James 4

1¿Junas buty shupqui' mọ' fáquitidye' mi'in judyeya' chutidye' mi'in? Ĉụi'si'ĉan dyijyedye' a'c̣his mi'in, mọ'ĉan shupqui' chutidye' ĉojtyi'ĉan mi'in. 2Me' tsan' fer mạ'jetiñe' jedye' mi'in, jam qui nam' dạctiñe', mọ'dyes qui dyijtutiñe' ijatidye' mi'in, paj qui dạctiñe've. Fer mạ'jetiñe' jedye', jam qui nam' tupuj dạctiñe' mi'in, mọ'dyes ji'fajquiyitidyeij mi'in me'ĉandye chutidyeij mi'in, ĉaĉaij na jam cọdyetinte Jen' mi'in mọ'dyes qui me' jam dạctiñe'. 3Me' tsan' cọdyetinte Jen', jam qui nam' rụij cọdaqui mi'in, mọ'dyes qui mu' Jen' jam jụjtyinac, ĉaĉaij na cäj cọdyetinte mi'in, cäjsische' dyijyedye' cọdaqui mi'in, paj qui ĉụi'si' dyijyedye' cạtiñe' mi'in. 4Jeñej vo'voi'si' p̂en mi'in, jam vämtyis dyijyedye' cạptes, me' bu'yi mi'in, jam Jen'si' dyijyedye' cạptinte mi'in, jacches mọmo' dyijyedye' cạtiñe'. ¿Jam chịj u mi'in mạ'jeja' jụijya' jacches jedye', fáquitiĉa' Jen'tum, me' shupqueja'? 5Jam fibi' mọ' sánac-dye' yi': “Mọ' Ạ'edye' yu'tyiyi-sin'si' tsun mu' Jen', jam mạ'je' paj qui ji'c̣ham'sin' yocsi'ya' jedye'”, yi'. 6Mu' na Jen' dadam' fer ñútyisin' ñịbe'jitidyesya' mu'. Sánacdye' yi': “Jen' doroi'jeĉú-nacsi mu'in va'bunnaquity in, mu'in na se'vetety in, jam va'bunnaquity in, mu'in mọmo' nọ́tyetacsi ñịbe'jitidyesya' mu'.” 7Mọ'dyes chiquemac Jen', fer bu'jam' dyich bu'jam' Sọyo'ya', mijam ra' dam' jụjbitiñe' dyijyedye' mọ', me' jụijya' bä'yi mi'in, yacchunac ra' mọ'. 8C̣hẹi'ya'jemac Jen' chat qui ra' mu' chime' c̣hẹi'ya'jinac. Juchajtumtyi' mi'in farajjevac juchaj mi'in, yojdyem' favac un o, me'jevac mọ', c̣hicon'jevac. Mi'in pärä' dyijyedye' cạtiñety, Jen'si' judyeya' jacches, jemoñe' mi'in jäm' yụ'taqui ĉụi'tyi' ĉojtyi' mi'in. 9Tárejam' juchadyes mi'in, aty ra' jam ma'joij mi'in, paj me'qui'dye me'chutiñe' dyisdye' mi'in, tárejam' juchadyes mi'in. 10̣Ọya'ya'jeyacac dyijyedye' mi'in Ayo'si'ya' vej mu', chat qui ra' Jen' muju'cha' yu'tyinac.224 11Vojity, jam ra' vaj meij ñäñitidyeij mi'in. Tyi chuc ñiñete vojity mu', judyeya' dyijtupte juchaj mu', jam mu' mọmo' ñiñete, Jen'si'mun yụ'tacdye' ñiñepte, me' bu'yi' mọ' shupqui', jam jäm' ĉọpte Jen'si' yụ'tacdye' mu', ñiñepte mọmo'. Ñiñeja' jụijya' mọ' yụ'tacdye', aty qui jam chiqueja' mọ', ñiñejaty qui shupqueja' tsun. 12Yirity mọmo' mu' Jen' yụ'tyety yụ'tacdye', mu'dyem' yirity jị'cäts yụ'tacsity juchadye'ya' muntyi' in. Mu'dyem' tupuj ji'c̣honsin' tsun judyeya' chimu'dye tupuj va'quicsin' tsun. Jesha' mi'in jam yụ'tactyi' paj qui ñiñetinte ĉụi'tyi' chätidye' mi'in. 13Se'vibutiĉam' ọij jäm' p̂eyacdye' yụ. Pạrej mu'ya' yi mi'in: “̣Q̂uin' vatyquej ra' nojno yocsi'ĉan bä'yedye' jịjcaij tsun, yiris ra' yómodye' mu'ĉan ra' carijtaqui tsun, ji'mincaquity ra' jedye' tsun judyeya' ra' ya'ij tsun, bijoyequi ra' querec̣ha mu'ĉan tsun”, yi mi'in. 14Mijam chịj mi'in jun' chuc ra' nojno jiyi' mạyedye'. Mi'in jeñej bu'yi jị'sa', me' bu'yi mi'in, mọ' jam men bu'yis, me'tuquim' mọtsis, me'dye mi'in chime', cavin mọtsi. 15Dam'dye jäm' jemoñe' yi mi'in: “Jen' yíya' me' ra' carijtaĉa' jambi'dyem' sänja' jụijya' tsun”, jemoñe' me' yi mi'in. 16Mi'in qui nam' va'bunyedye'tum p̂eyaqui mi'in. Därsi' mọ' juchaj shupqui' me' va'bunnaĉa' jụijya' tsun. 17Chị́yebijaty jụijya' rụijsis dyijyedye' Jen'si' mu', jedye' chuc mu' mạ'je', jam qui nam' me' jun'taĉa'ya', juchaj mọ' shupqui' tsun.

will be added

X\