Luke 1

1Yụ nash sáñe' ọij mídyes Teófilo, yi' jun' chuc mu' Jesucristo tsuntum bä'yi jiquej. Mu'ya' jiquej dai' mu'in sáñe'tyi' in jun' buty bä'yi mu' tsuntum jiquej. 2Mu'in sánaquity in mọ'dye mọmo' p̂eyacdye' sáñe' in yódyes-dyem' se've'si' tsun, mọ' so'minsi' tsun in mu'in cại'tyi' p̂eyacdye' Jesucristos in, ĉaĉaij na tạ'caty mu'in cạvetety in yoqui'dyem' tiyac-chuti'ya' carijtaqui jiquej u. 3- 4Mọ'dyes yụ räj cạvacsebi sánac-dye' mu'in cạvetetysi' jiquej in judyeya' yụ jéyacsi chime' mu'in cạvetety in aty tiyacchuti'ya' carijtac-dye' jiquej mu'. Yụ jäm' ĉọi' paj qui yụ jéye sánacdye'che' räj jun' jun' chuc jun'tacaque Jesucristo jiquej, paj qui rụijsis me'chui' mi mọ' p̂eyacdye' aty se'ves jiquej mi, mi nash fer bu'yity Teófilo. 5Urucya' jiquej yoqui'dyem' ayo'bu'yaqueya' Judeaĉan mu' Herodes jiquej u,78 mu'ya' yirity cudyitity Jen'che', Zacarías tịj mu', Abíassi'ĉantyi' ñuru', mu'mun carijtaqui Jen'si'ĉan aca' mu'. Zacaríassi' na p̂en mu' Isabel tịj mọ', vóshi' mu' chime' Aarónvunsi' jiquej. 6Zacarías judyeya' p̂en mu' anic rụij bä'yi in Jen'si'ya' vej mu', räjĉan chiquepte Jen'si' p̂eyacdye' in, judyeya' yụ'tacdye' mu', mijam jụ'ñiij in. 7Itŝij qui nam' ạva' mọ'in, ĉaĉaij na särä' bu'yis mọ' p̂en mu', Isabel, judyeya' mu' Zacarías aty chime' isho'mun aijvun in. 8Yirisĉan mạyedye' aty tupudye' mu'in Abíasĉantyi' ñuru'tyity in, mu'in qui tŝọ́taqui in paj qui Jen'si'ĉan aca' carijtaqui in. 9Me' bu'yi' yicdye' mu'insi' in mu'in cudyitity Jen'che' in, yirity ñuru'ĉantyi' in yụ'tac paj qui mu' ji'co'shayeque'tyi' jẹrejres Jen'dyes. Mu' na Zacarías me' bu'yi mu' yụ'tac. 10Aty Jen'si'ĉan aca' yirity mu' ji'co'shayeva'que' jẹrejres, mu'in jorojyaty dai'tyi' in, cọdaqui mu'in Jen'che' in. 11Me'ĉandye yirity anjer ji'caviti Zacaríasya', ĉụi'dye vatyquej mu'ya' rụi'cujcuij tacve bu'yi yóya'dyem' mọ' ji'co'shayaquis jẹrejres o. 12Mu' na Zacarías aty me' cạveteya' mu' anjer, tyum' tyeij ĉojtyi' mu' noi'yi mu'. 13Mu' na anjer yi jajiti: —Jam ra' noi'yi mi Zacarías, a nash Jen' jụjjibun cọdacdye' mi, ạva'yi ra' mi ĉụi'si'ĉan p̂en mi mọ' Isabel, Juan ra' yụ'tyeyete tịj mi. 14Där ra' ma'joij mi ạva'tum mi, judyeya' ra' dai' yoctyi' in ma'joij mu'dyes chime' in, na'iya' mu'. 15Mu' ra' ạva' mi fer bu'yi ra' Jen'si'ya' vej mu'. Mu' ra' jam dam' c̣hom' tyeij pashsi' tyédye', mijam ra' vino tyeij mu'. Na'i ram' mu' jasäsdyi ra' Jen'si' Ạ'edye' mu'. 16Mu' ra' ji'ca'nacseban Jen'ya' dai' mu'in Israeltyi' vóshi' in, paj qui mu'in cäc̣hä'chubajte in Jen' Ayo' mu'in. 17Mu' ra' Juan jä'mij tashche' voro'tacsi muntyi' in jambi'dyem' atsij mu' Ayo' tsun. Fer bu'yi ra' judyeya' dyijyedye'tum chime', yojdyem' Elíasvun jiquej u. Chime'dye ra' ji'jäm' yụ'tacseban muntyi' in ĉụi'tyi'tum ạva' mu'in, chimu'dye ra' yi paj qui mu'in jam chiquetety Jen' in rụij bu'ban' dyijyedye' mu'in. Me' ra' ạva' mi jä'mij ra' yi paj qui muntyi' in jä'mii'tyi ĉojtyi' mu'in, paj qui tiĉun'teve in Ayo' tsun atsijya' mu' —yi mu' anjer jajiti Zacarías. 