Colossians 3

1Mi'in Cristotum vañinye-bantyi' mi'in, mu'dye tsạ'chunac, mọ'dyes qui jemoñe' dyijtutiñe' mạyedye'ches jedye' mi'in, yóche'dyem' ayo'bu'yi Cristo q̂uin' u, tacve bu'yi Jen'ya'. 2Mạyedye'ches jedye' dyijtuvac mi'in, jam ra' jacches mọmo' jedye' dyijtutiñe' mi'in. 3Mọ' tashches dyijyedye'vun mi'in aty säñi' Cristotum, mọ'dyes q̂uin' aty Cristotum bä'yi mi'in, mu' jäm' ĉujcabunac ạ'edye' mi'in, judyeya' muntyi' in aty jam chäyibunac dyijyedye' in, ĉaĉaij na aty Jen'tyi' mi'in. 4Cristo quim' yirity dyijtutinte mi'in, mu'si' qui dyijyedye' me'chup-tinte. Atsijbanya' ra' mu', mi'inmun ra' ji'caviti mu'tum judyeya' ra' pen'dyetutinte mi'in fer bu'yedye'ĉan. 5Mọ'dyes ji'sänvac mi'in mọ' a'c̣his dyijyedye' jacches mi'in. Jam qui ra' ac̣hi' bä'yi mi'in, aty jam ra' vo'voij bä'yi mi'in, mijam ra' ac̣hi' dyijyeban mi'in, aty ra' jam fer mạ'jetinte querec̣ha mi'in, me' jụijya' fer dyijtuja tsun, jen'tuja querec̣ha shupqueja'. 6Jo'memes a'c̣his dyijyedye' mọ' ji'me'tacsi' tsäqui'sisĉan mu'in jam chiquetety Jen' in. 7Mi'in chime' me'tyity jiquej mi'in, jo'mes cäc̣hä'chutiñe' a'c̣his dyijyedye' jiquej mi'in. 8̣Q̂uin' farajjevac räj jo'mes a'c̣his. Me'qui'dye ra' fạ́codye'tum bä'yi mi'in, mijam qui ra' vaj meij fáquibun mi'in mijam qui ra' vaj meij ñäñibun mi'in, me'qui'dye ra' ji'shuptiñe' a'c̣his p̂eyacdye' mi'in. 9Aty ra' jam vaj meij väñätutidyeij mi'in, ĉaĉaij na aty va'quectiñe' mọ' tashches dyijyedye' a'c̣his mi'in, jeñej ọctumtyi' quị'si', me' va'quectiñe' mọ' mi'in, q̂uin' aty yocve bä'yi mi'in. 10Yódyem' mụi'tyity quị'si' u, me' bu'yi' mọ' me'chutiñes mi'in mọ' mụi'sis dyijyedye' mi'in. Mu'dye Jen' yu'tyiyisin' mọ' mụi'sis dyijyedye' tsun, mu'dye chime' yu'tyiyisin' paj qui yejĉoi' che'ejĉoi' mọ' mụi'sis dyijyedye' tsun, paj qui me' shupqueja' mọ'tum yojdyem' mu' u, mu' mụi'sis ji'cayisin'tyi', me' ra' chat rụij mu' chị́yeja Jen'. 11Aty jam yoc yoc muntyi' in, vaj cäts cạvacsi Jen', paj tsan' judío in judyeya' jam judío in, paj tsan' sei'tactyi' a' in judyeya' jam sei'tactyi' a' in, paj tsan' yoc p̂eyaquity in judyeya' chätity muntyi' in, paj tsan' úñity in judyeya' jam úñity in, räj vaj cäts cạvacsi mu' Jen' muntyi' in, ĉaĉaij na mu' Cristo jajbu'yisin' räj tsun, mum' yirity jemonja tsun räj muntyi' tsun. 12Mi'in tsim'tactyi' Jen'tyi' mu', aty Jen'tyi' mi'in, mu' nash fer mạ'jinac mi'in. Yojdyem' mụi'tyityĉan quị'si' cätiya' u mi'in, jemoñe' me'dye mi'in chime' jäm'yedye'tum bä'yi räjĉan mi'in yoctyi'tum in. Ñịbe' ĉọcsejam' mi'in, jäm'yi ra' chime' mi'in, dyich bu'yi ra' yoctyi'tum mi'in. Jam ra' fibi'nacdye'tum bä'yi mi'in, 13tyum'chutidye'tum ra' vaj