Ephesians 2

1Mi'in jiquej sän'dye'ĉan bä'yi ĉaĉaij na juchaj ji'sännac mi'in jiquej, mijam chiquetinte Jen' jiquej. 2Me' jiquej bä'yi mi'in cäc̣hä'chucsebi mi'in a'c̣his dyijyedye' mu'in jacchetysi' muntyi' in, mọm' cäc̣hä'chubitinte dyijyedye' sọyotysi' ayos mọ'in, mọ'in tai'ya' bä'yis in, mọ'in bächäcsis in jam chiquetety Jen' in. 3Tasdye jiquej me' bä'ja' tsun, jun' chuc mạ'je' a' tsun jäm'taqui', mom' cạja' tsun, ĉụi'si' dyijyedye' a'c̣his cạja' tsun. Anic tsäqui'sisĉan-dyety jiquej tsun vaj me' yoctyi'tum úchety muntyi' in, ĉaĉaij na juchajtum na'eja' tsun. 4Mu' na Jen' där ñịbe' ĉọcsity, anic fer mạ'jisin' tsun. 5Me' tsan' sän'dye'ĉan bä'ja' jiquej tsun, mu' qui nam' Jen' vañinjibusin' tsun, yiri'ya'dye Cristotum vañinjibusin' jiquej, me' mu' Jen' ñịbe'jitidyesya' mu' ji'c̣honnac mi'in. 6Jesucristotum mu' vañinjibusin', judyeya' mạyedye'che' ji'bä'yisin' q̂uin', me' bu'ja' tsun, aty Cristotum tsun räj Cristoty tsun. 7Mọ' yu'tyiyisin' me' ra' mu' yejĉoij jorojĉanjeyacsi jun' chuc mu' där mạ'jisin' tsun, anic där ñịbe'jisin' Cristoya'. Räjĉan ra' mu' me' yejĉoij jorojĉan jị'ĉoyacsi mọ' därsi' mạ'jitidyes mu' tsundyes. 8Jen' ñịbe'jitidyesya' mu' ji'c̣honnac mi'in anicyedye'ya' mi'in, mijam jun' bu'yi tupuj ĉụi' ji'c̣honti mi'in, ñịbe'jitidyesya' mu' ji'c̣honnac mi'in. 9Tsun jam ĉụi' tupuj ji'c̣hontiĉa' tsun jun' chuc rụij bä'ja', mọ'dyes jam jun' tupuj ĉụi' va'bunyeja' tsun jun' chuc mọ' c̣hon'dyedyes tsun. 10Aty ji'c̣honsin'ya' tsun, mu' Jen' yu'sin' tsun Jesucristoty tsun paj qui rụij bä'ja' Jen'dyes judyeya' nọ́tacseja' bä'ja' chime' tsun, ĉaĉaij na mu' Jen' me' jä'mij dyijyi paj qui me' bä'ja' tsun. 11Mi'in jam judío na'i, me'dyes qui mu'in judío in äcäijjinac in, jínac in: “Jam sei'tactyi' a' in”, me' jínac in. “Tsun nash anic sei'tactyi' a' tsun,” yi in. Mọ' na sei'tacdye' a'si' a'dyes mọmo' shupqui'. 12Dyijtuĉam' mi'in jam judío mi'in, moch bu'yim' Cristoya' jiquej mi'in, jam Israeltyi' vóshi' mi'in, anic yocvety mi'in, mijam dam' mi'indyes mọ' Jen'si' p̂eyacdye' mu', mu' yụ'tyeyacsis vóshi'vun tsun jiquej, mijam yiris jedye' jäm'si' bistiñe' mi'in mijam Jen'tyi' chime' mi'in, mọ'dyes qui ñịbe' bä'yi jiquej mi'in. 13̣Q̂uin' qui nam' aty Jesucristoty mi'in, Cristosya' chäsh mu' mọ' c̣hẹi'ya'jinac Jen'ya' mi'in, me' q̂uin' mi'in moch bä'yity jiquej mi'in. 14Mu'dye Cristo yu'sin' paj