Jude 1

1Yụ nash Judas úñity Jesucristoty mu' judyeya' anictyity vojity mu' Santiagoty. Yụ vorjeyac räj mi'in fayactyi' Jen'tyi' mi'in mạ'jeyacdyety mu' Ạvatusin'tyi' tsun, mu' Jesucristo ĉujcanactyi'. 2Yụ cọdyete Jen' paj qui mu' ñịbe' ĉúnac judyeya' paj qui mu' so'minac ma'jodye' ĉojtyi'ĉandyes mi'in, paj qui chime' dadam' muju'cha' mạ'jeyacsity bä'yi mi'in. 3Chätidye' mạ'jeyacdyety yụ, aty ra' sáñe'ya' yụ mi'indyes, fer mạ'je' tsan' yụ p̂eye' mọ' c̣hon'dyedyes p̂eyacdye', mọ' vaj me' ji'c̣honsin'si' tsun. Me' tsan' me' jemoñe' qui nam' yocsi' ji'chäyitidye' so'meyac ọ́che' sánacdye'che'. Mọ'dyes ra' yụ jéyac: ji'fercatac Jen'dyes mi'in, ferdye' yụ'tacac mi'in, chime' ñutsjevac mọ' ji'chäyitidye' paj qui jam cäj ji'shupque' yoctyi' in, ĉaĉaij na mọ'dye ji'chäyitidye' Jen' so'misin' tsun anicjejaty mu', mọ' ji'chäyitidye' jam ra' jun' cäj ji'shupcac. 4̣Q̂uin' pạrej mu'ya' in jeñej bu'yi jụjjetety Jen' in me' bu'yi yu'ti in, itŝij chäte' ji'säsdyi tsunya' in. Mu'in jam irijyity Jen'che' in, anic cäj jị'chiyacsi in, yi in tupuj ac̣hi' bä'ja' tsun ĉaĉaij na mu' Jen' anic jäm'yity, mu' jam dyijtubusin' juchaj tsun, yi in. Mu'indye mọmo' va'quecte in mu' Jesucristo, Ayo' tsun, mu' yirity ayo'tuja tsun. Urucya'dye jiquej mọ' p̂eyacsi' sánacdye' mu'in me'tyity in, yi' va'tacdye' ra' so'mac in mu'in me'tyity in. 5Me' tsan' aty chị́yetiñe' mi'in ọij p̂eyacdye', yụ qui na ram' quivij ji'dyijvebadyeyac jun' chuc mu' Jen' jiquej ji'c̣honacsi Egiptoĉantyi' mu'in Israeltyi' vóshi' jiquej in.230 Me' tsan' me', jäqui've qui nam' mu' ji'sänacsi mu'in jam anicjetety in.231 6Chime'dye mu'in anjer in mu'in jam jị'cätsety in mọ' yụ'tacdye' so'macsis Jen' jiquej, judyeya' farajje' in mọ' bä'yedye' yóĉandyem' Jen' yụ'tacsi jiquej u, mọ'dyes qui mu' Jen' va'cacsequi va'tacdye'ĉan, mu'ĉan yejĉoij c̣họ'coij tojmadye'ĉan in, ĉä'räij in jun'si' chuc ayijya' tupudye' Jen'si' mu', aty ra' jị'cäts yụ'tacsiya' juchadye'ya' mu'in. 7Me' mu'in Sodomaĉantyi' jiquej in judyeya' Gomorraĉantyi' in, judyeya' chime' c̣hẹi'ya' bä'yity in, räjdye me' ac̣hi' bä'yi in, yódyem' mu'in ac̣hi'yity anjer jiquej u in, me'dye mu'in chime' ac̣hi' bä'yi in, vo'voij mọmo' bä'yi in, judyeya' vaj son' me'ti in, me' farajjepte in Jen'si' dyijyedye' mu'indyes in, ĉụi' ac̣hi'ti in judyeya' ĉụi' ac̣hi'taqui a' in. Mọ' ji'me'tacdye' mu'in va'cac tŝijĉan in, jam ra' jụ'ñisĉan mạyedye' shuban mu'ĉantyi' in. Mọ' va'tacdye' mu'in mọ' ji'dyijvisin' paj qui jam me' jäm'taĉa' tsun.a 8Me'dye q̂uin' chime' in mu'in cäjsis ji'chäyitidye' tui'tyi' in