James 3

1Vojity yụ, jam ra' dai' yu'ti jị'chiyacsity mi'in. Chịj mi'in mu' Jen' dadam' ra' fer muju'cha' jị'cäts yu'sin' jun' chuc bä'ja' tsun jị'chiyacsejaty tsun, jam jeñej yoctyi' anicjetety in. 2Jesha' anicjejaty Jen' räj mọ'ya' cäj cạja' tsun. Mu' na jam cäj cại'tyi' p̂eyacdye' mu', mu' me'tyity anic rụij bä'yi, chịj bächäqui ĉụi'si' a' mu' räjtumdye nem mu'. 3Me'dye mu'in chime' cavayo in, yụ'tyeyeyac ji'dyäcaquis chụ'ĉan mu'in paj qui tupuj jo'mesya' chäquisin' in. Me' tsan' därsi' jebacdye', jo'mesya' tupuj bächäc. 4Me'dye chime' mu' marĉantyi' covamba, me' tsan' jiyi därtyi' mu', me' tsan' fertyi' tyi'mu jácati, mọ'ya' qui nam' miquis jị'chui'taquis mu', mọ' tupuj bächäte junanaj chuc mạ'je' jịjcaij mu' bächätety. 5Me'dye chime' nem tsun, me' tsan' miquis a'si' jedye' mọ', därsi' qui nam' shupqui' ferdye' me'chui', carij bächäc jeñej miquis adye' tupuj ji'co'shaye' därsi' därä'. 6Rụijdye me', chụ'ĉansi' nem tsun jeñej bu'yi' ac̣hi'tacsis tŝij. A'c̣hisya' p̂eyacdye' tsun, mọ'ya' ac̣hi'taĉa' räj dyijyedye' tsun judyeya' a' tsun. Sọyo'ya' shupqui' ferdye' nemsi' tsun, räjen' dyijyedye' muntyis mu'in ac̣hi'tacsebi'. 7Jesha', jụ'ñis ĉụi' mọmo' jebacdye' in tupuj cu'dyetucseja' muntyi' tsun, paj tsan' vajedyedye' jụijya', judyeya' jaijtyi', judyeya' nas judyeya' ojñi'ĉansi' chime' in, jụ'ñis ĉụi' mọmo' tupuj cu'dyetuc in. 8Mọ' qui nam' nem tsun jam tyi tupuj ji'dyäquibusin' in, yejĉoi' mọmo' ji'shupque' a'c̣his p̂eyacdye', jeñej venenotumsi' me' bu'yi' p̂eyacdye' tsun. 9Nemya' tsun tima'queja Jen', chịmo'ya'dye nemya' tsun ñinacseja' muntyi' in jäm'tacsity Jen', yódyeijdyem' mu' u, jo'meij jäm'tacsi.223 10Ĉụi'si'ya' nem tsun tupuj ji'shupqueja' jäm'si' tima'cacdye' judyeya' a'c̣his ñinacsedye' chime', me' me' ji'shupqueja'. Vojity, jam mọ' jäm' jo'mes. 11¿Vaj me' buty shupqui' yiri'ya' yirisĉan noria jäm'si' ojñi' judyeya' a'c̣his? Jam jun'. 12Me'dye chime' cätidye' in, mọ' cätidye' higuera jam jun' ji'shupque' orivo in, judyeya' ova chime' jam jun' ji'shupque' higo in. Jeñej yirity jijmo'mo a'c̣hity jam jun' tupuj ji'shupque' jäm'si' ojñi'. Me' ra' tsun chime' jam ra' tupuj ji'shupqueja' a'c̣his p̂eyacdye' chụ'ĉan tsun. 13Mu'ya' mi'inĉantyi' pạrej muntyi' anic dyijyedye'tumtyi' jụijya' ĉúti, jemoñe' rụij bä'yi, paj jam va'bunyedye'tum bä'yi. Me' bä'yi jụijya' mu', mọ'ya' ra' tupuj chị́yete yoctyi' in anic dyijyedye'-tumtyi' mu'. 14Jam me' jụijya' mi'in, ĉụi' mọmo' dyijtuti jụijya' mi'in judyeya' ji'fajquiyitidyeij jedye' jụijya' mi'in, jam ra' va'bunyi mi'in mijam ra' yi mi'in: “Tsun nash muju'cha' dyijyedye'-tumtyi' muntyi'.” Me' jụijya' yi mi'in chäcdyis väñädye' shupqui' mi'in. 15Mọ' nash dyijyedye' jam Jen'si' mu', muntyis mọmo' mu'in, jacches, Sọyos dyijyedye' mọ', 16mọ'dyes qui ĉụi' dyijtutiĉa' jụijya', ji'fajquiyitiĉa' jedye' jụijya', me' jụijya' tsun, aty ra' chutiĉa' bä'ja' tsun, anic qui ra' yịjyi a'c̣his cạja'. 17Jam mu'in me' in mu'in me'chuptety Jen'si' dyijyedye' in, mu'in yedyej rụijsis dyijyedye' me'chui'tyi' in, jäm'jiti bä'yi in, judyeya' jäm'yedye'tum bä'yi in, judyeya' se'vitidyeij in, judyeya' chime' ñịbe' ĉọcsi in judyeya' nọ́tyetacsi yoctyi' in. Chime'dye mu'in vaj cäts cạvacsi muntyi' in, mijam fibi'nacdye'tum bä'yi in, me' bu'yi mu'in bä'yi in mu'in Jen'si'tum dyijyedye' bä'yity in. 18Dyijtuja' jäm'jitidyes tsun, paj qui ji'jäm' yụ'tacseja' muntyi' in, me' ra' chat rụij bä'yi muntyi' in.

will be added

X\