Acts 22

1ÿYi jéyacsi: —Chätidye' räj mi'in, se'vibutiĉam' p̂eyacdye' yụ, yụ ra' ñutsjiti mi'insi'ya' vej. 2Me'dye se'vete in ĉụi'si'ĉan p̂eyaqui p̂eyacdye' hebreosĉan, dadam' c̣hu'c̣hen'yejoij in. Mu' na yejĉoij jéyacsi: 3—Yụ nash judío, Tarsoĉan na'ityi' yụ Ciliciaĉansi' bä'yedye', úĉan qui nam' Jerusalénĉan p̂añi yụ. Mu'dye Gamaliel ji'chäyin yụ. Anic jäm' ji'chäyin yụ in jun' chuc ra' chique' yụ yụ'tacdye' so'macsis vóshi'vun tsun jiquej. Anic jäm' dyijtute Jen' yụ yódyem' q̂uin' mi'in u dyijtutinte Jen'. 4Anic fer fạ́cacsi jiquej yụ mu'in cäc̣hä'chuptety in Jesússi' majmi mu', mạ'je' tas ijacsi yụ. Yụ tapjeyacsi, ĉär'tacsi yụ, son' in judyeya' p̂en chime' in. 5Mu'in chime' in, mu' tashchety cudyitity Jen'che' räjtumdye mu'in tashche' bu'yity muntyi' in, anic chäyibun yụ in ọij rụijsis p̂eyacdye' yụ. Mu'in so'min yụ in ferdye'tumsi' paper chätidyedyes tsun Damascoĉandyes, mọ'che' yi' mu'in ca ra' so'min yụ in tyi chuc anicjetety Jesús in. Mọ'dyes qui mu've jịjcaij yụ dyijyi yụ mạ'je' c̣hococo' tucsi yụ úĉan Jerusalénĉan in paj qui úĉan va'tacdye' so'mac in —jéyacsi mu' Pablo—. 6Me'dye roi'je' tsun. C̣hẹi'ya'yequi Damasco tyiti tsun, quichĉan tsun, me'ĉandye mạyedye'ches mạijjin yụ, anic fer tŝútyin yụ. 7Mạijyedye'ĉan mụijya' tŝọij yụ, se've' vatyquej yụ yiris p̂eyacdye', yi': “Saulo, Saulo, ¿jun' dash me'tim?” jin yụ. 8Yụ qui yi vorjete: “¿Tyi ĉaĉaij mi u?” Vorjin yụ: “Yụ u Jesús Nazaretĉantyi' yojdyetydyem' me'tety um.” 9Mu'in na pen'dye' yụ in cạve' tsan' in mọ' mạijquedye', tyum' tyeij ĉojtyi' mu'in, jam qui nam' mu'in se've' in mọ' p̂eyacdye' mọ' jinsi' yụ. 10Yụ qui jéte: “¿Jätäjyi ca' mi yụ́dyes?” Vorjin yụ Ayo' tsun: “Sacyebada tạij Damascoĉan jịjcava, mu'ĉan ra' jin in jun' chuc dyijyedye' yụ judyeya' jun' chuc ra' chime' mi”, yi jin yụ. 11Yụ na aty jam jun' naijti, mọ' mạijquedye' mọ'dye mọmo' ji'tofeyin yụ. Mọ'dyes qui mu'in pen'dye' yụ in un chubun yụ in, mu'indye Damascoĉan can yụ in. 12Mu'ĉan yirity muntyi', Ananías tịj mu', anic dyijyity Jen'che' mu' chiquebitety yụ'tacdye'. Räj Damascoĉantyi' judío in anic jäm'yi ĉọ́te in. 13Mu'dye ĉútin yụ, jin yụ: “Mi vojity Saulo, naijbuda”, jin yụ. P̂eyacdye'ĉandye naijbun yụ, nạijbajte yụ. 14Yi qui jin yụ: “Jen' vóshi'vuntyi' tsun mu' aty tsim'tyin mi, mu' ra' jin mi jun' chuc dyijyedye' mu', chime'dye jun' chuc ra' mi, mi ca ra' cạvepte mu' rụijtyity Ạva' mu', judyeya' ra' chime' se'vepte mi chụ'ĉansi' p̂eyacdyem'. 15Mi ca ra' voro'tacsity p̂eyacdye' mu', jéyacsi ra' mi räj úchety muntyi' in cạve'si' mi judyeya' se'ves mi. 16̣Q̂uin' chat yiristum mọmo' ji'chojta, Ayo'si'che' ra' tịj mu' cọdaquim Jen'che' chat qui ra' c̣hicon'jibun juchaj mi”, yi jin yụ mu' Ananías —jéyacsi mu' Pablo—. 