Hebrews 9

1Tashches p̂eyacdye' Jen'si' mu' jísin' mọ' jun' chuc ra' muntyi' in jäm'tyeyete ra' in tima'cacdyes aca' ọ́ches mu', judyeya' chime' mọ' p̂eyacdye' jéyacsi' jun' chuc ra' tima'quete Jen' mu'ĉan in. 2Me' jäm'tye' jiquej in Jen'si' aca' mu' cäjyasĉansi' jac jiquej:211 mọ' tashves vavdye' je' in: Tsäqui'sis Vavdye', mọ'ĉan mọ' yụ'taquis vera,212 judyeya' mọ' mesa yóche'dyem' yụ'tac Jen'yadyety pan u.213 3Chime'dye jäqui've mu' pärä'yity juñum bu'yity mọ'ya' yocsi' vavdye', mọ' je' in: Mọjo'cha' Tsäqui'sis Vavdye'.214 4Mọ'ĉan mọ' ji'co'shayaquis jẹrejres oro mọ', judyeya' mọ' cajón yụ'tacdye'tumsi', sham'tacsi' oroya'. Cajónĉan yiris puñuj oro me'chui'si' mạyedye'ches säcsedye' maná, chịmo'ĉandye mutyudye' mu' Aarónsi', mọ' co'ñeyeban'si' jiquej judyeya' mu'in mij sánacdye'tumtyi' in Jen'si' mu'. 5Fajche' cajón mu'che' yụ'tacsi querubin bu'yity in, mu'in jị'ĉopte Jen'si' mạijquedye' mu'. Mọ' pavaj mu'in juñumchubi' än'tacdye' mọ'sim', mọ' jị'cavacdyes vayacdyes juchaj muntyis mu'in.215 Me' me' mọ'ĉan jäm'tac Jen'si'ĉan aca' mu'. ̣Q̂uin' qui nam' jam jemonac mọ' p̂eyeyac jedye' chuc mọ' cại'. 6Aty me' jämii'tac räj, chat qui tiyacchuti carijtaqui mu'in cudyitity Jen'che' in. Räjĉan mạyedye' tashves mọmo' site' vavdye' in, mu'ĉan carijtaqui Jen'dyes in. 7Yirity mọmo' tupuj site' mọ' tätscäi'ches vavdye', mọ' Mọjo'cha' Tsäqui'sis. Mu' tashche' cudyitity Jen'che', mum' tupuj mu'ĉan siti, yiri' quim' yiris yómodye' site' mọ'. Jun'si' chuc site'ya' mu'ĉan, cại' cu'dyes chäsh juchadyes mu', mọ' ĉụi'sidyes juchaj mu' judyeya' muntyidyes chime' juchaj in. Pạrej juchatute Jen' in mijam chịj in jun' chuc juchaij in, mọ'dyes yi' mọ' chäsh chime'. 8Jen'si' Ạ'edye' mu' jísin' jedye' chuc cại' mọ', mọ' ji'chäquiyisin' taca'dyem' fer bu'yi' mọ' tashches yụ'tacdye' jiquej, mọ' yi' jun' chuc ra' carijtaqui in mọ'ĉan tashchesĉan vavdye' jiquej, jambi'dyem' tupuj sitac jiquej mọ' Mọjo'cha' Tsäqui'sis vavdye', mọ' jambi'-dyem' vanchuc muntyidyes jiquej. 9Ọij jị'ĉocdyes shupqui' tsundyes q̂uin', mọ' ji'chäquiyisin' jun' chuc mọ' tuyacdye' Jen'ya', räjtumdye ji'co'shayacdye' mu'dyes in, mọ' qui nam' jam tupuj c̣hicon'jeyacsebi' ĉojtyi' mu'in tuyetety Jen' in, yejĉoij ji'yoquiti juchajya' mu'in. 10Mọ' mọmo' p̂eye' säcsedye' judyeya' tyédye' judyeya' yịjyi favacdye' chime', me' me' cại' tashches ji'chäyitidye'. Mọ' a'dyes mọmo' tsun, mọ' ya'i' jiquej jun' qui' chuc mu' Jen' mụi'sis yụ'tye' p̂eyacdye' mu'. 