Acts 27

1Aty yíya' in paj qui Italiave jịjcaij tsun. Pablo judyeya' yoctyi' ĉär'tactyi' in so'mac väc̣hä'tyitytyi'ya' ayo' in, Julio tịj mu', paj qui mu' ĉọjcacsi. Väc̣hä'tyitysi' ñurum' mu'sim' Julio tịj mọ': ayo'si' muju'chatysim', me' jị'ti'e' mọ'. 2Mu'ya' bijti tsun marĉantyi'che' covamba, Adramitioyaty mu' covamba, aty sactity ra' Asiavesĉan bä'yedye' in. Chime' pen'dyetun tsun mu' Aristarco, Tesalónicaĉantyi' mu' muntyi', mọ' Macedoniaĉansi' bä'yedye'. Mu'ya' tacti tsun. 3Nojno mạyedye' Sidónya' venjoij tsun, mu'ya' sojquiti tsun. Mu' väc̣hä'tyitytyi' ayo' Julio anic jäm'jajiti mu' Pablotum, yi mu' paj qui sóbaqui pen'dye'ya' mu'. Mu'in nọ́tyete in jedye' jedye' chuc jemoñe' mu'. 4Quivij mi'i tsun, mu' na tyi'mu va'quiquin tsun, chị've jijicayin tsun, mu've qui tyeij tsun Chipreve, mọ' ñutsjityin tsun. 5Jẹjcai' qui mi'i tsun, cajñe' tsun mọ' Cilicia judyeya' Panfilia, chäjäm' Miraya' venjoij tsun, Liciasĉansi' bä'yedye', mu'ya' q̂uin'dyem' sojquiti tsun, p̂ai'joij mu'ya' tsun. 6Mu' väc̣hä'tyitytyi' ayo' yoctyi' mu'ya' dạcte covamba, Alejandríayaty mu', Italiave ra' jịjcaijtyi'. Mu'che' qui ji'bijtyin tsun, tacti qui tsun. 7Jäjäm'tum me'quejĉoij tsun dai' mạyedye', ñịbe'tum mi'i tsun ĉaĉaij na va'quiquin rocjin tyi'mu tsun, ñịbe'tum cha'she' tsun mọ' bä'yedye' Gnido. Jam méqui' chụi' tyeij tsun, me'dyes qui quic̣hen' mọ' jac Salmón, mu've qui tyeij tsun chị've jijicayin tsun cọijti tsun mọ' poc̣ho' Creta. 8Yejĉoij chị've tyeij tsun ñịbe'-quejĉoij tsun, chäjäm' venjoij mu'ya' tsun Jäm'si' Sojquitidye'ya', je' mọ'ya' in, c̣hẹi'ya' yocsi' mọ' bä'yedye' Lasea. 9Men mu'ya' tsun, ji'moñe' tupudye' mi'edyes covambache' tsun, jä'mijdye venchui' tupudye' tyi'mus. Mọ'dyes yi mu' Pablo jéyacsi: 10—Yụ ra' jéyac mi'in q̂uin', yụ cạve' anic tsäqui' mi'eja'ya'. Yejĉoja' jụijya' tsun pechja' ra', moñi ra' covamba judyeya' cạcdye' tsun, tupuj ra' pechja' —jéyacsi Pablo. 11Mu' na väc̣hä'tyitytyi' ayo' yoc mu' dyijyi, jam mu' se'vepte p̂eyacdye' Pablos, mu' mọmo' se'vete mu' a'tumtyi' covamba judyeya' mu' bächätety. 12Mọ' qui sojquitidye' a'c̣hii' mọ'ya', jam jäm'si' paj qui ji'cajnacdyes tsịvu'vudyes tupudyem'. Mọ'dyes arajdye tas covambaĉantyi' in jam mạ'je' tacya' mu'ya' in, yi in: “Dam'dye jäm' jiijja' mọmo', Feniceya' jịjcaja' tupuj jụijya' tsun, mu'ya' ra' ji'jiijja' tupudye' tsịvu'vudyes”, yi in. Fenice chime' Cretaĉansi' bä'yedye', mọ'ya' jäm' covambadyes sojquitidye', mọ'ya' ñucjeĉun'tes tyi'mu, ĉaĉaij na yocvetaque bu'yi jam jijtuijve tyi'mu. 13Mu' na tyi'mu mụ́yidyem' fuju'juij jätisve jäjäm'tum, mọ'dyes qui tichaĉan in mọ' ji'dyäcaquis covambas, chat qui sacti in jeñej ra' tupujtye' cha'she' Fenice ĉúti in, chị've tyeij mu'ya' in mọ' Creta. 