Colossians 1

1- 2Yụ Pablo, yụ nash jutactyi' Jesucristoty mu', mu' Jen' me' yu'tyin yụ. Yụ nash pen'dyetun yụ mu' vojity tsun Timoteo. Yụ sáñe' ọij mi'indyesi' vojity tsun, Colosasĉantyi' Jen'tyi' ñuru'tyity mi'in, Cristoty atsvun mi'in, anic rụij cäc̣hä'chutintety Jen'. Yụ cọdyete Jen' mu' Ạvatusin'tyi' tsun paj qui mu' ñịbe'jitidyes so'minac mi'in paj qui chime' so'minac ma'jodye' ĉojtyi'ĉandyes mi'in. 3Räjĉan cọdaquiya' Jen'che' tsun mi'indyes, yoshoropaij jéte Jen' tsun, mu' Jen' Jesucristoty, Ayoty tsun, 4ĉaĉaij na tŝútyin tsun p̂eyacdye' jun' chuc mi'in anicjetinte mu' Cristo Jesús judyeya' mạ'jeyacsi mi'in räj mu'in Jen'tyi' ñuru'tyity in. 5Mi'in me' q̂uin' ĉaĉaij na tashche' jiquej se'vise mi'in mọ' rụijsis ji'chäyitidye', mọ' nash jäm'si' p̂eyacdye' Jen'si' mu', ji'jäque'si' mọ' ñịbe'yedyes, mọ' ra' so'minacsi' mi'in mạyedye'che', mọ' bisva'tiñes q̂uin' mi'in, mọ' ji'bisiyinacsi' Jen' mọ'che'. 6Mọ' jäm'si' p̂eyacdye' Jen'si' mu' yejĉoi' ji'tse'e' pai' bu'yi' ọij jac judyeya' mi'inya' chime', mọ' nọ́tyetacsi' tyi chuc se'vety in judyeya' anicjety in, yojdyem' mọ' ñútyinac jiquej u tashche' se'vetiñe'ya' jiquej mi'in. Mọ' p̂eyacdye' p̂eijbite ñịbe'jitidyes Jen'si' mu', mi'in jäm' chị́yeptinte mọ' p̂eyacdye' mu', anicsis mọ' p̂eyacdye'. 7Jiquej mu' Epafras, mạ'jeyacdyety tsun mu' úñi Jen'dyes tsuntum, mu' ji'chäyinac jiquej Jen'si' p̂eyacdye' mu', ĉaĉaij na mu' jị'cätse'tyi' Cristodyes, mi'indyes úñi mu'. 8Chimu'dye jin tsun jiquej jun' chuc Jen'si' Ạ'edye' mu' yi' paj qui mạ'jeyacsity bä'yi mi'in. 9Tsun aty chị́quiya' mọ' jiquej, jun' chuc me' anicyi mi'in, chat qui tsun tiyacchui' cọdyete Jen' mi'indyes, mijam farajje' tsun cọdyete Jen' tsun mi'indyes. Tsun cọdyete Jen' paj qui tupuj chị́yeptinte mi'in dyijyedye' mu' räj, paj qui anic muju'cha' dyijyedye'tum judyeya' chị́dye'tum bä'yi mi'in, mọ' so'minacsi' Jen'si' Ạ'edye' mu'. 10Chat me'dye qui ra' rụij bä'yi mi'in, jo'mes nash mu' mạ'je' Ayo' tsun, paj qui räjĉan ma'jotyinac mu', me' ra' chat räjĉan jäm'yedye'tum bä'yi mi'in, paj qui yejĉoij chị́yetinte mi'in jun' buty mu' Jen'. 11Chime'dye tsun cọdyete mu' muju'cha' ferdye'tumtyi' Jen', paj qui därsi'ya' ferdye' mu' yu'tyinac mi'in paj qui fer bu'yi mi'in, paj qui tyum'chutidye'tum ji'cajñetiñe' mi'in mọ' carijsis jị'ĉojtiñes mi'in. 12Ma'jodye'tum yoshoropaij jémac Jen', mu' aty jäm' yu'tyinac mi'in paj qui mi'inmun tupuj Jen'ya' bä'yi mi'in mạijquedye'ĉan Jen'si' mu', räjtumdye Jen'tyi' ñuru'tyity in, mu'che' ra' räj so'minac ñịbe'yedye' mu'. 13Mu' nash ji'c̣honsin' tsun tojmadye'-ĉantyi'ya' ayo', chat qui yu'sin' paj qui tsun ayotuja mu' mạ'jeyac-dyety Ạva' mu'. 14Ạva'ya' mu', mu' Jen' ji'c̣honsin' tsun judyeya' c̣hicon'jityisin' juchaj tsun. 15Cristo cạvetety jiquej in, mu' jorojĉanjisin' mu' jam nạijtyejaty Jen', ĉaĉaij na Jen' bu'yi mu' Cristo.179 Mu' nash tashche' bu'yity Jen'tyi' Ạva' mu', mu' jam jäm'tacdye', mọ' na jäm'tacdye' jam me' in, anic moch in. 16Mu' Jen' Cristotum räj jäm'tacsi jedye' in, mạyedye'ches in judyeya' jacches, jorojĉansi' in judyeya' jam jorojĉansi' in, anjer in judyeya' sọyo' in, judyeya' fer bu'yity in, judyeya' ayo'bu'yity in, judyeya' yụ'tactyi' chime' in, me' me' räj jäm'tacsi mu' Jen' Cristotum, chime'dye Cristodyes jäm'tacsi mu' Jen'. 