Acts 5

1Chime'dye mu'ya' yirity muntyi', tịj mu' Ananías, Safira tịj p̂en mu'. Chime'dye mu'in in ji'mincaqui yiris jac mu'in. 2Me' mu'in dyijyi in chet querec̣ha pạrejjeyaqui in ĉụi'dyety mu'in, mu'in na jutactyi' Jen'tyi' mu', chet qui so'macsi in. “Mush uts querec̣ha jacyaty”, jéyacsi. 3Mu' na Pedro yi jéte: —Ananías, ¿jun' me' um ji'site' Sọyo' Satanás ĉojtyi'ĉan u mi? Jeñej aty ra' tsan' väñätui' Jen'si' Ạ'edye' ĉúti um. Chet mu' querec̣ha jacyaty pạrejtaqui mi ĉụi'dyety mi'in. 4Mọ' jac ĉụi'si' jiquej mi. Aty ji'mincaquiyam querec̣haya', mu' ĉụi'tyi' mọmom. ¿Jun' me' dyijyi ĉojtyi'ĉan um? Jeñej aty vaj muntyi' väñätutiĉa' u ĉúti mi, jam na me', Jen'mun chime' väñätutem —yi jajiti Pedro. 5Yédye'ĉandye mọmo' jọ'chaij säñi mu' Ananías. Räj mu'in se'vaquity in jäm' mu'in itŝij tyeij in noi'yi in. 6Atsij mu'in nanamuntyi' in comon'bite a' in chat qui nạ́te in. 7Aty chibin hora me' bu'yi', ĉụi'dye ayij p̂en mu' Ananíassi'. Mọ'ĉan siti' mijam chị' mọ' jun' chuc vämtyi' mọ'. 8Chat qui mu' Pedro je': —¿Me'si'che' ji'mincatiñe' mi'in mọ' jac yoj jitiĉa'dyem' tsun u mi'in? ¿Rụij ca' mọ'? —je' Pedro. Vorjete mọ': —Anic me'si'che' ji'mincaqui' tsun. 9Mu' qui Pedro vorje': —¿Jun' ca' me' mi'in vaj cäts dyijyi' mi'in jị'ĉojtiñe' Ayo'si' Ạ'edye' mu'? Mush tyu' útsi in rudyu'jectety in vämtyi'vun mi, chime'dye ra' mi chịmo'ya'dye ram jịjcai' —je' mu' Pedro. 10Yédye'ĉandyem' mụijya' tŝọi' jọ'chai' säñi'. Siti mu'in nanamuntyi' in, sänaques dạquique' in. Chịmo'ya'dye rudyu'jeque' in, yóya'dyem' vämtyi'vun om' rudyu'tac. 11Räj mu'in anicjetety Jen' in där mu'in noi'yi in, räjtumdye yoctyi' se'vaquity in. 12Jutactyi' Jen'tyi' mu' dai' qui' jị'caveyacsi Jen'si' ferdye' mu' muntyisya' vej mu'in. Mu'in anicjetety Jen' in tsudyujñiti in Jen'si'ĉan aca' in väc̣häjc̣häsve Salomónsi', mu'ĉan yiqui tsudyujñiti in. 13Mu'in na yoctyi' in jam anicjetety Jesucristo in anic jäm'yi ĉọcsi in mu'in anicjetety Jesucristo in, jam qui nam' jịjcatacsi in ĉaĉaij na noi'yi in. 14Pạrej qui nam' muntyi' in yejĉoij sitacsi in, son' judyeya' p̂en in, dayi mu'in in anicjetety Jesucristo in. 15Muntyi' in aty cạvepteya' ferdye' in Jen'si' mu', chat qui ji'shupcacsi jorojya' in mu'in are'reijtyi' in, mu'ya' chuden'jeyacsi in yóya'dyem' ra' tyeij Pedro u, paj qui cajnacsi mu' Pedro onojnodyem' mu'si' mu'inche' tŝọi' mu', mọ' qui ji'chäcacseban'. 16Chime'dye yocsi'ĉantyi' bä'yedye' in, c̣hẹi'yas Jerusalén, mu'ĉantyi' dai' atsij in tucsi are'reijtyi' in judyeya' sọyo'tumtyi' in, mu' räj ji'chäcacseban. 