Hebrews 3

1Vojity yụ, vaj yiri'ya' Jen'tyi' mi'in, judyeya' fayactyi' Jen'ya' mi'in. Dyijtumac mi'in mu' Cristo Jesús, mu' jutactyi' Jen'tyi' mu' paj qui mu' anictyity cudyitity Jen'che' tsundyes, mu'che' ĉútiĉa' q̂uin' tsun. 2Mu' Jesús anic chiquetety Jen' mu' jayu'tity, yojdyem' mu' Moisés chiquete Jen' jiquej u, ĉọjcapte Jen'tyi' muntyi' mu'. 3Jesha' mu' jäm'tyety yiris aca' muju'cha' ra' mu' tima'cac, ọya'yam' tima'cac mọ' aca' jäm'tyes. Me'dye mu' chime' Jesús dadam' mu' muju'cha' tima'cac, uya'ya' mu' Moisés tima'cac. 4Räj aca' in mu'ya' yirity jäm'tyety in, mu' na Jen' mum' yirity räj jäm'tyety jedye'. 5Moisés úñity Jen'tyi' jiquej mu', jäm' úñi mu'dyes, mu'si'ĉan aca' rụij carijtaqui mu' jị'cätsepte p̂eyacdye' mu'. Mu' p̂eyepte räjĉan Jen'si' p̂eyacdye' mu', mọ' yi'sim' jun' chuc ra' mu' Jen' yirisĉan mạyedye'. 6Mu' na Cristo jam úñity, mu' Ạva' mu' Jen'tyi', jäm' chicaqui Jen' mu', mu' rụij ayo'bu'yi Jen'tyidyes muntyi' mu'. Me' tsun chime' Jen'tyi' muntyi' shupqueja' tsun, yejĉoja' jụijya' sóñi'yedye'tum bisaĉa' Jen'dyes tsun. 7Mọ'dyes jemoñe' jäm' se'veja' ọij p̂eyacdye' yi'si' Jen'si' Ạ'edye' mu': “Se'vebitinte q̂uin' Jen'si' p̂eyacdye' jụijya', 8jam ra' dam' yäcäjjetye-tiñe' ĉojtyi' mi'in, jam ra' jeñej mu'in urucyaty vóshi'vun mi'in, mu'in va'quectety Jen' jiquej in, yoqui'dyem' jị'ĉojte jiquej u in cäjyasĉan jac. 9Mu'ĉan mu'in in vóshi'vun jiquej mi'in jị'ĉujtyin yụ in,202 me' tsan' dai' qui' jị'cave-yacsi ferdye' yụ, vạjpedye' qui'tac yómodye' cavibun ferdye' yụ in, uts na jam dam' anicjin yụ in, mem' ñäñin yụ in. 10Mọ'tum yụ jam dam' jäm'yi, yi yụ: Uts muntyi' me'tyity in yejĉoij mọmo' farajjin yụ in ĉojtyi'ĉan mu'in, jam mạ'je' chäquibun p̂eyacdye' yụ in. 11Mọ'dyes ji'fajquin yụ in, mọ'dyes ferdye'tum yụ'tye' yụ p̂eyacdye' yụ, yi yụ: Yụ ra' jam ji'sitacsi mu'ĉan in, mijam ra' dam' jị'jutyiti mu'ĉan in”, yi mu' Jen'. 12Mọ'dyes vojity, are'ĉa mu'ya' pạrej a'c̣hity ĉojtyi' mi'in, jam anicjetintety Jen' mi'in, are'ĉa me'ĉandye peñi mi'in farajjetinte mu' tsạ'tyi' Jen'. 13Dam'dye jäm' jam me' mi'in, jambi'dyem' jiyi' tupudye' q̂uin', mọ' p̂eyes ọij sánacdye', jemoñe' vaj cäts mạyedye' vaj meij jiĉun yu'bun mi'in Jen'dyes paj qui jam se' ja'yinac mọ' juchaj, paj qui jam yäcäjjeyaqui ĉojtyi' mi'in. 14Tsun nash pen'dye' bu'ja' Cristotum, yejĉoja' jụijya' ĉútiĉa' mu'che', yojdyem' tashche' jiquej ĉútiĉa' u, jemoñe' me' q̂uin' tsun yejĉoja' me' tsun, jun' qui' chuc jadyic tupudye'. 15Yi' mọ' sánacdye': “Se'vebitinte q̂uin' Jen'si' p̂eyacdye' jụijya', jam ra' méqui' yäcäjjetyetiñe' ĉojtyi' mi'in, jam ra' jeñej mu'in urucyaty vóshi'vun mi'in, mu'in va'quectety Jen' jiquej in”, yi' sánacdye'. 16¿Tyi buty me' jiquej se'veptety p̂eyacdye' in ĉụi'si'ĉansi' chụ' Jen'si' jiquej mu' judyeya' va'quec-bitety in? Mu'in Egiptoĉan shubantyi' jiquej in, ji'shupcactyi' Moiséstyi' jiquej in. 17¿Tyi buty mu'in in jam ma'jotacsi Jen' jiquej, vạjpedye' qui'tac yómodye' jị'fajte in? Mu'in juchatutety jiquej in judyeya' säñity in, cäjyasĉan jac mu'ĉan va'cac a' mu'in. 18¿Tyi buty mu'in jiquej in Jen' yụ'tyeyacsi fersi' p̂eyacdye' mu', jéyacsi: “Mi'in ra' jam jun' yútyetiñe' mọ' jac, mijam ra' jị'jutyiti mu'ĉan mi'in?” Mu'in jam chiqueptety p̂eyacdye' jiquej in.203 19Anic jorojĉan mu' Jen' jam ji'sitacsi mu'ĉan in ĉaĉaij na jam anicjete in.

will be added

X\