Galatians 4

1Yụ ra' jéyac ọij jị'ĉocdyes p̂eyacdye'. Jesha' mu' jedye'tumtyity ạva' mu', me' ra' tsan' räj mu'dyes jen'si' jedye' mu', miqui'dyem' qui nam' taca' jụijya' mu', jeñej úñity mọmo' bä'yi, 2ĉaĉaij na miqui'dyem' taca', mu'ya' qui nam' mu'in ĉọjcatety in, mu'in bächäpte jedye' in, jun' qui' chuc ayijya' tupudye' jayu'tyiyitis jen' mu', chat q̂uin'dyem' so'maqui ạva' mu' paj qui bächäqui ĉụi' jedye' mu' yụ'tyeyetes jen' mu' jiquej. 3Me'dye tsun chime' jiquej ọ́ches jacches dyijyedye' me'sin' tsun jiquej mọ' bächäsin'. 4A qui nam' ayijya' mọ' tupudye' yụ'tyes Jen', mu' jutaqui Ạva' mu', yiris munsi' mu'ĉan na'i mu', judyeya' yụ'tacdye'tum bä'yi ĉaĉaij na judío na'i mu'. 5Ayidye' mu' paj qui ji'c̣honsin' tsun paj qui jam bächäsin' mọ' yụ'tacdye' judyeya' paj qui Jen' ạvatusin' tsun. 6Aty Jen'tyi' ạva' mi'in, mọ'dyes mu' Jen' so'minac ĉojtyi'ĉan mi'in mọ' Ạva'si' Ạ'edye' mu'. Ạ'edye' mu' yi' paj qui tsun jéja Jen': “Yụ́tyi' Jen', yụ́tyi' Jen'”, jéja tsun. 7Mọ'dyes aty jam úñedye'ĉan mi'in, q̂uin' aty Jen'tyi' ạva' mi'in, mu'dye qui ra' räj ñịbe'jinac mi'in, mọ' p̂eyes p̂eyacdye' mu', ĉaĉaij na aty mu'tyi' ạva' mi'in. 8Me'dyem' bä'yi jiquej mi'in jambi'dyem' chị́yetinte Jen' mi'in, yejĉoij cäc̣hä'chucsi mi'in jäm'tacdye' jacches jiquej in, mọ'in jam Jen' bu'yis in, mọ' mọmo' bächänac jiquej in. 9̣Q̂uin' aty chị́yetinte Jen' mi'in, dadam' jäm' yi yụ: mu' Jen' aty chäyinac mi'in. ¿Jun' me' q̂uin' u mi'in caman' dyijyeban chimu've mi'in cäc̣hä'chubajtiñe' mọ' ọ́ches fibis jacches dyijyedye' mọ' itŝis ferdye'? ¿Jun' me' bu'ban u mi'in mạ'je' paj qui mọ'dye ayotubajtiñe' mi'in? 10Anic me' mi'in cäj cạtiñe' dyijyedye' mi'in, ĉaĉaij na pạrej ạ̈räjjetiñe' mạyedye' mi'in, pạrej na ạ̈räjjetiñe' ịvas feshta mọ', judyeya' yómodyes feshta chime', räj mọ' ạ̈räjjetiñe' mi'in, jo'meschem' ĉúti mi'in, mọm' mọjo'cha' dyijtutiñe'. 11Anic yụ där táreyac mi'in, jun' ra', vatyquej yocve dyijyeban jụijya' mi'in, are' fibim' jị'chiyeyac Jen'si' p̂eyacdye' mu'. 12Vojity, yụ ra' ferche' jéyac mi'in, yódyem' yụ q̂uin' u aty jam bächän yụ mọ' yụ'tacdye', me' bu'vacdye mi'in chime', ĉaĉaij na aty me' bä'yi yụ jeñej jam judío yụ, yódyem' mi'in u jam judío mi'in. Jesha' mi'in jam dam' me' a'c̣his so'mitiĉa' yụ mi'in. 13Chịj tyu' u mi'in, tashche' jiquej yụ japacjoij yụ mi'inya', me'dyes qui yụ me'ĉandye voro'tyeyac mi'in Jen'si' p̂eyacdye' mu'. 14Me' tsan' a'c̣histum japacjodye' yụ jajbu'yeyac jiquej mi'in, jam qui nam' äcäijjitiĉa' yụ mi'in, mijam méqui' va'quiĉun'dyiĉa' yụ mi'in. Dadam' mọmo' jäm' tiĉun'dyiĉa' yụ mi'in, ạ̈räjjitiĉa' mi'in, jeñej Jen'tyi' anjer, me' bu'yi tiĉun'dyiĉa' yụ mi'in, jeñej Jesucristo, me' tiĉun'dyiĉa' yụ mi'in. 15Anic ma'jotyitiĉa' yụ mi'in jiquej, meij jịjcaij mạ'je' fónaqui vej mi'in paj qui so'mitiĉa' yụ mi'in, tupuj jụijya' mi'in. ̣Q̂uin' na aty jam me' dyijyi mi'in, yocve dyijtutiĉa' yụ mi'in, aty jam jeñej jiquej ma'jotyitiĉa' yụ mi'in. ¿Jun' qui ĉaĉaij me' u q̂uin' mi'in? 16¿Fáquitity buty yụ mi'intum yu'tiĉa' mi'in, jéyacdye'ya' mọ' rụijsis p̂eyacdye', mọ' buty ji'fajquiyitiĉa' yụ mi'in? 17Cäjsis tui'tyi' ji'chäyitidye' in anic fer dyijtunac in, a'c̣hisya' qui