Acts 9

1- 2Saulo yejĉoij me'tacsi mu'in cäc̣hä'chutety Ayo' in, anic fer c̣hojvacsi, mu' mạ'je' räj ijacsi. Chat qui mu' Saulo dyijyi yocsi'ĉan ra' jịjcaij bä'yedye' Damascoĉan, quevacsequi muntyi' in mu'ĉan mu'in cäc̣hä'chuptety in mọ' mụi'sis majmi Ayo'si' mu', son' in judyeya' p̂en in. Jerusalénĉan ra' cạcsi, mu'ĉan qui ra' ĉär'tacsi, mọ' dyijyedye' mu' Saulosi'. Mọ'dyes mu' Saulo jä'mij ĉọcte mu' tashche' cudyitity Jen'che', cọdyete yiris ferdye'tumsi' paper, mọ' ra' jị'caveyacsi mu'in tashche' bu'yity vajmu'yaijĉan in Damascoĉan, paj qui mu'in so'mete in jụjjetety Jesucristo in, juna' ĉụi' in. 3Me'dye mu' sacje' mu' Saulo pen'dye'tum, Damascove jịjcaij in. Aty c̣hẹi'ya' tyiti in mọ' bä'yedye' Damasco, vatyquej ayij mạyedye'ches mạijyis, mạijjajiti mu' Saulo, anic fer játŝuti. 4Mụijya' tŝọij Saulo, chat qui se've' yiris p̂eyacdye' yi' jajiti: —Saulo, Saulo, ¿jun' dash me'ti mi? —jéte. 5Vorjete Saulo: —¿Tyi ĉaĉaij mi u? Vorjajiti yi: —Yụ u Jesús, yojdyetydyem' me'tety um. 6Vañinyebada, tạij bä'yedye'ĉan jịjcava, mu'ĉan ra' jin in jun' chuc ra' mi —yi jéte Saulo. 7Mu'in na pen'dye' mu' tyumumuj tyeij ĉojtyi' mu'in, me' tsan' se've' p̂eyacdye' in jam qui nam' muntyi' nạijte mu'ya' in. 8Sacyeban mụijyaty Saulo. Doijroyeban tsan' aty jam jun' naijbun. Mu'in qui pen'dye' mu' un chupte in Damascoĉan cạte in. 9Chibin mạyedye' mu'ĉan me' bu'yi, yejĉoij jam naijbun mijam méqui' säcsi mijam tyeij chime'. 10Mu'ya' Damascoĉantyi' anicjetety Jen' Ananías tịj mu'. Mu' Ayo' tsun mu'ya' jị'cavacdye'ĉan ji'caviti, jafaijti: —Ananías —jajiti. Vorjete Ananías: —Utsdye u yụ. 11Ayo' jajiti: —Tạij mu've jịjcava mọ' caye Chụi'sis je'si' in, mu'ĉan ra' quequevcapte mi Judassi' aca' mu'. A ra' dạcbiteyam jéyacsi ram: “¿Uĉan tyu' u dyäqui mu' Saulo, Tarsoĉantyi' muntyi'?” jéyacseva. Mush tyu' mu' cudyiva'quin yụ q̂uin', 12judyeya' chime' jị'cavacdye' so'mete yụ, mu' cavin mi Ananías, mi ca ra' ĉọcte judyeya' ca ra' toco'jectem paj qui quivij naijbunve mu', mọ'dyes mu' bisin mi —jajiti Ayo'. 13Ananías vorjete: —Jun' a vu', anic dai' muntyi' jin yụ in mu' muntyi' där jị'ñibe'cacsi mítyi' muntyi' in, Jerusalénĉan bä'yity in. 14Mọ'dye mọmo' dyijyedye' tui' atsij úya' q̂uin', tui' ca yiris ferdye'tumsi' paper, mọ' so'metes in mu'in tashchety cudyitity Jen'che' in, yi' ca mọ' mu' tupuj tapjeyacsi räj mu'in ĉútity míche' in —yi Ananías jéte Ayo' tsun. 15Vorjajiti Ayo' tsun: —Tạij ĉọcme mọmo' ĉaĉaij na yụ tsim'te uts muntyi' mu' ra' voro'tacsi mu'in Israeltyi' vóshi' in judyeya' mu'in yoctyi' muntyi' jam judío in judyeya' jacchety ayo' chime' in, mu' ra' p̂iyin yụ, räj ra' jéyacsi muntyi' in. 16Yụ ra' jị'caveyete paj där ñịbe' cạve' mu' yụ́dyes —yi Ayo' jajiti Ananías. 