Hebrews 12

1Mọ'dyes q̂uin', dai' mu'ya' jiquej in jị'cavaquity anicyedye' in, mu'in ferdye'tum cäc̣hä'chutety Jen' jiquej in. Mu'in jemoñe' cäc̣hä'chucseja' in, jemoñe' chime' yacchuja' räj jedye' chuc ñutschusin'si' tsun, judyeya' mọ' juchaj tapchusin'si' tsun, jemoñe' mọ' räj farajjeja', paj qui dyichyedye'tum ji'fercatiĉa' carijtacdye'ya' tsun mọ' so'misin'si' Jen'. 2Dyijtuja mu' Jesús, mu' tashche' jiquej so'misin' anicyedye', judyeya' mu' ñútyisin' paj qui yejĉoja' anicyeja' jun' qui' chuc jadyic. Jesús anic dyichchuti ijac croshche', me' tsan' därsi' tsị́cadyem' shupquim' ijac croshche', jam mọ' dyijtui', mu' dyijtui' jun' chuc ra' därsi' ma'jodye' shupquim'. Anicdye me' q̂uin', tacve bu'ban Jen'ya'. 3Dyijtubimac jun' chuc mu' dyichyaque, dyichjeyacsebi a'c̣his dyijyedye' mu'in juchajtumtyis muntyis in, mu'in fạ́quetety jiquej in. Me'dye ra' mi'in chime', paj qui jam yocve dyijyi ĉojtyi'ĉan mi'in, paj qui jam peñi mi'in. 4Jesha' mi'in, me' tsan' mi'in yejĉoij chuti paj qui juchaj jam ji'pennac, jambi' qui nam' ijanac in, yódyem' mu' jiquej u. 5¿Mi'in aty yaquintuptinte ọij p̂eyacdye' Jen'si' mu', mọ' so'minacsi' mi'in ạva' mu'? Yi' sánacdye': Ạva' yụ, jam ra' ĉụi'tuptem fạra'yedyem' Ayos mu', mijam ra' yoqui mi ji'chäyinya' va'tacdye'ya', 6ĉaĉaij na mu' Ayo' tsun fạra'jeĉúnacsi mạ'jeyactyi' mu' judyeya' jị'chiyacsi va'tacdye'ya' mu' yojyojdyem' ạva' um', yi' sánacdye'. 7Mu' Jen' va'tacdye'ya' ji'chäyinac mi'in, dyichchubitinte ra' mọmo', mọ'ya' ra' tupuj chịj mi'in aty ạvatunac mi'in. Jesha' úchety muntyity jen' mu'in räj va'tacdye'ya' jị'chiyaqui ạva' mu'in paj qui jäm' bä'yi in. 8Me'dye mu' chime' Jen', räj dam'jiyisin' va'tacdye' mu', jam me' va'tacdye' so'minac jụijya' mi'in, mọ'ya' chịj mi'in jam anictyity ạva' mu', jeñej bu'yi muñejĉantyi' ạva' mi'in, me' bu'yi shupqui mi'in. 9Miqui'-dyem' jiquej tsun, ĉụi'tyi' jen' tsun so'misin' va'tacdye'. Me' tsan' me'jisin', ạ̈räjjeyaĉa' qui nam' jen' tsun. Dadam' mu' mạyedye'-chety muju'cha' ra' irijjeja, mu' ra' tsạ'chusin' tsun, yóche'dyem' ra' bä'ja' u. 10Miqui'dyem' jiquej tsun, me' tsan' jam men mu'tum tsun, ĉụi'tyi' jen' tsun so'misin' va'tacdye', ĉụi'si'ya' dyijyedye' mu' dam'jiyisin' jun' chuc jäm' mu' ĉọi'. Mu' na Jen' dadam' mus mọjo'cha' dyijyedye', mu' so'misin'ya' va'tacdye' paj qui jäm'joja've tsun. Mu' mạ'je' paj qui jam jụ'ñija' shupqueja' yojdyem' mu' u. 11Anicdye me' yiris va'tacdye' jam jäm' ĉọ́ja' tsun, are'yi' tsundyes. Me' tsan' me' chiqueja' tsun, dyijtuja' qui nam' jụijya' tsun jun' buty me' so'mac va'tacdye' tsun, mọ'ya' dạcja' rụijsis dyijyedye' jụijya' tsun, jäqui've qui ra' rụij bä'bajsha' tsun, ma'jodye'tum bä'bajsha' tsun. 12Jiĉudac Jen'dyes, itŝity ferdye' mi'in. Atyu' ra' peñi' un mi'in judyeya' cas mi'in, atyu' me' bu'yi mi'in. Jiĉujsham' quivij Jen'dyes mi'in, 13rụijsis majmi cäc̣hä'chubadac. Me' jụijya' bä'ban mi'in, mu'in itŝity ferdye' in cäc̣hä'chunactyi' jụijya' in jam ra' penjan in, jiĉun ra' mọmo' Jen'dyes in. 14Yụ'tacac ferdye' mi'in paj qui jäm'jiti bä'yi mi'in räjtum muntyi' mi'in, yụ'tyevac chime' ferdye' mi'in paj qui jam jụ'ñiij Jen'si'ya' vej mi'in. Tyi chuc jam me' jụijya' in, mu'in ra' jam jun' cạvete Ayo' in. 15Are'ĉa va'quecbitinte Jen'si' ñịbe'jitidyes mu', mọ' mạ'je' so'misin'si', mijam ra' me'chutiñe' a'c̣his dyijyedye', mọ' jeñej bu'yi' a'c̣his därä' chịbi'si' venenotumsi', me' bu'yi'dye mọmo' chime' a'c̣his dyijyedye' mi'in, mọ' ac̣hi'tacsi' dai' muntyi' in. 16Mijam ra' vo'voij mi'in, mijam ra' äcäijjeptinte Jen'si' dyijyedye' mu', jam ra' jeñej Esaú mi'in, yojdyem' mu' u äcäijjeyaqui ĉụi'si' na'edyedyes mu' tashchetydyety ạva' mu', jam otejjeyaqui, ji'mincai' mọmo' yiris piji' säcsedye'. 