17Mu' tashchety cudyitity Jen'che' yojtumdyem' pen'dye' u mu' mu'in Saduceo in, yoqui in ĉaĉaij na dai' muntyi' in jịjcatacsi in mu'in jutactyi' Jen'tyi' in. 18Mọ'dyes qui mu'in tapjeyacsi in jutactyi' Jen'tyi' mu', ĉär'taquisĉan ĉär'jeyacsi in. 19Mọ'dye tsedyedye' yirity anjer Ayo'tyi' mu' atsij vanacjetyetac-seban chụi'dye' ĉär'taquissi'. Jäcacseban judyeya' jéyacsi: 20—Tạij mu'ĉan Jen'si'ĉan aca' jịjcajam', voro'tacsejam' mu'ĉan, jéyacsejam' muntyi' in mọ' p̂eyacdye' mọ' mụi'sis majmi cại'si'. 21Jutactyi' Jen'tyi' mu' chiquepte p̂eyacdye' in. Aty nojno mạyedye' pam'dye Jen'si'ĉan aca' siti in, tiyacchuti jị'chiyacsi mu'ĉan in. Mu'in na ayo' in jam chịj in. Mu' tashchety cudyitity Jen'che' judyeya' mu'in nọ́taquity in, vajmu'ya'jeyacsi mu'in tashche' bu'yity judío in räjtumdye ayo' in. Aty vajmu'yaij in, jutacsi tsan' väc̣hä'tyity in paj qui jäcacsi in mu'in ĉär'taquisĉantyi' jutactyi' Jen'tyi' mu'. 22Aty venjoij ĉär'taquisĉan in, aty mu'in itŝij mu'ĉan in. Ca'ñibun in jéyacseban ayo' in: 23—Venjoij mu'ya' tsun ĉä'räi' tsan' jäm' mọ' dạquique' tsun. Chụi'dye'ya' mu'in väc̣hä'tyity in ĉọjcacva'joij in. Aty tsan' vanchui' chụi'dye' tsun, itŝij méquity atsvun mu'ĉan in —yi mu'in úñity in jéyacseban in. 24Se'vacsebi p̂eyacdye' mu'in, mu' ayo' mu'in yụ'tactyi' in ĉọjcai'tyi' in Jen'si' aca' mu' judyeya' mu'in tashchety cudyitity Jen'che' in anic mu'in äjyi in, yi jítidyeij in: —¿Jun' buty me' uts muntyi' in? 25Vatyquej atsij yirity muntyi' jéyacsi: —A na jiquej mu'ĉan in mu'in ĉär'tactyi' muntyi' jiquej in, aty Jen'si'ĉan aca' mu'in in jị'chiyacseva'joij muntyi' in —yi mu' jéyacsi. 26Mọ'dyes qui mu'in cavin shupqui in mu'in yụ'tactyi' in ĉọjcaptety Jen'si' aca' in ayo'tum mu'in, chat qui jäcacsi in, jam qui nam' jun'jeyacsi in ĉaĉaij na quijnacsi muntyi' in, vátyequej ra' farajnacsi mijya' in. 27Ji'sitacsi qui ayo'ya' in yụ'tacsi mu'insi'ya' vej in. Mu' tashchety cudyitity Jen'che' jéyacsi: 28—Tsun ferche' jéyac mi'in jam ra' yejĉoij dam'dye jị'chiqueyacsi muntyi' in mu'si' p̂eyacdye' mọ' jị'chiyacsis mi'in. Me' tsan' jéyac tsun, mi'in qui nam' yejĉoij jị'chiqueyacsi räj Jerusalénĉantyi' muntyi' in ji'chäyitidye' mi'in, judyeya' dyijyi mi'in mạ'je' tsunmun ji'me'tiĉa' mi'in uts sän'dye' muntyis —jéyacsi ayo'. 