Ephesians 5

1Mi'in nash mạ'jeyacdyety Jen'tyi' ạva' mu', mọ'dyes jemoñe' ferdye' yụ'tiñe' paj qui rụij cäc̣hä'chuptinte dyijyedye' mu'. 2Räjĉan mạ'jeyacsejam' bä'jam', yojdyem' mu' Cristo mạ'jisin' u, me'dye ra' mi'in chime' mạ'jeyacsi. Mu' anic där mạ'jisin' mọ'dyes ĉụi' ji'säsdyi ji'ijati tsundyes, mọ' jeñej bu'yi' ji'co'shayacdye' Jen'dyes, me' bu'yi' sän'dye' mu'. Mọ' jama'jotyibuti Jen' yojdyem' jẹrejres tucdye' o, me' shupqui' sän'dye' mu'. 3̣Q̂uin' aty Jen'tyi' mi'in, mọ'dyes aty ra' jam vo'voyeban mi'in, mijam ra' jo'mes a'c̣his dyijyedye' me'chubajtiñe' mi'in, mijam ra' fer dyijtutinte chime' querec̣ha. Aty ra' jam quivij jo'mesĉan ji'sässun mi'in, mijam ra' mọ' p̂eijjajtiñe' mi'in. 4Aty ra' jam a'c̣his p̂eyacdye' ji'shupquetiñe' chụ'ĉan mi'in, mijam ra' tsịca'yis p̂eyacdye' chime' p̂eijjajtiñe' mi'in. Jam nash jäm' jo'mes mi'indyes, dam'dye jäm' yoshoropaij jéjam' Jen', mọ' ram' ji'shupquetiñe' mi'in. 5Anicsis p̂eyacdye' ọij chị́yetiñes mi'in, mọ' yi': tyi chuc ac̣hi' bä'yity judyeya' vo'voijtyi' in, judyeya' fer dyijtutety querec̣ha in, mu'in me'tyity in jam nash ra' mu'in jun' Jen'ya-dyety in yóĉandyem' ayo'bu'ye-dye'ĉan u mu'. Jesha' fer dyijtuja querec̣ha jụijya' tsun, jeñej bu'yi' jen'tuja'si' jedye', me' bu'yi mu' querec̣ha. 6Are'ĉa se' ja'yinac in mọ' fibisya' p̂eyacdye' mu'in. Mọ'dye juchaj sáñe'si' yụ ọ́che' q̂uin', mọ' ra' ji'me'tacsi' tsäqui'sisya' Jen'si' mu', mọ' ra' so'macsi Jen' tyi chuc jam chiquetety in. 7Jam ra' pen'dyetucsi mi'in mu'in me' ac̣hi' bä'yity in, pạrejyejam' mi'in. 8Jiquej mi'in chime' tojmadye'ĉan bä'yi mi'in. ̣Q̂uin' qui nam' aty mạyesĉan bä'yi mi'in ĉaĉaij na aty Ayo'tyi' mi'in. Mọ'dyes jemoñe' räjĉan rụij bä'yi mi'in, aty cäc̣hä'chubitinte Jen'si' mạijquedye' mu'. 9Tyi chuc mạyesĉan bä'yi in, mọ' yi' paj qui jäm'yity shupqui in, judyeya' rụij bä'yity in, judyeya' rụijsis dyijyedye' cại'tyi' chime' in. 10Dyijtujam' fer paj qui chịj mi'in jedye' buty ma'jotye' Ayo' tsun. 11Jam ra' mi'inmun cäc̣hä'chucsebi dyijyedye' mu'in, mu'in tojmadye'ĉan bä'yity in, anic fibis dyijyedye' mu'insi' in. Dam'dye jäm' jéĉunacsi mi'in mu'in me' dyijyity in paj qui jorojĉanyi' mạijyisya' in, 12ĉaĉaij na caminve jäm'taqui a'c̣his in, därsi' mọ' tsị́cadye' shupqui' ji'jäcacsebija' dyijyedye' jụijya' mu'in. 13Me' rụij bä'ja' mu'insi'ya' vej mu'in, chat qui Jen'si' mạijquedye' mu' jorojĉanjeyacsebi' a'c̣his dyijyedye' mu'in, 14mọ' mạijquedye' mu' mọ' räj jị'motse' mọ' tojmas a'c̣his mu'in. Mọ'dye mọmo' p̂eye' mọ' p̂eyacdye' yi': “Tsạ'ebada ĉọshity mi, vañinyebada sän'dye'ĉan bä'yity mi, chat qui ra' mu' Cristo mạijchun mi”, yi' p̂eyacdye'. 