meij cavitidyeij mi'in. Jäm'jitidyeij ra' mi'in, mu'ya' ñäñitidyeij pạrej jụijya' mi'in, jemoñe' vaj meij farajjitidyeij dyijtucdye'ya' juchadyes mi'in. Yojdyem' mu' Cristo jam dyijtubunac juchaj u, me'dye ra' mi'in chime' jam ra' vaj meij dyijtubutidyeij juchaj mi'in. 14Me' me' ra' bä'yi mi'in, dadam' mọ' mọjo'cha' jemonac paj qui vaj meij mạ'jitidyeij mi'in. Jesha' vaj me' mạ'jitiĉa' jụijya' tsun, chat ra' vaj cäts dyijyeja' tsun, mọ' mạ'je' Jen'. 15Jesha', jam rụij dyijyeja' jụijya' tsun, táreja' ra' tsun, rụij qui nam' dyijyeja' jụijya' tsun, ma'joja' ra' tsun, mu'dye ra' Cristo so'misin' ma'jodye' ĉojtyi'-ĉandyes tsun. Mọ' me'chuja' jụijya' tsun, tupuj chị́ja' jun' chuc ra' jäm'taĉa' tsun. Mu' Jen' me' fayinac mi'in paj qui vaj me' dyijyi mi'in, yojdyem' mus a' yiris u, me' yu'tyinac chime'. Jam ra' farajjetiñe' yoshoropaij yédye' Jen'che' mi'in. 16Ji'sisbimac Cristos p̂eyacdye' mu' ĉojtyi'ĉan mi'in, mọ' nash mọjo'chas jäm'si' p̂eyac-dye' mu'. Räj dyijyedye'-tum ji'chäyitac vaj meij judyeya' ji'ma'yitac Jen'si'tum p̂eyacdye' mu'. Sánacdye'ches jimacdye' urucyas mọ' ra' jimtiñe' mi'in, Jen'si'tum jimacdye' mu' jimaqui ra' mi'in Jen'dyes, yoshoropaij jémac ĉojtyi'ĉan mi'in. 17Jun' chuc jäm'taqui jụijya' mi'in, jedye' chuc p̂eyaqui jụijya' mi'in, räjĉan ra' yi mi'in dyijtucdye'ya' mu' Jesús, Ayo' tsun, yoshoropaij jémac mu' Jen' Ạvatusin'tyi' tsun, Jesucristosche' tịj mu' Ayos tsun jémac. 18Mi'in p̂en jemoñe' se'vetinte vämtyi' mi'in cäc̣hä'chucdye'ya' mi'in mu' Ayo' tsun. 19Mi'in son', mạ'jeyaĉam' ĉụi'si' p̂en mi'in, jam ra' doroi'jetiñe' mi'in. 20Mi'in ạva', räjĉan chicaĉam' ĉụi'tyi' jen' mi'in judyeya' tse' mi'in, mọ' nash ma'jotye' Ayo' tsun. 21Mi'in ạva'tumtyi' mi'in, jam ra' jị'fajcaqui ạva' mi'in, are'ĉa ji'yocaqui ĉojtyi'ĉan ạva' mi'in. 22Mi'in úñity räjĉan chiquemac jacchety ayo' mi'in. Jam ra' doijrodye'ĉan mọmo' carijtaqui mi'in paj qui ma'jotyi-nac, me' tsan' jam mu' doijroij, ĉojtyi'ĉan qui na ram' dyijtutinte mi'in ĉaĉaij na Jen'che' irijyi mi'in. 23Jedye' chuc carijtaqui jụijya' mi'in, jemoñe' yụ'tiñe' ferdye' mi'in, me' ra' carijtaqui mi'in, jeñej bu'yi' Jen'dyes carijtac-dye', me' bu'jam' carijtaĉam' mi'in, jam ra' muntyi-dyes mọmo' carijtaqui mi'in. 24Chịj mi'in mu'dye Ayo' tsun so'minac ra' bijodyedyes mi'in yojdyesdyem' so'macsis räj mu'tyi' u in, me'dye ra' so'minac chime', ĉaĉaij na Cristodyes carijtaqui mi'in, mu' anictyity Ayo' mi'in. 25Tyi chuc ac̣hi' bä'yity, mu' ra' so'mac va'tacdye' jun' chuc a'c̣his jäm'taqui, ĉaĉaij na mu' Jen' räj vaj cäts cavisin' úchety muntyi' tsun, mijam yirity muju'cha' cavisin' mu' Jen'.

will be added

X\