' mu' jụjtyin chat qui ra' so'min mi jedye' chuc jemoñes mi, ĉaĉaij na yen'tyi cọdyeva'te mi. 9Mọ'dyes yụ jéyac, cọdyemac Jen', chat qui ra' mu' so'minac, quevvac, chat qui ra' dạctiñe', fayi jụijya' chụi'dye'ya' mi'in, mu' ra' vanacjiyinac mi'in. 10Tyi chuc cọdaquity jụijya', mu' ra' Jen' jaso'miti, tyi chuc queve'tyi' jụijya', dạque' ra', tyi chuc fayity chụi'dye'ya' jụijya', vanacjeyeyac ra' chụi'dye'. 11Mi'in chime' ạva'tumtyi' mi'in, ạva' cudyityinac tạbedye' jụijya' mi'in, ¿nas bu ra' so'maqui ạva' mi'in? ¡Jam jun'! 12Chime'dye cudyityinac fen jụijya' mi'in, ¿so'metinte bu ra' ijtyiquij mi'in? ¡Jam jun'! 13Me' tsan' ac̣hi'yity mi'in, jäm'si' qui nam' so'maqui ĉụi'tyi' ạva' mi'in, dadam' ra' mu' Jen' mạyedye'chety Ạ'edye' mu' jam ra' quijatutacsi mu'in cọdyetety in. 14Yirity muntyi' sọyo'-tumtyi', mọ' jepepej jayu'ti mu' muntyi', jam jun' p̂eyaqui. Mu' qui Jesús meijjajityibun sọyo', tiyacchubun p̂eyaĉan. Muntyi' in anic mu'in där äjyi in. 15Pạrej na jam me' in, yi mọmo' in: “Mu' Beelzebú sọyoty ayo' mọ'in,89 mu' nash jaso'miti ferdye' mu' Jesús, mu'si'ya' ferdye' meijjetyetacsi sọyo' in”, me' yi in. 16Chime'dye mu'ya' yoctyi' muntyi' in mạ'je' tsan' jị'ĉojte in vatyquej ra' jutactyi' Jen'tyi' mu', mọ'dyes cọdyete tsan' in paj qui jị'caveyacsi Jen'si' ferdye' mu'. 17Mu' na Jesús chị́yacsebi dyijyedye' mu'in jam jäm'si', yi in Satanássi'tum ferdye' carijtaqui mu'. Mọ'dyes qui mu' jéyacsi: —Jesha' bä'yedye'ĉantyi' chuti ayo'tum jụijya' mu'in, mijam ra' men me' bu'yi' mọ' bä'yedye'. Chime'dye vaj chätidye' jụijya' in vaj meij chuva'tidyeij in, cavin ra' mọtsi in. 18Me'dye ra' chime' mu' Satanás, vaj meij chutidyei' bä'yi'ya' sọyo' in, jam ra' men me' bu'yi' ayo'bu'yedye' mu' Satanássi', cavin ra' mọtsim'. Anic cäj p̂iijtiĉa' yụ mi'in, yi mi'in: “Uts Jesús Beelzebúsi'ya' ferdye' meijjetyetacsi sọyo'”, yi mi'in. Anic va've yi mi'in, ĉaĉaij na mọ' sọyo' jam tupuj meijjetyetacseban' sọyo'. 19Chime'dye chịj mi'in ĉụi'tyi' chätidye' mi'in jam Satanássi'ya' ferdyem' meijje-tyetacsi sọyo' in, mu'indye chịj in anic cäj cạtiñe' dyijyedye' mi'in. 20Yụ nash meijjetyetacsi sọyo' Jen'si'ya' ferdye' mu', ọij ji'ĉuyinac mi'in Jen' aty ayo'bu'yi mi'indyes. 21Jesha', yirity feryity muntyi' ñutsyedyestumtyi', tupuj ĉọjcaqui ĉụi'si' jedye' mu' aca'ĉansi' mu'. 