Hebrews 11

1Me' shupqui' mọ' anicyedye' tsun. Anicyeja'ya' Jen'che' tsun aty chị́ja' anic ra' so'mac tsun mọ' bisja'si' tsun, chime'dye anicye-dye' ji'chäquiyisin' me' tsan' jam cạvepja Jen'si' jedye' mu', mọ'ya' qui nam' mu'. 2Chime'dye mu'in urucya'muntyi' jiquej in ma'jotac Jen'ya' in anicyedye'ya' mu'in. 3Anicyedye'ya' tsun chị́ja' jun' buty mu' Jen' p̂eyacdye'ya' mu' jäm'tye' ọij jac judyeya' mạyedye' jiquej. Räj jäm'tacdye' mu' cạvejas q̂uin', jam jorojĉansi' jedye' jäm'tacsaque jiquej mu'. 4Anicyedye'ya' mu' Abelsi', mọjo'chas mus jäm'si' tucdye' mu' so'mete Jen', jam jeñej Caínsi' tucdye' mu', ọya'ya'. Anicyedye'ya' mu' Abel, Jen' rụij jayu'ti judyeya' jama'jotyibuti tucdye' mu'. Me' tsan' itŝij q̂uin' mu' Abel, p̂eyacdye'dyety mọ'yam', mọ' tucdye' mu' mọ' jorojĉanjisin' anicjete Jen' mu'. 5Me'dye mu' chime' Enoc anicyedye'ya' mu' rụi'cu' cạc mạyedye'che', jácabun Jen'. Mijam mu' säñi mijam tyi dạĉajte úche' jacche' in, ĉaĉaij na mem' rụi'quen' moñi, Jen' jácabun. Yi' sánacdye' jambi'dyem' jácabunya' mu', tashche' jama'jotyiti Jen'. 6Jam anicyeja' Jen'che' jụijya' tsun, jam ra' jun' ma'jotac Jen'ya' tsun. Mạ'je' c̣hẹi'ya'jeja Jen' jụijya', jemoñe' tashche' chum anicjeja jun' chuc mu' mu'ya', jun' chuc so'macsi bijodye' mu'in fer dyijtutety in. 7Me'dye mu' Noé chime' anicyedye'yam' chiquepte Jen'si' p̂eyacdye' mu', mọ' jaso'mitis jiquej, yi' jun' chuc ra' ayij mọ' bänedye'. Me' tsan' jambi' mọ' jorojĉan cạve' jiquej, jä'miij mu' tashche' jäm'te covamba, mu'che' c̣hoñi mu' räjtumdye chätidye' mu'. Anicyedye'ya' mu' Noés, Jen' rụij jayu'ti judyeya' chime' so'macsi va'tacdye' jacchety muntyi' in, räj p̂uti in ojñi'ĉan in. 8Chime'dye mu' Abraham anicyedye'ya' mu' chiquete Jen', yoqui'dyem' jafaijtiya' jiquej u, yocsi've qui jac jịjcaij, mọ' jaso'mitis ra' Jen'. Anicjete mu', farajjeyactaqui ĉụi'si' jac mu', sacje' mu', mijam chịj jun've chuc ra' jịjcaij mu'. 9Anicye-dye'ya' mu', bä'yi yoctyisĉan jac in, jam ĉụi'sim', mọ' Jen' jaso'mitis yódyes jajitidyem' tashche' jiquej u, yi: “Yụ ra' so'meye.” Yóĉandyem' bä'yi u quị'si' aca' mu', mọ' tinates mu'in, vaj me'dye jeñej mu' Isaac judyeya' mu' Jacob, mu' Jen' so'macsi p̂eyacdye' mu'. Me' tsan' jambi' cạ̈tsi' Jen'si' p̂eyacdye', mijambi' so'mac jac in, yejĉoij qui nam' anicyi in. 10Me' tsan' mu'ĉan bä'yi in, mu' qui nam' Abraham dyijtui' bise' mọ' anicsis bä'yedye', mọ' dyijtui'si' Jen' judyeya' jäm'tyes chime', mọ' jam p̂ucushyi'si' mijam ra' mọtsis chime'. 11Abraham chime', me' tsan' särä' bu'yis p̂en mu' Sara, me' tsan' mu' isho', anicyedye'ya' qui nam' mu' so'mac a'si' ferdye' mu' paj qui ạva'yi, ĉaĉaij na mu' chị́yete Jen' anic jị'cätse' p̂eyacdye' jaso'mitis jiquej. 12Me' tsan' aty jiijtaquity tupudye' ạva'yedyes mu', ạva'yi qui nam' judyeya' dayetaqui vóshim', jeñejti ọ́rota' in mạyedye'chety judyeya' jeñejti jáman in marvety, me'ti in, mijam tupuj tsic vóshi' mu'. 