14Jambi' jun'si' jịjcaij tsun shupqueti vatyquej tsäqui'tyity tyi'mu, rep tŝútyin tsun, 15chidac tacbajte covamba. Mijam qui jun' chụi' tyeij tsun, farajjete qui covamba tsun, ĉụi' quim' jácati tyi'mu. 16Muvetaque qui tyeij tsun miquis mọ' poc̣ho' Cauda. Mọ' ñutschute tyi'mu dam', mu've ñịbe'tum bijbajte tsun mu' miquity covamba c̣hon'dyety, 17därtyi'che' jịjcaban. Vitsi'cac yụ'bajte tsun minacdye'ya' mu' covamba, tupuj qui dyichjetyete tyi'mu. Dyijyi qui tsun: “Are'ĉa tyi'mu va'quicsin' tsun Sirte, tịj mu' jámansi'”, yi tsun. Chat qui va'queque' in yiris nomajchuquis ojñi' paj qui jam fer mi'i covamba. 18Nojno mạyedye' yejĉoij fer tyi'mu. Mu'in mu'che' carijtaquity in tiyacchui' va'queque' in cạcdye' mu'in. 19Yocsi' mạyedye' ĉụi'si'ya' un mu'in va'cajquiqui in pạrej covambas jedye' mu'in, paj qui che'yeban in. 20Dai' mạyedye' yejĉoij mu' tyi'mu fer fuju'juij, mijam jun' jorojĉan mu' tsun mijam ọ́rota', jeñej ra' jam c̣hoñi ĉúti tsun. 21Me'qui' jam dam'je' jedye' tsun. Chat qui mu' Pablo sacyi jéyacsi: —¿Jun' dash jam mạ'je' se'vibutiĉa' p̂eyacdye' yụs mi'in, yi jéyac yụ jiquej? Ĉụi' yacchuja' Creta tsun, yojdyem' q̂uin' cạveja' u. 22Me' tsan' me' yụ qui nam' jéyac: sóñi'yejam', jam ra' yirity säñi mi'in, uts ra' covamba pechtaĉa'. 23Inoj tsedyedye' mu' Jen', me'chuntyi' yụ, mu' tima'quetety yụ, mu' jutaqui anjer mu', mu' qui ji'caviti yụ́ya'. 24Yi jin yụ: “Jam ra' noi'yi mi Pablo, mi ra' ji'caviti muju'chatyya' ayo' Romaĉantyi'ya'. Chime'dye mu' Jen' ñịbe'jin jụjjibun cọdacdye' mi, mu' ra' räj ji'c̣honacsi uts covambachety in pen'dyetuntyi' in, mídyes ra' mu' ji'c̣honacsi cọdacdyedyes mi”, me' jin yụ mu' anjer. 25Mọ'dyes sóñi'yejam' mi'in, yụ na chị́yete Jen' mu' ra' jị'cätse' mọ' p̂eyacdye' yoj jindyem' yụ u mu' anjer. 26Tsun ra' va'cac poc̣hosche' jac —jéyacsi Pablo mu'chety in. 27Yiri'tac vạjpedye' jiyi' mạyedye' me'qui' jẹjcai' mu' tyi'mu, ĉụi' mu've can tsun marve Adriático. Tsedyedye' menya' mu'in mu'chety carijtaquity in chị́qui in aty c̣hẹi'yaij jac in. 28Tị́dye'ya' tuputui' in ojñi', chibin qui'tac jäbän jiyi' metro, me'qui'ĉan maj. Aty muju'va' in quivijje' tuputui' in, aty chị'yai' mọ'ya', pärä' qui'tac yävätidye' jiyi'dyety metro. 