qui vaj meij jäm'jitiĉa' muntyi' tsun, judío tsun judyeya' jam judío in, aty jam vaj meij fáquitiĉa' bä'ja' tsun. Fáquitidye' muntyis jiquej in, mọ' jeñej bu'yi' juñumchuquis, me' bu'yi' mọ' shupqui'. Mu' qui Cristo ji'ijatidye'ya' mu' tyum'teyacsebi mọ', sän'dye'ya' mu' itŝi' tyei' mọ' juñumchuquis, jäm'jiti vatyquej in judío in judyeya' jam judío in. 15Mu'si'ya' sän'dyem' taste' mọ' tashches yụ'tacdye', mọ'si' ji'chäyitidye' mọ' aty jam mọ' bächäsin' tsun. Mọ'dyes q̂uin' aty jam pärä' ñuru' tsun, yirity quim' ñuru' tsun shupqueja' tsun, judío tsun judyeya' jam judío in, mụi'tyity qui ñuru'tyity tsun, vaj me' qui Cristoty tsun, jäm'jitidye'tum bä'ja' räj tsun. 16Mu'si'ya' sän'dyem' croshches tyum'teyacsebi fáquitidye' mu'in pärä' ñuru'tyity in, judyeya' yụ'tacsi paj qui vaj yiri'ya' jäm'jiti Jen'tum in, yirity mọmo' q̂uin' ñuru' in. 17Me'dyes qui mu' Cristo atsij, jäm'si' p̂eyacdye' tui' mu' räjdyes muntyi' in, mi'indyes jam judío mi'in, mi'in moch bu'yity Jen'ya' jiquej mi'in, judyeya' mu'indyes chime' judíodyes in, mu'in c̣hẹi'ya' bu'yity in. Mọ'dyem' p̂eyacdye' tui' mu' Cristo mu'indyes in, mọ' yụ'tacsi' paj qui jäm'jiti Jen'ya' in. 18Pärä'tyity ñuru' jiquej tsun, Cristo qui yu'sin' paj qui vaj me' c̣hẹi'ya'jeja Jen' mu' Ạvatusin'tyi' tsun, mọ'dye Jen'si' Ạ'edye' mu' mọ' ñútyisin' paj qui mu' c̣hẹi'ya'jeja tsun. 19Mọ'dyes q̂uin' mi'in jam judío mi'in aty jam yocve bu'yi mi'in aty jam moch mi'in. ̣Q̂uin' aty chätidye'tum bu'yi Jen'tyi'tum muntyi' mi'in, aty Jen'tyi' ạva' mi'in. 20Mi'in nash jeñej yiris aca' jäm'tacsi' jäm'chuquistum, mu'in jutactyi' Jen'tyi' mu' judyeya' jaso'mitity p̂eyacdye' Jen' in, mu'in in jeñej bu'yi jäm'chuquis acas mọ', mu' na Jesucristo jeñej bu'yi muju'chaty mij acadyety. 21Anicdye' me' tsun anicjejaty Jen' jeñej bu'ja' Jen'si' aca' mu'. Mu' na Cristo räj tsun tapchusin' judyeya' fer bu'ja' yu'sin' paj qui vaj meij ñútyitiĉa' bä'ja' tsun, yódyem' acas jedye' o mọ', me' bu'ja' tsun chime'. Me' yejĉoij dayi in mu'in anicjetety Jen' in, yódyem' yiris aca' cächquejĉoi'si' o, me' bu'ja' shupqueja' tsun, Jen'si' bu'ja' aca' tsun, mum' yirity me'chusin' tsun. 22Mi'in chime' jam judío mi'in, aty Cristoty mi'in, mi'inmun chime' aca' bu'yi Jen'si' mu', mọ' jäm'tyejijcai'si' mu' Cristo yoctyi'tum anicjetety Jen' in, mọ'ĉan bä'yi' Jen'si' Ạ'edye' mu'.

will be added

X\