Hebrews 1

1Urucya' jiquej dai' qui' mu' Jen' yụ'tyeyeyacsi p̂eyacdye' mu' vóshi'vun tsun jiquej in, yịjyi p̂eyacdye' so'macsi jiquej mu'in jaso'mitity p̂eyacdye' mu', chat mu'in qui ji'jiyeyacsi muntyi' in. 2̣Q̂uin' chat ọij jadyiquis tupudye' mu' Jen' ĉụi'tyi'ya' Ạva' mu' yu'tyiyisin' p̂eyacdye' mu'. Ạva'tum mu', mu' Jen' räj ọij jäm'tye' jac judyeya' mạyedye', judyeya' yụ'taqui Ạva' mu', mu' qui räj me'chui' jedye'. 3Jen'tyi' Ạva' mu' jeñej bu'yi Jen'si' queptacdye' mu', mu' me'chuptety därsi' ferdye' mu' judyeya' mạijquedye' mu'. Chime'dye mu' Ạva' mu' fersi'ya' p̂eyacdye' mu' räj bächäcsi jac judyeya' mạyedye'. Mu' c̣hicon'jityitacsin' juchaj tsun, chat qui mạyedye'che' jịjcaban, mu'che' bä'ban tacve bu'yi muju'chatyya' Jen'. 4Jen'tyi' Ạva' mu' muju'cha' shupqui, uya'ya' qui mu'in anjer in. Anic mọjo'chas tịj jayu'tyiyiti Jen', Ạva', jéyaqui, mu'insi' na tịj anjersi' in ọya'ya' mu'in. 5Mu' Jen' mijam yirity anjer jéte: “Mi nash Ạva' yụ, q̂uin' aty ạvatuye”,200 jam jéyacsi anjer in. Yocsi' sánacdye' yi': “Yụ ra' Jen' mu', judyeya' mu' ra' Ạva' yụ”, yi' sánacdye'. 6Yocsi' sánacdye' chimu'dye p̂eijbite Ạva' mu'. Mu' Jen' aty ra' jutaquiya' mu' tạ'caty Ạva' mu' paj qui úche' jacche' jijtuij, yi mu': “Paj tima'quete in räj mu'in Jen'tyi' anjer mu'”, yi' sánacdye'. 7Chime'dye mu' Jen' ji'jäcacsi anjer in yi mu': “Jen' yụ'tacsi anjer in úñity bu'yi mọmo' in, jeñej bu'yi qui nam' tyi'mu in, judyeya' tŝij bu'yi in, me' bu'yi yụ'tacsi.” 8Mu' na Ạva' mu' yocvedye p̂eijte jéyaqui: “Jam ra' jụ'ñisĉan mạyedye' mọtsi' ayo'bu'yedye' mi, mi nash anictyity Jen' anic rụij ayo'bu'yi mi, mijam méqui' cäjsis dyijyedye' me'chui' mi,” jéyaqui Ạva' mu'. 9“Mi anic fer ma'jotye' mọ' rụijsis dyijyedye', mọ' na a'c̣his dyijyedye' in fạ́cacsim, jam mọ' ma'jotye' mi, mọ'dyes mu' Jen' Ayo' mítyi' mu' tsim'tyin mi judyeya' ma'jodye' so'min, muju'cha' mu' yu'tyin, pen'dye' na mi, uya'ya' mu'in in.” 10Chime'dye mu' Jen' yi jéyaqui Ạva' mu': “Mi Ayo', tashche' jiquej jäm'tye' mi ọij jac jiquej, chime'dye mạyedye' jäm'tye' mi. 11Mọ' ra' räj mọtsi', mi na ra' jam jụ'ñisĉan mạyedye' mọtsi. Jac judyeya' mạyedye' mọ'in ram' ishoi' in, yojdyem' quị'si' tạbaijtyi' u, me'joi' ra' mọ'in ac̣hi'joi' in. 12Yojdyem' yirity muntyi' va'cajquiqui tạbaty quị'si' u, mụi'tyityĉan qui q̂uị'si' cäbun, me'dye ra' chime' ọij jac judyeya' mạyedye'. Mi na ra' jam jụ'ñisĉan mạyedye' mọtsi, mi ra' yejĉoij, mijam ra' jun' yocve shupqui mi”, yi' sánacdye'. 13Jen' jam yirity anjer jéte me'dye Ạvam' jéyaqui: “Tacve bu'yi ra' bä'yi yụ́yam, jun' qui' chuc yụ ji'penbiye mu'in fáquintyi' in”, jéyaqui Ạva' mu'. 14Jam me' jéyacsi mu'in anjer in ĉaĉaij na mu'in úñity Jen'tyi' in. Jen' jäm'tacsi anjer in ạ'edye' bu'yi in, paj qui mu'in nọ́tacsi muntyi' in, mu'in c̣hon'dyedyety ra' in.

will be added

X\