Hebrews 7

1Uts Melquisedec Salem-ĉantyi' ayo' jiquej, judyeya' cudyitity Jen'che' jiquej, mu' muju'cha' bu'yity Jen'. Abraham ji'penacsiya' yoctyi' ayo' jiquej in, aty ca'ñibunya' mu', mu' qui Melquisedec jaji'rebiĉun'ti judyeya' jaso'miti jäm'si' p̂eyacdye'. 2Chat qui mu' Abraham pạrej yụ'tye' jedye' Melquisedecdyesi', mọ' chutacsis yoctyitysi' ayo' in, mu' so'mete yiri'tacĉansi' yiris jedye' jịjcai' so'mete.209 Mọ' tịj Melquisedec yi' ca yi': “Rụij ayo'bu'yity,” yi' ca. Mu' chime' ayo' Salemĉantyi'. Salem yi' ca yi' “Ĉojtyi'ĉansi' ma'jodye'.” Mọ' na ca yi' Melquisedec Ayo' so'macsity ĉojtyi'ĉan ma'jodye', yi' ca mọ' yi'. 3Mijam méqui' chị́yac jen' mu' tyi chuc, mijam tse' mu', mijam vóshi' mu' chime', mijam sánac tịj mu'in, jam jeñej mu'in cudyitity Jen'che' jiquej in. Yojdyem' Jen'tyi' Ạva' u mu', me'dye chime' mu' Melquisedec, jam jụ'ñisĉan mạyedye' mọtstaqui cudyitidye' Jen'che' mu'. 4Jorojĉandye muju'cha' bu'yi uts Melquisedec jiquej, mu' na Abraham uya'ya' mu'. Abraham vóshi'vun tsun jiquej, me' tsan' fer bu'yity mu', so'mete qui nam' Melquisedec yiri'tacĉansi' yiris jedye' jịjcai', mọ' chutyetacsis chutidye'ĉan jiquej. 5Yụ'tacdye' jiquej Jen'si' yim' jun' chuc mu'in cudyitity Jen'che' in Levítyi' vóshi' mu', mu'in yụ'tac in jäctyetacsity in ĉụi'tyi' chätidye' mu'in yiri'tacĉansi' yiris jedye' mu'in, me' bu'yi jäctacsi Jen'dyes in. Me' tsan' mu'indye in Abrahamtyi' vóshi' in, mu'in qui nam' Levítyi' vóshi' in, mu'in jäctyetacsity in. 6Mu' na Melquisedec, me' tsan' jam Levítyi' vóshi' mu', jäctyete qui nam' mu' Abraham yiri'tacĉansi' yiris jedye' jịjcai' mu', judyeya' jaso'miti jäm'si' p̂eyacdye' chime'. Me' tsan' mu' Abraham tsim'tactyi' Jen'tyi' mu', judyeya' so'mactyi' p̂eyacdye' Jen', mọ' p̂eyacsi' ra' vóshi' ra' mu', mu' qui nam' Melquisedec so'mete jäm'si' p̂eyacdye'. 7Jorojĉandye mu' Melquisedec muju'cha' bu'yi, uya'ya' mu' Abraham, ĉaĉaij na mu' muju'cha' bu'yity, mu' tupuj so'mete jäm'si' p̂eyacdye' mu' uya'ya' bu'yity. 8̣Q̂uin' mu'in cudyitity Jen'che' in jäctacsity yiri'tacĉansi' yiris jedye' jịjcai' muntyis mu'in, mu'in me' jäctacsity muntyi' in sän'dyedyety mọmo' muntyi' in. Mu' na Melquisedec mu' jäctyetety Abraham jiquej, jam mu' me', sánacdye' p̂eijte yi': “Mu' nash tsạ' bu'yity.” 9- 10Levítyi' vóshi' in, cudyitity Jen'che' mu'in yụ'tac in paj qui jäctyetacsi muntyi' in yiri'tacyis mu'in. Tupuj yéja' tsun, me' tsan' itŝijdyem' mu' Leví jiquej yoqui'dyem' mu' Abraham so'meteya' yiri'tacyis jedye' jiquej u mu' Melquisedec, jeñej bu'yi qui nam' mu' Leví chime' so'mete mu' Melquisedec, me' bu'yi' shupqui' mọ', ĉaĉaij na Abrahamtyi' ra' vóshi' mu' Leví jiquej, mu'ĉan ra' na'i mu'. 11Mu'in cudyitity Jen'che' in vóshi' mu' Levíty jiquej in, mu'in jéyacsi muntyi' in yụ'tacdye' Jen'si' mu'. Mu'indye Aaróntyi' chime' vóshi' mu'. Mọ' qui nam' yụ'tacdye' jéyacsis mu'in jiquej in, mijam mọ' rụij yụ'tacsi' muntyi' in. Me' tupuj jụijya' mọ', a vuty jam mu' atsij Cristo u, a vuty jam cudyiti Jen'che' tsundyes u. Mu' Cristo yocsi' cudyitidye' cäc̣hä'chui', Melquisedecsi' jiquej, jam mu' Aarónsi' cäc̣hä'chupte cudyitidye' mu'. 