Acts 23

1Mu' Pablo anic vejtucsi cạvacsi mu'in ayo' in, chat jéyacsi: —Chätidye', tạ'catydye nash yụ rụij ĉojtyi'ĉan cại'tyi' yụ ọij dyijyedye', rụij bä'yi yụ Jen'si'ya' vej mu' —yi mu' Pablo jéyacsi. 2Ananías, tashchety cudyitity Jen'che' mu' jéyacsi pạrej mu'ĉantyi' in paj qui mu'in in ĉatbite chụ' in mu' Pablosi'. 3Aty ĉatbiteya' in, yi qui mu' jéte Ananías: —Jen'dye ra' ĉatjin mi, anic ac̣hi'yity mi, jäm' yu'ti tsan' mi. Mi nash yụ'tac paj qui yụ'tacdye'ya' jị'cäts yu'bun' yụ mi, me' tsan' me', mídye qui nam' ji'ĉattim, me' va'queque' mi mọ' yụ'tacdye' —yi Pablo jéte. 4Mu'ĉantyi' jéte in mu' Pablo: —Mi nash fạra'ñete uts tashchety cudyitity Jen'che' —jéte in. 5Voryi mu' Pablo: —Chätidye', chátaty otej jam tyu' ca' ĉaĉaij chị́yete yụ mu' buty jiquej uts tashchety cudyitity Jen'che', ĉaĉaij me' yi' sánacdye': “Jam ra' ñiñetinte ayo' mi'in”, yi' —yi jéyacsi mu' Pablo. 6Pablo aty cạvacsi ayo' in jam yedyety mu'in in, chet mu'in saduceo in judyeya' chet fariseo in. Mọ'dyes qui yi mu' Pablo fer p̂eyaqui: —Chätidye', yụ nash fariseo, vóshi' yụ yedyej fariseo in. ̣Q̂uin' mọ' ji'me'tacdye' yụ ĉaĉaij na anicyi yụ vañinyeban ra' säñity in, yojdyem' tsun fariseo anicyeja'ya' tsun, mọ' ji'me'tyiyin yụ in —yi Pablo jéyacsi. 7Jéyacsi mu' Pablo chat qui mu'in ayo' in ji'fajquiyiti in p̂eyacdye' mu'in, jam méqui' cäts dyijyedye' mu'in mu'ĉantyi' in, 8ĉaĉaij na mu'in saduceo yi in jam vañinyeban säñity in, itŝij anjer ĉọcsi chime' in, judyeya' itŝi' ạ'edye' muntyis ĉọcsebi in, me' bu'yi' ji'chäyitidye' mu'in saduceos in, fariseo na in jam me' in anicyi mu'in in. 9Mọ'ya' chutidyeij mu'in ayo' in dadam' muju'cha' äjnaqui in. Sacyi pạrej fariseo in mu'in jị'chiyacsity yụ'tacdye' in, yi jéyacsi in: —Itŝi' u méquis juchaj dạcbite tsun, vatyquej ra' jap̂iyiti yirity anjer, vatyquej yiris ạ'edye' jaso'miti —yi in. 10Dadam' fer äjnaqui in chuti p̂eyacdye'ya' mu'in fariseo in judyeya' saduceo in. Mu' na väc̣hä'tyitytyi' ayo' mu'in dyijyi are'ĉa tar'jete in uts Pablo, mọ'dyes qui mu' jutacsi väc̣hä'tyity in paj qui mu'in ji'c̣honte Pablo in, jitishajte in ji'chäyitidye'ĉan väc̣hä'tyitysi' in. 11Mọ'dye tsedyedye' mu' Ayo' ji'caviti Pabloya', jajiti: —Sóñi'yeva Pablo, a nash jị'chiqueyacsi mi p̂eyacdye' yụ úĉantyi' Jerusalénĉantyi' in, me' ra' chime' jéyacsi mi Romaĉantyi' in yụ́si' p̂eyacdye' —jajiti Jen'. 