nam' dyijyedye' dyijtunac in, mọ'ya' mạ'je' jụj ja'yinac in paj qui mu'in mọmo' dyijtucsi mi'in, paj qui aty jam tsun dyijtutiĉa' u mi'in. 18Jäm' tsan' me' dyijtunac in, jäm'si'ya' dyijyedye' jụijya' mu'in. Jemoñe' qui nam' jäm'si'ya' dyijyedye' dyijtunac in, me' tsan' mu'ya' yụ, me' tsan' itŝij yụ, me' vu' ca' me' bu'yi' yoctyi' dyijtunac in. 19Chätidye', mạ'jeyacdyety ạva' yụ, yụ anic fer táreyac yụ. Cuvij me' bu'yi yụ jeñej yiris jạjtsis p̂en, jị'ĉojtyes are'redye' basdyidyes mọ', me'dye yụ chime' fer dyijtuyac mi'in jun' qui' chuc fer bu'yi Cristoya' mi'in. 20Faraj vu' ca' yụ mi'intum q̂uin', tupuj me' chị́yebiyac dyijyedye' mi'in, are' rụijsis, are' jam, me' jụijya', tupuj chịj yụ jätäjjeyac chuc ra' yụ. ̣Q̂uin' qui nam' yụ jam chị́yebiyac dyijyedye' mi'insi'. 21Pạrej mu'ya' mi'in taca' yụ'tacdye'che' ĉúti mi'in paj qui tsan' ji'c̣honnac ĉúti mi'in. ¿Jam adac chiquetiñe' mi'in jätäjyi' chuc mọ' yụ'tacdye' Jen'si' mu'? 22Sánacdye' yi' mu'ya' jiquej pärä' ạva' mu' Abrahamtyi', mu' tashchety úñisĉantyi' ạva' mu',163 mu' na yoctyi' ạva' mu' ĉụi'si'ĉantyi' p̂en mu', jam úñisĉantyi'.164 23Mu' úñistyi' ạva' mọ' jun' chuc na'i jacchety ạva' in, me' mu' na'i. Saraty na ạva' mọ' jam mu' me', na'i paj qui cạ̈tsi' Jen'si' p̂eyacdye' mu', mọ' jayu'tyiyitis Abraham jiquej. 24- 25Mọ'in pärä' p̂en in jị'ĉocdyes p̂eyacdye' shupqui' in. Mọ'in pärä'sis p̂en in jeñej pärä'sis p̂eyacdye' yụ'tyes Jen', me' bu'yi' mọ'in shupqui' in. Agar úñis jiquej, mọ' jeñej bu'yi' Jen'si' yụ'tacdye' mu', jaso'mitis Moisés jiquej, mụcu'che' Sinaíche' Arabiaĉantyi' mu' mụcu', mu'che' jaso'miti jiquej, me' bu'yi' mọ' shupqui' Agar, úñis mu'. Mọ' jị'ĉocdyes p̂eyacdye' yi' jun' chuc mọ'dye q̂uin' yejĉoij mu'in judío in cäc̣hä'chui' in mọ' yụ'tacdye', jeñej bu'yi úñi mọ'che' in, me' bu'yi in, ĉaĉaij na me' bu'yi in q̂uin'tyity Jerusalénĉantyi' in. 26Mọ' na Sara jam úñis, mọ' jeñej bu'yi' mọ' Jen'si' p̂eyacdye' mu' jayu'tyiyitis Abraham jiquej, me' bu'yi' mọ'. Tyi chuc mọ' anicjety in mu'in jam úñity bä'yi in, jeñej mạyedye'chesĉan Jerusalén bä'yi in, me' shupqui in mạyedye'chedyety yụ'tac in. 27Yi' sánacdye': “Mi p̂en särä' bu'yis, me' tsan' jam chị́yes ạva' mi, ma'jodye'tum qui na ram' äjyi' mi. Mọ' p̂en jọbataĉan'si' vämtyi' dai' ra' mu'ya' ạva' mọ', ọya'ya' ra' mọ' vämtyi'yas”, yi' sánacdye'.165 28Vojity yụ ra' jéyac, yódyem' mu' Jen' jị'cätse' p̂eyacdye' jiquej u aty na'iya' Isaac, me'dye q̂uin' mi'inya' aty cạ̈tsi' Jen'si' p̂eyacdye' mu' aty ạvatunacya' mi'in. 29Jam me' Agartyi' ạva' mọ' yụ'tac jiquej, jam cạ̈tsi' Jen'si' p̂eyacdye' mu' na'iya' mu'. P̂añi ạva' mọ', mu' jạñibe'ti' Saraty ạva' mọ', mu' na'i cạ̈tsi' mọ'si' p̂eyacdye' Jen'si' Ạ'edye' mu'.166 Me'dye q̂uin' chime' mu'in ĉútity yụ'tacdye'che' in, mu'in jị'ñibe'casin' in tsun Jen'tyi' ạva' tsun. 30¿Jätäjyi' a ĉa sánacdye'? Yi': “Fitupjeva' mọ' úñis ạva'tumdye mọ', ĉaĉaij na mọ' úñistyi' ạva' mọ' jam ra' mu'mun so'mac jen'si' jedye' mu', mu' ra' jam jeñej Saraty ạva' mọ', mọ' jam úñis.”167 31Mọ'dyes vojity yụ, tsun jam úñistyi' vóshi' tsun, jam yụ'tacdye'che' ĉútiĉa'tyi' tsun, mọ' vóshi' tsun jam úñis, mọ'dyes aty faraj bu'ja' tsun.

will be added

X\