James 5

1Se'vibutiĉam' ọij p̂eyacdye' mi'in jedye'tumtyi'. Tárejam' mi'in, äjyejam' chime', därsi' tyu' ra' ñịbedyes cạvetiñe' mi'in. 2Fibidyes mọmo' jedye' mi'in me'chutiñes, räj ra' mọ' mọtstaqui mi'in, jäm'tyi'vun quị'si' mi'in, räj ram' tạbaij. 3Chime'dye fibidyety querec̣ha mi'in, mu' ä'ñejijcatintety q̂uin' mi'in, ĉaĉaij na jadyiquis tupudye' aty cha'sheja'. Räj ra' buntaqui querec̣ha mi'in, oro judyeya' plata mi'in. Mu'jinac ra' ji'me'tyiyinac Jen', mu'si' ra' chicäjrädyem' jeñej bu'yi' ra' tŝij shupquim', mọ' ra' ji'munac mi'in. 4Jesha' pạrej shu'atucsi úñity mi'in quịjodye'ĉan carijtaquity in, tári mu'in otejjeyaqui in ĉaĉaij na jam rụij jiya'dyeyacsi mi'in. Mọ' ra' ji'me'tyiyinac ĉaĉaij na mu' muju'chaty Jen' aty se'vacsebi táredye' mu'in, jun' chuc ñịbe' jị'cavacsi mi'in querec̣hatumtyi' mi'in. 5Mi'in ĉụi' mọmo' ma'jotyiti bä'yi mi'in úche' jacche', mọ' mọmo' dyijtutiñe' mi'in feshtaij bä'yi mi'in, mijam yiris jedye' jayejjotaqui mi'in. Anic jäm' räjĉan säcsi mi'in, yojdyem' babes vaca shushdyes o, me' mi'in, me'dyes va'tacdyedyety ra' mi'in. 6Ji'me'tacsi ji'ujacsi mi'in mu'in itŝity juchaj in, mu'in jam jun' ĉụi' ñutsjitity in. 7Vojity, tyum'chutac bisacdye'ya' Ayo' tsun, yojdyem' mu' quịjoijtyi' muntyi' u tyum'chuti-dye'tum bise' mọ' quịjodye'ĉansi' vädacdye' sicdye' mu'. Chime'dye bise' tashches añej judyeya' jäquis, jun' qui' chuc shupqui' mọ' vädacdye'. 8Me' ra' mi'in, tyum'chuti-dye'tum bä'jam', fer bu'jam' mi'in, ato' o c̣hẹi'ya' ayidye' Ayos mu'. 9Vojity, jam ĉa vaj meij ñäñitidyeij p̂iijtidyeij mi'in, are'ĉa va'tacdye' cạtyetinte mi'in Ayo', atyu' c̣hẹi'ya'yeban mu' Jen' jị'cäts yụ'tacsity juchadye'ya' muntyi' in. 10Vojity yụ, dyijtucsejam' mi'in mu'in jaso'mitity p̂eyacdye' Jen' jiquej in, mu'in Ayo'si'che' tịj p̂eyaquity jiquej in. Cäc̣hä'chucsebibadac dyijyedye' mu'in, jun' chuc tyum'chutidye'tum ñịbedyes ji'cajñe' jiquej in. 11Jesha' tsun anic ma'joij cạvacseja' mu'in me' tyum'chutaquety ñịbedyesya' jiquej in. Mi'in aty se'veptinte mọ' tyum'chutidye' Jobvunsi' mu', därsi'ĉan ñịbedyes tyum'chuti jiquej mu'. Chịj mi'in jäqui've qui mu' Jen' där jañutyibun, ĉaĉaij na mu' Ayo' tsun där jäm'yity judyeya' ñịbe' ĉọcsity chime'. 12Vojity yụ, yụ jéyac, yụ'tiñe' p̂eyacdye' jụijya' mi'in, jam ra' yụ'tiñe' tsäqui'yistumsi' p̂eyacdye' mi'in, paj qui chịj in anicsis mọ' p̂eyacdye' mi'in. Jam ra' ji'jäctiñe' mạyedye'che', mijam ra' ji'jäctiñe' ọij jac chime', mijam ra' yocsi' ji'jäctiñe' chime' paj qui chịj in anicsis mọ' p̂eyacdye' mi'in. Jun'si' chuc yụ'tiñe' p̂eyacdye' jụijya', yi mi'in, “Me' ra' yụ”, jam jụijya', yi ra' mi'in: “Jam ra' me' yụ.” Jemoñe' jị'cätsetiñe', jam ra' tsäqui'yistum p̂eyacdye' yụ'tiñe' mi'in are'ĉa va'tacdye' cạtyetinte mi'in mu' Jen'. 13Tyi chuc mi'inĉantyi' in carijsis jị'ĉojtye'tyi' in, jemoñe' mu'in me'tyity in cọdaqui Jen'che' in. Vatyquej mu'ya' jụijya' ma'joijtyi' in, jemoñe' jimaqui Jen'dyes in. 14Vatyquej pạrej mu'ya' are'reijtyi' jụijya' in, jemoñe' mu'in fayacsi mu'in ĉọjcacsity anicjetety Jen' in, chat qui ra' mu'in cọdyete Jen' in are'reijtyidyes in, judyeya' Ayo'si' tịj ji'jäcbite in tai'teya' in aseiteya'. 15Anicyedye'tum cọdaqui Jen'che' jụijya' in, mu' ra' are'reijtyi' jäquijcate in, chäĉän ra' mu', Ayo' ra' sacjebajte. Juchaj na ra' mọ'ya' jụijya' mu', Jen' ra' vayacjajibubun. 16Mọ'dyes vaj me' p̂eijvac ĉụi'si' juchaj mi'in. Chime'dye vaj meij cọdyemac Jen' mi'in, paj qui mu' ji'chäĉunac mi'in. Mu' rụijtyity muntyi' fer cọdyete Jen' jụijya', anic ferdye'tum shupqui' cọdacdye' mu', jụjjajibuti ra' cọdacdye' mu'. 17Elías jiquej, me' tsan' mu' muntyi' mọmo' yojdyem' tsun u, mu' qui nam' fer cọdyete Jen' paj qui jam añei'. Rụijdye me', chibin yómodye' judyeya' jäbän ịvaj, me'qui' jam dam' tŝọi' añej.225 18Chimu'dye cọdyebajte Jen', chat qui mu' Jen' jị'tŝoban' mọ' añej judyeya' mọ' jac ji'chäĉan' sacacdye' in. 19Vojity, vatyquej pạrej mu'ya' farajjeptety in rụijsis majmi Jen'si' mu', juchajĉan bä'ban, jemoñe' mi'in ferche' ji'ca'ñebajtinte Jen'ya'. 20Där jäm'si' dyijyedye' mu', mu' ji'ca'ñebajtetysi', se'vepte jụijya' mu'si' p̂eyacdye' mu', chat qui ra' mu' Jen' vayacjajibuti juchaj mu', judyeya' qui ra' jaji'c̣hon'dyi paj qui jam säñi mu'.

will be added

X\