Galatians 3

1Anic itŝity dyijyedye' mi'in Galaciaĉantyi' mi'in. ¿Tyi ĉaĉaij ji'shapuyibunac dyijyedye' u mi'in paj qui farajjetiñe' mọ' rụijsis p̂eyacdye'? Anic jorojĉan jéyac yụ yụ́si'ya' ji'chäyitidye', jeñej bu'yi' mi'insi'ya' vej yụ jị'caveyeyac jun' chuc croshche' ijac mu' Cristo, me' bu'yi' shupqui' ji'chäyitidye' yụ. 2Jesha' jítiĉa' yụ mi'in: ¿Jen' buty me' mọmo' so'minac Ạ'edye' mu' cäc̣hä'chucdye'ya' mọ' yụ'tacdye' jiquej? Jam jun', anicyedye'ya' mu' so'minac. 3Itŝity dyijyedye' mi'in. Jesha' tashche' jiquej anicyedye'ya' mi'in mu' Jen' so'minac ĉụi'si' Ạ'edye' mu', mọ' tsạ'chunac mi'in Jen'dyes. ¿Jun' qui dash ĉaĉaij me' dyijyi mi'in q̂uin' chat tupuj p̂añi Jen'dyes mi'in mọ' cäc̣hä'chucdye'ya' yụ'tacdye'? Jam jun'. 4Farajjetiñe' qui jụijya' mọ' rụijsis ji'chäyitidye' mi'in, fibidyes ra' shupqui' mọ' räj jị'ĉojtiñes mi'in cäc̣hä'chuc-dye'ya' mi'in p̂eyacdye'. Faraj vu' ca' jam me' mi'in farajjetiñe' mọ' paj qui jam me' fibidyes shupqui' mọ' ji'chäyitidye' se'vetiñes mi'in. 5Yụ ra' jéyac mi'in: ¿Mu' Jen' so'minac buty Ạ'edye' mu' judyeya' ji'caviyinac ferdye' mu' cäc̣hä'chucdye'ya' mi'in mọ' yụ'tacdye'? Jam jun' me'. Mu' me' ñịbe'jinac ĉaĉaij na mi'in anicjetiñe' mọ' jäm'si' p̂eyacdye' Jen'si' mu' se'vetiñes jiquej mi'in. 6Me'dye mu' chime' Abraham jiquej anicjete Jen', me'dyes qui mu' Jen' rụij jayu'ti.159 7Jesha', mu'in anicjetety Jen' in mu'in nash anictyity vóshi' Abrahamtyi', me' yụ'tac in. 8Tashi' jä'mij yi' sánacdye' jun' chuc ra' mu' Jen' rụij yụ'tacsi mu'in jam judío in anicyedye'ya' mu'in. Jen' jä'miij tashche' jaso'miti p̂eyacdye' mu' Abraham mọ' c̣hon'dyedyes p̂eyacdye', yi': “Míya'dye ra' yụ räj ñịbe'jeyacsi jacchety muntyi' in”, yi' sánacdye'.160 9Mu' Abraham anicjepte Jen'si' p̂eyacdye' mu', mọ'dyes qui mu' Jen' ñịbe'jajiti jiquej. Me'dye q̂uin' chime', tyi chuc anicjetety Jen' in mu'in ra' ñịbe'jeyac Jen'ya' in, yojdyem' Abrahamvun jiquej u. 10Tyi chuc dyijyity tsan' tupuj c̣hoñi cäc̣hä'chucdye'ya' yụ'tacdye', mu' me' dyijyity, va'tacdyedyety mu' shupqui, ĉaĉaij na mọ' yi' sánacdye': “Tyi chuc jam räjen' chique'tyi' mọ' sánacdye' yụ'tacdye'ĉansi', va'tacdyedyety mu' shupqui.” 11Anic jorojĉan ọij shupqui' sánacdye' Jen'si' mu', mu' ra' jam rụij yụ'tacsi muntyi' in cäc̣hä'chucdye'ya' in mọ' yụ'tacdye', ĉaĉaij na mọ'dye p̂eye' sánacdye', yi': “Mu' na rụij yụ'tactyi' anicyedye'ya', mu' ra' c̣hoñi.” 12Mu'in cäc̣hä'chui'tyi' in mọ' yụ'tacdye', mu'in na jam dyijtui' in anicyedye' Jen'che', yụ'tacdyem' dyijtui' in. Ọij sánacdye' p̂eye' mọ' yụ'tacdye', yi': “Tyi chuc räjen' chique'tyi' in mọ' sánacdye' yụ'tacdye'ĉansi', mu'in ra' c̣hoñi in.” 13Cristo ji'c̣honsin' tsun paj qui jam tsunche' tŝọi' mọ' va'tacdye' mu', mọ' cại'si' yụ'tacdye', ĉaĉaij na Cristoche' tŝọi' mọ' va'tacdye', mọ' cại'si' yụ'tacdye', mọ' tsunsi' cại' va'tacdye'. Anicdye me' cạ̈tsi' mọ' sánacdye' yi': “Tyi chuc ijactyi' sonche' in mu'in so'mac va'tacdye' Jen'ya' in.” 14Mọ' dyijyedye' Jen'si' mu', mu' Cristo me' cabusin' va'tacdye' tsun paj qui mu'indyes chime' jam judíodyes in shupqui' ọij p̂eyacdye' jayu'tyiyitis Jen' Abraham jiquej, paj qui räjtumdye tsun so'mac tsun Jen'si' Ạ'edye' mu' anicyedye'ya' tsun mu' Jesucristo. 