Ephesians 3

1Mọ'dyes yụ Pablo, me' ĉä'räij yụ q̂uin' Jesucristodyes, ĉaĉaij na yụ voro'tyeyac mi'in jam judío mi'in p̂eyacdye' mu'. 2Jedac aty chịj mi'in jun' chuc mu' Jen' ñịbe'jitidyesya' mu' yu'tyin yụ, paj qui yụ voro'tyeyac p̂eyacdye' mu' mi'in jam judío mi'in, me' yụ nọ́tyeyac. 3Jen' jin yụ ĉụi'si' dyijyedye' mu', mọ' jam chị́yeptes muntyi' jiquej in, yoj yi'dyem' sáñe' u yụ ọ́che'. 4P̂iyibutiĉam' ọ́ches jụijya' mi'in, me' ra' chat chịj mi'in jun' chuc yụ chị́yepte Jen'si' dyijyedye' mu', mọ' jam chị́yeptes muntyi' jiquej in, mọ' yi' mu' dyijyi jutete jiquej mu' Cristo. 5Jen' jambi' jị'chiqueyacsi urucyaty muntyi' jiquej in ọij dyijyedye' mu'. ̣Q̂uin' chat mu' Jen' mọ' jị'chiqueyacsi jutactyi' mu' judyeya' jaso'mitity p̂eyacdye' mu'. Ĉụi'si'ya' Ạ'edye' mu' jéyacsi' jun' chuc dyijyedye' mu'. 6Dyijyedye' Jen'si' mu' jam chị́yeptes muntyi' jiquej in, yi': mu'in jam judío in, anicjeptety in jäm'si' p̂eyacdye' Jen'si' mu', mu'inmun ra' chime' ñịbe'jeyacsi vaj cätsdye judíotum in. Chime' mu'in in jeñej bu'yi Cristos a' mu', mu'indyesmun chime' in mọ' p̂eyacdye' Jen'si' mu' yụ'tyes jiquej mu', mọ' jị'cätsepte tsundyes mu' Cristo Jesús. 7Jen' yu'tyin yụ úñity mu', ĉụi'si'ya' ñịbe'jitidyes mu' yu'tyin yụ judyeya' so'min ferdye' mu' chime' paj qui yụ voro'tacsi p̂eyacdye' mu'. 8Me' tsan' yụ uya'ya'tacsi räj mu'in anicjetety Jen' in, Jen' qui nam' ñịbe'jiti-dyesya' mu' yu'tyin yụ paj qui voro'tacsi yụ jam judío in, jéyacsi yụ jun' chuc mu' Cristo anic där jäm'si' mọjo'chas ñịbe'jitidyes so'misin' tsun. 9Mọ' yụ'tacdye' yụ paj qui räj jéyacsi yụ muntyi' in mọ' tạ'cas dyijyedye' Jen'si' mu', mu' jäm'tacsity räj jedye' in. Jäm'tye'ya' ọij jac jiquej me'dye q̂uin', mu' jam jị'chiqueyacsi muntyi' in mọ' dyijyedye' mu'. 10̣Q̂uin' qui nam' mu' Jen' räj jị'chiqueyacsi rụijsis dyijyedye' mu' mu'in che've fer bu'yity in, judyeya' mu'in anjer ayo'bu'yity in, paj qui mu'in cạvete in jun' chuc mu' räjĉan dyijyedye'tum carijtaqui. Mọ'dyes qui aty cạvacsiya' in mu'in anicjetety Jen' in, mu'inya' chị́yepte in jun' chuc anic dyijyedye'tum carijtaqui Jen'. 11Jen' me' jị'cätse' mọ' tạ'cas dyijyedye' mu', aty juteteya' mu' Cristo Jesús Ayo' tsun. 12̣Q̂uin' aty Cristoty tsun anicyedye'ya' tsun, mọ'dyes q̂uin', aty jam noi'yedye'tum c̣hẹi'ya'jeja Jen'. 13Mọ'dyes yụ ferche' jéyac mi'in: me' tsan' ñịbe' cạve' yụ úĉan, jam qui na ram' tári ĉojtyi'ĉan mi'in ñịbedyesya' yụ, me' dyijtutiĉa'ya' yụ mi'in, ĉaĉaij na mi'indyes me' jị'ĉojtye' yụ. 14Mọ'dyes yụ dyụtsyi Jen'si'ya' vej mu', mu' nash tsuntyi' Jen'. 15Mu'dye Jen' räj jäm'tacsi jacche' bä'yity in, judyeya' mạyedye'chety chime' in, räjen' me'chucsi mu'. 16Yụ cọdyete mu' ferdye'tumtyi' Jen', mu' me'chui'tyi' mọ' mọjo'chas jäm'si' ñịbe'jitidyes mu', paj qui Ạ'edye'ya' mu' so'minac ferdye' ĉojtyi'ĉandyes mi'in. 17Cọdyete chime' yụ paj qui mu' Cristo ĉojtyi'ĉan jajbu'yinac mi'in anicyedye'ya' mi'in, paj qui räjĉan mạ'jitidyestum bä'yi mi'in, me' ra' mạ'jeyacsity bä'yi mi'in, mijam ra' yocve dyijyi mi'in. 18Me' ra' mi'in yojtumdyem' anicjetety Jen' u in, mi'in tupuj chị́yebitinte Cristos mạ'jitidyes mu', jun' chuc mu' mạ'jinac mi'in. Anic där mọjo'chas mạ'jitidyes mu', jeñej bu'yi' yiris därsi' jedye', anic jiyi' mochas judyeya' därves judyeya' moches chime', me' quis mạ'jitidyes mu'. 19Me' tsan' muntyi' tsun jam tupuj räj cha'shepja mạ'jitidyes mu', yụ qui nam' cọdyete Jen', paj qui mu' ji'chäquiyibunac Cristos mạ'jitidyes mu', jun' chuc mọ'. Me' ra' chat q̂uin'dyem' tupuj me'chubitinte Jen'si' dyijyedye' mu', mọ' ra' bän'jibunac ĉojtyi' mi'in. 20Mọ'dyes tima'queja Jen', mu' muju'cha' ferdye'tumtyi', mu' tupuj jụjjibusin' räj cọdacdye' tsun, yódyesdyem' tsun muntyi' u tsun jam cha'sheja' dyijtuja'si' yiri' u, mu' na Jen' tupuj mu' me' jäm'taqui. Anic jiyi' därsi' ferdye' mu', mọ' carijtaquis tsunĉan. 21Tsun anicjejaty Jen', jemoñe' räjĉan tima'queja Jen', ĉaĉaij na tsun aty Cristoty, jam ra' mọtsi' tima'cacdye' mu'.

will be added

X\