18Vorjete Zacarías yi jéte: —¿Jun' bu ra' me' tupuj chịj yụ me' ra' cạ̈tsi' ọij p̂eyacdye' ạva'yi ra' tsun? A qui nam' isho'mun atsvun tsun —yi jéte Zacarías. 19Vorjajiti anjer: —Yụ nash Gabriel anictyity jutactyi' Jen'tyi' yụ, mu' nash jutin yụ paj qui yụ so'meye ọij jäm'si' p̂eyacdye'. 20Jesha' mi q̂uin' jam dam' anicjibutim yụs p̂eyacdye', mọ'dyes qui ra' q̂uin' jepepej shupqui mi, mijam ra' jun' p̂eyaqui mi jun' qui' chuc cạ̈tsi' mọ' tupudye' aty cạ̈tsi'ya' mọ' p̂eyacdye' —yi jajiti anjer. 21Mu'in na muntyi' jorojyaty in bisacdye' mu'in je' in. Yi jítidyeij in: “¿Jun'taqui buty mu'ĉan meñi?” 22Aty men q̂uin'dyem' shuban mu'ĉantyi', jepepej shuban, jam jun' p̂eyaĉan. Me' chịj mu'in jorojyaty in, mu' Jen' ji'naijti mu'ĉan Jen'si'ĉan aca' Zacaríasya'. Shuban c̣họco' c̣họco' qui p̂eyaĉan, yejĉoij jepepej bu'yi. 23Zacarías aty ijaijya' mọ' mạyedye' carijtacdye' mu' Jen'si'ĉan aca', chat ca'ñibun ĉụi'situban bä'yedye' mu'. 24Chat jäqui've mọ' p̂en mu' Isabel ạva'yi', tacya' aca'ya' ĉanam' ịvaj, jam shupqui'. 25Yi' ĉojtyi'ĉan mọ': “Jen' ñịbe'jin yụ, jadyic ra' tsị́catacsi' yụ muntyi' in ĉaĉaij na yụ särä' bu'yis jiquej”, yi' mọ' Isabel. 26Aty jäbän ịvaj tyiti' mọ' Isabel ạva'tum, chat qui mu' Jen' jutete mu' anjer Gabriel, Nazaretve jutete Galileaĉansi' bä'yedye'. 27Mọ'ĉan yiris bä'yi' nanas, María tịj mọ', jambi' tyushtes son'. A qui nam' tsan' mu'ya' vämtyidyety mọ' aty p̂eyacdye'ĉan atsvun. Vämi' ra' mọ' mu'che', José tịj mu'si', vóshi' mu' Davidvuntyi' jiquej. Jen' jutete mu' anjer mu' Gabriel paj qui mu' ĉọ́que' mọ' María. 28Site' jajiti': —Yụ vorjeye, därsi' ñịbe'jitidyes Jen' so'min mi, mu' nash pen'dyetun. 29Mọ' María aty cạveteya' mu' anjer judyeya' se'vepte p̂eyacdye' mu', chat qui mọ' jo'meque'quei' cajotyiti' cavin dyijtupte p̂eyacdye' mu', “Jun' bu'yi' buty cại' ọij p̂eyacdye' mu'”, yi' mọ' dyijyi'. 30Quivij jap̂iyiti' mu' anjer jajiti': —Jam ra' noi'yi' mi María, ĉaĉaij nash mu' Jen' ma'jotyin mi. 31Jạjtsi' nash ra' mi, son' ra' ạva' mi, yụ'tyeyete ra' tịj mi Jesús. 32Mu' ra' fer bu'yi, jéte ra' in: Ạva' Jen'tyi' muju'chaty. Jen' Ayo' tsun jayu'ti ra' ayo'bu'yi, yódyem' Davidvun u, vóshi'vun mu' jiquej. 33Mu' ra' ayo'bu'yi Israeltyidyes vóshi' in, mu'si' ra' jam jụ'ñisĉan mạyedye' mọtsi' ayo'bu'yidyem', me' bu'yi ra' ạva' mi —jajiti' anjer mọ' María. 34Vorjete María: —¿Jun'dyem' yụ me' ạva'yi' ĉaĉaij na jam tyi tyushtyin son' yụ in? —yi' mọ' María jéte. 35Vorjajiti' anjer: —Jen'si' qui na ram' Ạ'edyem' tŝútyin mi, Jen'si' ferdye' mu' juñum bu'yi' ra' míche'. Ạva' ra' mi anictyity tsim'tactyi' Jen'tyi' mu', jéte ra' in Jen'tyi' Ạva' mu'. 