James 2

1Vojity yụ, mi'in anicjetintety Jesucristo, mu' mạijquedye'tum bä'yity Ayo' tsun, jemoñe' vaj cäts cạvacsi muntyi' mi'in, jam ra' uya'ya' cạvacsi pạrej mi'in. 2Vatyquej säsnac jụijya' pärä' muntyi' in vajmu'yaijĉan mi'in. Yirity jedye'tumtyi' muntyi' jäm'tyi'ĉantyi' quị'si' judyeya' sontica orom'. Yoctyi' na atsij anic ñịbety, a'c̣hityĉantyi' quị'si' seijbotyĉan. 3Mi'in tiĉun'tinteya' jäm'tyi'ĉantyi' quị'si', jétinte: “Uche' bä'va jäm'si'che' bä'yaquis”, jétinte jụijya' mi'in. Mu' na ñịbety jam me'jetinte, jétinte mọmo': “Rụi'quen' tyä mu'yam, jam jụijya', mụijya' p̂utsquen' mi”, jétinte mi'in. 4Me' yi jụijya' mi'in, mọ' ji'ĉuyinac aty jam vaj cäts cạvacsi muntyi' mi'in, mijam rụijsisya' dyijyedye' cạvacsi mi'in. 5Vojity mạ'jeyacdyety yụ, se'vevac jäm' ọij p̂eyacdye'. Mu' Jen' tsim'tacsi mu'in ñịbety in muntyisya' vej mu'in, anicye-dye'ya' qui nam' mu'in jedye'-tumtyi' shupqui in Jen'si'ya' vej mu'. Mu'dye yụ'tacsi paj qui Jen'yadyety in ayo'bu'yedye'ĉan mu' yoj jeyacsidyem' jiquej u. Yi mu' Jen' mu'in ra' me' so'mac in yódyetydyem' mạ'jetety u in. 6Mi'in qui nam' jam me', äcäijjeyacsi mi'in mu'in ñịbety in. Yụ ra' jéyac: ¿tyi ĉaĉaij me'tyinac u? ¿Tyi ĉaĉaij ji'me'tyinac ayo'ya' u? 7¿Jam adac mu'in jedye'tumtyi' in? Mu'in ñiñepte in Jesucristos tịj mu', mọ' jäm'si' tsundyes, mọ' ji'jäcbitintes mi'in yoqui'dyem' jụjjetinteya' jiquej u. 8Yi' ọij mọjo'chas yụ'tacdye' sánacdye'ches, yi' mọ': “Mạ'jeyacsejam' fer chätidye' mi'in, yojdyem' ĉụi' mạ'jiti u mi'in”, yi'.218 Chiquetiñe' jụijya' mi'in ọij yụ'tacdye', där ra' jäm' shupqui mi'in. 9Jam qui nam' me' jụijya' mi'in, jam vaj cäts cạvacsi muntyi' jụijya' mi'in, shupqui' ra' vatyquej juchaj mi'intum, mọ' yụ'tacdye' ji'me'tyinac juchadye'ya' mi'in. 10Me' tsan' yirity muntyi' chique'ya' räj mọ' yụ'tacdye' ji'chäyitidye', yiris qui nam' jam chique'ya' mọ', därsi' juchaj so'mete Jen'. Me' tsan' yiris mọmo' ji'chäyitidye' jam chiqueja'ya' tsun, jeñej qui räjen' mọ'si' ji'chäyitidye' mọ' va'quecbija tsun, me' shupqui' mọ' ji'me'tacdye' tsun. 11Mu' Jen' jísin'tyi' jiquej: “Jam ra' vo'voij mi'in”,219 chimu'dye yi: “Jam ra' ujatinte muntyi' mi'in”, yi.220 Jam qui tsan' vo'voij jụijya' mi'in, ujatinte qui nam' muntyi' jụijya' mi'in, vaj me'dye juchatutiñe' mọ' yụ'tacdye', mọ' ji'me'tyinac juchadye'ya' mi'in. 12Jemoñe' rụij bä'yi mi'in judyeya' rụij p̂eyaĉam' chime', ĉaĉaij na mọ'dye ra' Jen'si' p̂eyacdye' mu', mọ' ji'farajjiyisin'si', mọ'dye ra' jị'cäts yu'nac. 13Jam ñịbe' ĉọcsejaty jụijya', me'dye ra' Jen' jam ñịbe' ĉúsin' tsun chime'. Ñịbe' na ĉọcsejaty jụijya' tsun, chat qui