Hebrews 2

1Mọ'dyes yejĉoja' ra' mọmo' fer dyijtuja' ọij ji'chäyitidye' yódyesdyem' se'vejas u, vatyquej ra' farajjeja' tsun, yojdyem' cashtity covamba u, vatyquej ra' me' tsun. 2Yụ'tacdye' Jen'si' mu', mọ' p̂eyeptes anjer jiquej in,201 anic mọ' tsäqui' bu'yis, jụ'ñity chuc juchatuptety in, jam chiqueptety in, mu'in jam jun' c̣honchuc jiquej in, va'tacdye' so'mac in. 3Dadam' tsun q̂uin', mijam ra' méqui' c̣honchusin' mu' Jen', jam dyijtupja'ya' mọ' p̂eyacdye' p̂eye'si' mọ' därsi' c̣hon'dyedyes. Mu'dye Ayo' tsun mu' tashi voro'yi ọij p̂eyacdye', chat qui mu'in se'veptety p̂eyacdye' in mu'in qui rụij ji'chäquiyibusin' in mọ' p̂eyacdye', judyeya' ji'ĉuyisin' in anic rụijsis mọ'. 4Jen'dye nọ́tacsi jiquej, so'macsi ferdye', dai' qui' jị'caveyacsi ferdye' mu' paj qui anic jorojĉan rụijsis p̂eyacdye' tui'si' in. Chime'dye mu' Jen' so'macsi carijtacdyedyes mu'in, Ạ'edye' mu' so'macsi' jun' jun' chuc mạ'je' mu', me' me' so'macsi'. 5Mu' Jen' jam yụ'tacsi anjer in paj qui mu'in ra' ayo'bu'yi in mụi'sischedyes jac, mọ' p̂eijjas q̂uin'. 6Sánacdye' yi' muntyi' qui ca ra' yụ'tac in, yi' sánacdye': “¿Jedyedyetydyem' jacchety muntyi' in? ¿Jun' adac dyijtucsi mi Jen'? ¿Jun' adac ĉọjcacsi mi? 7Mi jiquej jäm'te muntyi', tashche' chum uya'ya' bu'yi anjerya', jäqui've qui nam' muju'cha' yụ'tem, so'mete ferdyem' judyeya' tima'cacdye' chime'. 8Mọ'dyes qui yụ'te paj qui räjdyes ayo'bu'yi”, yi' sánacdye'. Ọij p̂eyacdye' yi' jun' chuc mu' Jen' jayu'ti muntyi' paj qui räjdyes ayo'bu'yi. Ọij jorojĉan yi' mijam yiris jedye' mọ'ya' ji'shuque', tasdyes ayo'bu'yi. Jambi' qui nam' cạ̈tsi' sánacdye' mu', jambi' tasdyes ayo'bu'yi. 9Me' tsan' me', Jesús qui nam' dyijtuja tsun, tashche' chum uya'ya' bu'yi anjerya', me' bu'yi yu'ti jiquej mu', jun' qui' chuc ijac räjdyes muntyi' in. Me' mu' Jen' ñịbe'jisin' tsun, mu' Jen' jayu'ti paj qui mu' ijac tsundyes, mọ'dyes qui jäqui've mu' Jen' jayu'ti paj qui fer bu'yi judyeya' tima'cacdye' so'mac chime'. 10Jen' räj jäm'tyety jedye' in judyeya' räjdyes ayo'bu'yity, mu'dye dyijyi paj qui mu' Jesucristo Ji'c̣honacsity muntyi' ñịbedyesya' mu' jị'cätsepte räj Jen'si' dyijyedye' mu'dyes. ̣Q̂uin'dyem' mu' tupuj ji'c̣honacsi mu'in dai'tyi' Jen'tyi' ạva' mu', mu'in qui ra' pen'dyetute mạyedye'che' in. 11Jesús c̣hicon'jeyacsity judyeya' mu'in c̣hicon'tactyi' chime' in yirity mọmo' Jen' mu'in, mọ'dyes mu' Jesús jam jun' tsị́catacsi, jéyacsi mọmo': “Mi'in nash ĉụi'tyi' vojity yụ”, jéyacsi. 12Mọ'dye nash yi' sánacdye': “Yụ ra' jéyacsi vojity yụ jun' chuc mi Jen', judyeya' ra' tima'queye chidyi'ĉanya' vajmu'yadye'ĉan.” 13Chiyi'dye mọ' yocsi' sánacdye': “Yụ ra' ĉúti mu'che' Jen'che'.” Yocsi' chime'dye yi': “Utsdye u yụ, pen'dyetucsi yụ ạva' in so'mintyi' yụ mu' Jen'.” 14Jesha' mu'in ạva' in anic a' me'chui' in, me'dye mu' chime' Jesús yụ'taqui sän'dyedyes ĉụi'si' a' mu' paj qui mọ'ya' sän'dye'ya' mu' ji'peñe' Sọyo', mọ' me'chui'si' sän'dye' jiquej. 15Me' bu'yi mu' ji'c̣honsin' muntyi' tsun paj qui jam quijñeja' sän'dye' tsun, ĉaĉaij na räjĉan noi'yedye'tum dyijtuja' mọ' sän'dye', me' bä'ja' jiquej tsun. 16Mu' atsij jiquej jam nọ́tacseti anjer in, mu' atsij paj qui nọ́tacseti mu'in Abrahamtyi' vóshi' in. 17Mọ'dyes qui mu' yojdyem' úchety vojity u, me' bu'yi yụ'tac, jun' jun' chuc jị'ĉojtyeja' tsun q̂uin', me' me'dye mu' jị'ĉojtye' jiquej, tupuj qui me' mu' ñịbe' ĉúsin' muntyi' tsun. Mu' yejĉoij cudyiti Jen'che' tsundyes, mu' jị'cätse'tyi' p̂eyacdye'. Mu' anic tashchety cudyitity Jen'che' yụ'tac, mu'dye vayacjibusin' juchaj tsun. 18̣Q̂uin' aty tupuj ñútyisin' tsun, jedye' chuc jị'ĉojtacdye' jụijya' tsun, ĉaĉaij na me'dye mu' chime' jiquej jị'ĉojtye' tsan' mọ' ji'penacdye' jiquej, anic ñịbe' cạve' mu' chime'.

will be added

X\