29Noi'yi in, “Are'ĉa mijche' sät tŝọ́ja'”, yi in, mọ'dyes qui pechve va'queque' in vạjpedye' minacdye'tumsi' ji'dyäcaquis. Mu'ya' qui cọdyete Jen' in paj qui nạijjoijve in. 30Mu'in na mu'che' carijtaquity in dyijyi in mạ'je' tsan' ĉa'joij in. Pajbajte in mu' miquity covamba. Väñädye'ya' yi in: “Tsun ra' ọ́che' cại' yocsi' ji'dyäcaquis in paj qui dyäcjete jụijche' tsun”, yi in. 31Mu' na Pablo chị́yacsebi dyijyedye' jam rụijsis mu'in, chat qui mu' jéyacsi väc̣hä'tyity in ayo'tum mu'in: —Jam tacche' jụijya' in uts carijtaquity in, jam ra' jun' c̣hoñi mi'in —jéyacsi. 32Mọ'dyes mu'in väc̣hä'tyity in tätsätsäje' minacdye' in mọ' tapchutes miquity covamba, chat qui mu' cashti covamba. 33Aty nạijjoqui've' chat Pablo jéyacsi paj qui säcsi in jedyetyi in. Yi mu': —Aty yiri'tac vạjpedye' jiyi' mạyedye' me'qui' dyijtuva'ti mi'in, jam dam'jetiñe' jedye'. 34̣Q̂uin' yụ jéyac mi'in: säcsevac q̂uin', paj qui tupuj jiĉun mi'in, chat qui ra' c̣hoñi mi'in. Yụ jéyac jam ra' méqui' jedyeij mi'in —jéyacsi mu' Pablo covamba-chety in. 35Aty me' jéyacsi mu' Pablo, chat jäcte pan, yoshoropaij jéte Jen' mu'insi'ya' vej in, q̂uemi'vete chum chat qui jebete. 36Räjen' mu'in covambachety in aty ma'joban in chat qui säcseban in. 37Mu'che' covambachety tsun me'tum tsun pärä' qui' cien yävätidye' qui'tac jäbän jiyi' rụi'cu' tsun. 38Aty me'si' säcsi tsun chat qui quivijje' va'queque' in covambaĉansi' jedye' in mọ' cạcdye' tsun trivo paj qui dam' che'yeban covamba tsun. 39Aty nạijjoi'ya' mu'in mu'che' carijtaquity in nạijtye' tsan' mọ' jac in, jam qui nam' chị́ye' in. Cạve' yiris noc̣hojc̣hos jámantumsi' in, dyijyi in mạ'je' mu've chụi' bu'yi in, vatyquej ra' tupuj chị've venjoij in. 40Tä'tsetyete in minacdye' ji'dyäcaquis covambas mu'in, taĉan ojñi'ĉan. Mọ'ya'dye dajjetyete in mọ' jị'chui'taquis coracdye' covambas, judyeya' tectyeyebajte in quivij mu' tyä'väty quị'si' jụijche' bu'yity mu' ji'mi'aquity covamba. Chat qui tiyacchuti tänen'ti mu' covamba chụi' bu'yi tsan' jámanve jịjcaij. 41Uya'ya'dye qui nam' sä'tejoij covamba, judye'dye venjoij chị've. Sät tŝọij mu'che' jụijche', jäm' pei' tŝọij jụijche', pech na mu' majĉan bu'yim', vacam'quedye'-ya'dyety fer meijya'yi pechve, me'ĉandye vocyi covamba. 42Mu'in na väc̣hä'tyity in dyijyi in mạ'je' räjtum ijacsi ĉär'tactyi' in, vatyquej ra' nai'qui ĉa'joij in. 43Mu' na väc̣hä'tyitytyi' ayo' mu'in mijam mu' me' mạ'je', dyijtute mu' Pablo paj qui jam mu'mun ijac. Mu' na ayo' jéyacsi: “Tyi chuc chịj nai'quity in, paj mu'in chum tashi p̂ai'joij ojñi'ĉan in, nopej jịjcaij in. 44Mu'in na jam chịj nai'quity in, paj sonche' nai'qui in, paj ra' tsan' q̂uem'sische' covambas in, jo'mesche' ra' nai'qui mi'in”, yi ayo' jéyacsi. Me'dye venjoij räjtumdye nopej c̣hoñi tsun.

will be added

X\