yejĉoij mu'in ĉụi' ac̣hi'ti in. Ĉụi' a'c̣his dạque' in dyijye-dye'ĉan mu'in, mọ' mọmo' cäc̣hä'chuqui in, ĉụi' ac̣hi'taqui a' mu'in. Äcäijjete Jen' in, mijam dam' chiquete in, judyeya' chime' fạra'nacsi in mu'in fer bu'yi che'vety in. 9Tashchety ayo' anjertyi' mu'in tịj mu' Miguel, me' tsan' mu' muju'cha' ferdye'tumtyi', jam qui nam' fạra'ñe' mọ' Sọyo' yoqui'dyem' chutiya' jiquej mọ'tum u, ji'me'tyiyiti in Moiséssi' a' mu' jun' chuc ra' mu' jiquej. Mu' anjer Miguel jam méqui' ji'shupqueye' fạra'nacdye', me' mọmo' je': “Yụ ra' cọdyete Jen', mu' ra' fạra'jiĉuñin mi”, je'. 10Uts na q̂uin' cäjsis ji'chäyitidye' tui'tyi' in, jụ'ñis chuc jam chique'si' in jedye' chuc mọ' cại', mọ' cavin ñiñe' in. Cätstye' jebacdye' in itŝi' méquis dyijyedye' mu'in, mọ' mọmo' cäc̣hä'chui' in, a'c̣his a'si' dyijyedye' mu'in, mọ'ya' ji'me'ti in va'tacdye'ĉan yu'ti in. 11¡Jábiya' ra' där ñịbe' cạve' in! Mu'in jịjcatyeptety in Caínsi' dyijyedye' jiquej mu'. Chime'dye yódyem' Balaamvun jiquej u, me'dye uts chime' q̂uin' querec̣have-dye'ya' cäjsis dyijyedye' jị'chiyacsi in. Yódyem' mu' chime' Coré jiquej u, mu' va'quecbite Jen'si' p̂eyacdye' mu', me'dye mu'in chime' q̂uin'tyity in va'quecbite in Jen'si' dyijyedye' mu', mọ' ra' jäm' ji'me'tacsi' sän'dye'ĉan. 12Anic där tsịca' in mu'in pen'dyetunacya' in judyeya' jibityinacya' in chime' Jen'dyes mi'in, jeñej ọctumsi' jedye', me' shupqui mi'inya' mu'in in. Me' tsan' Jen'dyes säcsi mi'in, mu'ĉandye pạrejjiti in, vaj meij shejvintutidyeij in, ĉụi' mọmo' dyijtuti in, yoctyi' qui nam' jam dyijtucsi in. Jeñej dyicba'badye' itŝis añej, va'queques tyi'mu, me' bu'yi mu'in shupqui in. Chime'dye jeñej jai'si' cätidye', mọ' c̣hoijtacsi', itŝis väsh, me' bu'yi mu'in in jeñej bu'yi anictyity säñity in. 13Jeñej därtyi' pufej marĉantyi', mu' ji'shupquety jeshocbo' a'c̣his, me' bu'yi in, ĉojtyi'ĉansi' mu'in yedyej a'c̣his dyijyedye' ji'shupcaqui in, anic mon'dye'ĉan bä'yi in, jeñej moñity ọ́rota', me' bu'yi in. Mu'in me'tyity in va'tacdye'ĉandyety in, tyim'dyesĉan tojmas, mu'ĉan ra' va'cac in uts cäjsis ji'chäyitidye' tui'tyi' in. 14Enoc jiquej ji'jäcacsi mu'in q̂uin'tyity in, mu' nash yävätidye'yity vóshi' Adántyi' mu' jiquej, jaso'miti p̂eyacdye' jiquej Jen'. Jä'miij ji'jäcacsebi va'tacdyedyes ra' mu'in ac̣hi'yitysi' q̂uin' in, yi mu': “Atsij ra' Ayo' tsun pen'dyetute ra' in mu'in anic shachtyity anjer in, jun'tum ra' mu'in mir, me'tum ra' in. 15Mu' ra' jị'cäts yụ'tacsi räj juchadye'ya' muntyi' in judyeya' ra' va'tacdye' so'macsi mu'in ac̣hi'yity in. Mu'in juchajtumtyi' in jiyi ac̣hi'yacñity in, judyeya' chime' a'c̣hisya' p̂eyacdye' ñiñetety Jen' in, mu'in ra' va'tacdye' so'mac in”, yi mu' jiquej. 