Galatians 1

1- 2Yụ Pablo sáñe' yụ ọij mi'indyes Galaciaĉantyi' jac bä'yity mi'in. Yụ nash jutactyi' Jen'tyi', jam muntyi' me' jutin yụ in, mijam jụ'ñity muntyi' yu'tyin yụ, mu'dye Jesucristo judyeya' Jen' mu' Ạvatusin'tyi' tsun, mu' jaji'tsa'ibuntyi' Jesucristo jiquej, mu' yu'tyin yụ. Yụ räjtumdye uts vojity tsun pen'dyetuntyi' yụ in, räj tsun vorjeyac mi'in ñuru'tyity Cristoty, pai' Galaciaĉan bä'yity mi'in. 3Yụ cọdyete Jen' mu' Ạvatusin'tyi' tsun, judyeya' mu' Jesucristo Ayo' tsun, paj qui mu' ñịbe'jitidyes so'minac mi'in, judyeya' paj qui mu' so'minac chime' ma'jodye' ĉojtyi'ĉandyes mi'in. 4Mu' Jesucristo ĉụi' ji'ijati tsunsidyes juchaj jiquej paj qui ji'c̣honsin' tsun paj qui jam me'sin' mọ' q̂uin'sis a'c̣his jacches jedye', ĉaĉaij na mọ' dyijyedye' Jen'si' mu', mu' Ạvatusin'tyi' tsun. 5Mọ'dyes tima'queja mu' Jen', jam ra' jụ'ñisĉan mạyedye' mọtsi' tima'cacdye' mu'. ¡Paj me'! 6Anic där äjjebiyac yụ dyijyedye' mi'in, mijam jaijve farajjebibajtinte Jen'si' ji'chäyitidye' mu', mu' fayinactyi' mi'in paj qui mu' Cristo ji'c̣honnac mi'in ñịbe'jitidyesya' mu'. Mi'in qui nam' yocsi' mọmo' p̂eyacdye' cäc̣hä'chutiñe'. 7Anic tsan' itŝi' yocsi' mọ'ya' p̂eyacdye' ji'c̣honacsis, me' tsan' me', mu'ya' qui nam' pạrej yocjepte in p̂eyacdye' p̂eijtes mu' Cristo, jo'mesya' se' ja'yinac in cäjsisya' ji'chäyitidye' mu'in. 8Där mọ' tsäqui' tuc mọ' cäjsis p̂eyacdye' ji'c̣honacsis je'si' in, me' tsan' tsundye mọ' tui' jụijya', me' tsan' yirity anjer cäjsis tui' ji'chäyitidye' jụijya', jam yódyesdyem' tsun voro'tyeyac jiquej u, paj va'cac tsäqui'sisĉan mu'in me'tyity in. 9Quivij yụ ra' jéyac: tyi chuc cäjsis tui'tyi' ji'chäyitidye' jụijya' in, mọ' jam se'vetiñes jiquej mi'in, mu'in ra' me'tyity in, paj tsäqui'sisĉan va'cac in. 10Ọijya' p̂eyacdye'ya' yụ jorojĉan jéyac, yụ jam mọ' dạque' paj qui muntyi' in tiĉuñin yụ in, mọm' dạque' yụ paj qui mu' Jen' tiĉuñinve yụ. Me' dyijyi jụijya' yụ paj qui muntyi' tiĉuñin yụ in, a vuty jam jun' úñity u yụ Cristoty mu'. 11Vojity, yụ ra' jéyac mi'in, ọij jäm'si' p̂eyacdye' Jen'si' voro'yedye' yụ jam nash mọ' muntyis dyijyedye' mu'in. 12Jam mọ' muntyi' so'min yụ in, mijam jụ'ñity muntyi' ji'chäyin yụ, me'dye Jesucristo mọmo' so'min yụ ji'chäyitidye' mu', mu' ji'caviyin yụ. 13Aty jeñej se'vaqui mi'in jun' chuc bä'yi yụ jiquej cäc̣hä'chucsebidyem' yụ ji'chäyitidye' judíos mu'in. Yụ ferche' jị'ñibe'cacsi jiquej mu'in anicjetety Jen' in, me' bu'yi tsan' mạ'je' jị'motsacsi yụ.158 14Yụ jiquej muju'cha' fer cäc̣hä'chui'tyi' ji'chäyitidye' chime' yicdye' judíos tsun, mọ' yu'tyiyinsi' vóshi'vun jiquej tsun, mu'in na pen'dye' yụ in uya'ya' cäc̣hä'chui' mu'in in. 15- 16Me' tsan' me' yụ jiquej, Jen' qui nam' därsi'ya' mạ'jitidyes mu' tsim'tyin yụ judyeya' fayin yụ paj qui yụ úñi mu'dyes, jambi'dyem' na'i yụ jiquej, aty mu' tạ'caty tsim'tyin yụ. Ayijya' qui tupudye' Jen'si' mu', chat qui mu' yu'tyin yụ paj qui chị́yepte yụ Ạva' mu' judyeya' chime' yu'tyin yụ voro'tacsity yụ p̂eyacdye' mu', mọ' p̂eijtes mu' Jesucristo mọ' jéyacsi yụ mu'in jam judío in. Aty me'si' jam yirity muntyi' jéte yụ jun' chuc ra' yụ, 17mijam Jerusalénĉan jịjcaij yụ, mijam mu'ĉantyi' in jéyacsi yụ mu'in tashche' jutactyi' Jen'tyi' mu'. Chụi' bu'yi Arabiaĉan jịjcaij yụ, aty me'si' Damascoĉan qui jijtuban yụ. 18Jiyi' chibin yómodye' chat q̂uin'dyem' Jerusalénĉan jịjcaij yụ, ĉọcte yụ mu' Pedro, mạ'je' yụ p̂eyaqui mu'tum. Mu'ya' dyäqui yụ yiri'tac ĉanam' jiyi' mọmo' mạyedye' jajbu'yete yụ. 19Mijam nạijtacsi yụ yoctyi' jutactyi' Jen'tyi' mu', Pedro judyeya' mu' Santiago, vojity mu' Ayo'tyi' tsun, mu'in mọmo' pärä' nạijtacsi yụ. 20Ọij q̂uin' p̂eyacdye' sáñe'si' yụ anic rụijsis Jen'si'ya' vej mu' yụ jéyac, mijam väñädye' yụ. 21Aty me'si', yocsi've qui jac jịjcaij yụ, Siriave judyeya' Ciliciave chime' jịjcaij yụ. 22Mu'in na ñuru'tyity anicjetety Jen' in, pai' Judeaĉan bä'yity in, mijam jun' chäyin yụ in, 23me' tsan' chịj in pạrej qui nam' yi in: “Mu' jị'ñibe'casin'tyi' tsun jiquej, mạ'je' tsan' jị'motssin'tyi' jiquej tsun anicjejaty Jen', mu'dye q̂uin' caman' voro'tacseban mọ' p̂eyacdye' Jen'si' mu'”, yi in, me' bu'yi ji'jäquin yụ in. 24Chat qui mu'in tima'quete Jen' in yụ́dyesi'.

will be added

X\