17Me'dye mu' sacje' Ananías ĉọcte mu' Saulo siste, dạquicte mu'ĉan, chat qui un yụ'taqui mu'che' jéte: —Vojity Saulo, mu' Ayo' tsun mu'dye Jesús, mu' ji'cavitity majmiya' míya', mu' nash jutin yụ paj qui naijbun quivij mi judyeya' paj qui chime' Jen'si' Ạ'edyem' ji'tŝun mi —yi Ananías jéte. 18Me'ĉandye jọ'chai' je'ñes p̂áp̂an' vejĉansi' mu', chat quivij naijbun mu' Saulo. Sacyeban judyeya' ji'chojti qui mu'. 19Chat q̂uin'dyem' säcseban mu' judyeya' qui jiĉun. Taĉan chum mu'ĉan Damascoĉan me' bu'yi, juñucsi' mạyedye' pen'dyetucsi mu'in jụjjetety Jen' in. 20Saulo chụi' vatyquej ji'tye' voro'tacdyem' vajmu'yaijĉan judío in, p̂eijte mu' Jesús jéyacsi mu' Jen'tyi' Ạva' mu'. 21Mu'in se'vetety in anic mu'in räj äjjete in. Yi jítidyeij in: —¿Jam adac utsdye mọmo' jiquej jị'ñibe'cacsity mu'in ĉútity Jesúsche' in Jerusalénĉan bä'yity in? ¿Jam adac mu' atsij úĉan tapjeyacsity ra'? Mạ'je' Jerusalénĉan cạcsi mu'ĉan qui ra' ji'me'tacsi mu'inya' tashchetyya' cudyitity Jen'che' in. ¿Jun' buty me' q̂uin' voro'tacsi mu'? —yi in. 22Dadam' ferdye'tum Saulo voro'tacsi, mijam ọya'yai' p̂eyacdyem', jéyacsi mu' Jesús Ji'c̣honacsity muntyi'. Mu' ji'penacsebi p̂eyacdye' mu'in Damascoĉantyi' judío in, aty jam tupuj vorjete in. 23Aty mu' dai' mạyedye' me' voro'tacsi mu' Saulo, mu'in qui judío in dyijyi in mạ'je' ijate in. 24Mu'in ĉọjcabi' in bä'yedyes chụi'dye' mọ', mạij judyeya' tsedyedye' me' bisva'bajte in, mạ'je' tsan' ñutsjeĉun'te Saulo in, me'jete ca ra' in. Mu' na Saulo chị́yacsebi mu' dyijyedye' mu'in, 25mọ'dyes qui mu'in anicjetety Jesucristo in ji'c̣honte in. Yiris tsedyedyes mu'in bä'yedyesche' na'ru bojvi in ji'baquitsbajte in därtyi'ĉan canasto, jorojya' jịjijcayebajte in, me' bu'yi ji'c̣honte in. 26Aty venjoijya' Jerusalénĉan mu' Saulo, mạ'je' tsan' yiri'ya' pen'dyetucsi mu'in anicjetety Jesucristo in, mu'in qui nam' jam jụjjete in ĉaĉaij na mu'in quijñete in, jeñej jam jụjjetety Jesucristo ĉọ́te in. 27Chat qui mu' Bernabé cạte mu' Saulo, jị'cavete mu'inya' in jutactyi'ya' Jen'tyi' mu'. Yi mu' Bernabé jéyacsi: “Uts Saulo cạvise mu' Ayo' Jesús majmiya' judyeya' mu' Ayo' jap̂iyitaque judyeya' qui Damascoĉan voro'tacsaque Saulo, p̂eijte mu' Jesús, jam dam' noi'yedye'tum jéyacsi”, yi mu' Bernabé jéyacsi jutactyi' Jen'tyi' mu'. 28Me' bu'yi jụjte in chat qui ji'yajcati taĉan mu'intum in voro'tacsi, mijam méqui' noi'yedye'tum jéyacsi Ayo'si' p̂eyacdye' mu'. 