22Atsij qui na yoctyi' muntyi' jụijya' dadam' muju'cha' feryity, mu' ra' jaji'pen'dyi jachutyiti räj mọ' ñutsjeyaquis mu', mu' qui ra' räj jajicbuti jedye' mu' judyeya' ji'cheteyacsi qui ra' pen'dye' mu'.90 23Tyi chuc jam ñútyintyi' yụ in, mu'in fáquin yụ in, judyeya' tyi chuc jam ñútyintyi' ĉujcabuntyi' oveca yụ in, mu'in ĉav'cacsity mọmo' in —yi jéyacsi Jesús. 24Chime'dye jéyacsi Jesús: —Yiris sọyo' meijyeban' muntyi'ĉansi' jụijya', jọban' chañesve jac tyeban' quevaqui' juna' chuc mạ'je' bä'yi' tsan'. Jam dạcaqui' juna' jụijya', dyijyeban' yi': “Dam'dye jäm' acatuban' yụ, yóĉansi'dyem' shupqui' jiquej oij.” 25Me'dye dạquishajte quivij mu' muntyi' jeñej bu'yity aca', jeñej jäm' coyacsi' jäm' yụ'tacsi'. 26Aty me' jadaquishun mu' muntyi', mọ' sọyo' chịmo've jịjcaban' cuvij quevacseĉan' yocsi' sọyo' in, yävätidye' qui in, dadam' mọjo'cha' ac̣hi'yis in räjen'dye qui siste in mu' muntyi'. Dadam' qui muju'cha' ñịbe' cạve' mu' muntyi' jam jeñej tashche' jiquej, yirisdyem' jame'chutiya' mọ' sọyo' jiquej. 27Taca' p̂eyacva'joij mu' Jesús, yiris p̂en muntyisya' vej yi' p̂eyaqui' jéte mu' Jesús: —Där ma'joi' tse' mi, mọ' ji'na'insi' jiquej judyeya' ji'tsi'yinsi' mi jiquej. 28Vorje' vatyquej Jesús: —Dadam' mu'in muju'cha' ma'joij in se'veptety Jen'si' p̂eyacdye' in judyeya' chiqueptety in. 29Dadam' dai'yaij atsij muntyi' in ĉọshte Jesús in. Jị'chiyacsi jéyacsi: —Anic ac̣hi'yity uts q̂uin'tyity muntyi' in, jo'mes mọmo' cudyityin yụ in, paj qui yụ jị'caveyacsi ferdye', chat qui ra' q̂uin'dyem' anicjin yụ in. Yụ ra' jam me' jị'caveyacsi yódyesdyem' cudyityinsi' u yụ in, mọ' ram' jị'caveyacsi yụ jun' chuc mu' ji'caviti Jonás jiquej, me'dye ra' yụ chime'. 30Yojdyem' mu' Jonás jị'caveyacsi mu'in Níniveĉantyi' jiquej u in, me'dye ra' yụ chime' Anictyity Muntyi' yụ, mọ'dye ra' jị'caveyacsi raij q̂uin'tyity muntyi' in.91 31Aty ayijya' tupudye' Jen'si' mu', jị'cäts yụ'tacsi ra' juchadye'ya' muntyi' in, mọ' ayo' Sabáĉansi' jiquej, mọ' ra' sacyi' ji'jäcacsebi' ra' juchaj muntyis q̂uin' in, me' tsan' mọ' jam ọ́yas dyụ́tsedye'ves tsan' mọ' bä'yis, ayij qui nam' se'veshbite mọ' rụijsis p̂eyacdye' Salomónsi' jiquej. ̣Q̂uin' na me' tsan' yụ́si' p̂eyacdye' anic mọjo'chas, ọya'yas jiquej Salomónsi', q̂uin'tyity qui nam' muntyi' in mijam méqui' mạ'je' se'vibun p̂eyacdye' yụ in mijam anicyi in. 32Chime'dye aty ayijya' tupudye' Jen'si' mu', jị'cäts yụ'tacsi ra' juchadye'ya' muntyi' in, mu'in Níniveĉantyi' jiquej