11- 12Anicdye me', atsij mu' Cristo, mu' qui yụ'tac anic cudyitity Jen'che' tsundyes q̂uin', mu'dye ji'chäquiyisin' jäm'yedye' so'misin'si' mu' Jen'. Mọ' qui nam' mạyedye'ches aca' Jen'si' mu', yóĉandyem' carijtaqui q̂uin' u mu', mọ' mọjo'cha' bu'yim', ọya'ya' ọ́ches aca' Jen'si' jiquej mu', mọ' jäm'tyes muntyi' jiquej in ọ́che' jacche'. Mu'ĉan siti mu' Cristo Tsäqui'sisĉan Vavdye' Mọjo'chas, mọ' mạyedye'ches, mu' jam cạbi' cu'dyes chäsh mọ', mijam chivos mijam vacas cạbi' juchadyes tsun, ĉụi'sim' chäsh yụ'taqui, mọ'ya' ji'c̣honsin' tsun paj qui Jen'yadyety tsun, paj qui räjĉan mu'ya' bä'ja', mijam ra' quivij yụ'taqui chäsh mu'. 13Anicdye me', mọ' toros chäsh mu', judyeya' chivos mu' judyeya' vacas chim chime' mọ', mọ' ji'co'shaye'si' Jen'dyes jiquej in, mọ' tupuj jäm' yụ'tacsebi' muntyis a' mu'in, mu'in ac̣hi'tity yụ'tacdyedyes in. 14Mọ' na chäsh mu' Cristos anic mọjo'cha' fer bu'yim', mọ' chat räj c̣hicon'tibusin' ĉojtyi' tsun. Ĉụi'si'ya' Ạ'edye' mu', mọ' jam jụ'ñisĉan mạyedye' mọtsis, mọ'ya' mu' Cristo ĉụi' yu'ti yojdyem' jam jụ'ñis oveca o ji'co'shayacdyes, me' bu'yi yu'ti mu' paj qui tupuj ji'c̣honsin' tsun juchajĉantyi' tsun, mọ' so'misin'si' sän'dye', paj qui cäc̣hä'chuja mu' tsạ'tyi' Jen'. 15Mọ'dyes mu' Jesucristo ujacdye'ya' mu' yu'sin' tsun paj qui jäm'jitiĉa' Jen'tum judyeya' chime' mu' yu'tyiyisin' tsun mụi'sis p̂eyacdye' Jen'si' mu', mọ' p̂eijtes ñịbe'yedyes mọ' so'macsis Jen' mu'in fayactyi' in. Mọ' ñịbe'yedyes mạyedye'ches in, mọ' jam ra' jụ'ñisĉan mạyedye' mọtsis ra' mu'in. Me' ra' so'macsi ĉaĉaij na mu' ji'ijati paj qui mu' vayacjeyacsebi juchaj mu'in juchatuptety in mọ' tashches p̂eyacdye' Jen'si' mu'. 16- 17Jesha', mọ'ya' muntyis sánacdye' mu'in mọ' jị'chicaqui' tyi chuc ra' so'mac muntyis jedye' mu' aty säñiya' mu' a'tumtyi'. Me' tsan' sánac, jambi' qui nam' ya'i' mọ' p̂eyacdye', aty mu' säñiya' mu' yụ'tyety jiquej, chat q̂uin'dyem' mọ' ferdye'tum shupqui' p̂eyacdye' yụ'tyes sánacdye'che', chat qui q̂uin'dyem' so'mac in jedye' mu'. 