16Me' mu'in q̂uin' ac̣hi'yity in, fuch mọmo' bä'yi in, räjĉan p̂eyacsi yoctyi' in ñinacsi in, mọ' mọmo' mu'in cäc̣hä'chui' in ĉụi'si' dyijyedye' a'c̣his mu'in. Anic där fibi'nacdye'tum bä'yi in, judyeya' tima'cacdye'tum jéyacsi in muntyi' in, mọm' dyijtui' in paj qui so'macve in. 17Chätidye', mạ'jeyacdyety yụ, dyijtucsebibajsham' p̂eyacdye' mu'in jutactyis Jesucristoty jiquej in. 18Mu'in jínac jiquej in jadyiquis ra' tupudye' pạrej ra' mu'ya' dyisactyepte in p̂eyacdye' Jen'si' mu', judyeya' ra' ĉụi'si' dyijyedye' a'c̣his cạqui in. 19Mu'indye ra' yi in paj qui yoc yoc dyijyi in mu'in anicjetety Jen' in. Me' mu'in cäjsis ji'chäyitidye' tui'tyi' in ĉụi'si' a' jabächäti in, jun' chuc mạ'je' bä'yi in me' mu'in in, jam qui nam' jun' me'chupte in Jen'si' Ạ'edye' mu'. 20Mi'in na chätidye' mạ'jeyacdyety yụ, jam ra' me' mi'in, mi'in aty anicjebitinte rụijsis p̂eyacdye' Jen'si' mu', mọ'dye ram' yejĉoij cäc̣hä'chu-bitinte paj qui fer bu'yi bä'yi Jen'dyes mi'in. Cọdyemac Jen', jätäjyi' chuc ra' mọ' Ạ'edye' mu', me' ra' cọdaqui mi'in. 21Yejĉojam' bä'jam' mi'in paj qui mi'inche' bu'yi' Jen'si' mạ'jitidyes mu'. Yejĉojam' bisbimac mọ' tupudye' Jesucristos Ayos tsun, mu' där ñịbe' ĉúsin'tyi' tsun, judyeya' ra' yu'sin' paj qui räjĉan Jen'ya' bä'ja' tsun. 22Mu'ya' pạrej jụijya' in aty mạ'je' yocve dyijyi in, cäjsis ji'chäyitidye' se've' in, jemoñe' jäm'yedye'tum nọ́tacsi mi'in mu'in me'tyity in. 23Yoctyi' na in jụj ja'yacsejam' paj qui jam tŝijĉan va'cac in, me' ra' mi'in ñutsjetacsi mi'in tŝijya'. Mu'ya' pạrej a'c̣his dyijyedye' jabächäti in, jemoñe' jäm'yedye'tum vortacsi jị'chique-yacsi mi'in, are'ĉa me'ĉandye säsnac mi'in. Jeñej ọctumtyi' quị'si' me' bu'yi' shupqui' a'c̣his dyijyedye' mu'in, mijam ra' dam' cäc̣hä'chucsebi mi'in. 24Tima'queja mu' Jen' mạijquedye'tumtyi'. Mu'si'ya' ferdye' mu' ñutsjinac mi'in paj qui jam peñi juchajĉan mi'in, judyeya' chime' paj qui jam jụ'ñiij mi'in aty canacya' mi'in ĉụi'si'ya' vej mu', mu' mạijquedye'tumtyi' Jen', mu'ya' ra' där ma'joij mi'in cätssisya' ma'jodye'. 25Jesucristosche' tịj mu' Ayo'si' tsun tima'queja mu' dyijyedye'tumtyi' Jen', mu' yiritytyity mu' Ji'c̣honsin'tyi' tsun. Tima'queja mu', mu' räjdyes ayo'bu'yity, anic ferdye'tumtyi' mu', judyeya' mum' yirity mạijquedye'tumtyi', anic muju'cha' bu'yity mu', tạ'catydye me', me'dye ra' yejĉoij räjĉan. ¡Paj jam jụ'ñisĉan mạyedye' mọtsi' tima'cacdye' mu'! Paj me'.

will be added

X\