Galatians 6

1Vojity, yirity mu'ya' jụijya' peñi juchajĉan, mi'in Jen'si'-tumtyi' Ạ'edye' bä'yity mi'in, jemoñe' rụijsistum p̂eyacdye' ji'ca'ñebajtinte quivij, jäm'ye-dye'tum qui na ram' jébajtinte mi'in paj qui quivij ca'ñibun, jam jụijya' me' mi'in are'ĉa mi'inmun peñi chime'dye. 2Jemoñe' vaj meij ra' ñútyitidyeij mi'in, jedye' chuc carijsis jụijya' mi'in. Me' jụijya' bä'yi mi'in chat qui ra' jị'cätsebitinte Cristos p̂eyacdye' mu'. 3Jam ra' va'bunyi mi'in. Tyi chuc ĉụi' yi: “Yụ nash muju'cha'”, mu' me' yity, ĉụi' mọmo' väñätuti, ĉaĉaij na mu' uya'ya' Jen'si'ya' vej shupqui. 4Jemoñe' ĉụi' dyijtuĉa' jun' chuc bä'ja' tsun. Rụij bä'ja' jụijya' tsun, tupuj ĉụi'si'ya' dyijyedye' ma'jotaĉa' tsun, aty ra' jam yoctyis dyijtucsebija' tsun. 5Jemoñe' vaj cäts ĉụi' ĉujcatiĉa' jun' chuc bä'ja' tsun. 6Se'vaquity Jen'si' p̂eyacdye' in jemoñe' me' me' ĉụi'si' jedye' jäm'si' mu'in so'mete in mu'in jị'chiyacsity in. 7Jam ra' ĉụi' väñätuti mi'in, Jen' jam jun' tupuj majmatuc mijam väñätuc, mu' räj chäyisin'. Jesha' yiris vej jụ'ñis chuc quịc jụijya', mọ'dye mọmo' intsii' judyeya' qui vädac, me'dye chime' tsun, jun' chuc bä'ja' jụijya' tsun, are' jäm' are' jam, me' bu'ja' ra' so'mac tsun. 8Tyi chuc dyijtui' in a'c̣his a'si' mu'in, mu'in ra' cại' sän'dye' in, mọ' ra' jeñej bu'yi' vädacdye' mu'in. Mu'in na chiqueptety Jen'si' Ạ'edye' in, mu'in ra' Jen'ya' bä'yi in, mọ' ra' jeñej bu'yi' mu'insi' vädacdye' mu'in. 9Mọ'dyes jam ra' shọijtyeja' carijtacdye' Jen'dyes, jäm' ra' yejĉoja' bä'ja' tsun, yirisĉan ra' mạyedye' mọ' ayij jäm'si' vädacdye', mọ' ra' chucdye' tsun, jam farajjeja'tyi' jụijya' tsun. 10Mọ'dyes jun'si' jụijya' ĉụi' tupuj tsun, jemoñe' räj nọ́tyetacseja' muntyi' in, dadam' mu'in anicjetety Jen' in jemoñe' nọ́tyetacseja' in. 11Cavibutiĉam' ọij q̂uin' därmunsi' sánacdye' yụ, sáñe'si' yụ ĉụi'si'ya' un yụ. 12Quivij ra' jéyac yụ, mu'in cäjsis ji'chäyitidye' tui'tyi' in mu'in mạ'je' se' ja'yinac in paj qui sei'tac a' mi'in, jo'mes mọ' dyijyedye' mu'in ĉaĉaij na mu'in mạ'je' in paj qui ma'jotac judíoya' in, mu'in ĉútity sei'tacdye'che' in, paj qui jo'mety judío in jam jị'ñibe'cacsi in, ĉaĉaij na mu'in pạrej judío in fạ́quete Cristo in, mu' ijactyi' croshche' jiquej. 13Jesha' mu'in, sei'tactyi' a' in, mu'in taca' jam chique' yụ'tacdye' in. Mu'in mạ'je' ji'sei'tyinac in mạ'je' va'bunyi mi'inche' in jun' chuc mu'in se' ja'yinac in. 14Yụ na jam jedye'ya' va'bunyi yụ, me'dye yirity mọmo' dyijtute yụ, mu' Jesucristo Ayo' tsun, mu' ijactyi' croshche' jiquej, mum' yirity tima'quete yụ. Yụ́mun säñi croshche', jadyic dyijtui' yụ jacches dyijyedye', jeñej bu'yi säñity shupqui yụ jacchesche' jedye' in. 15Me' tsan' sei'tactyi' a' jụijya' tsun, me' tsan' jam, jam mọ' jedye' yi', me'dye yiris mọmo' jemoñe' jedye' dyijtuc, paj qui mu' Jen' mụi'sis dyijyedye' so'misin' tsun. 16Yụ cọdyete Jen' paj qui mu' ñịbe' ĉọcsi judyeya' so'macsi ma'jodye' ĉojtyi'ĉandyes mu'in, räj mu'in chiqueptety in ọij p̂eyacdye' jéyacsi' yụ mi'in q̂uin'. Ọij cọdacdye' yụ q̂uin' chime' räjtumdyes Jen'tyidyes muntyi' in. 17Ọij ra' jadyiquis p̂eyacdye' jéyac: Paj jadyic me'tyin yụ in Jen'dyes. A'che' yụ jorojĉan pai' aty tätsacdye' yụ cäc̣hä'chuc-dye'ya' Jesús yụ, mọ' jị'ĉocdye' yụ anictyity úñity mu'. 18Vojity, yụ cọdyete mu' Jesucristo Ayo' tsun paj qui mi'in räj so'minac ñịbe'jitidyes mu' ĉojtyi'ĉandyes mi'in. Paj me'.

will be added

X\