36Chime'dye ĉụi'si' chätidye' mi, Isabel, mọ' särä' bu'yis je'si' jiquej in, me' tsan' isho' mọ', aty chime' ạva'tum q̂uin', aty jäbän ịvaj tyiti' mọ' jạjtsi', 37ĉaĉaij na Jen'dyes jam méqui' carij —jajiti' anjer mọ' María. 38Jụjyi' mọ' chat qui vorjete: —Jụdyej, paj me' cạ̈tsi' yụ́tum ọij Jen'si' p̂eyacdye' mu', yoj jiti'dye bu um, ĉaĉaij nash yụ Jen'si' úñis mu' —yi' María jéte mu' anjer. Jọban qui mu'. 39Chat qui mọ' María sacti' miqui'muntyi'che' mụcu' jịjcai', yiris bä'yedye' Judeaĉansi', cavin mọ'che' jịjcai', 40yóche'dyem' Zacaríassi' p̂en um'. Ventyeque' rụij bu'yi' site', vorje' mọ'ĉan Isabel. 41Aty se'vebi' voryedyem' Marías, me'ĉandye yitar'yi ạvam' vo'coĉantyim' Isabeltyi', chat qui játŝuti' Jen'si' Ạ'edye' mu' mọ' Isabel. 42Chat qui fer p̂eyaqui' Isabel je' María: —Därsi' ñịbe'jitidyes so'min mi mu' Jen', jam jeñej yocsi' p̂en in. Me'dye chime' ạva' mi vo'coĉantyi' mi, där ñịbe'jibun. 43Mi nash ra' Ayo'si' tse' mu', mu' nash yụ́tyi' Ayo' chime' tsan' me' ĉushdyi' q̂uin' mi, mọ' därsi' ñịbe'jitidyes shupqui' yụ́dyes. 44Mụi'dye se'vepye voryedye' mi mu' vo'coĉantyi' ạva' yụ yitar'yi ma'jodye'tum. 45Mu' Jen' anic ma'jodye'tum yu'tyin mi anicyedyedyes mi, anicyi' mi cạ̈tsi' ra' mọ' p̂eyacdye' Jen'si' so'minsi' —yi' jajiti' Isabel mọ' María. 46Mọ' qui p̂eyaqui' María yi': —Yụ nash tima'quetes Jen' ĉojtyi'ĉan yụ, 47anic ma'joi' mu'dyes yụ ạ'edye'ĉan yụ, mu' Ji'c̣hoñintyi' yụ, 48ĉaĉaij na mu' dyijtun yụ, me' tsan' yụ ñịbe' úñis mu', tsim'tyin qui nam' yụ. Muntyi' ra' in jam jụ'ñisĉan mạyedye' farajje' dyijtun yụ in, yi ra' in: “Anic ñịbe'jajiti' mọ'”, me' ra' ji'jäquin yụ in, 49ĉaĉaij na mu' muju'cha' ferdye'tumtyi' Jen' anic där ñútyin yụ. Tịj mu'si' anic muju'cha' rụijtyity Jen', jéte in. 50Jen' ñịbe' ĉọcsi tyi chuc irijyity mu'che' in. 51Därsi'ya' ferdye' mu' dyäcjeĉunacsebi dyijyedye' mu'in va'bunnaquitysi' in. 52Mu' ji'shupcacseban mu'in ayo'bu'yity in, chat qui yụ'tacsi in mu'in ñịbe' bä'yity in. 53Mu' qui so'macsi jedye' in mu'in dáquity in, mu'in qui na jedye'tumtyi' in dạ̈rä' mu' jutacseban, itŝi' jedye' unĉan mu'in. 54Mu' nọ́tacsi Israeltyi' vóshi' in, mu'in nash úñity mu' dyijtucsi mu' judyeya' ñịbe' ĉọcsi. 55Me' jị'cätsaqui p̂eyacdye' mu' yụ'tyeyacsis jiquej vóshi'vun jiquej tsun, mọ' jayu'tis Abraham, räjtumdye vóshi'tum, mu' Jen' räjĉan ra' ñịbe' ĉọcsi —me' yi' p̂eyacdye' Marías. 56María mendye jajbu'ye' mọ' Isabel, chibin ịvaj jajbu'ye', chat qui q̂uin'dyem' yạjquiban' ĉụi'situban' qui aca' mọ'. 57Ĉụi'dye cha'she' tupudye' mọ' Isabelsi' chat qui mọ' basdyi', son' ạva' mọ'. 