29Pedro yoctyi'tum jutactyi' Jen'tyi' mu' vorjeyacsi in: —Jemoñe' tashi chiquete Jen' tsun jäqui've ra' muntyi' in. 30Me' tsan' mi'in ji'ijatinte mu' Jesús jiquej judyeya' ji'pactinte croshche' jiquej mi'in, Jen' qui nam' vóshi'vuntyi' jiquej tsun, mu' jaji'tsa'ibun, 31mạyedye'che' jácabun, judyeya' jayu'bun tacve bu'ban Jen'ya' mu'. Jen' jayu'bun paj qui ayo' bu'yi mu', judyeya' Ji'c̣honacsity muntyi'. ̣Q̂uin' chat mu' so'misin' ñịbe'jitidyes mu' paj qui tsun Israeltyi' vóshi' tsun tupuj caman' dyijyebajsha' juchajche', judyeya' paj qui mu' Jen' vayacjibusin' juchaj tsun. 32Tsun nash jéyacsity räj ọij q̂uin', chime'dye me' Jen'si' Ạ'edye' mu' me' jéyacsi', ĉaĉaij na mu' Jen' mọ' so'macsi tyi chuc chiquetety in —jéyacsi mu' Pedro. 33Mu'in ayo' in aty se'vacsebi p̂eyacdye' in, jäm' mu'in fạ́coij tyeij in, dyijyi in mạ'je' me'ĉandye tsan' ijacsi in. 34Mu'ya' na yirity mu'ĉantyi' ayo', fariseo mu', Gamaliel tịj mu'. Mu' jị'chiyacsity yụ'tacdye' chime', mu' ạ̈räjjetety muntyi' in. Sacyi mu' Gamaliel jéyacsi paj qui ji'shupcacsi chum in Jen'tyi' jutactyi' mu'. 35Yi jéyacsi ayo': —Chätidye', mi'in Israeltyi' vóshi' mi'in, yụ ra' jéyac, are'ĉa mi'in jun'jeyacsi mi'in uts muntyi' in. 36Jesha' jiquej shupqui yirity muntyi' Teudas tịj mu'. Yi mu', “yụ nash muju'cha' bu'yity.” Dai' muntyi' jịjcate in vạjpedye' qui' cien rụi'cu' in. Aty me'si' chat qui mu' ujate in, mu'in na jịjcatety in räj pai' jịjcaij in, me'qui'dye jadyic in. 37Chime'dye me'si' yóqui'dyem' san'quejĉoij muntyi' u in, shupqui mu' Judas, Galileaĉantyi' muntyi'. Mu' se' ja'yacsi dai' muntyi' in jịjcate in. Me'jeyacdye mu' chime' ijac jiquej, mu'in na cäc̣hä'chutety in pai' jịjcaij in, me'qui'dye jadyic in. 38Mọ'dyes yụ ra' jéyac mi'in, are'ĉa uts q̂uin'tyity muntyi' in, jam ra' me'tacsi mi'in. Muntyis mọmo' dyijyedye' jụijya' mu'insi' in, jadyic ra' jam ra' yejĉoi'. 39Jen'si' na ra' dyijyedye' jụijya' mu', jam ra' jun' mi'in tupuj ji'penacsebi, are'ĉa Jen'tum chuti mi'in —jéyacsi mu' Gamaliel. Mu'in ayo' in jụjjepte p̂eyacdye' in. 40Ji'sitacseban in Jen'tyi' jutactyi' mu', si'bacsi qui in judyeya' ferdye'tum jéyacsi in paj qui jam cuvij voro'tacsi in Jesússi' p̂eyacdye' mu', chat qui q̂uin'dyem' ji'c̣honacsi in. 41Mu'in na jutactyi' Jen'tyi' mu' jọban mu'in in, farajjeyacsetaqui ayo' in. Ma'jodye'tum jọban in ĉaĉaij na mu' Jen' tsim'tacsi paj qui jị'ĉojtye' in ñịbedyes Jesúsdyes. 42Me' tsan' me' jéyacsi in yejĉoij qui nam' voro'tacsi in jäm'si' p̂eyacdye' Jesússi' mu'. Räjĉan mạyedye' Jen'si'ĉan aca' in judyeya' muntyisĉan aca' in mu'in jéyacsi in: “Jesús Ji'c̣honsin'tyi' tsun”, me' jéyacsi muntyi' in.

will be added

X\