29Mu'dye voro'tacsi mu'in judío in, mu'in p̂eyaquity in griegosĉan p̂eyacdye', mu'in na dyijyi in mạ'je' ijate in mu' Saulo. 30Anicjetety Jesucristo in chị́qui in yocve qui mu'in cạte in Cesareaĉan. Aty mu'ĉan venjoij in jutete qui in paj qui Tarsoĉan jịjcaij. 31Aty me'si' mu'in anicjetety Jesucristo in jäm' bä'yi in, aty jam jedyeij in, mu'in Judeaĉantyi' in judyeya' Galileaĉantyi' in judyeya' Samariaĉantyi' chime' in, aty jam jị'ñibe'cac in. Yejĉoij p̂añi Jen'dyes in judyeya' yejĉoij che'ejĉoij in mu'in jụjjetety Jesús in ĉaĉaij na Jen'si' Ạ'edye' räjĉan nọ́tacsi'. Räjdye irijyi Ayo'che' in mu'in in. 32Pedro pai' räj ĉọcsequi mu'in anicjetety Jesucristo in. Räj Lidave jịjcaij ĉọcsequi mu'vety in. 33Dạquicte mu'ĉan puñichjoijtyi' muntyi', Eneas tịj mu'. ̣Q̂uen'ĉan yómodye' chụduj bu'yi jubijĉan mu', me'qui' jị'ĉojtye' puñichjodye' mu'. 34Pedro yi jéte: —Eneas, Jesucristo aty ji'chäĉun mi, vañinyebada, tsuptaĉada jubij mi —jajiti. P̂eyacdye'ĉandye chäĉän mu', vañinyeban vatyquej. 35Räj Lidaĉan bä'yity in judyeya' Sarónĉantyi' chime' in cạvete in chäĉädaque, cächyejoij mu'in chime' jụjjete Ayo' in. 36Yiris p̂en Jopeĉan bä'yi'si', anicjetes Jesucristo, Tabita tịj mọ', griegosĉan p̂eyacdye': Dorcas. Ọij p̂en anic ñịbe'yis räjĉan nọ́tacsi' tyi chuc jayej-jotaquity jedye' in. 37Chat japacjoi' mọ' Dorcas aty me'si' tac tyei' säñi'. C̣hicon'jetaque' in chat qui chuden'tye' in che'vesche' vavdye' mọ'. 38Mọ' bä'yedye' Jope c̣hẹi'ya' bu'yi' mọ'tum yocsi' bä'yedye' Lida, yóĉandyem' dyäqui Pedro u. Chị́qui mu'ĉan mu' Pedro Lidaĉan, chat qui mu'in Jopeĉantyi' in anicjetety Jesucristo in jutacsi pärä' muntyi' in paj qui jäcte in. Ventyecte in jéte in: “̣Q̂uin'dye ca ra' Jopeĉan jịjcaij mi”, jéte in. 39Me'dye mu' Pedro cäc̣hen'yejoij jịjcacseban Jopeĉan jịjcaij in. Venjoij in che'vesche' vavdye' ji'bojvete in, yóche'dyem' mọ' Dorcasvun jiquej o. Mọ'che'dye mọ'in muñemunsi' p̂en in, táreva'que' in Dorcasvun. Jị'caveyete in mu' quị'si' dyebetactety jiquej tsạ'dyem'. 40Pedro ji'shupcacsi räj mọ'in in, chat qui dyụtsyi mu' cọdaqui Jen'che'. Chat qui cạvi, je' mọ' p̂envun: —Tabita, vañinyebada. P̂eyacdye'ĉandyem' doijrojyeban' cạvete mu' Pedro p̂utsquen'yeban' qui. 41Tapjebi' qui un mọ', sacjeban' fayacseban qui jorojyas muñemunsi' p̂en in judyeya' jụjjetety Jen' in. Pedro jị'caveyacseban aty mọ' tsạ'ebadaque. 42Räj Jopeĉan bä'yity in chị́qui in jun' chuc mu', mọ'dyes qui mu'in chime' cächyeĉojĉoij mu'ĉan jụjjete Ayo' in. 43Mu' na Pedro mu'ĉan dai' mạyedye' Jopeĉan, jajbu'yete yirity carijtye'tyi' sho'pa', Simón tịj mu' mu'ya' dyäqui mu' Pedro.

will be added

X\