Acts 6

1Aty dayi in anicjetety Jen' in. Pärä' ñuru' in, pạrej griegosĉan p̂eyacdye' p̂eyaqui in, pạrej na ĉụi'si'ĉan p̂eyaqui in. Chime'dye dai' mọ'ya' säntaquis vämtyi' in muñemunsi' in, räjĉan mạyedye' so'macsi tsạ'bu'yedyes mọ'in. Mu'in na griegosĉan p̂eyaquity in ñinacsi mu'in in p̂eyaquity ĉụi'si'ĉan in. Yi in: “Tsunĉan säntaquis vämtyi' in jam jäm' so'mac in, jam jeñej yocsi' in”, yi in. 2Mọ'dyes qui mu'in yiri'tac pärä' jiyity jutactyi' Jen'tyi' mu' vajmu'ya'jeyacsi in mu'in anicjetety Jen' in. Jéyacsi in: —Tsun jam tupuj farajje' voro'tacdye' Jen'si' mu', jam ra' tsun me'chui' mọ' carijtacdye' ji'chetacdye' jedye' in mọ'in säntaquis vämtyi' in. 3Dam'dye jäm' mi'inĉantyi' tsim'tacsi mi'in muntyi' in, yävätidye' rụi'cu' in, jụ'ñity chuc mi'in chị́yacsity dyijyedye'tumtyi' in judyeya' Jen'si'tumtyi' Ạ'edye' bä'yity in. Aty tsim'tacsiya' mi'in, tsun qui ra' yụ'tacsi paj qui mu'in ĉọjcai'tyi' jedye' in. 4Tsun ra' jẹjcai' cọdyeva'te Jen' judyeya' voro'tacsi Jen'si' p̂eyacdye' tsun —jéyacsi in mu'in jutactyi' Jen'tyi' mu'. 5Mu'in anicjetety Jen' in räj ma'jotacsebi p̂eyacdye' mu'in. Chat qui tsim'te in mu' Esteban, fer anicjetety Jen', judyeya' Jen'si'tum Ạ'edye' bä'yity mu'. Chitsim'tacdye yoctyi' in me' me' in: mu' Felipe judyeya' mu' Prócoro judyeya' mu' Nicanor judyeya' mu' Timón judyeya' mu' Parmenas judyeya' mu' Nicolás. Mu' Nicolás Antioquíaĉantyi' mu', jam mu' judío na'i, uts na mu' me'chucsebi judíos ji'chäyitidye' mu'in. 6Aty tsim'tacsiya' in, chat qui mu'insi'ya' vej cạcsi in, aty jutactyi'ya' Jen'tyi' mu'. Mu'in qui cọdyete Jen' in chat qui yụ'taqui un in, me' bu'yi yụ'tacsi in. 7Yejĉoi' jị'tse'epte in Jen'si' p̂eyacdye' mu', yejĉoij dayi in mu'in anicjetety Jen' in Jerusalénĉantyi' in. Chime'dye mu'in in cudyitity Jen'che' in anic mu'in dai' jụjtye' in mọ' p̂eyacdye' Jen'si' mu'. 8Esteban anic Jen'si'tumtyi' nọ́tacdye' judyeya' ferdye' jị'caveyacsi muntyi' därsi' äjyedyes. 9Pạrej mu'ya' muntyi' judío in, yocsi'ĉantyi' vajmu'yadye' in, tịj mu'in “C̣hoñity Uñity in”, me' jéyacsi mu'ĉantyi' in. Me'dye mu'ĉantyi' in pen'dyetucsi yoctyi' judío in Cireneĉantyi' in judyeya' Alejandríaĉantyi' in judyeya' Ciciliaĉantyi' in, judyeya' Asiaĉantyi' chime' in, me' me' ĉọshte Esteban in, chuti p̂eyacdye'ya' mu'tum in. 10Mọ' na Jen'si' Ạ'edye' mu' jaso'miti mu' dyijyedye', mọ'dyes mu'in jam jun' ji'pente in p̂eyacdye'ya'. 11Mọ'dyes qui mu'in ya'itacsi yoctyi' muntyi' in paj qui väñädye'tum p̂eyaqui p̂eijteya' in, paj qui yi in: “Tsun uts se'vete Esteban p̂eijte Moisésvun judyeya' Jen' chime', a'c̣histum p̂eyacdye' ji'shupque'”, yi in ji'me'te Esteban in. 12Mọ'ya'dye p̂eyacdye'ya' fạ́coij ji'tacsi muntyi' in, räjtumdye tashche' bu'yity in judyeya' mu'in jị'chiyacsity yụ'tacdye' chime' in. Mọ'dyes qui mu'in tapjete in mu' Esteban, ayo'ya' cạte in. 13Jéyacsi muntyi' in paj qui väñädye'ya' ji'me'te in. Yi jéyacsi ayo' in: —Uts muntyi' räjĉan a'c̣hisya' p̂eyacdye' p̂eijbite Jen'si' aca' mu', judyeya' yụ'tacdye' chime' mu'. 14Anic tsun se'vete uts yi mu': “Jesús Nazaretĉantyi' tas ca ra' morocjepte ọij Jen'si' aca' mu', judyeya' ca ra' chime' yoc yụ'tac räj yụ'tacdye' tsun, yu'tyiyisin'si' Moisésvun jiquej”, yi nash uts Esteban se'vete tsun —yi mu'in väñäijtyi' in ji'me'te in. 15Räj ayo' mu'ĉantyi' in judyeya' yoctyi' muntyi' chime' in vaj mọ'che' je' vej in cạvete in Esteban, pashyi vatyquej vejya' mu' cäts anjer vejya' ji'ĉuti.

will be added

X\