Ephesians 4

1Yụ Pablo ĉä'räij Jesucristodyes, yụ ferche' jéyac paj qui rụij bä'yi mi'in, ĉaĉaij na me' mu' jínac Jen' fayinacya' jiquej. 2Jam ra' fibi'nacdye'tum bä'yi mi'in, jäm'yi ra' bä'yi mi'in, tyum'chutidye'tum judyeya' dyichyedye'tum ra' mạ'jitidyeij mi'in. 3Yụ'tacac ferdye' paj qui vaj cäts dyijyedye' cạtiñe' mi'in, ĉaĉaij na Jen'si' Ạ'edye' mu' yirity ñuru' yu'nac mi'in, mọ' yi' paj qui vaj me' jäm'jitidyeij bä'yi mi'in. 4Jesha' tsun anicjejatyi' Jen', tsun a' bu'ja' Cristos mu', yirity mọmo' ñuru' tsun. Yiris mọmo' mọ'ya' Jen'si' Ạ'edye' mu', chiyirisdye mọ'ya' c̣hon'dyedyes mọ' bisja'si' tsun, mọ' ra' so'misin'si' mu' Jen'. 5Chime'dye yirity mọmo' mu'ya' mu' Ayo' tsun, chiyirisdye p̂eyacdye' anicjeja'si' tsun, chiyirisdye ji'chojtidye' jị'ĉojtyeja'si' tsun. 6Chiyiritydye mu'ya' mu' Jen', mu' Ạvatusin'tyi' räj. Räjdyes ayo'bu'yi mu', räj jajbu'yacsi, judyeya' räj so'macsi paj qui carijtaqui mu'dyes in. 7Räj vaj cäts so'misin' paj qui carijtaĉa' mu'dyes, jun' chuc mạ'je' mu' Cristo, me' so'misin'. 8Mọ'dye p̂eye' sánacdye', yi': “Anic che've bojban mu' mạyedye'che', cạcseban ji'penactyi' mu'. Chime'dye so'macsi carijtacdyedyes muntyi' in”, yi' sánacdye'. 9¿Jedye' buty ọij cại' p̂eyacdye' “bojban” yi'? Mọ' ji'chäquiyisin' jun' chuc tashche' jiquej, mu' chạij úĉan mochĉansi'ĉan jac jịjcaij. 10Mu' chạijtyi' jiquej chimu'dye bojban jadyicchesche' mạyedye' jịjcaban, paj qui räj bu'yi bä'yi jacche' judyeya' mạyedye'che'. 11Mu'dye so'macsi ñịbe'yedyes muntyidyes in, carijtacdyedyes so'macsi. Pạrej jutactyi' yụ'tacsi, pạrej jaso'mitity p̂eyacdye' yụ'tacsi, pạrej cạyacsity p̂eyacdye' yụ'tacsi, pạrej ĉọjcacsity anicjetety Jen' yụ'tacsi, judyeya' pạrej jị'chiyacsity p̂eyacdye' yụ'tacsi. 12Me' me' so'macsi muntyi' in paj qui mu'in jị'chiyacsi in judyeya' nọ́tyetacsi in mu'in anicjetety Jen' in, me' räj jäm' yụ'tacsi in paj qui mu'in räj tupuj carijtaqui Jen'dyes in, judyeya' paj qui räjĉan fer bu'yi bä'yi Jen'dyes in. 13Me' ra' vaj cäts yiri'ya' dyijyeja' anicjejaty Jen'che' tsun, paj qui vaj cäts yiri'ya' chị́yepja Jen'tyi' Ạva' mu', jun' chuc dyijyedye' mu'si'. Me'dye ra' yejĉoja' p̂anja' Jen'dyes tsun, jun' qui' chuc fer bu'ja' Jen'dyes, yojdyem' mu' Cristo u, paj me'dye qui tsun shupqueja'. 14Aty qui jam jeñej bu'ja' miquity tsun, jemoñe' yódyem' isho'muntyi' u in dyijyedye'tum bä'yi in, jemoñe' me' dyijtuja' tsun, paj qui jam jụ'ñis ĉụi' ji'chäyitidye' anicjeja' tsun, paj jam jeñej bu'ja' covamba jeñej jácati tyi'mu, juna' ĉụi' mọmo' jịjcaij, paj qui jam me' tsun. Me' ra' chat jam se' ja'yisin' in mu'in va'ves ji'chäyitidye' tui'tyi' in, mạ'je' väñädye'ya' se' ja'yacsi muntyi' in. 15Jemoñe' rụijsis cạja' ji'chäyitidye', judyeya' mạ'jeyacsejaty bä'ja' tsun, paj qui yejĉoja' p̂anja' Jen'dyes tsun, yojdyem' Cristo u, paj qui me' shupqueja' tsun, ĉaĉaij na mu' jo'no' bu'yi tsuntum, tsun qui a' bu'ja' mu'. 