12̣Q̂uin' chat mu' Jen' yi paj qui yoc bu'yi' yụ'tac mọ' cudyitidye' mu'che', jemoñe' qui mọ' chime' yoc yụ'tac mọ' p̂eyacdye'. 13- 14Ayo' tsun p̂eijtety mọ' sánacdye', jam mu' Levíty vóshi' jiquej mu', chị́ja' qui nam' tsun Judátyi' vóshi' mu'. Judátyi' vóshim' mijam yirity yụ'tac cudyitity Jen'che' in, ĉaĉaij na mu' Moisés jam me' yi jiquej. 15Mọ'dyes q̂uin' dadam' jorojĉan aty yocve yụ'tye' mu' Jen', yoctyi' atsij cudyitity Jen'che' muntyidyes in, yojdyem' Melquisedec jiquej u. 16Mu' yụ'tacya' jiquej, mọ' jam cäc̣hä'chui' yụ'tacdye' yi' Levítyi' vóshi' mọmo' yụ'tac in, mu' na Cristo jam me', mu' Cristo yụ'tac ĉaĉaij na mu' ferdye'tumtyi', mu' ra' jam jụ'ñisĉan mạyedye' säñi. 17Yi mu' Jen': “Cudyitity Jen'che' yụ'tac mi, jam ra' jụ'ñisĉan mạyedye' mọtsi' cudyitidye' yụ́che' mi, yojdyem' Melquisedecsi' jiquej u”, yi' sánacdye'. 18Me'dye mu' Jen' jị'motse' tashches yụ'tacdye' mu', ĉaĉaij na mọ'si' jiquej itŝi' ferdyem', fibis mọmo' jiquej, 19mijam tupuj rụij yu'sin' jiquej. ̣Q̂uin' chat mu' Jen' yụ'tye' yocsi' p̂eyacdye' dadam' mọjo'cha' jäm'si', mọ'ya' q̂uin' c̣hẹi'ya'jeja Jen'. 20Chime'dye mu' Jen' fersi' p̂eyacdye' ji'jäque' jayu'tiya' mu' Cristo jiquej, paj qui mu' anictyity cudyitity Jen'che' muntyidyes shupqui mu'. Mu'in na yoctyi' cudyitity Jen'che' in, jam mu'in me' yụ'tac in, jam mọ' ji'jäque'. 21Mu' Jesús mum' yirity fersi'ya' p̂eyacdye' yụ'tac jiquej, yi' mọ' sánacdye': “Ayo' tsun fersi' p̂eyacdye' ji'jäque', mijam ra' jun' tupuj yocsi' yéban' dyijyedye' shupqui' mu'. Jam ra' jụ'ñisĉan mạyedye' mọtsi' cudyitidye' yụ́che' mi”, yi' mọ' sánacdye'. 22̣Q̂uin' chat mu' Jesús yụ'tye' paj qui fer bu'yi' mọ' mụi'sis p̂eyacdye' Jen'si' mu', mọ' anic mọjo'chas p̂eyacdye', jam jeñej mọ' tashches jiquej. 23Mu'in cudyitity Jen'che' in jam mu'in pärä' jiquej in, me' tsan' säñi in yoctyi' cächyi jiquej in. 24Mu' na Jesús jam mu' me' yụ'tac, mum' yirity yejĉoij cudyiti Jen'che' muntyidyes in, ĉaĉaij na mu' jam jụ'ñisĉan mạyedye' säñi. 25Mọ'dyes mu' Jesús ferdye'tum, tupuj ji'c̣honacsi tyi chuc c̣hẹi'ya'jetety Jen' in Jesússi'che' tịj mu', räjĉan bu'yi ra' Jen'ya' in. Mu' tupuj ji'c̣honacsi ĉaĉaij na mu' räjĉan cọdaqui Jen'che' mu' mu'indyes in, jam ra' jụ'ñisĉan mạyedye' säñi mu'. 26Där jäm' mu' cudyiti Jen'che' tsundyes, mu' jemonjaty tsun. Mu' jam jụ'ñity, mijam dam' juchaj me'chui'tyi', pạrejtactyi' juchajtumtyi'ya' in, anic jiyi che've yụ'tac mu', ọya'ya'dye mạyedye'che'. 27Mu' jam jeñej cudyitity Jen'che' in, mu'in räjĉan mạyedye' ji'co'shaye' Jen'dyes in, tashche' chum ji'co'shaye' in ĉụi'sidyes juchaj mu'in judyeya' qui jäqui've muntyisdyes juchaj in. Mu' na Jesús jam me', yiri' quim' ji'säsdyi ijac jiquej tsundyes, jeñej bu'yi' ji'co'shayacdye' Jen'dyes, me' bu'yi' mus ijacdye' jiquej mu'. 28Mọ' yụ'tacdye' jiquej yụ'tacsi' juchajtumtyi' muntyi' in paj qui mu'in cudyiti Jen'che' in. Jäqui've qui mu' Jen' yụ'taqui ĉụi'tyi' Ạva' mu', fersi' p̂eyacdye' ji'jäque' yụ'taqui mu', mu' qui räjĉan bu'yi cudyitity Jen'che' muntyidyes in, mu' räj jị'cätsepte Jen'si' dyijyedye' mu'. Jen' fersi' p̂eyacdye' ji'jäque' jayu'tiya' jiquej mu' Jesús.

will be added

X\