Hebrews 5

1Räj mu'in tashche' cudyitity Jen'che' in, muntyi'ĉantyi' tsim'tac in, mu'in yụ'tac in paj qui muntyidyes úñi in Jen'si'ya' vej mu'. Mu'in so'mete Jen' in tucdye' muntyis mu'in, judyeya' chime' Jen'dyes ji'co'shaye' juchadyes mu'in. 2Mu' cudyitity Jen'che' tupuj ñịbe' cạvacsi mu'in juchajtumtyi' muntyi' in, mu'in vatyquej juchajĉan tŝọijtyi' in, judyeya' mu'in chime' jam chị́yeptety in Jen'si' p̂eyacdye' in, ĉaĉaij na mu' muntyi' chime', itŝi' ferdye' mu'. 3Jam muntyidyes mọmo' juchaj ji'co'shaye' Jen'dyes, ĉụi'si'mundyes chimem' juchaj ji'co'shaye', ĉaĉaij na mu' chime' juchajtumtyi' muntyi'. 4Jesha' yirity muntyi' jam ĉụi' che' yu'ti paj qui cudyitity Jen'che', me'dye Jen' mọmo' jafaijti paj qui mu' cudyitity Jen'che', yojdyem' mu' Jen' u jafaijti Aarón jiquej.207 5Anicdye me' mu' Cristo jam ĉụi' yu'ti paj qui cudyitity Jen'che', mu'dye Jen' me' jayu'ti jiquej, yoj yi'dyem' sánacdye' o: “Mi nash Ạva' yụ, q̂uin' aty ạvatuye.” 6Yocsi' sánacdye' yi': “Räjĉan ra' mi cudyitity Jen'che', mijam ra' jụ'ñisĉan mạyedye' mọtsi' cudyitidye' mi yojdyem' Melquisedecsi' u mu'”, yi' sánacdye'. 7Uche'dyem' rụi'cu'ĉandyem' jiquej, mu' Cristo cọdyete Jen', cọdacdye'ĉan mu' fer p̂eyaqui tárisdye'tum cọdyete mu' ĉaĉaij na mu' Jen' fer bu'yi, mu' tupuj jaji'c̣hondyi sän'dye'ĉan. Jen' jụjbite cọdacdye' Cristos mu' ĉaĉaij na mu' chiquete. 8Me' tsan' Jen'tyi' Ạva' mu', ñịbedyesya' qui nam' mu' ji'chäyiti chiquete Jen'. 9Me' bu'yi aty räj jị'cätse' Jesús, me'dyes qui räj ji'c̣honacsi mu'in chiquetety in, mijam ra' jụ'ñisĉan mạyedye' va'cac in mu'in ji'c̣honactyi' in. 10Mọ'dyes qui mu' Jen' jayu'ti mu' Cristo paj qui mu' cudyitity mu'che' muntyidyes in, mu' yụ'tac yojdyem' Melquisedec jiquej u. 11Taca' tsan' dai' jo'mes ji'chäyitidye', mạ'je' tsan' yụ jị'chiyeyac, carij qui nam' shupqui' jị'chiyeyac ĉaĉaij na mi'in yäcäjjetinte ĉojtyi' mi'in, jam jun' ji'sistiñe' ĉojtyi'ĉan p̂eyacdye'. 12Aty tsan' men anicjetinte Jen', tupuj tsan' jị'chiyacsity shupqui mi'in. Jam qui nam' me' mi'in, yejĉoij qui nam' me' mi'in yojdye' jiquej u mi'in, jemoñe' paj qui quivijjebadyeyac mọ' tashches ji'chäyitidye'. Mi'in jeñej bu'yi joijno', jambi' tupuj säcsity, tsi'yidyem' mọmo', me' bu'yi mi'in, uya'yam' chị́yetiñe' mọ' ji'chäyitidye'. 13Tyi chuc me'tyity in, jeñej tsi'yitydyem' joijno' in, uya'yam' chị́yeptety in rụijsis ji'chäyitidye' Jen'si' mu', mijam chị́yety in jụ'ñis chuc rụijsis, jụ'ñis chuc jam rụijsis. 14Mu'in na muju'cha' chị́ye'tyi' in mọ' ji'chäyitidye', mu'in jeñej isho' shupqui in, tupuj aty jebei'tyi' shush in, ĉaĉaij na mu'in jị'chiyactyi' in, chị́ye' jäm' in jụ'ñis chuc rụijsis, jụ'ñis chuc a'c̣his.

will be added

X\