58Chätidye' mọ' judyeya' mu'in c̣hẹi'ya' bä'yity in se've' mu'in in jun' chuc mu' Jen' där ñịbe'jajiti', mu'inmun chime' ma'jotyebi' ạva' in. 59Aty q̂uen'ĉan mạyedye' tyiti ạva' mọ' chat qui ji'sei'taqui'. Dyijyi tsan' in mạ'je' tịjdyes yụ'tyeyete in Zacarías, jen'che' ra' tsan' tị'i. 60Mọ' qui nam' tse' mu' yi': —Jam ra' me' tịj mu', Juan ra' tịj mu'. 61Chätidye' mọ' vorje' in: —¿Jun' dash me' tịj yụ'tyeyetinte? Ĉaĉaij na jam yirity chätidye' mi'in me' tịj mu'in —yi je' in. 62Mu' qui jen' mu' joijnoty jepte in, c̣họco' c̣họco' p̂eyepte in: “¿Tyi bu ra' tịj mu' ạva'sim?” 63Mu' yiris cọdaqui sánaquis, chat qui mu' mọ'che' sáñe': “Juan ra' tịj mu'.” Mu'ĉantyi' in räj äjjepte p̂eyacdye' in. 64Me'ĉandye p̂eyaĉan mu' Zacarías tima'quebajte qui Jen'. 65Mu'in c̣hẹi'ya' bä'yity in anic äjyi mu'in in, pai' vatyquej chị́qui in Judeaĉantyi' in, yóĉandyem' miqui'muntyi' mụcu' u in, räj mu'in chịj in. 66Mu'in se'vaquity in yi in: “¿Jun' buty uts joijno'?” Anic jorojĉan Jen'si' ferdye' játŝutyiti. 67Jen'si' Ạ'edyem' játŝuti mu' Zacarías joijnoty jen' mu', chat qui mu' jaso'miti p̂eyacdye', yi mu': 68—Tima'queja mu' Jen', mu' Ayo' tsun Israeltyi' vóshi' tsun, ĉaĉaij na atsij mu' ñútyissin' tsun judyeya' ji'c̣honsin' tsun muntyi' mu'. 69Mu' jutiyisin' yirity fer bu'yity Ji'c̣honsin'tyi', vóshi' mu' Davidvuntyi' úñity Jen'tyi' jiquej mu'. 70Mu' jị'cätse' mọ' p̂eyacdye' so'macsis jiquej mu' Jen' mu'in urucyaty jaso'mitity p̂eyacdye' in, 71yi' jun' chuc ra' mu' ji'c̣honsin' tsun mu'inya' fáquisin'tyi'ya' in paj qui jam mu'in ji'pensin' in. 72Chime'dye yi jun' chuc ra' ñịbe' ĉúbusin' vóshi'vun tsun, mu' ra' jam farajjeyaqui ĉụi'si' p̂eyacdye' mu' yụ'tyeyacsis jiquej. 73Ĉụi'si'che' tịj mu' yụ'tyeyete p̂eyacdye' mu' Abraham vóshi' tsun jiquej. 74Yi mu' jun' chuc ra' ji'c̣honsin' fáquisin'tyi'ya' in, paj qui jam noi'yedye'tum cäc̣hä'chuja mu' Jen'. 75Chat qui ra' yejĉoja' rụij bä'ja' tsun mu'si'ya' vej mu', mijam ra' jụ'ñija' mu'ya' jun' qui' chuc jadyic tsun. 76Chime'dye mi, ạva', mu'in ra' jin in: “uts jaso'mitity p̂eyacdye' mu' muju'chaty Jen'”, me' ra' jin in. Atsijya' qui na ram' mu' Ayo' tsun, mi ra' tashi jä'miij jäm' yụ'tye' majmi mu'dyes. 77Mi ra' voro'tacsi Jen'tyi' muntyi' mu', chimidye ra' jéyacsi mi jun' chuc ra' Jen' vayacjeyacsebi juchaj mu'in paj qui ji'c̣honacsi. 78Mu' Jen' tsuntyi' fer mạ'jisin' tsun ñịbe' ĉúsin', jutiyisin' ra' Ji'c̣honsin'tyi'. Mu' ra' mạijyi yódyem' mạyedye'chety tsun u, 79mạijchucsi ra' mu'in tojmadye'ĉantyi' in, mu'in quijnaquity sän'dye' in, judyeya' ra' so'misin' c̣hon'-dyedyes tsun —yi' mọ' p̂eyacdye' jaso'mitis Zacarías. 80Mu' ạva' mu' p̂añi, anic ferdye' cại' ĉojtyi'ĉan mu'. Mu' bä'yi cäjyasĉan jac jun' qui' chuc cha'she' tupudye' mu', chat qui ji'caviti Israeltyidyes vóshi' in tiyacchui' voro'tacsi.

will be added

X\