17Aty me'si' ca'ñibun yụ Jerusalénĉan jijtuban yụ. Cọdaqui Jen'che' yụ Jen'si'ĉan aca' mu', chat jị'cavacdye'ĉan ji'caviti yụ́ya' mu' Ayo'. 18Yụ qui nam' nạijte, mu' jin yụ: “Cavin shubada mi úĉantyi' Jerusalénĉantyi', úĉantyi' muntyi' in jam ra' chäquibun p̂eyacdye' in”, yi jin yụ. 19Yụ qui vorjete: “Ayo' yụ, jun'dyem' jam se'vin yụ in ĉaĉaij na jäm' chäyin yụ in jun' chuc yụ jiquej jị'ñibe'cabiye mu'in anicjintyi' in. Chime'dye sitacsi yụ vajmu'yaijĉan in, jäcacsi yụ judyeya' si'bacsi yụ judyeya' ĉär'tacsi yụ. 20Aty ijabun in úñity mi Esteban, mu'ya' yụ chime', jäm' ĉọcsebi yụ dyijyedye' ujatetysi' in, ĉọjcacsebi chum yụ quị'si' mu'in, mu'in ijactyi' in, me' yi yụ jiquej”, jéte yụ mu' Ayo'. 21Mu' na vorjin yụ: “Tạij sacta, yụ ra' juteye paj qui voro'tacsequi mi mu'in jam judío in moch bä'yity in”, yi mu' jin yụ Ayo' —me' jéyacsi mu' Pablo. 22Muntyi' in jäm' se'vete in mu' Pablo jun' chuc p̂eye' voro'tacdye' mu' jam judíodyes in, chat qui tiyacchui' äjnaqui in fer p̂eyaqui yi in: —Ijamac uts muntyi', paj me'qui'dye tsạ' bu'yi —yi in. 23Dadam' yejĉoij äjnaqui in, chischisjeyaqui quị'si' mu'in, judyeya' che've va'queque' p̂uijdas in jị'fajcacdyes mu'in. 24Mu' na ayo' väc̣hä'tyitytyi' in jéyacsi paj qui ji'siste in ji'chäyitidye'ĉan väc̣hä'tyitysi' in. Aty mu'ĉan in jutacsi paj qui si'bete in mu' Pablo, paj qui p̂eye've juchaj mu', jun' buty mu'in judío in me' fạ́quete in. 25Aty tsan' c̣họ'coij mu', aty ra' tsan' si'bete in, chat qui mu' Pablo cọdyete p̂eyacdye' mu' ĉọjcacsity väc̣hä'tyity in, jéte: —¿Tupuj buty si'betinte mi'in yirity anictyity Romaĉantyi' jambi'dyem' dạcbitinteya' juchaj mu'? ¿Jätäjyi' ca' yụ'tacdye' Romaĉantyis? —jéte mu' Pablo. 26Mu' ĉọjcacsity aty se'vaqui Romaĉantyi' mu' Pablo, cavin ĉọcte mu' väc̣hä'tyitytyi' ayo' in, jéte: —¿Chịj mi u jedye' chuc jun'taqui mi? Mu' muntyi' anictyity Romaĉantyi' —jéte. 27Mu' qui ayo' ĉọcte mu' Pablo jéte: —¿Mi adac anictyity Romaĉantyi'? Vorjete Pablo mu' Ayo': —Anic nash me' yụ. 28Yi mu' ayo' jéte: —Yụ nash chime'dye romano, anic där ya'i' jäque' mọ' paper Romaĉantyi' jishupquinsi' yụ. Yi Pablo vorjete: —Yụ nash me' na'i romano. 29Mu'in na si'betety ra' tsan' Pablo in cavintum meijyi mu'ya' in. Mu'dye ayo' väc̣hä'tyitytyi', meijyi chime' mu'ya', aty me' chịjya' Romaĉantyi' na mu' jiquej, mọ'dyes mu' noi'yi ĉaĉaij na aty ji'sapte tsan' mu' Pablo cadenaya', ĉaĉaij na jam me' yi' Romaĉantyis yụ'tacdye' mu'in. 30Mu' väc̣hä'tyitytyi' ayo' mu'in mạ'je' räj chịj jedye' buty ji'me'tyeyete in mu'in judío in, mọ'dyes qui nojno mạyedye' jutacsi mu' paj qui mu'in räj vajmu'yaij in mu'in tashche' cudyitity Jen'che' in, räjtumdye ayo' judíoty mu'in. Chat qui mu' jutacsi paj qui mu'in dajbajte in mu' Pablo, judyeya' yụ'te in ayo'si'ya' vej mu'in.

will be added

X\