17Chịj mi'in aty cọdaquiya' ĉụi'tyi'che' jen' mu', aty mạ'je' qui tsan' paj qui so'mac mu' ñịbe'jitidyes p̂eyacdye', aty qui jam jun' tupuj so'mac. Me' qui tsan' mu' fer tári otejjeyaqui, aty qui nam' jam jun' jụjjepte cọdacdye' mu'. 18Jesha' mi'in q̂uin' dyijtutiñes q̂uin' mi'in jam ọ́ches jacches mọ', mijam jorojĉansi', jam jeñej Israeltyi' vóshi' jiquej in. Mu'in c̣hẹi'ya'jise jiquej in mu' mụcu' Sinaí, yoqui'dyem' so'macya' yụ'tacdye' u in. Cạve' in mọ'che' mụcu'che' tŝij, tomaj tŝọi' jị'sam' judyeya' cächyi tyi'mu tsäqui'tyity. 19Chime'dye tujyedye' därsi' se've' in, chime'dye se'vete Jen' in p̂eyaqui, anic där tsäqui' mọ' cạve' in. Aty se'vepteya' p̂eyacdye' in anic itŝijyacñi noi'yi in, cavin cọdaqui in paj qui jam me' yejĉoij p̂eyaqui mu' Jen' mu'intum in.216 20Anic där tsäqui'yis ĉọpte in p̂eyacdye' mu', yi mu': “Jam ra' täjtinte mu' mụcu', tyi chuc täjtety jụijya', paj tsan' cu'dye' jụijya', jemoñe' yiristum ijac ijmeya', jam jụijya' farajnac mijya'”, yi mu' Jen' yụ'tye' p̂eyacdye'. 21Anic där mọ' tsäqui' cạves in. Mu'dye Moisés yi: “Där noi'yi yụ, noc̣ho'c̣hoij yụ”, yi mu'. 22Mi'in na q̂uin' jam me' mi'in, mi'in jeñej bu'yi yoctyi' c̣hẹi'ya'jetinte mụcu' mu' Sión, mọ' mạyedye'ches bä'yedye' Jerusalén yóche'dyem' bä'yi tsạ'tyi' Jen' u, mọ' c̣hẹi'ya'jetiñe' mi'in. Mu'che' vajmu'yaij in mu'in shachtyity anjer in, mu'in tima'quetety Jen' in. 23Chime'dye mi'in aty c̣hẹi'ya'jeyacsi mu'in anicjetety Jen' in, mu'in jeñej bu'yity tashchety Jen'tyi' ạva' mu', mu'in sánactyi' tịj in mạyedye'che'. Mu'dye Jen' c̣hẹi'ya'jetinte mi'in, mu' Jị'cäts yụ'tacsity juchadye'ya' muntyi' in, judyeya' chime' c̣hẹi'ya'jeyacsebi säñitysi' ạ'edye' in, mu'in rụijtyitysi' in, q̂uin' aty ji'c̣honac in. 24Mu'dye Jesús c̣hẹi'ya'jetinte mi'in, mu' yu'tyiyisin'tyi' mụi'sis p̂eyacdye' Jen'si' mu', judyeya' chäsh mu', mọ' c̣hicon'jisin'si' tsun. Mọ' chäsh mu' Jesucristos anic mọjo'chas jäm'si' p̂eyacdye' so'misin' tsun, jam jeñej Abelsi' chäsh mu' jiquej, ọya'ya' mu', mọ' cọdaqui' va'tacdye' ijatidyes. 25Are'ĉa jam ĉa va'quecbitinte p̂eyacdye' mu' p̂eyaquitysi' q̂uin'. Jesha' mu'in va'quecbitety Jen'si' p̂eyacdye' jiquej in, mọ' jéyacsi jiquej úche' jacche', mu'in jam jun' c̣honchuc jiquej in. Dadam' q̂uin' tsun mijam ra' méqui' c̣honchuc tsun ĉụi' va'quec-bijaya' p̂eyacdye' mu'si' mạyedye'chety p̂eyaquitysi' q̂uin'. 26Tashche' jiquej p̂eyaquiya' mu' Jen', aty so'macsiya' yụ'tacdye' mu', p̂eyacdye'ya' mu' ji'bubaque' ọij jac. ̣Q̂uin' aty yocsi' p̂eyacdye' ji'shupque' yi': “Yiri'dyety ra' yụ ji'bubaque' ọij jac, jam ra' jac mọmo', mạyedye'mun ra' chime'.” 27Yi mu' “yiri'dyety ra'”, yi, mọ' ji'chäquiyisin' räj ra' jị'motse' mọ' jorojĉansi' jäm'tacdye' mu', mọ'indyety ra' jam mọtsis in, mọ'in räjĉan bu'yis in, mọ'indyety ra' tacya' in. 28Mọ' ayo'bu'yedye' Jen'si' mu', mu'ĉan ra' yu'sin', mijam ra' p̂ucush mọ' mọtsi'. Mọ'dyes q̂uin' jemoñe' yoshoropaij jéja Jen', judyeya' tima'queja mu', mọ' mu' ma'jotye'. Irijyedye'tum ạ̈räjjeja mu' Jen', 29ĉaĉaij na tsuntyi' Jen' anic där tsäqui' bu'yi, jeñej yiris tŝij furque-va'joi'si', me' bu'yi mu'.

will be added

X\