Ephesians 6

1Mi'in ạva', chicaĉam' ĉụi'tyi' jen' mi'in judyeya' tse' mi'in, mọ' nash mu' ma'jotye' Ayo', me' ra' bä'yi mi'in ạva'. 2Mọ'dye p̂eye' yụ'tacdye' yi': “Jäm'jeyaĉam' ĉụi'tyi' jen' mi'in judyeya' tse' mi'in”, yi' yụ'tacdye'. Ọij nash tashches yụ'tacdye' jäm'yedye' tui'si' mu'indyes chiquetydyes in. 3Mọ' jäm'yedye' yi': “Me' ra' mi'in paj qui jäm' muve mi'in judyeya' paj qui men bä'yi chime' úche' jacche' mi'in”, yi' yụ'tacdye'.172 4Mi'in ạva'tumtyi', jam ra' jị'fajcaqui ạva' mi'in, jäm' ĉọjcaĉam' judyeya' jäm' ji'p̂anaĉam' mi'in. Jemoñe' jị'chiyaqui ạva' mi'in paj qui chịj in paj qui jam a'c̣his dyijyedye' cại' in, judyeya' jị'chiyaĉam' chime' mi'in jun' chuc Ayo' tsun mạ'je'. 5Mi'in úñity, chiquemac jacchety ayo' mi'in, jäm'jemac, irijyejam' mu'che' mi'in. Jäm' carijtaĉam' mu'dyes mi'in, yoj bu'yidyem' Cristos u, me' bu'yi ra' carijtaqui mi'in. 6Jam ra' doijrodye'ĉan mọmo' jäm' carijtaqui mi'in paj qui ma'jotyinac mi'in, me' tsan' jam mu' doijroij mu', jäm' ra' carijtaqui mu'dyes mi'in. Ĉojtyi'ĉan qui na ram' dyijtutinte mu' Jen' mi'in carijtacdye'ĉan mi'in, mọ' mạ'je' Jen' ĉaĉaij na Cristoty úñity mi'in. 7Ma'jodye'tum ra' carijtaqui ayodyes mi'in, mọ' carijtacdye' Cristodyes, jam muntyidyes mọmo'. 8Chịj mi'in, tyi chuc jäm' carijtaqui Jen'si'ya' vej mu', me' tsan' úñity, me' tsan' jam úñity, mu' ra' Ayo' tsun so'macsi bijodye' mu'in. 9Chime'dye mi'in me'chucsity úñity mi'in, me'dye ra' mi'in chime', jam ra' ashjeyaqui úñity mi'in, jam ra' c̣hojvaqui mi'in. Chịj mi'in mu'ya' nash Ayo' mi'in mạyedye'chety, mu' nash vaj cäts ayo'bu'yi räjdyes muntyi' in, úñitydyes in judyeya' ayodyes chime' mu'in, ĉaĉaij na mu' vaj cäts cạvacsi räj úchety muntyi' in, jun' chuc bä'yi mu'in in. 10Vojity, yụ ra' q̂uin' jéyac, yejĉojam' fer bu'jam' mi'in, ĉaĉaij na Ayo'tyi' mi'in, mu'si'ya' ferdye' fer bu'jam'. 11Cätac ñutsjitidyetyĉan quị'si', mu' so'minactyi' Jen', mu'ĉan ra' tupuj dyichjetyetiñe' mọ' Sọyo' a'c̣hisya' dyijyedye' mọ', paj qui mọ' jam ji'ĉujtyinac väñädye'ya' mọ'. 