ra' ñịbe' ĉúsin', jị'cäts yụ'tacsiya' juchadye'ya' muntyi' in. 14Vojity, jam nọ́tacdye'tum bä'ja' jụijya' tsun, me' tsan' yéja' tsun, yụ anicjete Jen', fibis mọ' shupqui' anicyedye' tsun, mọ' fibis anicyedye' tsun jam tupuj ji'c̣honsin' tsun. 15Mu'ya' pạrej vojity mi'in jayejtyity quị'si' jụijya' mu'in judyeya' chime' säcsedye' mu'in. 16Jéyacsi jụijya' mi'in: “Jäjäm'yeban ĉa mi'in, jäm' ra' c̣hục säcseban mi'in judyeya' ra' jäm'tyi'ĉan quị'si' cäbun mi'in”, vatyquej me' jéyacsi jụijya' mi'in, jam qui nam' so'macsi jụijya' mi'in jedye' chuc jayejjotaqui in. Mem' ĉụi' jéyacsiya' mi'in, fibis mọ' shupqui' p̂eyacdye' mi'in, mọ' jam jun' tupuj nọ́tacsi'. 17Me' bu'yi' chime' anicyedye' tsun, p̂eyacdye'ya' mọmo' yéja' jụijya' tsun, jam qui nam' nọ́tacdye'tum bä'ja' jụijya' tsun, fibis mọmo' shupqui' mọ' anicyedye' tsun. 18Vatyquej mu'ya' pạrej yirity yi jụijya': “Jam vaj cäts bu'ja' tsun, yirity anicjejaty Jen', yoctyi' na nọ́tacdye'tum bä'jaty”, yi mu' jụijya'. Jam na me', mu'in anicyity mọmo' in, jam qui nam' nọ́tacdye'tum jụijya' in, jam jorojĉan mọ' anicyedye' mu'in. Nọ́tacdye'tum bä'yi jụijya' in, mọ' jị'ĉocsebi' anicyedye' mu'in. 19Vatyquej chime' yirity yi, “Yụ anicje' ọij p̂eyacdye' yi'si': Mu'ya' yirity mọmo' Jen'.” Anic tsan' jäm' mọ' anicyedye' mu', taca' qui nam' jayej anicyedyem'. Jesha', mọ'in chime' sọyo' in mọ' anicje' in, jun' chuc mu'ya' yirity mọmo' Jen', me' tsan' me', mọ' qui nam' jam tupuj ji'c̣honacsi', noc̣ho'c̣ho-yequi' mọmo' in quijnacdye'tum Jen'ya' in. 20Anic cäj cại' dyijye-dye' mi. ̣Q̂uin' yụ ra' jị'chiqueyeye, jam rụij bä'ja' jụijya' tsun, fibis mọ' shupqui anicyedye' tsun. 21Dyijtuja vóshi' tsun Abraham. Jen' rụij jayu'ti mu' Abraham chicacdye'ya' mu' so'mete tsan' ạva' mu' Isaac ji'co'shayacdyety tsan' jiquej.221 22Mọ' ji'chäquiyisin' tsun, Abraham jam anicjete mọmo', chime'dye chiquete, chicacdye'ya' mu' mọ'ya' jị'cätsaqui anicyedye' mu'. 23Mọ'dyes qui cạ̈tsi' mọ' sánacdye' yi': “Abraham anicjete Jen' me'dyes qui mu' Jen' rụij jayu'ti”.222 Chime'dye yi mu' Jen': “Abraham pen'dye' yụ.” 24Ọij jorojĉanjisin', jam anicyedye'ya' mọmo' mu' Jen' rụij yu'sin' tsun, jemoñe' nọ́tacdye'tum bä'ja' chime'. 25Me'dye mọ' chime' jiquej Rahab, me'taquis p̂en, Jen' rụij jayu'ti' nọ́tacdye'ya' mọ', ĉaĉaij na mọ' tiĉunacsi' mu'in cạvequety jac jiquej in. Jijmu'sacsi' chum judyeya' qui yocve jịjijcayacseban'. 26Jesha', muntyis a' tsun, itŝi' tsạ'si' jụijyam', aty mọ' säñis a'. Me'dye mọ' chime' anicyedye' tsun, jam nọ́tacdye'tum bä'ja'tyi' Jen'dyes jụijya' tsun, fibis mọ' shupqui' anicyedye' tsun jam ya'i'.

will be added

X\