13Räj mu'in p̂eyactyi' q̂uin' yụ in, yejĉoij anicjete Jen' in me'dye säñi in. Me' tsan' jambi' so'mac in yoj jeyacsidyem' Jen' jiquej u, yejĉoij qui nam' anicjete Jen' in, jeñej aty taquem cạvepte in mọ' so'macsis ra' Jen', aty so'mac ĉúti in, me' bu'yi' mọ'. Yi dyijyi in: “Jam nash úchedyety tsun, yocche-dyety tsun”, yi in. 14Tyi chuc me' yity in jorojĉan mu'in queve' in ĉụi'sidyes bä'yedye' mu'in paj qui mu'ĉan bä'yi in. 15Yejĉoij dyijtuĉan jụijya' in ĉụi'si' jac mu'in, a vuty tupuj ca'ñibun u in. 16Jam qui nam' me' mu'in in, jäm'sim' bä'yedye' dyijtui' in, mạyedye'ches. Mọ'dyes mu' Jen' ma'jotacsi jam jun' tsị́catacsi yi mu': “Yụ nash Jen' mu'intyi' in”, yi ĉaĉaij na mu'dye jäm'tyeyeyacsi bä'yedyedyes mu'in. 17- 18Abraham anicyedye'ya' mu' ĉụi'tyi' ạva' mu' Isaac so'mete Jen', jaji'ĉujtiya' mu' Jen' jiquej. Tashche' jiquej jaso'miti p̂eyacdye' Abraham jun' chuc ra' dayi vóshi' mu'. Mu' yi: “Isaacya' ra' cạ̈tsi' mọ' p̂eyacdye' yụ'tyes yụ jiquej, mu'tyi'ĉan ra' vóshi' mu', yụ ra' jị'cätse' mọ' p̂eyacdye' so'meyes yụ”, yi. Me' tsan' me', Abraham qui nam' jam quijatutyete ạva' mu' Isaac, ĉaĉaij na mu' 19chị́yete Jen' jam jayej ferdye' mu', tupuj vañin-jeyacseban säñity in. Anicdye me', mu' Abraham dyijyi tsan' ujate ra' mu' Isaac, jeñej bu'yi' ujactyi' tsan' atsvun, sacyeban qui nam', me' bu'yi' mọ' shupqui'. 20Isaac jiquej jä'miij p̂eye' jun' chuc ra' mu' Jen' so'macsi ñịbe'jitidyes mu'in Jacob judyeya' mu' Esaú, ĉaĉaij na mu' anicjete Jen' jun' chuc ra' mu'. 21Aty säñiya' ra' mu' Jacob jiquej, anicyedye'ya' mu' cọdyete Jen' mu'indyes in Josétyidyes ạva' mu', pären'dyes cọdaqui mu' paj qui mu' ñịbe'jitidyesya' nọ́tacsi mu' Jen'. Mutyudye'dyety jañutyiti, uts na tima'quete Jen'. 22Aty säñiya' ra' mu' José jiquej, anicyedye'ya' mu' yi p̂eyaqui jéyaqui chätidye' mu' jun' chuc ra' jábiya' in mu'in Israeltyi' vóshi' in yacchui' ra' in Egipto. Jä'miij mu' jéyacsetaqui me' ca ra' tsan' jindyety mu', cạc ca ra' mọmom'. 23Chime'dye jiquej Moiséstyi' jen' mu' judyeya' tse' mu', anicyedye'ya' mu'in mijam quijñete Egiptoĉantyi' ayo' in, mijam chiquepte p̂eyacdye' chime' in. Na'iya' Moisés jijmu'sete in, chibin ịvaj jumjete in, ĉaĉaij na jäm'tyi' ĉọ́te cạvete in. 24Aty rijtiya' mu' Moisés, tupuj tsan' ayo'tyi' vịya' mu' yụ'tac, tupuj tsan' ayo'bu'yi mu'. Anicyedye'ya' qui na mu' jam jụjyi. 25Dadam' dyijtui' mu' paj qui mu'mun jị'ñibe'cac chime' Jen'tyi'tum muntyi' mu'. Mijam mọ' dyijtui' ma'jotye' juchaj ĉaĉaij na chịj mu', mọ'si' ma'jodye' mijam ra' yejĉoi' mọ', cavin ra' jiyim'. 26Mu' jụjyi paj qui Jen'dyes bä'yi, me' ra' tsan' Cristodyes ñiñete in, ọya'ya' dyijtui' jacches jedye' Egiptoĉansi', ya'i'si', mọ' mọmo' dyijtui' bijodye' jaso'mitis ra' Jen'. 27Moisés anicyedye'ya' mu' yacchui' jiquej Egipto, me' tsan' ayo' jafaquiti, mu' qui nam' jam quijñete. Moisés dyichyedye'tum dyich bu'yi, jeñej bu'yi cạvete Jen', mu' jam jorojĉantyi'. 