15Mọ'dyes jäm' ra' ĉujcati ĉụi' mi'in, dyijyedye'tum ra' bä'yi mi'in, jam ra' itŝi' jétiñe' dyijyedye' bä'yi mi'in. 16Jam ra' fibi' mọmo' bä'yi mi'in, räjĉan ra' carijtaqui Jen'dyes mi'in ĉaĉaij na q̂uin' dai' mu'ya' ac̣hi'yity muntyi' in. 17Mọ'dyes jam ra' itŝi' jétiñe' dyijyedye' bä'yi mi'in, dam'dye jäm' fer dyijtutiñe' mi'in paj qui chịj mi'in jedye' chuc mạ'je' Ayo', me' ra' bä'yi mi'in. 18Jam ra' tyédye'ya' yi mi'in, mọ' ra' jedye' ĉụi' ji'jäm'tyiyinac, dam'dye jäm' jụjbimac Jen'si' Ạ'edye' mu', paj qui mọ' bächänac. 19Jemoñe' vaj meij jäm' p̂iyitidyeij mi'in Jen'si' p̂eyacdye' mu'. Chime' ra' vaj meij p̂iyitidyeij mi'in tima'cacdyes sánacdye' Jen'si' mu' judyeya' Jen'si' jimacdye' mu', me' me' ra' vaj meij ji'chäyitidyeij mi'in. Jimaĉam' Ayodyes tsun, tima'quemac ĉojtyi'ĉan mi'in. 20Räjĉan ra' yoshoropaij jétinte Jen', mu' Ạvatusin'tyi' tsun, Jesucristosche' tịj mu' Ayo' tsun jétinte, jedye' chuc jị'ĉojtiñe' jụijya', me' bu'yi yoshoropaij jémac. 21Se'vitac vaj meij mi'in ĉaĉaij na vaj me' irijyi Cristoche' mi'in. 22Mi'in p̂en, jemoñe' se'vetinte vämtyi' mi'in, yojdyem' me' se'veja Ayo' u, 23ĉaĉaij na mu' vämtyi' jo'no' bu'yi p̂endyes mu', mu' nash ĉọjcai'tyi' p̂en mu', yojdyem' mu' Cristo ĉujcasin'tyi' tsun u anicjejaty, judyeya' mu' jo'no' bu'yi tsun. Mu' nash ji'c̣honsin' tsun, tsun jeñej bu'ja' a' mu'. 24Yojdyem' tsun anicjejaty mu' Cristo u ayotuja tsun, me' ra' mi'in chime' p̂en jemoñe' ayotuqui' vämtyi' mi'in. 25Chime'dye son' mi'in, mạ'jeyaĉam' ĉụi'si' p̂en mi'in, yojdyem' mu' Cristo mạ'jisin' u anicjejaty mu', mọ'dyes mu' ji'säsdyi ji'ijati tsundyesi'. 26Mu'si'ya' sän'dye' mu' c̣hicon'jityisin' juchaj tsun judyeya' Jen'dyety yu'sin'. P̂eyacdye' mu' c̣hicon'jibusin' ĉojtyi' tsun, mọ' yu'sin' jeñej bu'yi c̣hicon'tactyi' ojñi'ya' tsun, me' bu'yi' mọ' p̂eyacdye'. 27Me' mu' Cristo anic jäm'yity yu'sin', paj qui jam ọctum shupqueja', me' ra' mu' ĉụi'si'ya' vej mu' yu'sin', mijam ra' jụ'ñija', yojdyem' yiris p̂en q̂uin'dyem ra' vämis o jäm' yu'tis vämtyidyes mọ', me'dye ra' tsun mu'si'ya' vej mu'.170 28Mọ'dyes son' mi'in mạ'jeyaĉam' p̂en mi'in yojdyem' ĉụi' mạ'jeyaqui ĉụi'si' a' u mi'in. Tyi chuc mạ'jeyaquity ĉụi'si' p̂en mu', ĉụi'si' a' mạ'jeyaqui, me' shupqui' mạ'jitidyes mu'. 29Jesha', jam yirity muntyi' fạ́caqui ĉụi'si' a' mu', dam'dye mọ' jäm' ĉọjcaqui judyeya' ji'säcsaqui. Me'dye mu' chime' Ayo' tsun jäm' ĉujcasin' tsun anicjejaty, 30ĉaĉaij na tsun jeñej bu'ja' a' mu'. 31Mọ'dye p̂eye' sánacdye' yi': “Me'dyes qui ra' mu' muntyi' yacchuqui ĉụi'tyi' jen' mu' judyeya' tse' mu' paj qui p̂entum bä'yi pạrej, yirity bu'yi cạvacsi Jen'”, yi' sánacdye'.171 32Ọij sánacdye' anic mọjo'chas jị'ĉocdyes ji'chäyitidye' tui', mọ' jam chị́yes urucyaty muntyi' jiquej in. Mọ' yi' ji'jäcte mu' Cristo tsuntumdye anicjejaty. 33Me' tsan' me' yi', mi'indyes qui nam' ọij p̂eyacdye' yi': Mi'in p̂enyaty mạ'jeyaĉam' ĉụi'si' p̂en mi'in, judyeya' mi'in p̂en chime', ạ̈räjjeyaĉam' ĉụi'tyi' vämtyi' mi'in.

will be added

X\