17Jambi'dyem' jäm'tac jedye' in, tạ'caty mu' mu'ya' Cristo, mu'dye räj yụ'tacsi jäm' bu'yi' in räj jäm'tacdye' mu'.180 18Cristo jo'no' bu'yi mu'inche' in anicjetetyche' Jen' in, mu'in na a' bu'yi in, mu' tsạ'chucsi. Mu' tashche' bu'yity Jen'tyi' Ạva' mu', mu' tashche' vañinyebantyi' säñity jiquej, mọ'dyes qui tashche' bu'yi ayo'bu'yi, räjdyes ayo'bu'yi mu'. 19Ĉụi'si'ya' dyijyedye' mu', mu' Jen' yi paj qui mu' Cristo me'chupte räj Jen'si' dyijyedye' mu' judyeya' ferdye' mu', mu' nash Jen' bu'yi. 20Mu' Jen' dyijyi jayu'ti mu' Cristo, mu' yụ'tacsi paj qui räj jacchety jedye' in judyeya' mạyedye'ches jedye' in räjtumdye jajbu'yety in, paj qui räj jäm'jibun Jen'tum mu'in in, mọ' chäsh mu' yụ'taquis croshche' jiquej mu', mọ'ya' c̣hẹi'ya'jeyacsi Jen' räj in. 21Jiquej mi'in anic moch bä'yi Jen'ya' mi'in, anic fạ́quetinte Jen' jiquej mi'in, me' mi'in a'c̣hisya' dyijyedye' mi'in, ac̣hi' bä'yi jiquej mi'in. 22̣Q̂uin' qui nam' mu' Jen' yu'tyinac aty jäm'jibun Jen'ya' mi'in sän'dye'ya' Cristosya' mu', mọ' jäm'jibunac mi'in Jen'tum. ̣Q̂uin' aty rụijtyity mi'in aty qui jam jụ'ñiij mi'in, me' ra' yu'tyinac ĉụi'si'ya' vej mu'. 23Mi'in qui nam' jemoñe' yejĉoij anicyi Jen'che', fer bu'jam', paj qui jam p̂ucushyi mi'in yocsi'tum jedye' in, mijam ra' chime' farajjebitinte mọ' jäm'si' p̂eyacdye' Jen'si' mu'. Yejĉojam' mọmo' bisvac mọ' so'minacsi' ra' Jen', mọ' ji'jäque'si' mọ' p̂eyacdye' mọ' se'vetiñes mi'in. Ọij p̂eyacdye' pai' jacche' se've' in. Jen' yu'tyin yụ jiquej paj qui yụ voro'tacsi mọ' p̂eyacdye' pai' jana' ĉụi' bä'yity in jéyacsi yụ. 24Me' tsan' ñịbe' cạve' yụ voro'tacdye'ya' mi'indyes Jen'si' p̂eyacdye' mu', ma'joij qui nam' bä'yi yụ. Me' yụ ñịbedyesya' jị'cätsepte Cristos ñịbedyes mu', yódyem' mu' ñịbe' cạvise jiquej u mu'indyes in anicjetetydyes Jen' in, mu'in nash Cristoty a' bu'yity in, me'dye yụ chime' ñịbe' cạve' ĉụi'si' a' yụ mu'indyes in voro'tacdye'ya' mu'in. 25Mu' Jen' yu'tyin yụ paj qui yụ úñi anicjetetydyes in. Mọ' yụ'tacdye' so'minsi' yụ paj qui yụ nọ́tyeyac mi'in, mu' mạ'je' paj qui yụ räj jị'chiqueyacsi p̂eyacdye' mu'. 26Mọ' ji'chäyitidye' mu', mọ' jam jị'chiqueyacsis urucya' muntyi' jiquej in, pai' bu'yity in, q̂uin' qui nam' mu' Jen' ji'chäquiyisin' tsun mu'tyi' ñuru'tyity tsun. 27Jen' dyijyi jị'chiqueyacsi mu'tyi' ñuru'tyity in ĉụi'si' dyijyedye' mu', mọ' jam chị́yeptes urucyaty muntyi' jiquej in. Mọ' dyijyedye' mu' anic jiyi' där jäm'si' mu', mạ'je' paj qui räj jacchety muntyi' in se've' in p̂eyacdye' mu', mọ' p̂eyes jun' chuc mu' Cristo jajbu'yinac ĉojtyi'ĉan mi'in, mu' Jen'yadyety yu'tyinac mu' mạijquedye'tumtyi' Jen', mọ' bisva'tiñes mi'in paj qui mu'ya' bä'yi mi'in. 28Mọ'dyes Cristos p̂eyacdye' mu' voro'tacsi tsun räj muntyi' in. Mu' Jen' so'min tsun räj dyijyedye' mu' anicsis, paj qui dyijyedye'tum carijtaqui tsun. Tsun fạra'jeĉunac-sebi a'c̣his dyijyedye' mu'in, judyeya' jị'chiyacsi tsun paj qui rụij bä'yi in judyeya' paj qui fer bu'yi ĉojtyi'ĉan mu'in, me' ra' tsun yụ'tacsi Jen'si'ya' vej mu' mu'in Cristoty in. 29Mọ'dyes fer carijtaqui yụ Jen'dyes mọjo'chasya' ferdye' so'minsi' yụ mu' Cristo, mọ'ya' úñi yụ jị'chiyacsi yụ Jen'si' p̂eyacdye' mu'.

will be added

X\