28Chime'dye anicyedye'ya' mu' Moisés räj chiquepte Jen'si' p̂eyacdye' mu' cäc̣hä'chui' mọ' Ji'c̣honacdyedyes feshta, judyeya' jutacsi paj qui räj tai'tye' chäsh chụi'dye'ya' mu'in, paj qui mu' ijacsity anjer jam qui jun'tacsebi tashchety ạva' mu'in. 29Anicyedye'ya' mu'in sapa'je' in mọ' jäijnäs tsique', chañejche' tyeij mi'i in. Jäqui've mu'in Egiptoĉantyi' in cäc̣hen' tsan' mu'ĉan tyeij in, tas qui nam' p̂uti mu'in in, judye'dye cha'shacsi in. 30Anicyedye'ya' mu'in Israeltyi' vóshi' in, mu' Jen' jiva'chabi' räj Jericós na'rum', aty yävätidye' mạyedye' cọijtiya' in mọ' bä'yedye' jiquej. 31Mọ' Rahab, me'taquis p̂en, anicye-dye'ya' mọ' c̣hoñi'. Jam mọ'mun säñi' jam jeñej mu'ĉantyi' in, mu'in jam chiquetety Jen' in, ĉaĉaij na mọ' tiĉunacsi' cạvequety jac jiquej in. 32¿Jedye' bu ra' dam'dye jéyac? Aty jam tupuj jéyac mi'in jun' chuc mu' anicyi Gedeón jiquej, judyeya' mu' Barac, judyeya' mu' Sansón, judyeya' mu' Jefte, judyeya' mu' David, judyeya' mu' Samuel judyeya' mu'in jaso'mitity p̂eyacdye' Jen' chime' in. 33Räj uts in anicyedye'ya' mu'in pạrej mu'ya' ji'penacsi bä'yedye' mọjo'chas yocves in, judyeya' pạrej mu'ya' rụij ayo'bu'yi chime' in. Anicyedye'ya' mu'in pạrej mu'ya' so'mac Jen'ya' in yoj yi'dyem' p̂eyacdye' o. Anicyedye'ya' mu'in pạrej ñutsjeyacsi in vajedyedye'ya', 34judyeya' pạrej yenamqueva'joi'si'ya' tŝij chime'. Pạrej mu'ya' in ñutsjetyetac Jen'ya' in paj qui jam dam'je' coc̣hino in. Pạrej mu'ya' itŝi' ferdye' mu'in, mu'in so'mactyi' ferdye' Jen'ya' in, paj qui ferdye'tum chuti in, ji'penacsi yocvety väc̣hä'tyity dai'tyi' in. 35Chime'dye mọ'ya' pạrej p̂en in anicyedye'ya' mọ'in, mu' Jen' vañinjeyacsebiban chätidye' mọ'in. Yoctyi' qui nam' jam me' in, pạrej ji'säsdyi in paj qui jị'ñibe'cac in judyeya' ijac in. Mu'in jam jụjyi in paj qui ji'c̣honacsi in mu'inya' ijacsityya' in, mọ' dyijtui' in mọ' dadam' mọjo'chas jäm'si' bä'yedye', mọ' ra' cạves in vañinyeban jụijya' in. 36Chime'dye pạrej mu'ya' fer ñinac in judyeya' si'bac in, pạrej saptac cadenaya' in judyeya' ĉär'tac in. 37Chime'dye pạrej farajnacsi mijya' in ji'sänacsi in, judyeya' pạrej mu'ya' chocjeyac seruchoya' in, pạrej coc̣hino damje' in. Pạrej juna' ĉụi' va'cac in, ñịbe' cạve' in, cu'dyes sho'pa' quị'situbi' in, me' mu'in in, jo'mes jayejjoi' mu'in. 38Cäjyasĉan jac va'cac in judyeya' mụcu'ya' chime' in, jojdojdosĉan to' bä'yi in. Me' tsan' me' va'cacsequi muntyi' in, mu'in qui nam' muju'cha' ya'ij in Jen'si'ya' vej mu', uya'ya' mu'in me'taquity in. 39Räj uts in p̂eyactyi' q̂uin' yụ, räj mu'in ma'jotac Jen'ya' in anicyedye'ya' mu'in, me' tsan' me', jambi' qui nam' mu' Jen' jị'cätseyacsi p̂eyacdye' mu' so'macsis jiquej mu'. 40Ĉaĉaij na mu' Jen' mọjo'cha' jäm'si' me'chui' dyijyedye' mu', mọ' mu' mạ'je' paj qui tsunmun q̂uin' mu'intum c̣honja' tsun chime', chat q̂uin'dyem' ra' jị'cätse' c̣hon'dyedyes p̂eyacdye' mu'.

will be added

X\