Colossians 4

1Chime'dye mi'in me'chuc-sity úñity mi'in, jemoñe' anic rụij bächäcsi úñity mi'in, jam ra' a'c̣histum dyijyedye' cạvacsi mi'in. Chịj tyu' u mi'in mu'ya' nash ĉụi'tyi' Ayo' mi'in mạyedye'-chety, mu'tyi' nash mi'in úñity mu'. 2Jam ra' farajjetiñe' cọdacdye' Jen'che' mi'in, dyij bu'yi ra' ĉojtyi'ĉan mi'in cọdacdye'ĉan mi'in, yejĉoij ra' yoshoropaij jétinte Jen'. 3Cọdaĉam' Jen'che' tsundyes chime', paj qui mu' Jen' vancai' yụ'tye' carijtacdye' tsundyes, voro'yedye' Jen'si' p̂eyacdye' mu', mọ' p̂eijtes Cristo, mọ' jam chị́yeptes urucyaty muntyi' jiquej in. ̣Q̂uin' qui nam' p̂eyacdye-dyes ĉä'räij yụ voro'yedye'ya' yụ, mọ' ji'me'tyiyin yụ in. 4Cọdyemac Jen' yụ́dyes paj qui yụ tupuj jorojĉan jepte mọ' Cristos p̂eyacdye' mu', ĉaĉaij na mọ' yụ'tacdye' yụ. 5Jemoñe' mi'in dyijyedye'tum bä'yi mu'intum in jam anicjetetytum Jen' in, jam ra' fibi' mọmo' bä'yi mu'intum mi'in, räjĉan ra' jị'chiqueyacsi mi'in Jen'si' p̂eyacdye' mu'. 6Jäm'sim' p̂eyacdye' ma'jodyes ji'shup-quevac yoctyi'tum muntyi' in. Jä'miij ra' dyijyi mi'in paj qui tupuj rụij vorjeyacseban mi'in tyi chuc cudyityinactyi' p̂eyacdye' jụijya' Jen'dyes in. 7Uts mạ'jeyacdyety vojity tsun Tíquico, mu' ra' ĉucnac jụijya' mi'in, räj ra' jínac jun' chuc yụ q̂uin' bä'yi úĉan. Mu' nash rụijtyity nọ́taquity tsun, mu' carijtaquity yụ́tum Ayodyes tsun. 8Me'dyes yụ ra' jutete mi'inya' paj qui mu' jínac mi'in jun' chuc bä'yi q̂uin' tsun úĉan, paj qui mu' ma'joij yu'tyinac mi'in. 9Mu've ra' jịjcaij Tíquico pen'dye'tum ra' mu' Onésimotum, mu' ra' jịjcatety. Onésimo mi'inĉantyi', mu' nash mạ'jeyacdyety vojity tsun, judyeya' rụij cäc̣hä'chutety Jen'.181 Mu'in ra' räj jínac in jun' chuc bä'yi q̂uin' tsun úya'. 10Uts Aristarco mu' pen'dyetuntyi' yụ ĉär'taquisĉan, mu' vorjinac mi'in chime'. Uts Marcos vojityyetacdyem' Bernabéty, mu' chime' vorjinac mi'in. A nash jéyac jiquej mi'in paj qui jäm' tiĉun'tinte mi'in mu' Marcos, ventyicnacya' mu'. 11Uts Jesús, Justo jétety in, mu' chime' vorjinac mi'in. Mu'inĉantyi' judío in anicjetety Jesucristo in, mu'in mọmo' chibin ñútyintyi' yụ in, uts Aristarco judyeya' Marcos judyeya' Justo, mu'in mọmo' ñútyityin yụ in voro'yedye' mọ' p̂eyacdye' p̂eyes mọ' ayo'bu'yedye' Jen'si' mu', ma'joij yu'tyin ĉojtyi'ĉan yụ in. 12Mu' Epafras mi'inĉantyi' chime', mu' vorjinac chime', úñity Cristoty mu'. Mu' räjĉan fer cọdyete Jen' mi'indyes paj qui fer bu'yi bä'yi Jen'dyes mi'in, paj qui räj ĉojtyi'ĉan cäc̣hä'chubitinte Jen'si' dyijyedye' mu'. 13Yụ nash chị́yepte Epafrassi' dyijyedye' mu', jun' chuc mu' fer dyijtunac mi'in, mu' fer úñi mi'indyes cọdacdye'ĉan Jen'che' mu'. Jam mi'in mọmo' me' dyijtunac mu', chime'dye dyijtucsi yoctyi' anicjetety Jen' in Laodiceaĉan bä'yity in judyeya' Hierápolisĉan bä'yity chime' in. 14Uts pịñitucsity Lucas mạ'jeyacdyety tsun, mu' chime' vorjinac mi'in, judyeya' mu' Demas chime' vorjinac mi'in. 15Vorjeyacsejam' mu'in anicjetety Jen' in Laodiceaĉan bä'yity in. Chime'dye vorjevac mi'in mọ' Ninfa, räjtumdye mu'in anicjetety Jen' chime' in, mu'in vajmu'yaijtyi' in mọ'si'ĉan aca' in. 16Aty me'si' p̂iyibutiĉa'ya' mi'in ọij sánacdye' yụs mi'in, chat qui ra' jutetiñe' mu'inya' in Laodiceaĉan bä'yityya' in, paj qui mu'ĉantyi' chime' p̂eye' in ọij p̂eyacdye'. Jemoñe' mi'in piyibutiĉa' chime' mi'in yocsi' sánacdye' yụ, mọ' jutes yụ jiquej Laodiceaĉantyidyes in, mọ' ra' jute' in mi'indyes. 17Chime'dye ra' jétinte mu' Arquipo: “Ferva'ta paj qui jị'cätse' mi mọ' carijtacdye' so'minsi' jiquej mu' Ayo' tsun”, me' jémac mi'in. 18Yụ Pablo, ọij sáñe' yụ voryetacdye' mi'indyes, ĉụi'si'ya' un sáñe' yụ. Jam ra' yaquintu-butiĉa' mi'in ĉär'tacdye' yụ, taĉan ĉä'räij úĉan yụ. Yụ cọdyete Jen' paj qui ñịbe'jitidyes so'minac mi'in. Paj me'.

will be added

X\