in, mu'in ra' sacyi in, ji'jäcacsebi ra' in juchaj muntyis q̂uin' mu'in, ĉaĉaij na mu'in se'vebitety in Jonássi' voro'yedyem' q̂uin'dyem' dyijyi juchajche' in. ̣Q̂uin' na me' tsan' yụ p̂eyacdye' tui' mọjo'chas, ọya'yas Jonássi' jiquej, jam qui nam' méqui' mạ'je' se'vibun p̂eyacdye' yụ in mu'in q̂uin'tyity muntyi' in. 33Yiris mạijyis aty ji'jä'nacya' jam jun' tupuj äptac, jemoñe' che'vem' yụ'tac paj qui mạijchucsi' räj mu'ĉantyi' muntyi' in. 34Mọ' vej mi'in mọ' nash jeñej bu'yi' a'ĉansi' mạijyis mi'in. Chuñem vej jụijya' mi'in, räjtumdye a' mi'in mạij bu'yi'. Jam na naijti' jụijya' vej mi'in, jo'mei'dyem' a' mi'in tojmai'. 35Jäm' dyijtutac mi'in paj qui jäm' naijti Jen'dyes mi'in, paj qui jam tojmadye'ĉan bä'yi mi'in. 36Yojdyem' yiris mạijyis o mạijchucsi' muntyi' in, me'dye ra' mi'in chime' mạijquedye'ĉan bä'jam' paj qui jäm' naijti Jen'dyes mi'in, mijam ra' tojmadye'ĉan bä'yi mi'in. 37Aty ji'me'siyaqui p̂eyaqui mu' Jesús, yirity atsij fariseo, fayete mu' Jesús paj qui mu'tum säcsi. Chat qui mu'ĉan jịjcaij mu' Jesús mesaya' jịjcaij. 38Fariseo äjyi mu' na Jesús jam tashche' rụij favaqui un mu' jun' chuc me' yicdye' mu'in. 39Jesús yi jajiti mu' fariseo: —Tacaty mi'in me'tyity fariseo, me' tsan' jäm' ji'ĉuti mi'in muntyi'ya' in, ĉojtyi'ĉan qui na mọmo' mi'in jam jäm' mi'in, a'c̣hi mi'in, jeñej yiris tyéquis fajchem' jäm' chụi'bui', me' yụ'tiñe' mi'in, ọ́ĉan qui nam' a'c̣hi' mọ'. Me' bu'yi ĉojtyi'ĉan mi'in dyijtutiñe' shi'adye' judyeya' ac̣hi'yedye'. 40Anic itŝi' dyijyedye' mi'in. ¿Chịj tsan' u mi'in mu' jäm'tyety a' mi'in mu'dye chime' jäm'tyiyinac ĉojtyi' mi'in? Mu' mạ'je' paj qui räj rụij jäm' bä'yi mi'in, räjtumdye ĉojtyi' mi'in. 41Me' ra' mi'in ĉútac ĉojtyi'ĉan mi'in chat qui ra' ñịbe'jeyacsi mi'in mu'in jayejjotaquity jedye' in, me' ra' chat räj jäm' yụ'tac ĉojtyi'ĉan mi'in. 42Där ra' ñịbe' cạvetiñe' mi'in fariseo mi'in. Räj me'chutiñety jedye' mi'in, mọ' pạrejjetiñe' dam' Jen'dyes, yiri'tacĉansi' jedye' so'metinte, me' tsan' miquis cätidyes shan, mọ' chime' pạrejjetiñe' Jen'dyes mi'in.92 Me' tsan' mọ' dyijtutiñe' mi'in, jam qui nam' rụij cạtiñe' muntyidyes in, mijam mạ'jetinte Jen' chime'. Dam'dye jäm' me' mi'in, mọ'in mọjo'cha' jemonacsi' in, jam qui na ram' mọ' ọya'yas yụ'tacdye' farajjetiñe' mi'in. 43Där ra' ñịbe' cạvetiñe' mi'in fariseo mi'in va'bunyedye'ya' mi'in, mọ' mọmo' mạ'jetiñe' mọjo'chas