James 1

1Yụ nash Santiago, úñity Jen'tyi' mu' judyeya' Jesucristoty mu', Ayo' tsun. Yụ nash vorjeyac mi'in yiri'tac pärä' jiyity ñuru'tyity mi'in Israeltyi' vóshi' mi'in, räj me'si'dye mi'in anicjetintety Jen' mi'in, räj bu'yity ọij jac, yụ vorjeyac mi'in. 2Vojity, yụ jéyac mi'in, me' tsan' jụ'ñis ĉụi' yịjyi ñịbedyes jị'ĉojtiñe'ya' mi'in, ma'jodye'tum ram' ji'cajñetiñe'. 3Mi'in aty chịj mu' Jen' ñịbedyesya' chäyibunac anicyedye' mi'in. Jam farajjecajcatiñe' mọ' anicyedye' mi'in, jị'ĉojtiñe'ya' mi'in mọ' ñịbedyes, mọ'ya' ra' chịj mi'in tyum'chutidye'tum bä'yi mi'in. 4Jam ra' dam' farajjetiñe' tyum'chutidye' mi'in, me' bä'yi jụijya' mi'in, chat qui ra' jam jụ'ñiij Jen'si'ya' vej mi'in, mijam qui ra' jayej ferdye' mi'in chime' paj qui rụij bä'yi Jen'dyes mi'in. 5Pạrej mọ'ya' taca' jayej dyijyedye' mi'in, jemoñe' cọdyetinte Jen', chat qui ra' mu' so'minac dyijyedye' rụijsis. Mu' so'macsi räj muntyi' in, mijam dam' quijatutacsi dyijyedye' so'macsi, mijam chime' fạra'jeĉúnacsi mu'in cọdyetety in. 6Jemoñe' qui nam' anicyedye'tum cọdyetinteya' mu' Jen', mijam ra' yoc dyijyi mi'in, ĉaĉaij na jam anicyedye'tum cọdacdye' jụijya' tsun, jeñej ra' vacam'quis pufej, juna' ĉụi' jịjcai' cại' tyi'mu, me' ra' shupqueja' tsun, yoc yoc dyijyeja' jụijya' tsun. 7Tyi chuc me' dyijyity, mu' ra' jam jun' jụjtac Ayo'ya', 8ĉaĉaij na jam yiris mọmo' dyijyedyem', cäts mạyedye' jịjcai' yocsi' yocsi' dyijyedye' cại' mu'. 9Mu'in ñịbety anicjetety Jen' in, tupuj qui nam' ma'jodye'tum bä'yi in, ĉaĉaij na mu' Jen' muju'cha' yụ'tacsi. 10Mu'in na jedye'tumtyi' anicjetety Jen' in, me' tsan' uya'ya' yụ'tacseban Jen', tupuj qui nam' ma'jodye'tum bä'yi in. Jesha', mu'in jedye'tumtyi' muntyi' in, räj me'chui'si' jedye' in, mọ' jeñej bu'yi' däräs jáme mọ'in, me'tuquim' ji'cavitim' judyeya' qui räj viritim'. 11Aty are'yechuij jụijya' mu' tsun, q̂uin'dyem' subin'yejoi' därä'si' jáme mọ', chat qui jọ'chai' mọ', me'qui'dye ve'ej mọ'. Me' ra' chime' mu' jedye'tumtyi' muntyi', me' tsan' fer carijtaqui, vatyquej ra' mọmo' mọtsi mu' mọ'tumdye jedye' mu'. 12Anic ma'joij mu'in jam peñity in jị'ĉojtye'ya' in ñịbedyes. Aty me'si' ji'cajñe'ya' in mọ', Jen' qui ra' yụ'tacsi paj qui mu'ya' bä'yi in, mọ' ra' bijodye' mu'in so'macsis ra' Jen' yódyetydyem' mạ'jetety u in. 13Jun'si' chuc ayijya' ji'penacdyes dyijyedye', jam ra' yi mi'in: “Jen'dye me' so'min yụ me'dyes mọ' jị'ĉojtye' yụ”, jam ra' me' yi mi'in. Mu' Jen' jam tupuj jo'mesya' ji'ma'yac a'c̣hisya' dyijyedye', mijam mu' chime' jo'mesya' ji'ma'yeyacsi a'c̣hisya' dyijyedye'. 