12Nojno mạyedye' mu'in pạrej judío in vaj cäts dyijyi in mạ'je' ijate in mu' Pablo. Ĉụi' yụ'tye' in tsäqui'yis p̂eyacdye' mu'in, jítidyeij in: “Mijam ra' säcseja' chijam ra' tyéja' ojñi' jun' qui' chuc mu' ijaja Pablo, chat q̂uin'dyem' ra' pacaj tsun”, yi in. 13Jiyidye mu'in in vạjpedye' qui'tac rụi'cu' in mu'in me' yity in. 14Mọ'dyes ĉọcsequi mu'in tashche' cudyitity Jen'che' in judyeya' mu'in tashche' bu'yity judío in, jéyacsi in: —A nash yụ'tye' yiris p̂eyacdye' tsun tsäqui'yis, yi' mijam ra' dam'je' jedye' tsun jun' qui chuc ijate tsun mu' Pablo. 15Mọ'dyes q̂uin' mi'in judyeya' yoctyi' ayo'bu'yitytum in, cọdyemac mu' väc̣hä'tyitytyi' ayo' mu'in paj qui mu' yụ'te mi'insi'ya' vej mu' Pablo. Jémac ayo' mi'in: “Nojno mạyedye' tsun mạ'je' jäjäm'tum cọdyetyete p̂eyacdye' mu' Pablo”, jémac. A na ra' tuteya' in tsun ra' bisĉun'te majmiya', ijaĉun'te ra' tsun, judye'dye ra' mi'inya' shupqueti —jéyacsi in. 16Mu' na tyúñe' Pabloty, ạva' voji'tyim', mu' se'vacsebi p̂eyacdye' mu'in. Mọ'dyes qui mu' mu'ĉan jịjcaij ji'chäyitidye'ĉan väc̣hä'tyitysi' in, jéyajquiqui tyúñe' mu'. 17Aty se'vepte p̂eyacdye' mu', chat qui mu' Pablo fayete yirity ĉọjcacsity väc̣hä'tyity, jéte: —Cạme uts nanaty ayo'ya', paj mu' jéte yiris jedye'. 18Me'dye mu' ĉọjcacsity väc̣hä'tyity in jácati ayo'ya', jéte: —Uts ĉär'tactyi' Pablo cudyin yụ, yụ uts tuyeye nanaty, mu' ca mạ'je' jin mi yiris p̂eyacdye' —jéte. 19Ayo' tapjajibuti un mu' nanatysi', dam' muju'veya' cạte, jéte: —¿Jedye' ca' mạ'je' jítim? 20Vorjete mu' nanaty: —Mu'in judíoty ayo' mu'in vaj cäts dyijyi in mi ca ra' cudyin in, paj qui nojno mạyedye' yụ'te mi mu' Pablo mu'insiya' vej in ayosya' mu'in. Mu'in ca ra' jin in: “Tsun ra' jäjäm'tum cọdyetyete p̂eyacdye' mu'”, jin ca ra' in. 21Jam ra' jụjtacsi mi, yocve nash dyijyi mu'in in. Mu'ya' nash vạjpedye' qui'tac muntyi' in, me' yu'tity in mu'in ra' bisĉun'te in mu' Pablo ijaĉun'te ca ra' in, ĉaĉaij nash aty me' yụ'tye' p̂eyacdye' in tsäqui'yis mu'in, mijam ca ra' dam'je' jedye' in jun' qui' chuc ca ra' ijate in mu' Pablo. Mọ'dyety bise' in paj qui jụjtacsebi mi cọdacdye' mu'in —yi Pabloty tyúñem' jéte mu' ayo'. 22Chat qui mu' ayo' yi jéte mu' nanaty: —Jọban ra' mi, jam ra' méqui' jị'chiqueyacsim yoctyi' muntyi' in ĉaĉaij na mi aty jítim —yi mu' ayo' jéte mu' nanaty. 