12Mọ' chutidye' tsun, jam muntyi'tum chutiĉa', sọyo'tum nash chutiĉa' tsun, räjtumdye a'c̣histum tai'yastum bä'yis in, judyeya' mu'intum fer bu'yity in, jụ'ñity ĉụi' q̂uin' ayo'bu'yity in mu'in ọ́chesĉan tojmas bä'yity in, jo'metytum chutiĉa' tsun. 13Yiri' mọmo' me'chuvac mi'in ñutsjitidyes Jen'si' mu', me' qui ra' tsan' ji'ĉujnacya' mọ' Sọyo', jam qui jedyeij mi'in tupuj qui dyichjetyetiñe' mi'in, paj qui jam ji'pennac mi'in. 14Jä'mij ra' jä'mii'tyi mi'in. Räjĉan ra' rụij p̂eyaqui mi'in, mọ' jeñej bu'yi' ñuts bu'yis fídye'ĉansi' tsun. Me'chuvac chime' mọ' rụijsis dyijyedye', mọ' ñuts bu'yis e'feya' tsun. 15Chime'dye jä'mii'tyevac paj qui räjĉan voro'tacsequi mi'in mọ' jäm'si' p̂eyacdye' ji'c̣honac-dyes muntyi' in, mọ' jeñej bu'yi' yujches väc̣hä'tyitysi' mu'. 16Dadam' mọjo'cha' me'chuvac mọ' anicyedye' Jen'che' mi'in, mọ' jeñej bu'yi' yiris ñutsjeĉunac-dyes unĉan bu'yis väc̣hä'tyitysi' mu'. Mọ'che' tupuj tyum' jị'tŝotiñe' mọ' co'shai'si' ijme va'tyiyinacsi' mọ' Sọyo', mọ' jeñej bu'yi' jị'ĉojtacdye'. 17Chime'dye me'chujam' c̣hon'dyes mi'in, mọ' jeñej bu'yi' ñutsyedyes jo'no'ches mi'in. Yejĉojam' Jen'si'tum p̂eyacdye' mu', mọ' jeñej bu'yi' chutidye-dyes coc̣hino mọ' so'minacsi' Jen'si' Ạ'edye' mu'. 18Jam ra' farajjetiñe' cọdacdye' Jen'che' mi'in, räjĉan cọdyemac Jen' jun' chuc jínac Jen'si' Ạ'edye' mu'. Räjĉan ra' tsạ' bu'yi Jen'dyes mi'in, jam ra' ji'yoquiti mi'in. Räjĉan cọdyemac anicjetetydyes Jen' räj in. 19Yụ́dyesmun chime' cọdyemac mu' Jen', paj qui mu' Jen' so'min yụ p̂eyacdye' mu', paj qui yụ tupuj mọ' jéyacsi muntyi' in paj qui jam chime' noi'yedye'tum voro'tacsiya' muntyi' in mọ' jäm'si' p̂eyacdye' mu', mọ' jam chị́yes urucya' muntyi' jiquej in. 20Mu' p̂eyacdye' tui'tyi' me' yu'tyin yụ, mu'si' p̂eyacdye' voro'tacsi yụ, p̂eyacdyedyes mu' q̂uin' ĉär'tac yụ. Cọdyemac Jen' yụ́dyes paj qui jam noi'yedye'tum voro'tacsi yụ. 21- 22Mu'ĉan ra' jịjcaij uts mạ'jeyacdyety vojity tsun Tíquico, ĉucnac ra' mi'in. Mu' jäm'tyi' nọ́taquity judyeya' rụij carijtaquity tsuntum Ayodyes. Me'dyes yụ jutete mi'indyes mu' Tíquico paj qui mu' jínac jun' chuc tsun bä'yi úya', mọ' ra' jiĉun yu'tyinac mi'in. 23Yụ cọdyete Jen' mu' Ạvatusin'tyi' tsun judyeya' mu' Jesucristo Ayo' tsun paj qui so'macsi ma'jodye' ĉojtyi'ĉan-dyes mu'in anicjetety Jen' in, yụ cọdyete chime' Jen' paj qui mu'in yejĉoij mạ'jeyacsity bä'yi in paj qui chime' yejĉoij mu'che' ĉúti in. 24Chime'dye yụ cọdyete Jen' paj qui ñịbe'jitidyes so'minac räj mi'in anicjetintety, yejĉoij mạ'jetintety mu' Jesucristo Ayo' tsun. Paj me'.

will be added

X\