14Ji'ma'yisin' a'c̣hisya' dyijyedye' jụijya' tsun, mọ' jam yocves jijtui' dyijyedye', ĉụi'tyi'ĉan ĉojtyi' tsun mọ'ĉan na'i'. 15Jäm'tujcacaja' jụijya' tsun mọ' a'c̣his dyijyedye' tsun, chat qui ra' me'ĉandye juchayeja', a na jiijja' juchayeja'ya', chat qui ra' ayij mọ' sän'dye'. 16Vojity mạ'jeyacdyety yụ, jam ra' yirity ĉụi' väñätuti mi'in. 17Räj mọ' ñịbe'yedyes jäm'si' me'chuja'si' tsun, räj mọ' mạyedye'ches jijtui', Jen' nash ñịbe'jisin' tsun, mu' jäm'tyety mạyedye'ches mạijyis in. Mu' nash räjĉan bu'yi, mijam dam' yocve dyijyi mu', mu' Jen' jam jeñej mạyedye'ches mạijyis in, pạrej jam mạijchusin' in, mu' na Jen' räjĉan mu' mạijchusin'. 18Mu' Jen' ĉụi'si'ya' dyijyedye' mu' tsạ'chusin' judyeya' chime' ạvatusin' tsun anicyedye'ya' rụijsis p̂eyacdye' mu', judyeya' chime' tsim'sin' paj qui tsun tashche' bu'ja' yu'sin' mu', jam jeñej yoctyi' in. 19Mạ'jeyacdyety vojity yụty mi'in cavintum se'vaĉam' mi'in, jam qui na ram' tashche' tashche'yi p̂eyaqui mi'in, mijam ra' cavintum fạ́coij tyeij mi'in. 20Tyi chuc fạ́coij tyeijtyi' jụijya' in, mu'in me'tyity in mijam méqui' jị'cätsepte in rụijsis dyijyedye' Jen'si' mu'. 21Faraj-jevac yiristum mọ' a'c̣his dyijyedye' mi'in, jam ra' ac̣hi' bä'yi mi'in. Jäm'tyi'tum ĉojtyi' jụjjebimac Jen'si' p̂eyacdye' mu', mọ' yu'tyiyinacsi' ĉojtyi'ĉan mi'in, mọ' ferdye'tumsi' mọ' tupuj ji'c̣honnac mi'in. 22Jam se'vac mọmo' mọ' p̂eyacdye', jemoñe' chicac, se'vetiñe' jụijya' mọmo' mi'in, ĉụi'si' väñädye' shupqui mi'in. 23Tyi chuc se'vaquity mọmo' tsan' mọ' p̂eyacdye' Jen'si' mu', jam qui nam' chiquepteya', mu' me'tyity jeñej yirity muntyi' ĉụi' cavitity espejoĉan. 24Ĉụi' caviti vejya', aty me'si' caman'jeban', mijam dam' dyijyeban jụ'ñiij chuc vejya' jiquej, me' bu'yi mu' muntyi' jam chique'tyi' p̂eyacdye' Jen'si'. 25Mu' na jäm' chique'tyi' jụijya' mọ' rụijsis p̂eyacdye' Jen'si' mu', mọ' ji'farajjiyisin'si', mu' jäm' chiquety jätäjyi' chuc mọ', judyeya' jam farajje', mu' ra' Jen' jañutyiti räj jedye' chuc jun'taquiya'. 26Tyi chuc anic jäm' cạptety ji'chäyitidye' Jen'si' mu', me' ĉúti jụijya' mu', jam qui nam' ĉọjcaqui nem jụijya' ĉụi'sim', fibis ra' shupqui' ji'chäyitidye' cại'si' mu'. 27Mu' Jen' Ạvatusin'tyi' tsun, mu' mạ'je' paj qui tsun rụij cạpja ji'chäyitidye' mu' mijam cäj, me' mạ'je' mu' paj qui tsun nọ́tacseja' mu'in säntaquity jen' in judyeya' tse' mu'in judyeya' mọ'in p̂en in säntaquis vämtyis in, mọ'in ñịbe' cạves in. Chime'dye mu' Jen' mạ'je' paj qui jam ĉụi' ac̣hi'tiĉa' tsun a'c̣hisya' dyijyedye' jacches.

will be added

X\