16Mu' bächäsin' jụijya' tsun, chat qui ra' tsun vaj meij jäm'jitiĉa' judyeya' ñútyitiĉa' chime', me' yirity mọmo' a' shupqueja'. Räj carijtaĉa' jäm' jụijya' tsun, me' ra' chat dadam' che'ejĉoja' vaj cäts qui ra' fer bu'ja' bä'ja' tsun, vaj me' mạ'jitiĉa' jụijya' tsun. 17Mọ'dyes Ayo'si'che' tịj tsun yụ ferche' jéyac mi'in, aty ra' jam jịjcatacsebi mi'in mu'insi' dyijyedye' in jam anicjetetysi' Jen' in, mijam ra' ji'cäc̣hä'yibun quivij mi'in. Fibis mọmo' mu'insi' dyijyedye' in, 18mu'insi' tojmas dyijyedye' mu'in. Mu'in in jam jun' tsạ'chucsi Jen' ĉaĉaij na jam chị́yete in, anic yäcäj ĉojtyi' mu'in. 19Jam tsị́cataqui a'c̣his dyijyedye' mu'in, jun' chuc jäm'taqui in, ĉụi' ji'säsdyi in a'c̣hisĉan dyijyedye' mu'in, ĉụi' va'quicdyi in. 20Mi'in na jam me' ji'chäyiti, jam me' yi' Cristos p̂eyacdye' mu', mọ' ji'chäyitis mi'in, 21ĉaĉaij na jäm' se'vebitinte ji'chäyitidye' mu', mọ' rụijsis p̂eyacdye' Jesússi' mu'. 22Mọ' yi' jínac paj qui va'quectiñe' tashches dyijyedye' a'c̣his mi'in, mọ' jeñej bu'yi' ọctumtyi' quị'si' me' ra' va'quectiñe'. Mọ' tashches dyijyedye' jiquej mi'in, mọ' bächänacsi' jiquej, mọ'dye mọmo' ac̣hi'nac jiquej mi'in cäc̣hä'chuc-dye'ya' a'c̣his a'si' mi'in, mọ' va've jijijcayinac jiquej. 23Jemoñe' q̂uin' mụi'sis dyijye-dye' ĉojtyi'ĉansi' me'chutiñe' mi'in. 24Yódyem' mụi'tyity quị'si' u, me' bu'yi' mọ' mụi'sis dyijyedye' q̂uin', jemoñe' mọ' me'chuja' q̂uin', mọ' yu'tyiyisin'si' Jen'. Yódyem' mu' Jen' u, me' ra' shupqueja' tsun, mu' mụi'tyity jíbujsin' paj qui rụij bä'ja' tsun, paj qui jam jụ'ñija' bä'ja' tsun judyeya' cäc̣hä'chupja mọ' rụijsis p̂eyacdye' mu'. 25Me'qui'dye ra' väñäij mi'in, rụijsis qui ram' p̂eyacdye' p̂eijtiñe' räjĉan vojitytum mi'in, ĉaĉaij na vaj yiri'ya' bu'ja' Cristos a' mu'. 26Fạ́coij jụijya' mi'in, are'ĉa juchaij mi'in. Jemoñe' cavin ji'jiijtiñe' fạ́codye' mi'in jambi'dyem' siti mu' tsun. 27Jam ra' jụjbitiñe' Sọyos dyijyedye' mọ', paj qui jam ji'ĉujtyinac mi'in. 28Tyi chuc shushu'aty jiquej, paj me'qui'dye shu'ayeban. Dam'dye jäm' ĉụi' carijtaqui mu' tsạ' bu'yedyes, tupuj qui chime' ñịbe'jeyacsi mu'in jayejjotaquity jedye' in. 29Chime'dye jam ra' a'c̣his p̂eyacdye' ji'shupquetiñe' mi'in, jäm'si' ram' p̂eyacdye' mọ' ram' ji'shupquetiñe', jụ'ñis chuc tupuj nọ́tyetacsi' yoctyi' in, jụ'ñis chuc jemoñe' in, paj qui p̂añi Jen'dyes in. 30Jam ra' ji'tarebitinte Jen'si' Ạ'edye' mu', mọ' so'misin'si' Jen'. Mọ' cachtacdye' bu'yis Jen'si' mu', mọ' jị'ĉocdyes aty Jen'tyi' tsun, paj qui chị́yac tsun aty ayijya' mọ' tupudye' c̣hon'dyedyes tsun. 31̣Q̂uin' ra' va'quectiñe' a'c̣his dyijyedye' ĉụi'si' mi'in, aty qui ra' jam fạ́codye'tum bä'yi mi'in, me'qui'dye qui ra' fạ́codye'tum äjnaqui mi'in, mijam ra' ñäñiti mi'in. Jam ra' dam' fáquitidyeij bä'yi mi'in. 32Dam'dye jäm', jäm'yedye'tum bä'yi mi'in, vaj meij ñịbe' ĉútidyeij mi'in. Mu'ya' pạrej juchatunac jụijya' in jam ra' yejĉoij dyijtucsebi juchaj mi'in. Yojdyem' mu' Jen' u jam dyijtubunac juchaj mi'in ĉaĉaij na aty Cristoty mi'in, me'dye ra' mi'in chime' jam dyijtucsebi yoctyis juchaj mu'in.

will be added

X\