18Me'dye mọ' chime' jiquej, mọ' chäsh so'me' ferdye' mọ' tashches yụ'tacdye' Jen'si' mu', tupuj ijac cu'dye' in. 19Anicdye me', mu' Moisés jiquej, yoqui'dyem' so'macsiya' p̂eyacdye' jiquej u, aty me'si' jéyacsiya' muntyi' in, Moisés tapje' mọ' ovecas fin mọ', c̣huctye'si' jäijnäsĉan, mọ'tumdye tapje' shan hisopos mọ', jeñej bu'yi' sinaquity me' bu'yi' yụ'tye'. Mọ'ĉan mu' chucje' vacasĉan chäsh mọ' judyeya' chivos mu' cafon'tacsi' ojñi'tum, chat qui fatsujje' mọ' sánacdye' yụ'tacdye' judyeya' muntyi' chime' fatsujnacsi. 20Yi qui jéyacsi: “Ọij chäsh so'me' ferdye' mọ' p̂eyacdye' yu'tyiyinacsi' mu' Jen' paj qui chiquetiñe' mi'in”, jéyacsi. 21Mu'dye Moisés chäshya' fatsujjepte Jen'si' aca' mu', mọ' tinates, chime' mọ'ĉansi' jedye' fatsujtacsi. 22Yi' mọ' tashches yụ'tacdye' arajdye räj jäm' yụ'tac chäshya' in, itŝi' jo'mes chäsh jụijya', a vuty jam vayac juchaj o muntyis mu'in. 23Anicdye me', jemoñe' mọ' cu'dyes chäsh ji'co'shaye'si' Jen'dyes jiquej in, mọ' qui jäm' yụ'tye' mọ' aca' tinates, räjtumdye jedye' mọ'. Ọij q̂uin' jacches jedye' jiquej in mọ' jeñej bu'yi' onom'si', mọ' ji'yetye' mạyedye'ches jedye' anicsis. Tyi chuc mạyedye'chedyety jụijya' in jemonac mọjo'chas jäm'si' chäsh, mọ' qui ra' jäm' yụ'tacsi'. 24Cristo jam site' ọ́ches aca', mọ' jeñej bu'yis onom'si' mạyedye'ches, mijam mu'ĉan cudyiti Jen'che' tsundyes, mạyedye'ches mọmo' site' mu' q̂uin', mu'che' ji'caviti Jen'ya' judyeya' cudyiti tsundyes mu'che'. 25Tashche' cudyitity Jen'che' jiquej räjĉan yómodye' jịjcaij site' mọ' Mọjo'cha' Tsäqui'sis Vavdye', jam qui nam' ĉụi'si' chäsh cạqui, cu'dyes chäsh cạbi' mu' juchadyes muntyidyes mu'in. Mu' na Cristo yocdye mu', jam räjĉan ĉụi' yu'tyiva'ti säñi tsundyes. 26Me' jụijya' mu' Cristo, a vuty dai' qui' mu' säñi chime' u, a vuty cäts yómodye' jịjcaij säñi u, yoqui'dyem' jäm'tye'ya' jac jiquej u me'dye q̂uin'. Jam qui nam' dai' qui' säñi mu' Cristo. Aty c̣hẹi'ya' jiquej mọ' jadyiquis tupudye', yiri' quim' atsij ji'caviti mu', judyeya' ĉụi' yu'ti paj qui vayacjeyacsebi muntyis juchaj mu'in, mijam ra' cuvij jemonac ijac. 27Me'dye q̂uin' räj muntyi' in yiri' quim' säñi in, chat qui ra' mu' Jen' jị'cäts yụ'tacsi juchadye'ya' mu'in. 28Mu' na Cristo yiri' quim' me' ĉụi' yu'ti ijac paj qui vayacjeyacsebi juchaj muntyis mu'in, mu'in dai'tyis in. Jábiya' ra' quivij mu' ji'caviti, aty ra' jam quivij atsijban mu' ji'ijabun juchadyes mu'in, atsij ra' mu' ji'c̣honacseshan tyi chuc bisva'tety in.

will be added

X\