bä'yaquis vajmu'yadye'ĉansi' in. Chime'dye mạ'jetiñe' paj qui muntyi' in jäm'yedye'tum vorjinac cayeĉan rébinacya' in. 44Där ra' ñịbe' cạvetiñe' mi'in fariseo mi'in, ĉaĉaij na mi'in jeñej bu'yi mọ' ru'dyes jam chä'tes me'dye muntyi' yútyi mu'ya' in jam chịj in,93 me' bu'yi mi'in chime' jam jorojĉan ĉojtyi'ĉansi' a'c̣his dyijyedye' mi'in. 45Yirity mu'ya' jị'chiyacsity yụ'tacdye' jéte mu' Jesús: —Me' yi mi tsunche' bu'yi' chime' mọ' tŝọi'. 46Vorjajiti Jesús: —Där ra' ñịbe' cạvetiñe' chime' mi'in jị'chiyacsity yụ'tacdye' mi'in. Anic carijsis jäm'tiñe' ji'chäyitidye' mi'in judyeya' jéyacsi muntyi' mi'in paj qui mọ' chique've in, mọ' jeñej bu'yi' yiris javquis jedye' ji'vecsi mi'in, mijam dam' nọ́tyetacsi mi'in paj qui chique've in. 47Där ra' ñịbe' cạvetiñe' mi'in, ĉaĉaij na anic ac̣hi'yity mi'in yojdyem' vóshi'vun jiquej u mi'in. Me' tsan' jäm' yụ'tacsebity ru'dyes mu'insi' jaso'mitity p̂eyacdye' Jen' jiquej in, mu'in ijacsity jiquej vóshi'vun mi'in. 48Vóshi'vun mi'in ijacsi jiquej in, mi'in qui nam' q̂uin' jäm' yụ'tacsebi ru'dyes mi'in, ọij jorojĉanyi' mi'in chime' cäc̣hä'chucsebiban dyijyedye' vóshi'vunsi' mi'in. 49Mu' na Jen' dyijyedye'-tumtyi' yi: “Yụ ra' juteyacsi mu'in so'mactyi' p̂eyacdye' yụ, judyeya' mu'in cạyacsity p̂eyacdye' yụ. Vatyquej ra' jam jụjjeĉúnacsi in, pạrej ra' jị'ñibe'cacsi in, pạrej na ra' ijacsi in”, me' yi jéyacsi Jen'. 50̣Q̂uin'tyity muntyi' in, mu'inche' ra' tŝọi' va'tacdye' mu'in räj ijacsity in jaso'mitity p̂eyacdye' Jen' jiquej in, räj mu'in ijactyi' jiquej in, yoqui'dyem' jäm'tacya' ọij jac jiquej o. 51Mu' tashche' ijactyi' Abel, jäqui've mu' Zacarías, Jen'si'ya' aca' ijate in, c̣hẹi'ya' mọ' ji'co'shayacdye', mu'ya' ijate jiquej in. Mọ'dyes ra' mu'in ijacsity mu'in jaso'mitity p̂eyacdye' Jen' in, räj ra' mu'inche' tŝọi' ọij va'tacdye' q̂uin'tyityche' muntyi' in. 52Där ra' ñịbe' cạvetiñe' mi'in jị'chiyacsity yụ'tacdye' mi'in, me' ra' tsan' mọ' me'chutiñe' sánacdye' mi'in, jumjetiñe' qui na mọmo' mi'in, mijam ĉụi' chiquetiñe' mi'in, mijam yoctyi' mạ'jetiñe' paj qui chique' in —jéyacsi Jesús. 53Aty me'si' jéyacsi mu' Jesús, mu'in jị'chiyacsity yụ'tacdye' in räjtumdye mu'in fariseo in jam jäm'jajiti mọ' p̂eyacdye' in jị'fajque' in, chat qui fạra'ñete in, chime'dye dai' cọdacdyes p̂eyacdye' so'mete in, 54vatyquej ra' cäjsis ji'shupqueyeyacsi paj qui tupuj ji'me'te in.

will be added

X\