Colossians 2

1Yụ ra' jị'chiqueyeyac mi'in, jun' chuc yụ fer dyijtuyac mi'in, fer úñi yụ cọdacdye'ĉan Jen'che' yụ mi'indyes, judyeya' mu'indyes chime' in Laodicea-ĉantyidyes in mu'in anicjetetydyes Jen' in, judyeya' mu'indyes chime' in jam chäyintyi' yụ in. Räj mi'inmun dyijtuyac yụ judyeya' cọdyete Jen' yụ mu'indyes in. 2Me' yụ yi paj qui jiĉun ĉojtyi'ĉan mu'in paj qui vaj meij mạ'jitidyeij mu'in in. Yụ mạ'je' paj qui so'mac in paj qui dyijyedye'tum shupqui in, paj qui tupuj chị́yepte in mọ' där jäm'si' dyijyedye' Jen'si' mu', mọ' jam chị́yeptes urucyaty muntyi' jiquej in. Dyijyedye' Jen'si' jiquej mu', mọ' yi' jun' chuc mu' Cristo. 3Mu' nash räj me'chupte mọ' jäm'si' dyijyedye' Jen'si' mu' judyeya' chị́dye' chime' mu', anic ya'i'si' mọ', mu'dye Cristo yirity mọ' so'misin' tsun. 4Yụ ra' jéyac mi'in, jam ra' se'vacsebi mi'in mọ' cäjsis ji'chäyitidye' mu'in se' ja'yacsity in, me' ra' tsan' ji'ma'jotacdyes p̂eyacdye' ji'shupque' in, jam qui na ram' jun' jụjjetiñe' mi'in. 5Me' ra' tsan' itŝij yụ mi'inya' q̂uin', yejĉoij qui nam' yụ dyijtuyac ĉojtyi'ĉan yụ. Anic där ma'jotyebiyac yụ dyijyedye' mi'in, yụ chịj ĉaĉaij na mi'in fer bu'yi bä'yi Jen'dyes mi'in, vaj yiri'ya' anicjetinte Cristo mi'in, mijam p̂ucushyi yocsi'tum jedye' mi'in. 6Mi'in aty jụjjetinte mu' Jesucristo, mu' aty Ayo' mi'in, mọ'dyes qui jemoñe' jịjcatinte mi'in. 7Fer bu'jam' Jesucristodyes mi'in, jeñej bu'jam' sonsi' ribin mochĉansim', me' bu'yi ra' che'i mi'in anicyi Jesucristoche' mi'in, ĉaĉaij na me' yi' mọ' se'vetiñes ji'chäyitidye'. Chime'dye ra' yejĉoij ĉojtyi'ĉan mi'in yoshoropaij jémac Jen'. 8Ĉujcatac mi'in are'ĉa se' ja'yinac mi'in jacches dyijyedye' muntyis mu'in fibis mu'in. Mọ' va'ves ji'chäyitidye' mu'in mọ' vóshi'vunsi' jiquej mu'in, muntyis mọmo' yicdye' mu'in, sọyos dyijyedye' cäc̣hä'chubi' in, mijam Cristos dyijyedye' cäc̣hä'chupte in. 9Cristo taquen' me'chupte dyijyedye' Jen'si' mu' a'ĉan mu', ĉaĉaij na Jen' bu'yi mu' Cristo. 10Mi'in chime' taquen' me'chuptinte Jen'si' dyijyedye' mu', mijam yiris jedye' jayej atsvun mi'in, ĉaĉaij na Cristoty aty mi'in. Mu' muju'cha' ayo'bu'yity, räj muju'cha'tacsi yoctyi' fer bu'yity in, judyeya' mọ'in fer bu'yis chime' in. 11Aty Cristoty mi'in, mu' nash ji'c̣honnac mi'in, jadyic bächänac ĉụi'si' dyijyedye' a'c̣his mi'in. Mọ' jeñej bu'yi ji'sei'tyinactyi' Cristo mi'in, me' bu'yi' mọ' c̣hon'dye' mi'in, jam a'dyes ji'jäcac mọ' sei'tacdye', ĉaĉaij na aty Cristoty mi'in. 12Ji'chojtidye' mi'in, mọ' jeñej bu'yi' aty nạc Cristotum mi'in, me' bu'yi' mọ' shupqui'. Mu'tumdye vañinyeban mi'in anicyedye'ya' mi'in, anicjebitinte mi'in Jen'si' ferdye' mu', mọ' vañinjebajtes mu' Cristo. 