23Väc̣hä'tyitytyi' ayo' mu'in fayacsi pärä' ĉọjcacsity väc̣hä'tyity in, jéyacsi: —Jäm' yụ'tacsejam' väc̣hä'tyity in paj qui mi'i in, arajtacya' ra' tsedyedye' sacjetiñe' mi'in, Cesareaĉan ra' jịjcaij mi'in. Pärä' qui' cien ra' yujyaty väc̣hä'tyity cạcsi mi'in, judyeya' ra' yävätidye' qui'tac cavayochety väc̣hä'tyity in, mu'in na ra' coc̣hinotumtyi' in, pärä' qui' cien ra' mu'in rụi'cu' in. 24Chime'dye jäm' yụ'tyevac cavayo in Pablodyesi'. Jäm' ĉọjcamac mu' Pablo, paj jam jun' jedyeij, so'metinte ra' fertyi' ayo' Félix —jéyacsi väc̣hä'tyity ayo'. 25Chime'dye so'macsi sánacdye' Félixdyesi', yi': 26“Yụ nash Claudio Lisias, yụ sáñe' ọij mídyes, mi nash muju'chaty ayo' tsun, yụ vorjeye. 27Chime'dye jéye munjaya'ĉan mu'in judío in tapjete in mu' Pablo, mạ'je' tsan' ijate in. Chị́qui yụ mu' anictyity Romaĉantyi', mọ'dyes qui yụ väc̣hä'tyityya' ji'c̣honte yụ. 28Mạ'je' yụ chịj jedye' buty ji'me'tyeyete in mu'in judío in, mọ'dyes yụ cạte mu'insi'ya' vej mu'in, judíotyya' ayo' in. 29Mọ' ji'me'tacdye' mu' yocve ca cại' ĉụi'si' yụ'tacdye' mu'in, itŝi' méquis juchaj mu' ji'ijacdyes mu', mijam ĉär'tacdyedyes chime' mu'. 30Ọij mạyedye' chịj yụ mu'in judío in dyijyi in mạ'je' ijate in, mọ'dyes cavintum jutete yụ paj qui míya' jịjcaij mu'. Chime'dye yụ jéyacsi judío in paj qui misya' vej ji'me'te in mu' Pablo, mọ'ya' juchaj jụijyam'. Aty me'qui'dye yi yụ”, yi' sánacdye' Félixdyes sáñe'si' väc̣hä'tyitytyi' ayo'. 31Sacti qui mu'in väc̣hä'tyity in, yoj jeyacsidyem' ayo' u, cạte in mu' Pablo tsedyedye' Antípatrisĉan. 32Nojno mạyedye' mu'in yujyaty väc̣hä'tyity in ca'ñibun in, Jerusalénĉan jijtuban in, acatuban in ji'chäyitidye'ĉan väc̣hä'tyitysi' mu'in. Mu'in na yoctyi' cavayochety väc̣hä'tyity in jiyi mu'in in, 33Cesareaĉan jiquicte in mu' Pablo. Venjoij mu'ĉan in, chat qui mu' Pablo jutete in ayo'ya' Félixya', chime'dye mọ' sánacdye' so'mete in. 34Mu' qui p̂eye' mọ' sánacdye' chat qui jéte mu' Pablo: —¿Jụ'ñisĉantyi' adac bä'yedye' mi? —jéte . Pablo vorjete: —Cilicia-ĉantyi' nash yụ. 35Yi qui mu' ayo' jéte: —Aty ra' atsijya' mu'in in ji'me'tyintyi' in, chat ra' q̂uin'dyem' se'vebiye ñutsjitidyem —yi ayo' jajiti. Chat qui mu' jutacsi väc̣hä'tyity in paj ji'siste in ayosĉan aca' mu', Herodes jäm'tyes jiquej, mu'ĉan tacjete in ĉọjcate qui in.

will be added

X\