15Vojity yụ ra' ji'shupqueyeyac jị'ĉocdyes p̂eyacdye'. Yirity muntyi' yụ'tye'ya' yiris p̂eyacdye', judyeya' tịj qui yụ'taquiya' sánac, aty fer bu'yi' shupqui' mọ' p̂eyacdye', aty jam tupuj yocyi' yụ'tac. 16Me'dye chime' mọ' fer bu'yi' p̂eyacdye' Jen'si' mu', mọ' jayu'tyiyitis Abrahamvun jiquej judyeya' vóshi' chime' mu'. Mọ' sánacdye' jam ji'jäcacsi' “mu'indyes vóshi' mu'”, mu'in dai'tyi' in, me'dye yirity mọmo' vóshi' mu' ji'jäcbite ĉaĉaij na yi' sánacdye': “judyeya' vóshidyes mi.”161a Me' yi' ĉaĉaij na yirity mọmo' mu' Cristo ji'jäcte sánacdye'. 17Mọ'dyes yi yụ, Jen' tashche' jiquej jayu'tyiyiti p̂eyacdye' mu' Abraham jun' chuc anicyedye'ya' mu' rụij yụ'tac. Jen' yi “Yụ ra' jị'cätse' mọ' p̂eyacdye'.” Jiyi' vạjpedye' qui' cien chibin qui'tac yómodye' me'si', chat q̂uin'dyem' yụ'tye' mu' Jen' mọ' yụ'tacdye' mu'. Yụ ra' jéyac, mọ' yụ'tacdye' mọ' jäqui've yụ'tacsi', mọ' aty jam tupuj jị'motse' mọ' tashches yụ'tacsi' p̂eyacdye' Jen'si' mu' jayu'tyiyitis Abraham jiquej, mọ' taca' fer bu'yi'. 18Jesha', mu' Jen' ñịbe'jisin' jụijya' tsun cäc̣hä'chucdye'ya' yụ'tacdye' jụijya' tsun, a vuty jam ñịbe'jitidyesya' shupqui' mọ', yódyesdyem' yi' o mọ' p̂eyacdye' Jen'si' jiquej u, mọ' jayu'tyiyitaques jiquej mu' Abraham, mọ' yi' jun' chuc mu' Jen' ñịbe'jajiti anicyedye'ya' mu'. 19Mọ'dyes yụ ra' jéyac: ¿Jedyedyes buty yụ'tacdye'? Jäqui've mu' Jen' cächjeyeyacsi mọ' yụ'tacdye', mọ' jị'ĉocdyes juchaj muntyis mu'in. Mọ' fer bu'yi' yụ'tac jun' qui' chuc atsijya' mu' Ji'c̣honacsity muntyi', mu' Abrahamtyi' vóshi' mu', mu' p̂eijtyety jiquej Jen'si' p̂eyacdye' mu'. Chime'dye mu'in anjer in ji'jiyete Moisés in Jen'si' yụ'tacdye' mu', mu' qui so'macsi muntyi' in. 20Jen' jam me' jaso'miti p̂eyacdye' mu' Abraham jiquej, mu' jam so'mete ji'jiyetety, mu' chụi' jaso'miti. 21¿Yụ'tacdye' fáquiĉun'ti' buty Jen'si'tum p̂eyacdye' mu', mọ' c̣hon'dyedyes tsun? Jam jun' me'. Tupuj mọ' yụ'tacdye' tsạ'chusin' Jen'si'ya' vej mu' jụijya' tsun, a vuty tupuj yụ'tacdye'ya' rụij yụ'tac u tsun. 22Jam qui nam' jun' me', ĉaĉaij na yi' mọ' sánacdye' jun' chuc mọ' juchaj bächäsin' räj jacchety muntyi' tsun, jeñej bu'ja' ĉär'taquisĉan yu'sin', paj qui dyijtupja tsun Jen'si' ñịbe'jitidyes mu', me' mu' ji'c̣honsin' anicyeja'ya' Jesucristoche' tsun, yoj yi'dyem' p̂eyacdye' Jen'si' mu'. 23Jambi'dyem' ayijya' mọ' tupudye' paj qui jä'mij anicyeja' Jesucristoche', yụ'tacdye' bächäsin' tsun jiquej, jeñej bu'ja' ĉär'tactyi' me' bu'ja' jiquej tsun, ĉụi'dye mu' atsij ji'c̣honacsity. 24Me' mọ' yụ'tacdye' bächäsin', mọ' yu'sin' Cristoya', mọ' yi' paj qui Cristo dyijtuja. Aty mu' dyijtujaya' chat qui anicyeja' mu'che', mu' qui rụij yu'sin' tsun anicyedye'ya'. 25Aty mu' qui anicjeja me'qui'dye mọ' bächäsin' yụ'tacdye'. 26̣Q̂uin' chat anicyedye'ya' Jesucristoche' mi'in, räj Jen'tyi' ạva' mu' yụ'tac mi'in, ĉaĉaij na aty Cristoty mi'in. 27Aty ji'säsdyi Cristoya' jụijya' mi'in,162 mu'si' qui jäm'yedyem' me'chuptinte mi'in ĉaĉaij na aty mu'tyi' mi'in. 28Mọ'dyes mu' Jen' vaj cäts cạvacsi muntyi' in, paj tsan' judío in, paj tsan' jam judío in, paj tsan' úñity in judyeya' paj tsan' jam úñity in, son' in judyeya' p̂en in, me' vaj cäts cạvacsi Jen' muntyi' in, me'dye mi'in vaj me' Jesucristoty mi'in. 29Mi'in Cristoty jụijya', Abrahamtyi' vóshi' shupqui chime' mi'in, Jen' ra' ñịbe'jinac räj mi'in jun' chuc yi' p̂eyacdye' mu', mọ' jaso'mitis Abraham jiquej.

will be added

X\