13Mi'in sän'dye'ĉan bä'yi jiquej mi'in, ĉaĉaij na juchaj me'tyinac ji'sännac mi'in jiquej, mijam méqui' jiquej me'chuptinte Jen'si' yụ'tacdye' mu', mijam sei'tactyi' chime' mi'in. ̣Q̂uin' qui nam' mu' Jen' jị'tsa'inac mi'in yiri'ya' Cristotum, judyeya' vayacjibunac räj juchaj mi'in. 14Sän'dye'ya' mu' croshche' jiquej mu' Cristo, mu' Jen' räj c̣hicon'je' déve tsun juchadyes, mọ' jeñej bu'yi' pactacdye' croshche', me' bu'yi' mọ' dévedyes tsun sánacdye', jadyic ji'me'sin' yụ'tacdye'. 15Sän'dye'ya' croshche' mu' räj ji'penacsi sọyo' in, räjtumdye fer bu'yis jiquej in, chat qui mu' jị'caveyacsi yoctyisya' vej mu'in mọ'in peñis in, mọ'ya' jị'tsicayacsi mu' Cristo. 16Mọ'dyes aty ra' jam se'vacsebi mi'in mọ' va'ves p̂eyacdye' mu'in jínactyi' in, yi mu'in: “Jam ra' jebetiñe' mi'in mọ' jam jebei'si' judío in, mijam ra' tyeij chime' mi'in. Chime'dye ạ̈räjjevac feshta mi'in, mọ' jị'jutyitidyes mạyedye' judyeya' ịvas feshta chime'”, yi in, jam ra' mọ' se'vacsebi mi'in. 17Jo'mes ji'chäyitidye' jam räjĉan bu'yis, yojdyem' onom'si' o, me' bu'yi' mọ'. Mọ' mọmo' jị'ĉoi' ayij ra' mọ' anicsis dyijyedye' Jen'si' mu'. ̣Q̂uin' chat aty atsij mu' Cristo, mu'si' qui ji'chäyitidye' cạpja tsun. 18Chime'dye pạrej mu'ya' cäjsis ji'chäyitidye' tui'tyi' in, va'bunyedye'tum yi in: “Tsun muju'cha' chịjtyi' ĉaĉaij na mu' Jen' jị'cavacdye' so'min tsun judyeya' anjer chime' tima'cacsi tsun”, yi in. Me' tsan' yi in: “Tsun jam méqui' fibi'naqui”, yi in, mu'in qui nam' där va'bunyi in, muntyis mọmo' dyijyedye' cäc̣hä'chucsebi in. Mi'in jam ra' se'vacsebi mi'in ñinacdye' mu'in. 19Mu'in me'tyity in aty jam ayotute Cristo in, mu' jo'no' bu'yity tsundyes mu' anicjejaty tsun, tsun jeñej bu'ja' a' mu'. Mu' tsạ'chusin' räj tsun, judyeya' fer bu'ja' yu'sin' tsun paj qui vaj meij dyijtutiĉa' tsun judyeya' p̂anja' Jen'dyes tsun, ĉaĉaij na mu' Jen' me' mạ'je'. 20Jesha' mi'in aty säñi Cristotum, aty c̣hoñi mi'in jacchesya' dyijyedye' sọyosya'. ¿Jun' qui dash me' taca' yejĉoij cäc̣hä'chutiñe' jacches dyijyedye'? ¿Jun' me' u mi'in yejĉoij cäc̣hä'chuc-sebi jo'mes va'ves dyijyedye' mu'in? 21Mọ' yi': “Jam ra' täjtyem ọij säcsedye', mijam ra' yocsi' jebei' mi, mijam ra' yocsi' chui' mi”, yi in. 22Fibi' mọmo' me' ạ̈räjjeyacsebi mi'in ji'chäyitidye' muntyis mu'in, mọtsis mọmo' jedye' säcsedye' p̂eye' in ji'chäyitidye'ĉan mu'in. Ọij ji'chäyitidye' muntyis mọmo' dyijyedye' me'chucsebi in. 23Mu'in cäc̣hä'chucsebity in anic jäm' ĉọi' mu'in in, yi in: “Tsun dyijyedye'tumtyi' ĉaĉaij na mọ' cäc̣hä'chui' tsun.” Chime'dye yi in: “Jemoñe' ĉụi' jị'ñibe'caĉa' a' tsun, judyeya' ji'c̣hu'c̣huyaĉa' chime', cäc̣hä'chucdye'ya' ji'chäyitidye' tsun”, yi in. Me' tsan' me' yi in, mọ' qui nam' jam jun' ji'dyäcacsebi' a'c̣his a'si' dyijyedye' mu'in.

will be added

X\